1. Ongahelipi omhepo yokuliholamwene younyuni ou tai dulu okukuma elininipiko letu?

OMOLWASHIKE hashi kala shidjuu okutula moilonga osho hatu lihongo mEendjovo daKalunga? Etomheno limwe ololo kutya ohashi pula elininipiko okuninga osho shi li mondjila, nope na omafininiko oo hae shi ningifa shidjuu okukala ovalininipiki. ‘Momafiku aa axuuninwa’ otwa dingililwa kovanhu ovo ‘ve lihole vo vene, ovanalwisho voimaliwa, ovalitangi, ovalinenepeki noka ve na elidiliko.’ (2 Tim. 3:1-3) Ngeenge elihumbato lovanhu ovo ve lihole mwene tali kundanekwa ile la tambulwa ko, omupiya waKalunga otashi dulika a kale e tonde elihumbato la tya ngaho, ndele otashi dulika a kale e va twila ondubo omolwoinima oyo ve na. (Eps. 37:1; 73:3) Otashi dulika umwe e lipule kutya: ‘Mbela ohashi eta ngoo ouwa okupitifa komesho omahalo avamwe ponhele yomahalo etu? Mbela ovanhu otava dulu okukala inava fimaneka nge ngeenge onde lininipike?’ (Luk. 9:48) Ngeenge otwa efa omhepo yokuliholamwene younyuni ou i tu nwefe mo, otashi dulika i nyone po ekwatafano olo hatu hafele meongalo nosho yo omufika wetu wopaKriste. Ashike ngeenge otwa  konakona oihopaenenwa iwa oyo i li mOmbiibeli noku i shikula ohatu mono ondjabi.

2. Ongahelipi okuhopaenena ovapiya vaKalunga ovadiinini taku dulu oku tu kuma?

² Ngeenge otwa hala okuhopaenena ovo ve li ovadiinini, otwa pumbwa okukonakona osho va ninga opo va mone oidjemo iwa. Ongahelipi va li va dula okupanga oukaume naKalunga, okukala va hokiwa kuye nosho yo okumona eenghono opo va longe ehalo laye? Okukonakona oinima oyo oku li oshitukulwa sha fimana shokulipalula pamhepo.

3, 4. (a) Ohatu pewa ngahelipi ewiliko lopamhepo? (b) Omolwashike hatu dulu okutya eendja dopamhepo oda kwatela mo shihapu shihe fi ashike okumona ouyelele?

³ Ohatu pewa omayele mawa mahapu nedeulo okupitila mOmbiibeli, moishangomwa yetu yopaKriste, mee-websites detu, mo-Jw Broadcasting nosho yo pokwoongala nopoyoongalele yetu. Ashike she likolelela keendjovo daJesus odo tadi hangwa muJohannes 4:34, eendja dopamhepo oda kwatela mo shihapu shihe fi ashike okumona ouyelele. Oshike sha kwatelwa mo? Jesus okwa ti: “Oikulya yange ei, Ame ndi longe ehalo laau a tuma nge nondi wanife oshilonga shaye.”

⁴ KuJesus, eendja dopamhepo oda kwatela mo okulonga metwokumwe newiliko laKalunga. Omeityo lilipi osho sha fa oikulya? Ngaashi ashike omalutu etu haa kala a wanenwa nokwa paluka nawa ngeenge twa lya oikulya i na oitungifi, omitima detu nosho yo eitavelo letu ohali pame ngeenge hatu longo ehalo laKalunga molwaashi ohatu ka mona omwenyo waalushe. Olungapi wa ile kelongekido loilonga yomomapya uhe udite nawa ashike eshi wa mana okuudifa owa li wa pepelelwa?

5. Ohatu ka pewa ondjabi yashike ngeenge ohatu katuka pandunge?

⁵ Ounongo owa hala okutya okutula moilonga omalombwelo aKalunga. (Eps. 107:43) Okumona ounongo oshi na ouwa. “Noinima yoye aishe i nondilo itai yelekwa nado. . . . Odo omuti womwenyo kukeshe ou te u kwata, nomunelao keshe oyou ta kanyatele kuo.” (Omayel. 3:13-18) Jesus okwa ti: “Eshi ngeenge mu shi shii, onye ovanelao ngeenge tamu shi ningi.” (Joh. 13:17) Ovahongwa ova li ashike tava ka dula okukala va hafa ngeenge ova twikile okulonga osho Jesus e va lombwela va longe. Kava li ashike va tambula ko omahongo aye nosho yo okushikula oshihopaenenwa shaye pakafimbo, ndele oyo oya li onghedi yavo yokukalamwenyo.

6. Omolwashike tu na okulididimika eshi hatu tula moilonga osho tu shii kutya oshi li mondjila?

⁶ Osha fimana kunena okukala hatu lididimike eshi hatu tula moilonga osho tu shii kutya oshi li mondjila. Oku shi faneka, otashi dulika makeninga e na oilongifo nosho yo eshiivo. Ashike ita ka mona mo ouwa moinima oyo ngeenge ihe i longifa. Ngeenge okwa longa oilonga youmakeninga monakudiwa noku na ounghulungu, okwa pumbwa okutwikila okulonga oilonga oyo opo ehe i dimbwe noku kale ha pondola. Sha faafana, otashi dulika hatu hafele oidjemo iwa oyo twa mona eshi twa tula moilonga osho twa lesha mOmbiibeli. Ashike ohatu mono ehafo tali kalelele mokukala ovalininipiki eshi hatu kala metwokumwe newiliko laJehova efiku keshe.

7. Otu na okulinyenga ngahelipi koihopaenenwa yopaMbiibeli ngeenge otwa hala okumona ounongo?

⁷ Natu ka taleni keenghalo nhe omo elininipiko letu tali dulu okuyelekwa nosho yo nghee ovadiinini vamwe va li va finda eshongo olo. Okukonakona ouyelele wonhumba hako akuke taku dulu oku tu nghonopaleka pamhepo. Onghee diladila kunghee to dulu okutula moilonga oitwa oyo pauhandimwe, ndele to shi ningi meendelelo.

8, 9. Oiningwanima oyo i li mOilonga 14:8-15 oya holola ngahelipi elininipiko lomuyapostoli Paulus? (Tala efano pehovelo loshitukulwa.)

⁸ Kalunga okwa “hala ovanhu aveshe va xupifwe nova fike meshiivo loshili.” (1 Tim. 2:4) Mbela oho tale ko ngahelipi ovanhu aveshe ovo va pumbwa okulihonga oshili? Nonande omuyapostoli Paulus okwa li ha kongo ovo ve shii nale kombinga yaKalunga meeshinagoga, ka li ashike ha kongo Ovajuda. Onghedi omo ovo va li hava longele oikalunga va li ve linyenga oya li ya yeleka elininipiko laye.

⁹ Pashihopaenenwa, eshi Paulus a li molweendo laye lotete loutumwa, Ovaliakonia ova li tava diladila kutya Paulus naBarnabas ovo va li oikalunga yavo Zeus naHermes ye uya molupe lopanhu opo i longe oinyengandunge. Mbela osho osha li sha yeleka Paulus naBarnabas va tambule ko efimano olo va li tava pewa? Mbela osho osha li tashi ke va ningifa va kale va pepelelwa omolwomahepeko oo va li va shakeneka moilando ivali oyo va talela po? Mbela ova li tava diladila kutya osho otashi dulu oku va kwafela va tandavelife onghundana iwa? Hasho nandenande. Ova li va pombaula diva oikutu yavo, tava tondokele mokati kovanhu nokwiingida tava ti: “Oshike tamu ningile ngaha? Nafye yo ovanhu ngaashi nye.” — Oil. 14:8-15.

10. Omeityo lilipi Paulus naBarnabas va li ve litala ko va fa ovanhu ovo hava popi Oshiliakonia?

¹⁰ Paulus naBarnabas kava li tava ti kutya onghedi yavo yokulongela Kalunga oya faafana naayo yovapaani, ndele ova li va hala okutya navo inava wanenena. Mbela ovatumwa ovo vavali ova li ve na oshinakuwanifwa she likalekelwa? (Oil. 13:2) Mbela ova li va vaekwa nomhepo iyapuki nova pewa eteelelo litunhula? Heeno, ashike Paulus naBarnabas ova li ve shii kutya ovanhu ovo hava popi Oshiliakonia navo otava dulu okumona omauwa a faafana ngeenge ova tambula ko onghundana iwa.

11. Ongahelipi hatu dulu okuhopaenena elininipiko laPaulus ngeenge hatu udifa?

¹¹ Ongahelipi hatu dulu okuhopaenena oshihopaenenwa shaPaulus shelininipiko? Shotete, otu na okukondjifa eyeleko keshe lokukala twa hala okutambula ko efimano omolwoinima oyo hatu pondola keenghono daJehova. Oshitivali, keshe umwe womufye oshiwa e lipule kutya: ‘Ohandi tale ko ngahelipi ovanhu ovo handi udifile? Mbela ondi na onhondo novanhu vamwe momudingonoko wetu?’ Eendombwedi daJehova mounyuni aushe odi shii okupandulwa molwaashi ohadi kongo moitukulwa yado ovo tashi dulika vena ehalo lokupwilikina konghundana iwa. Omafimbo amwe, okuninga ngaho otashi dulika taku pula di lihonge omalaka nosho yo omaputuko aavo va dinika moshitukulwa. Ashike Eendombwedi odo hadi ningi eenghendabala da tya ngaho ihadi litale ko di va dule. Ponhele yaasho, ohadi kendabala okuuda ko onghalo yomunhu keshe opo di dule okuhanga omutima waye netumwalaka lOuhamba.

12. Epafras okwa li a ulika ngahelipi kutya oku na ko nasha navamwe?

¹² Onghedi vali imwe omo hatu dulu okuulika kutya ohatu dulika nelininipiko komalombwelo aKalunga, omokwiilikanena ovo “va mona eitavelo li nondilo li fike puletu.” (2 Pet. 1:1) Epafras osho a li a ninga. Ombiibeli oye mu tumbula ashike lwoikando itatu momishangwa adishe da nwefwa mo odo da shangwa kuPaulus. Eshi Paulus a li a kwatelwa meumbo limwe muRoma, okwa li a shangela Ovakriste vomuKolossi kutya Epafras okwa kala te va “kondjele alushe momailikano aye.” (Kol. 4:12) Epafras okwa li e shii nawanawa ovamwatate nokwa li e na ko nasha navo shili. Onghalo yaye oyo ya li ya fa yaPaulus “omukwatwa pamwe” naye kaya li ye mu imba aha yandje elitulemo keemhumbwe davamwe  dopamhepo. (Filem. 23) Okwa li a ninga po sha e va kwafele. Mbela osho itashi ulike kutya ka li e lihole ye mwene? Okwiilikanena Ovakriste vakwetu otaku dulu okweeta oidjemo iwa, unene tuu ngeenge otwa kala hatu va tumbula komadina. — 2 Kor. 1:11; Jak. 5:16.

13. Ongahelipi to dulu okuhopaenena oshihopaenenwa shaEpafras momailikano oye?

¹³ Diladila kwaavo to dulu okwiilikanena to va tumbula komadina. Ngaashi Epafras, ovamwatate novamwameme vahapu ohava ilikanene ovo ve li momaongalo avo nosho yo omaukwaneumbo oo e na oinakuwanifwa idjuu ile ovo va taalela okuninga omatokolo a kwata moiti ile va taalela omayeleko. Vahapu ohava ilikanene ovo omadina avo e li moshitukulwa osho shi li ko-jw.org, shi na oshipalanyole “Jehovah’s Witnesses Imprisoned for Their Faith.” (Inda opo pa shangwa NEWSROOM > LEGAL DEVELOPMENTS.) Shikwao vali, ohatu ningi nawa ngeenge otwa kala hatu dimbuluka ovo va filwa ovaholike vavo, ovo va xupa moiponga yopaushitwe nomoita efimbo opo la di ko nosho yo ovo tave lididimikile oupyakadi wopashimaliwa. Osha yela kutya ope na ovamwatate novamwameme vahapu ovo twa pumbwa okwiilikanena notava dulu okumona mo ouwa. Ngeenge hatu ilikanene ovanhu va tya ngaho, ohatu ulike kutya itatu kongo ashike ouwa wetu vene ndele nawavamwe yo. (Fil. 2:4) Jehova oha udu omailikano a tya ngaho.

14. Jehova okwa tula po ngahelipi oshihopaenenwa sha denga mbada shi na sha nokukala omupwilikini muwa?

¹⁴ Onghedi onhinhatu omo hatu ulike kutya otu li ovalininipiki omokukala hatu pwilikine nawa kuvamwe. Jakob 1:19 okwa ti natu kale hatu “endelele okupwilikina.” Jehova okwe tu tulila po oshihopaenenwa sha denga mbada moshinima osho. (Gen. 18:32; Jos. 10:14) Diladila kwaasho hatu dulu okulihonga meenghundafana odo da shangwa muExodus 32:11-14. (Lesha.) Nonande Jehova ka li a pumbwa ekwafo laMoses, okwa li e mu pa omhito opo e mu lombwele omaliudo aye. Olyelye ta ka pwilikina nelididimiko nokushikula omaetepo omunhu oo ha ningi omapuko luhapu? Jehova oha pwilikine nelididimiko kwaavo have mu ilikana ve na eitavelo.

15. Ongahelipi hatu dulu okuhopaenena Jehova ngeenge tashi uya pokufimaneka vamwe?

¹⁵ Oshiwa keshe umwe womufye e lipule kutya: ‘Ngeenge Jehova okwa li e lininipika eshi a li ta ungaunga nokupwilikina kovanhu ngaashi ooAbraham, Rakel, Moses, Josua, Manoah, Elia naHesekiel, mbela ame itandi dulu okufimaneka ovamwatate aveshe mokukala inandi va dina, handi pwilikine komaetepo avo, noku a tula nokuli moilonga? Mbela ope na umwe meongalo letu ile moukwaneumbo wetu a pumbwa ekwafo lange? Oshike ndi na okuninga po? Ohandi ka ninga po shike shi na sha naasho?’ — Gen. 30:6; Ovatok. 13:9; 1 Eeh. 17:22; 2 Omaf. 30:20.

16. Ohamba David oya li ye linyenga ngahelipi eshi ya li ya udifwa nai kuSimei?

¹⁶ Elininipiko ohali tu kwafele yo tu ulike elipangelo ngeenge twa udifwa nai. (Ef. 4:2) Oshihopaenenwa shimwe shididilikwedi otashi hangwa mu 2 Samuel 16:5-13. (Lesha.) David nosho yo ovapiya vaye ova li ve lididimika eshi va li tava tukwa nokuponokelwa kuSimei, omupambele wohamba Saul. David okwa li e lididimikila etukano olo nonande okwa li e na eenghono doku li xulifa po. Okwa li a mona ngahelipi eenghono opo a dule okulipangela? Ohatu dulu okumona ouyelele mokukonakona etukulwa etitatu lEpsalme.

17. Oshike sha li sha kwafela David a kale e na elipangelo, nongahelipi hatu dulu oku mu hopaenena?

¹⁷ Eenhetekelindjovo dEpsalme etukulwa 3  oda ulika kutya ola shangwa kuDavid eshi a li ta i “onhapo omona waye Absalom.” Ovelishe 1 nonhi-2 otadi tu kumwe noiningwanima oyo ya popiwa muSamuel omutivali etukulwa 16. Epsalme 3:4 ola popya shi na sha nelineekelo laDavid, la ti: “Onda lalekida Omwene mokule, Ye nokwa uda eingido lange komhunda yaye iyapuki.” Nafye ohatu dulu okwiilikana ngeenge hatu ponokelwa. Jehova ohe tu nyamukula moku tu pa omhepo yaye iyapuki oyo tai dulu oku tu kwafela tu lididimike. Mbela oto dulu okudiladila konghalo omo wa pumbwa okulipangela ile okudimina po oo e ku udifa nai? Mbela ou na ngoo elineekelo kutya Jehova oku wete oluhepo loye note ke ku nangeka noupuna?

18. Omolwashike wa tokola toko okutula moilonga omalombwelo aKalunga?

¹⁸ Okuninga osho tu shii kutya oshi li mondjila ohaku eta omanangeko noupuna mahapu. Nomolwaasho Omayeletumbulo 4:7 pa-NW a ti kutya “ounongo oshinima sha fimanenena.” Nonande ounongo owe likolelela keshiivo, ou na sha unene nomatokolo oo hatu ningi ponhele ashike yokuuda ko ouyelele wonhumba. Nokuli noufelepuka ohava ulike ounongo. Nonande kave shii shihapu, eenghatu davo ohadi ulike kutya ove shii osho tashi ka ningwa po nohave shi lilongekidile. (Omayel. 30:24, 25) Kristus, oo e li ‘ounongo waKalunga,’ oha longo alushe osho tashi hafifa Xe. (1 Kor. 1:24; Joh. 8:29) Kalunga oku shii eyooloko pokati kokuninga etokolo li li mondjila nosho yo okukala metwokumwe nalo. Oha pe ondjabi ovo have lididimike nelininipiko nosho yo ovo hava ningi osho ve shii kutya oshi li mondjila. (Lesha Mateus 7:21-23.) Onghee hano, natu twikileni okulonga opo ovanhu aveshe meongalo va dule okulongela Jehova nelininipiko. Okutula moilonga osho tu shii kutya oshi li mondjila ohashi pula efimbo nelididimiko, ashike ohashi ulike kutya otu na elininipiko olo hali tu etele ehafo paife nosho yo monakwiiwa.