OSHITUKULWA SHOKUKONAKONWA 39
‘Tala ongudu inene’
‘Tala, ongudu inene ya nyengana okuvalwa i li ofika ya taalela olukalwapangelo nOdjona.’ — EH. 7:9.
EIMBILO 60 Otashi ti exupifo kuvo
EXUKU LOSHITUKULWA *
1. Omuyapostoli Johannes okwa li a taalela onghalo ilipi lwopexulilo lefelemudo lotete O.P.?
OMUYAPOSTOLI Johannes okwa li a taalela onghalo idjuu neenghono lwopexulilo lefelemudo lotete O.P. Okwa li omunamido, a li a tulwa modolongo konhunhu yaPatmos, notashi dulika oye aeke a li omuyapostoli e li momwenyo. (Eh. 1:9) Okwa li e shi shii kutya ovapataneki ova li tava pukifa omaongalo, nova li tava etifa olutandu. Elongelokalunga lashili ola li tali monika la fa li li pokuxula po. — Jud. 4; Eh. 2:15, 20; 3:1, 17.
Omuyapostoli Johannes okwa mona “ongudu inene” ya djalekwa oikutu itoka to i kwete oivale yomilunga momake avo (Tala okatendo 2)
2. Metwokumwe nEhololo 7:9-14, Johannes okwa li a mona emoniko litunhula lilipi? (Tala efano kombada yoshifo.)
2 Ofimbo Johannes a li monghalo oyo idjuu, Kalunga okwa li e mu ulikila emoniko litunhula li na sha nonakwiiwa. Memoniko olo, omweengeli umwe okwa lombwela ovaengeli vakwao va kelele eemhepo dihanauni di na sha noudjuu munene, fiyo osheshi ovapiya va didilikwa lwaxuuninwa. (Eh. 7:1-3) Ovapiya ovo ove li 144 000, ovo tava ka pangela pamwe naJesus meulu. (Luk. 12:32; Eh. 7:4) Johannes okwa tumbula vali ongudu imwe inene, a ti: “Tala,” outumbulilo oo tala otau ulike kutya okwa li a kuminwa osho a mona. Johannes okwa li a mona shike? Okwa mona “ongudu inene ya nyengana okuvalwa yomoiwana aishe nomomaludi aeshe novomovanhu aveshe novomomalaka aeshe; vo ova li ofika va taalela olukalwapangelo nOdjona.” (Lesha Ehololo 7:9-14.) Johannes otashi dulika a li a hafa neenghono eshi a shiiva kutya otapa ka kala ovanhu omamiliyona monakwiiwa ovo tava ka longela Kalunga monghedi ya yuka.
3. (a) Omolwashike emoniko laJohannes tali pameke eitavelo letu? (b) Ohatu ke lihonga shike moshitukulwa eshi?
3 Nopehe na omalimbililo, emoniko olo ola li la pameka eitavelo laJohannes. Emoniko olo otali pameke eitavelo letu neenghono, molwaashi otali popi kombinga yomafiku axuuninwa oo tu li muo. Otwa mona nghee ovanhu omamiliyona tava ongelwa, ovo ve na eteelelo loku ka xupa poudjuu munene noku ka kala nomwenyo fiyo alushe kombada yedu. Moshitukulwa eshi, ohatu ke lihonga nghee Jehova a hololela oshiwana shaye oule womido di dulife pomilongo hetatu da pita kutya ongudu inene oya fikama po moolyelye. Opo nee ohatu ka kundafana oinima ivali i na sha nongudu oyo: (1) ounene wayo (2) oilyo yayo oya dja mounyuni aushe. Oitwa oyo otai ka pameka eteelelo laaveshe ovo ve li oshitukulwa shongudu oyo ya nangekwa noupuna.
ONGUDU INENE OTAI KA KALA PENI?
4. Oshili yopaMbiibeli ilipi omalongelokalunga oipupulu ehe udite ko, nongahelipi eitavelo lOvakonakoni vOmbiibeli la li la yooloka ko kulavo?
4 Omalongelokalunga oipupulu ihaa hongo oshili yopaMbiibeli oyo kutya ovanhu ovo hava dulika otava ka kala nomwenyo fiyo alushe kombada yedu. (2 Kor. 4:3, 4) Kunena, omalongelokalunga oipupulu mahapu ohaa hongo kutya ovanhu aveshe ovo hava longo ouwa ngeenge ova fi otava i meulu. Eitavelo lavo ola li la yooloka ko kwaalo lokangudu kanini kOvakonakoni vOmbiibeli, ovo va li hava nyanyangida Oshungonangelo okudja mo 1879 lwaapo. Ovakonakoni vOmbiibeli ova li va itavela kutya Kalunga ota ka ninga vali edu Oparadisa, novanhu omamiliyona ovo hava dulika otava ka kala kombada yedu, ndele hameulu. Ashike osha pula efimbo lihapu opo va yoolole filufilu kutya ovanhu ovo hava dulika ovelipi naanaa. — Mat. 6:10.
5. Ovakonakoni vOmbiibeli ova li va itavela shike shi na sha novanhu 144 000?
5 Ovakonakoni vOmbiibeli natango ova li va konakona mOmishangwa nova mona kutya ovanhu vamwe otava ka ‘kulilwa kedu,’ va ka pangele pamwe naJesus meulu. (Eh. 14:3) Ongudu oyo oya fikama po mOvakriste 144 000, ovaladi nova longela Kalunga fimbo va li kombada yedu. Ongahelipi shi na sha nongudu inene?
6. Ovakonakoni vOmbiibeli ova li va itavela shike shi na sha nongudu inene?
6 Johannes okwa mona memoniko ongudu oyo i li ‘ofika ya taalela olukalwapangelo nOdjona.’ (Eh. 7:9) Eendjovo odo oda li da ningifa Ovakonakoni vOmbiibeli va fike pexulifodiladilo kutya ongudu inene nayo otai ka kala meulu, ngaashi ashike ovo 144 000. Ndele otapa ka kala eyooloko lashike pokati keengudu odo mbali, 144 000 nosho yo ongudu inene ngeenge aveshe ova i meulu? Ovakonakoni vOmbiibeli ova li tava diladila kutya ongudu inene oya fikama po mOvakriste ovo va li ihava dulika naanaa kuKalunga eshi va li kombada yedu. Nonande ova li hava dulika komifikamhango dopaenghedi, vamwe vomuvo ova li natango oilyo yomalongelokalunga oipupulu. Ovakonakoni vOmbiibeli ova li va fika pexulifodiladilo kutya ovanhu ovo ova ulika eitavelo, ndele inava wana oku ka pangela pamwe naJesus. Molwaashi ovanhu ovo vomongudu inene kava li naanaa ve na ohole inene yokuhola Kalunga, ova wana okuya meulu komesho yolukalwapangelo, ndele haku ka kala omutumba kolukalwapangelo.
7. Paitavelo lOvakonakoni vOmbiibeli, oolyelye va li tava ka kala kombada yedu pefimbo lokupangela kwaKristus, nova li va itavela shike shi na sha novadiinini vopefimbo lonale?
7 Oolyelye tava ka kala kombada yedu? Ovakonakoni vOmbiibeli ova li va itavela kutya konima eshi ovanhu 144 000 nongudu inene va ongelwa va ye meulu, ovanhu vakwao omamiliyona otava ka kala nomwenyo kombada yedu va hafele omanangeko noupuna pefimbo lokupangela kwaKristus. Ovakonakoni vOmbiibeli kava li va teelela ngeno ovanhu ovo omamiliyona va longele Jehova ofimbo Kristus ina hovela okupangela. Mepingafano naasho, ova li tava diladila kutya ovanhu ovo otava ka hongwa kombinga yaJehova pefimbo lokupangela kwaKristus. Lwanima, ovo va diinina omifikamhango daJehova, otava ka kala nomwenyo fiyo alushe kombada yedu, ofimbo ovo ihava dulika tava ka hanaunwa po. Ova li va itavela kutya ovo tava ka kala “oidale” kombada yedu pefimbo lokupangela kwaKristus otava ka ya meulu pexulilo lomido eyovi. Ova li yo va itavela kutya “oidale” oya kwatela mo ovadiinini ovo va fya fimbo Jesus ine uya kombada yedu, notava ka nyumunwa pefimbo lomido eyovi. — Eps. 45:16.
8. Paitavelo lOvakonakoni vOmbiibeli, elalakano laKalunga ola li la kwatela mo eengudu dopatatu dilipi?
8 Ovakonakoni vOmbiibeli ova li va itavela kutya ope na eengudu dopatatu, (1) ovanhu 144 000 ovo tava ka pangela pamwe naJesus meulu, (2) ongudu inene yOvakriste ovo vaha li naanaa ovadiinini, ovo tava ka kala ofika komesho yolukalwapangelo laJesus meulu, (3) ovanhu omamiliyona ovo tava ka hongwa kombinga yaJehova pefimbo lOmido Eyovi dOkupangela kwaKristus. * Lwanima Jehova okwa li a kwafela Ovakonakoni vOmbiibeli va ude ko nawanawa oshinima osho. — Omayel. 4:18.
OUYELELE WOSHILI TAU YELA
Ovanhu vahapu ovo ve na eteelelo loku ka kala kombada yedu va ninginifwa poshoongalele mo 1935 (Tala okatendo 9)
9. (a) Omonghedi ilipi ongudu inene tai ka kala ‘ofika ya taalela olukalwapangelo nOdjona’ kombada yedu? (b) Omolwashike eudeko eli lEhololo 7:9, li na eityo?
9 Mo 1935, Eendombwedi daJehova oda li da uda ko nawa kutya ongudu inene oyo ya monika memoniko laJohannes oya fikama po moolyelye. Lwanima Eendombwedi daJehova oda li da uda ko kutya ongudu inene kai na okuya meulu i ka kale ‘ofika ya taalela olukalwapangelo nOdjona.’ Ponhele yaasho, osho otave ke shi ninga pafaneko. Nonande ongudu inene otai ka kala kombada yedu, otai kala ‘ofika ya taalela olukalwapangelo’ okudimina ounamapangelo waJehova nomokudulika kuye. (Jes. 66:1) Otai ka kala ‘ofika komesho yOdjona’ mokuulika eitavelo mekuliloyambo laJesus. Sha faafana, muMateus 25:31, 32, ‘oiwana aishe’ mwa kwatelwa ovakolokoshi oya popiwa tai ka “ongelwa” komesho yaJesus kolukalwapangelo laye loshinge. Osho otashi ulike kutya oiwana aishe oyo kai li meulu, ndele oi li kombada yedu. Eudeko eli la pepalekwa otali ti sha filufilu. Ola yelifa kutya omolwashike Ombiibeli inai popya kutya ongudu inene oya twalwa meulu. Ongudu ashike imwe, oyo ya udanekelwa omwenyo waalushe meulu, ovanhu 144 000 ovo tava ka ‘pangela kombada yedu’ pamwe naJesus. — Eh. 5:10.
10. Omolwashike ongudu inene ya pumbwa okuhongwa kombinga yaJehova fimbo Omido Eyovi dOkupangela kwaKristus inadi fika?
10 Okudja mo 1935, Eendombwedi daJehova oda kala di shi shii kutya ongudu inene oyo ya popiwa memoniko laJohannes, oya fikama po mOvakriste ovadiinini ovo ve na eteelelo loku ka kala kombada yedu fiyo alushe. Ndele opo ongudu inene i ka xupe poudjuu munene, oya pumbwa okuhongwa kombinga yaJehova fimbo omido eyovi inadi hovela. Ove na okuulika eitavelo la kola opo va mone “eenghono okuya onhapo ei aishe tai ka ningwa,” fimbo Omido Eyovi dOkupangela kwaKristus inadi hovela. — Luk 21:34-36.
11. Omolwashike Ovakonakoni vOmbiibeli vamwe va li tava diladila kutya vamwe otava ka twalwa meulu konima yomido eyovi?
11 Ongahelipi shi na sha nediladilo olo kutya vamwe ovo ve li oshihopaenenwa shiwa kombada yedu otava ka ya meulu konima yomido eyovi? Ouyelele oo owa li wa pita mOshungonangelo 15 Februali 1913. Umwe otashi dulika a tomhafane kutya: ‘Omolwashike ovanhu ovadiinini vopefimbo lonale tava ka kala kombada yedu ofimbo Ovakriste ovo vehe fi naanaa ovadiinini tava ka kala nomwenyo meulu?’ Ediladilo olo ola kanghamena koinima ivali ya puka, shotete oshosho kutya ongudu inene otai ka ya meulu, noshitivali oshosho kutya ongudu inene oya fikama po mOvakriste ovo vehe fi naanaa ovadiinini.
12-13. Oshike osho ovavaekwa nosho yo ongudu inene va ka didilika shi na sha nondjabi yavo?
12 Ngaashi twe shi mona, okudja mo 1935, Eendombwedi daJehova oda li da uda ko filufilu kutya ongudu inene oyo ya monika memoniko laJohannes otai ka xupa puHarmagedon. Ndele otava ka dja “momahepeko manene” oku kombada yedu notava ka “ingida nondaka inene tava ti: ‘Exupifo olaKalunga ketu nolOdjona, ou e li omutumba kolukalwapangelo.’” (Eh. 7:10, 14) Kakele kaasho, Omishangwa oda popya kutya ovo tava ka nyumunwa va ye meulu otava ka pewa ouwa u dule wovadiinini vopefimbo lonale. (Heb. 11:40) Ovamwatate ova li va hovela okushiva ovanhu nouladi va longele Jehova ve na eteelelo loku ka kala nomwenyo fiyo alushe kombada yedu.
13 Ongudu inene oya hafa omolweteelelo olo. Oi shii kutya Jehova okwa hoolola ovapiya vaye ovadiinini ve mu longele kutya nee omeulu ile okombada yedu. Ovavaekwa nosho yo ongudu inene ove shii kutya otava ka mona ashike ondjabi omolwefilonghenda laJehova olo a ulika okupitila mekuliloyambo laJesus Kristus. — Rom. 3:24.
ONGUDU INENE MOMUVALU
14. Omolwashike vahapu va li tave lipula konima yo 1935 kombinga yanghee exunganeko li na sha nongudu inene tali ka wanifwa po?
14 Konima eshi eudeko loshiwana shaJehova la pepalekwa mo 1935, ovanhu vahapu ova li natango tave lipula shi na sha nanghee ovo ve na eteelelo loku ka kala kombada yedu tava ka ninga ongudu inene. Pashihopaenenwa, Ronald Parkin okwa li e na omido 12 eshi eudeko li na sha nongudu inene la pepalekwa. Okwa ti: “Pefimbo opo opa li ovaudifi 56 000 mounyuni aushe, navahapu vomuvo otashi dulika va li ovavaekwa. Onghee ongudu inene kaya li tai monika ya kula.”
15. Ongahelipi ongudu inene tai twikile okwoongelwa?
15 Omido da ka landula ko, ovatumwa ova li va tuminwa koilongo ihapu, nomuvalu wEendombwedi daJehova owa li wa hapupala meendelelo. Mo 1968, okwa li kwa hovelwa oprograma yekonakonombiibeli taku longifwa embo Oshili oyo tai twala komwenyo waalushe. Embo olo ola yelifa paunafangwa oshili yOmbiibeli, naasho osha li sha kuma neenghono ovanamitima diwa. Meni ashike lomido nhee, ovanhu ve dulife petata lomiliyona ova li va ninginifwa. Eshi ongeleka yaKatolika ya hovela okukanifa ekwatafano naLatin Amerika nosho yo noilongo imwe, naashi oilonga yetu ya li ya shilikwa muEuropa lokoushilo nomuAfrika, ovanhu omamiliyona ova li va ninginifwa. (Jes. 60:22) Omido opo da di ko, ehangano laJehova ola nduluka po oilongifo imwe vali yokukwafela ovanhu ve lihonge kombinga yOmbiibeli. Osha yela kutya paife opa ongelwa oilyo yongudu inene i dulife pomamiliyona ahetatu.
ONGUDU INENE YA DJA MOUNYUNI AUSHE
16. Ongudu inene otai ongelwa okudja peni?
16 Eshi Johannes a shanga emoniko laye okwa ti, ongudu oyo inene otai ka dja ‘moiwana aishe nomomaludi aeshe nomovanhu aveshe nomomalaka aeshe.’ Omuprofeti Sakaria okwa hangwa nale a xunganeka oshinima sha faafana, a ti: “‘Omafiku tuu enya ovalumenhu omulongo vomomalaka aeshe oiwana otava ka kwata koshikutu shomulumenhu Omujuda nokukanyatela ko, ndele tava ti: Ofye twa hala okweenda pamwe nanye, osheshi ofye twa uda, nokutya Kalunga e li pamwe nanye.’” — Sak. 8:23.
17. Oshike tashi ningwa po opo ku kwafelwe ovanhu vomoiwana nomomalaka aeshe?
17 Eendombwedi daJehova oda didilika kutya, opo ovanhu vomalaka aeshe va ongelwe, onghundana iwa oi na okuudifwa momalaka mahapu. Otwa kala hatu toloka oishangomwa yokukwafela ovanhu va konakone Ombiibeli oule womido di dulife 130, ndele paife ohatu toloka momalaka mahapu neenghono okuyelekanifa nonakudiwa. Osha yela kutya kunena Jehova ota ongele ongudu inene okudja moiwana aishe pashikumwifilonga. Molwaashi Ombiibeli noishangomwa oyo ya kanghamena kuyo oi li momalaka mahapu, ongudu oyo otai longele Jehova ya hangana nonande oya dja mounyuni aushe. Eendombwedi oda shiivikila ouladi moilonga yokuudifa nohole yado youmwainafana. Osho itashi pameke tuu eitavelo! — Mat. 24:14; Joh. 13:35.
EMONIKO OLO OLE TU KUMA NGAHELIPI?
18. (a) Metwokumwe naJesaja 46:10, 11, omolwashike itashi kumwifa eshi Jehova a wanifa po exunganeko li na sha nongudu inene? (b) Omolwashike ovo ve na eteelelo loku ka kala kombada yedu vehe na okukala ve udite va patelwa kondje?
18 Otwa hafa neenghono omolwexunganeko li na sha nongudu inene. Itashi tu kumwifa eshi Jehova a wanifa po exunganeko olo monghedi ikumwifi. (Lesha Jesaja 46:10, 11.) Ovo ve li oilyo yongudu inene ova hafa neenghono omolweteelelo olo Jehova e va pa. Kave udite va patelwa kondje molwaashi inava vaekwa nomhepo yaKalunga opo va ka pangele pamwe naJesus meulu. Ohatu lesha mOmishangwa shi na sha novalumenhu nosho yo ovakainhu ovo va li ve na eitavelo nohava wilikwa komhepo iyapuki, ashike kave li oshitukulwa sho 144 000. Umwe womuvo oJohannes omuninginifi. (Mat. 11:11) Umwe vali oDavid. (Oil. 2:34) Ovalumenhu va tya ngaho, navakwao vahapu otava ka nyumunwa va kale nomwenyo mOparadisa kombada yedu. Aveshe, mwa kwatelwa ongudu inene otava ka mona omhito yokuulika oudiinini wavo kuJehova nokounamapangelo waye.
19. Okutala kunghee exunganeko li na sha nemoniko laJohannes tali wanifwa, otashi tu kwafele ngahelipi tu mone nghee efimbo olo tu li mulo la endelela?
19 Eshi osho oshikando shotete Jehova a ongela ovanhu omamiliyona okudja moiwana aishe ve mu longele. Kashi na nee mbudi kutya otu na eteelelo lokuya meulu ile olokombada yedu, otwa pumbwa okukwafela ovanhu vahapu ngaashi tashi shiiva va ninge oshitukulwa shongudu inene ‘yeedi dimwe.’ (Joh. 10:16) Mafiku Jehova ota ka eta oudjuu munene oo wa xunganekwa oo tau ka hanauna po omapangelo nomalongelokalunga oo haa hepeke ovanhu. Oilyo aishe yongudu inene kai na tuu oufembanghenda munene wokulongela Jehova fiyo alushe kombada yedu! — Eh. 7:14.
EIMBILO 139 Kala wa fa u liwete mounyuni mupe
