1. Oshinima sha fimana shilipi Jesus a li a kundafana novahongwa vaye moufiku waye wa xuuninwa?

ESHI Jesus a li pamwe novahongwa vaye moufiku waye wa xuuninwa, okwa li a tumbula ohole oikando hanga 30. Okwa li a popya kondadalunde kutya ovahongwa vaye ove na okukala ve “holafane.” (Joh. 15:12, 17) Ohole yavo yokuholafana otai ke va didilikifa mo ve li ovashikuli vaye vashili. (Joh. 13:34, 35) Ohole oyo kai fi oshinima shanafangwa. Jesus okwa li ta ulike koukwatya wokuheliholamwene. Okwa ti: “Kape na ou e nohole i dule yaau ta yandjele ookaume kaye omwenyo waye. Onye ookaume kange, ngeenge tamu ningi eshi handi shi mu lombwele.” — Joh. 15:13, 14.

2. (a) Oshike hatu hange mokati kovapiya vaKalunga? (b) Omapulo elipi hatu ka nyamukula moshitukulwa eshi?

² Kunena ovapiya vaJehova ohava didilikwa mo ve li oshiwana shaye omolwohole yashili yokuheliholamwene nosho yo oukumwe wavo oo ihau tengauka. (1 Joh. 3:10, 11) Inatu pandula tuu eshi ovapiya vaJehova ve na ohole ya fa yaKristus mokati kavo nonande oukwashiwana, omuhoko, elaka, ile eputuko lavo ola yoolokafana! Otashi dulika tu lipule kutya: ‘Omolwashike ohole ya fimana  unene kunena? Jehova naJesus ohave tu tungu ngahelipi pahole? Ongahelipi hatu dulu okuulika pauhandimwe ohole ya fa yaKristus oyo tai “tungu”?’ — 1 Kor. 8:1.

3. “Omafimbo madjuu” ohaa kumu ngahelipi ovanhu?

³ Molwaashi onghalamwenyo oi na ashike “oudjuu auke netutuko,” vahapu ‘momafimbo aa madjuu’ ohava mono oixuna pamaliudo koinima ya yoolokafana. (Eps. 90:10; 2 Tim. 3:1-5) Ovanhu vahapu ohava kala va hala okusholola. Okwa tengenekwa kutya ovanhu va konda 800 000 ohave likufa omwenyo omudo keshe, nomeesekonde 40 ohamu fi omunhu umwe. Shinyikifa oluhodi, Ovakriste vamwe ove liyandja komafininiko a tya ngaho ndele tave likufa omwenyo.

4. Ovanhu velipi va tumbulwa mOmbiibeli va li va hala okufya?

⁴ Pefimbo lOmbiibeli, vamwe vomovapiya vaKalunga ovadiinini ova li va wililwa po keenghalo davo nova li ve lihalela okufya. Pashihopaenenwa, eshi Job a li mouyahame okwa li a popya a ti: “Nda kuta! Inandi hala okukala nomwenyo fiyo alushe.” (Job 7:16; 14:13) Jona okwa li a uda nai konghedi omo oinima ya li ya enda eshi a li ta wanifa po oshinakuwanifwa shaye nokwa li a popya a ti: “Akutu Omwene, paife, kufe nge omwenyo wange, osheshi okufya kwange ku dule okukala ndi nomwenyo.” (Jona 4:3) Natango, pomhito imwe omuprofeti omudiinini Elia okwa li a kumwa konghalo yaye nokwa li a pula a fye. Okwa ti: “Sha wana. Omwene, kufa omwenyo wange.” (1 Eeh. 19:4) Ashike Jehova okwa li a lenga ovapiya ovo ovadiinini nokwa li a hala va kale nomwenyo. Ponhele yokutokola nghee va li ve udite, okwa li e va kwafela va finde ehalo lavo lokukala va hala okufya noku va tunga pahole opo va dule okutwikila oku mu longela noudiinini.

5. Omolwashike ovamwatate novamwameme va pumbwa unene ohole yetu paife?

⁵ Nonande ovamwatate novamwameme ihava kala va hala okusholola, vahapu kunena ohava ungaunga neenghalo di nyemateka nova pumbwa okutungwa pahole. Vamwe ohave lididimikile omahepeko nosho yo omasheko. Vamwe ohava kembaulwa ile hava ambwa koilonga. Ile va loloka molwaashi ohava longo olutaima ile ve na okukala tava longo oilonga oyo tai pula okulongwa meendelelo efimbo alishe. Natango vamwe ohava ungaunga nomaupyakadi momaukwaneumbo, tashi dulika hava kembaulwa kookaume kavo kopahombo ovo vehe fi ovaitaveli. Vahapu meongalo ohava kala va loloka palutu nopamadiladilo omolwoinima oyo nosho yo vali omafininiko amwe. Olyelye mbela ta dulu okukwafela ovo va teka omukumo va twikile?

6. Jehova oha tungu ngahelipi ovapiya vaye pahole?

⁶ Jehova oha tungu ovapiya vaye moku va ulikila ohole alushe. Ovaisrael ova li va tuwa omukumo eshi va uda Eendjovo daJehova odo tadi ti: “Ove u nondilo momesho ange, nomufimanekwa, shaashi ondi ku hole. . . . Ino tila, osheshi Ame ondi li pwoove.” (Jes. 43:4, 5) U li umwe womovapiya vaJehova, oto dulu okukala noushili kutya Jehova oku ku hole neenghono. * Eendjovo daKalunga oda popya shi na sha naavo tava kongo elongelokalunga lashili da ti: “Ye Omuladi ha xupifa. Ye ote ku hafele nehafo.” — Sef. 3:16, 17.

7. Omonghedi ilipi ohole yaJehova ya fa yaina omunyamifi? (Tala efano pehovelo loshitukulwa.)

⁷ Kashi na nee mbudi kutya ovapiya vaJehova ova taalela omayeleko a tya ngahelipi, okwa  udaneka kutya ote ke va kwafela note ke va hekeleka. Okwa ti: “Ndele nye otamu ka nyama, tamu ka kumininwa mombuda, ndele tamu ka ukatwa komatundji. Ngaashi ina ta hekeleke omona.” (Jes. 66:12, 13) Kashi fi tuu oshinima shiwa ina omunahole a kuminina okaana kaye kombuda, ile e ka ukata komatundji! Kungaho, Jehova oha ulikile ovalongeli vaye vashili ohole inene nosho yo olukeno. Kape na omalimbililo kutya ou na ondilo nowa fimana kuJehova. — Jer. 31:3.

8, 9. Ohole yaJesus otai dulu ngahelipi oku tu kwafela?

⁸ Ovakriste vashili otava dulu okunanenwa kuKalunga omolwetomheno eli kutya: Eshi “Kalunga a kala e hole ounyuni, Oye a yandja Omona waye Ewifa, opo keshe ou te mu itavele aha kane, ndelenee a kale e nomwenyo waalushe.” (Joh. 3:16) Jesus naye okwe tu ulikila ohole eshi e tu yandjela omwenyo waye. Ohole ya tya ngaho kai li tuu etwomukumo kufye! Eendjovo daKalunga oda udaneka kutya kape na nande ‘oudjuu ile efininiko’ tali dulu oku “tu tukula mohole yaKalunga yomuKristus.” — Rom. 8:35, 38, 39.

⁹ Ngeenge hatu ungaunga nomaudjuu opalutu, opamaliudo, ile ngeenge oupamhepo wetu tau nghundipala, ohole yaKristus inene otai dulu oku tu pa eenghono tu lididimike. (Lesha 2 Ovakorinto 5:14, 15.) Ohole yaJesus oi na eenghono doku tu kwafela noku tu twa omukumo tuha sholole nonande otwa taalela omaupyakadi ngaashi oiponga yopaushitwe, omahepeko, okuudifwa nai ile tu na oisho.

10, 11. Oolyelye ve na oshinakuwanifwa shokutunga ovamwatate ovo va teka omukumo? Shi yelifa.

¹⁰ Onghedi imwe omo Jehova he tu tungu pahole, okupitila meongalo lopaKriste. Ohatu dulu okuulika ohole yaye mokuhola nokutunga ovamwatate novamwameme pamaliudo ndele hapamhepo ashike. (1 Joh. 4:19-21) Omuyapostoli Paulus okwa ladipika Ovakriste a ti: “Hekelekafaneni nye mu tungafane keshe umwe nomukwao, ngaashi hamu shi ningi nokuli shito.” (1 Tes. 5:11) Havakulunhuongalo ashike, ndele aveshe meongalo otava dulu okuhopaenena Jehova naJesus mokuhekeleka nokutunga ovamwatate novamwameme. — Lesha Ovaroma 15:1, 2.

 ¹¹ Vamwe meongalo otava yahama pamaliudo notashi dulika va pumbwa ekwafo lovaxungimwenyo nosho yo lopaunamiti. (Luk. 5:31) Ovakulunhuongalo nosho yo vamwe meongalo ove shii kutya inava deulilwa ouxungimwenyo. Ashike aveshe meongalo otava dana onghandangala ya fimana ‘yokupopya nehekeleko neemwenyo da polimana, okuyambidida ovanghundi noku va tala onheni.’ (1 Tes. 5:14, NW.) Ovakriste aveshe ova pumbwa okuulika oukwao wananghali nelididimiko, nokupopya nehekeleko opo va tunge ovo va teka omukumo. Mbela ou li odjo yehekeleko nosho yo yetwomukumo? Okukala u shii nghee u na okuyandja ekwafo otaku dulu okuningifa eenghendabala doye di kale tadi ti sha.

12. Yandja oshihopaenenwa shaumwe oo a li a tungwa eshi a li a ulikilwa ohole meongalo.

¹² Ongahelipi ohole yetu tai dulu okutunga ovo tava yahama pamaliudo? Omumwameme Omukriste umwe wokuEuropa okwa ti: “Omafimbo amwe ohandi kala ndi na omadiladilo okulikufa omwenyo. Ashike ondi na ovo hava yambidida nge. Ovo ve li meongalo letu ova xupifa omwenyo wange. Ovamwatate novamwameme ohava tu nge unene omukumo nohava ulikile nge ohole. Nonande ovanini ashike ve shii kutya onda polimana, eongalo ohali yambidida nge alushe. Ovalihomboli vamwe ova fa ashike ovadali vange vopamhepo. Ohava file nge oshisho nohava yambidida nge alushe efimbo keshe.” Ovanhu aveshe ihava kwafele monghedi ya faafana. Ashike okuyambidida nehalo liwa otaku dulu okweetifa po eyooloko la kula kwaavo tava yahama pamaliudo. *

13. Oshike twa pumbwa okuninga ngeenge otwa hala okutunga vamwe?

¹³ Kala omupwilikini muwa. (Jak. 1:19) Okupwilikina u udite oukwao wananghali oku li onghedi yokuulika ohole. Otashi dulika u pule omapulo noukeka nelalakano lokuuda ko onghalo yaao ta mono oixuna. Opo nee oto ka dula okuudila Omukriste mukweni oukwao wananghali noku mu tunga. Omalinyengo oye okoshipala na ulike kutya ou na ko nasha naye shili. Ngeenge Omukriste umwe okuudite kutya okwa pumbwa oku ku yelifila oinima moule, kala omulididimiki nosho yo henuka uhe mu kwate melaka. Ngeenge owa pwilikine nelididimiko, otashi dulika u ka ude ko ashishe osho sha kwatelwa mo. Osho otashi dulu okukwafela omumwatate ile omumwameme oo ta mono oixuna a kale e ku lineekela notashi ke mu linyengifa a pwilikine kwaasho to popi eshi to kendabala oku mu tunga. Okunakonasha kwoye otaku dulu oku mu hekeleka eshi to ulike kutya ou na ko nasha shili.

14. Omolwashike twa hala okuhenuka okukembaula vamwe?

¹⁴ Henuka okukala ho kembaula vamwe. Okukembaula ovo va polimana otaku dulu okuweda ko kouyahame wavo notaku dulu oku tu imba tuha ninge eenghendabala tu va tunge pahole. “Omunhu ta tu neendjovo ngaashi eongamukonda, ndelenee elaka lovanaendunge tali velula.” (Omayel. 12:18) Ihatu ningile owina ‘okutwa’ ovo va polimana neendjovo di yahameka. Nonande umwe okwa ‘tuwa’ shihe fi oshiningilewina, osho otashi dulu oku mu yahameka. Okutunga vamwe pahole moku va twa omukumo otashi pula oku va udila oukwao wananghali,  nokukala twa fa ngeno tu li monghalo yavo. — Mat. 7:12.

15. Oshike hatu dulu okulongifa opo tu tunge vamwe pahole?

¹⁵ Kala ho hekeleke vamwe nEendjovo daKalunga. (Lesha Ovaroma 15:4, 5.) Omishangwa Diyapuki odi li omamona oo e na ondilo ihe fi okuyelekwa nasha mokuhekeleka vamwe. Ombiibeli oya dja ‘kuKalunga kelididimiko nokehekeleko.’ Kakele komishangwa dehekeleko, otu na oikwafifo yokukonakona Ombiibeli ihapu. Ohatu dulu okulongifa o-Watch Tower Publications Index nosho yo o-Research Guide for Jehovah’s Witnesses. Oikwafifo oyo otai dulu oku tu kwafela tu mone omayele opaMbiibeli taa tungu opo tu lididimikile omaupyakadi oludi keshe. Otai dulu yo oku tu honga okukala hatu yandje omayele mawa oo taa dulu okuningifa eenghendabala detu di kale tadi pondola.

16. Omaukwatya elipi twa pumbwa ngeenge hatu tu omukumo Omukriste oo a polimana?

¹⁶ Kala ho yavelele nowa ngungumana. Oo oku li omaukwatya a denga mbada okuheliholamwene oo hatu ulike ngeenge hatu tu umwe omukumo noku mu tunga. Jehova oku li ‘Xe yefilonghenda naKalunga kehekeleko alishe,’ noha ulikile ovapiya vaye ‘efilonghenda lomomutima.’ (Lesha 2 Ovakorinto 1:3-6; Luk. 1:78; Rom. 15:13) Paulus okwa tula po oshihopaenenwa shiwa moshinima osho, eshi a shanga a ti: “Otwa holoka mokati keni nombili ngaashi ina omunyamifi ha tekula ouhanana vaye; osho nafye yo moku mu djuulukwa neenghono twa hala oku mu pa yo havaengeli laKalunga alike, ndelenee eemwenyo detu vene yo, osheshi onye omwa ninga ovaholike vetu.” (1 Tes. 2:7, 8) Ngeenge otwa kala hatu yavelele vamwe ngaashi Kalunga, otashi dulika e tu longife tu nyamukule omailikano omunhu oo a wililwa po.

17. Etaleko lilipi li li pandjele li na sha novamwatate tali tu kwafele tu va tunge pahole?

¹⁷ Inatu teelela ovamwatate va kale va wanenena. Kala u na etaleko li li pandjele li na sha novamwatate novamwameme. Kashi li mondjila okukala twa teelela ovamwatate vaha ninge epuko notashi ke tu nyemateka. (Omuud. 7:21, 22) Dimbuluka kutya osho Jehova ha pula ovapiya vaye va ninge oshi li pandjele. Ngeenge otwa hopaenene oshihopaenenwa shaye, ohatu ke lididimikila okuhawanenena kwavamwe. (Ef. 4:2, 32) Ponhele yoku va lombwela kutya osho tava ningi inashi wana, shi ninga elalakano loye oku va pandula mwaasho tava ningi. Osho otashi dulu oku va twa omukumo. Okupandula vamwe tashi di komutima otaku dulu oku va tunga noku va kwafela va ‘kale ve nelitango’ moilonga yavo iyapuki. Oshi li xwepo okuninga ngaho ponhele yoku va yelekanifa navamwe. — Gal. 6:4.

18. Otu na etomheno lilipi lokutunga vamwe pahole?

¹⁸ Odi keshe yaJehova oi na ondilo kuye nosho yo kuJesus, oo a yandja ekuliloyambo. (Gal. 2:20) Otu hole ovamwatate novamwameme neenghono. Otwa hala oku va fila oshisho noku va yavelela pahole. Opo tu kale odjo yetulumuko, natu “lalakaneneni hano eshi tashi hapupalifa ombili netungafano.” (Rom. 14:19) Inatu teelela tuu nodjuulufi oku ka kala mOparadisa omo muhe na osho tashi ke tu teya omukumo! Itamu ka kala ouyahame, oita, efyo, omahepeko, omaupyakadi omoukwaneumbo nosho yo enyemato. Ngeenge Omido Eyovi da piti po, ovanhu otava ka kala va wanenena. Ovo tava ka pita meyeleko laxuuninwa otava ka tambulwa ko ve li ovana vaJehova Kalunga vokombada yedu notava ka ya “memanguluko loshinge shovana vaKalunga.” (Rom. 8:21) Atusheni natu twikile okuulika ohole oyo tai tungu nokukwafelafana opo tu ka mone ondjabi oyo ihafifa noitunhula.