1-2. (a) Metwokumwe nOmayeletumbulo 16:31, otu na okutala ko ngahelipi ovamwatate novamwameme ovanamido ovadiinini? (b) Omapulo elipi hatu ka kundafana moshitukulwa eshi?

OVATALELIPO ovo hava talele po oparka yepangelo oyo i li moArkansas, U.S.A., otashi dulika ve li twe ouwe ve li ashike kombada. Onghee hano, ouwe va tya ngaho ove li ashike ngaashi va shitwa inava kwewa. Osho otashi dulu okuningifa ovanhu vahapu vaha kale tava yandje elitulemo kouwe va tya ngaho, notashi dulika va ende po ashike vehe na ko nasha navo.

² Ngaashi ouwe ovo, ovamwatate novamwameme ovanamido ovadiinini ove li omamona ondilo. Eendjovo daKalunga oda yelekanifa eenghwakutoka davo noshishani. (Lesha Omayeletumbulo 16:31; 20:29) Onghee hano, otashi dulika tuha yandje elitulemo komamona oo ondilo. Ovanyasha, ovo va lenga ovamwatate novamwameme ovanamido, otashi dulika va mone ouwa muhapu shi dulife okumona oupuna wo venevene. Moshitukulwa eshi ohatu ka kundafana omapulo atatu: Omolwashike Jehova a tala ko ovamwatate novamwameme ovanamido ve li omamona e na ondilo? Omolwashike ovamwatate novamwameme ovanamido tava dana onghandangala ya fimana mehangano laJehova? Oshike twa pumbwa okuninga, opo tu mone ouwa pauyadi moshihopaenenwa shavo?

3. Metwokumwe nEpsalme 92:12-15, omolwashike ovanamido ovadiinini ve na ondilo momesho aJehova?

³ Ovanamido ovadiinini ove na ondilo momesho aJehova Kalunga. Oku shii kutya ounhu wavo womeni owa tya ngahelipi nokwa lenga omaukwatya avo mawa. Oha kala a hafa, ngeenge ovanamido tava lombwele ovanyasha owino, oo va likola oule womido  dihapu odo va kala tave mu longele. (Job 12:12; Omayel. 1:1-4) Jehova okwa lenga yo elididimiko lavo. (Mal. 3:16) Ova shakeneka omaupyakadi mahapu mokukalamwenyo kwavo, ashike eitavelo lavo muJehova inali tengauka nandenande. Eteelelo lavo li na sha nonakwiiwa ola pama shi dulife eshi opo ve lihongo oshili. Jehova oku va hole, molwaashi otava twikile okuudifa kombinga yedina laye ‘nonande ova kulupa.’ — Lesha Epsalme 92:12-15.

4. Oshike tashi dulu okutwa omukumo ovamwatate novamwameme ovanamido?

⁴ Ngeenge oto ende to kulupa, shilipalekwa kutya Jehova oha dimbuluka oilonga oyo we mu longela monakudiwa. (Heb. 6:10) Owa kala nokuyambidida nouladi oilonga yokuudifa, naasho osha hafifa Tate yetu womeulu. Owe lididimikila omaupyakadi, mwa kwatelwa naao e ku nyikifa oluhodi. Owa kala nokudulika komifikamhango dopaMbiibeli douyuki noku di popila, wa longa noudiinini oshinakuwanifwa sha kwata moiti osho wa li u na mehangano laJehova nokudeula vamwe. Oho ningi ngaashi to dulu, opo u endele pamwe nehangano laJehova, olo hali endelele neenghono. Oho yambidida nokutwa omukumo ovo ve li moilonga yefimbo li yadi. Jehova Kalunga oku ku hole neenghono, eshi u li omudiinini. Okwa udaneka kutya ‘ovadiinini vaye ite va efa nande.’ (Eps. 37:28) Okwa udaneka a ti: “Fiyo otamu kulu, tamu mene eenghwakutoka onda hala oku mu kuminina.” (Jes. 46:4) Onghee hano, ino fika pexulifodiladilo kutya ngeenge owa kulupa, ku na vali onghandangala ya fimana oyo to dana mehangano laJehova. Ou na ondilo neenghono.

5. Oshike ovanamido va pumbwa okukaleka momadiladilo?

⁵ Ovanamido otava dulu okulongifwa meenghedi dihapu mehangano laJehova. Nonande kave na vali eenghono ngaashi nale, otashi dulika ve na oimoniwa ihapu iwa oyo va likola momukokomoko womido. Jehova ota twikile oku va longifa meenghedi da yoolokafana, ngaashi oihopaenenwa tai shikula yopefimbo lonale noyokunena tai shi ulike.

6-7. Yandja oihopaenenwa okudja mOmbiibeli yovanamido ovo va li va nangekwa noupuna, eshi va longela Jehova noudiinini.

⁶ Ohatu dulu okumona oimoniwa iwa mOmbiibeli yovadiinini ovo va longela Jehova fiyo  omoukulupe. Pashihopaenenwa, Moses okwa li e na omido 80 lwaapo, eshi a hovela okulongela Jehova e li omuprofeti nosho yo omupopikalelipo waye koshiwana shaIsrael. Daniel otashi dulika a li e na omido di dulife pomilongo 90, eshi Jehova a li te mu longifa e li omuprofeti. Omuyapostoli Johannes naye otashi dulika a li e na omido 90 nasha, eshi a nwefwa mo a shange embo lEhololo.

⁷ Ovanamido vakwao vahapu, otashi dulika vehe shiivike notashi dulu okukala shipu kufye tuha yandje elitulemo kuvo. Ndele Jehova oku va wete nohe va pe ondjabi omolwoudiinini wavo. Pashihopaenenwa, Simeon, oo a li omulumenhu “omuyuki noha tila Kalunga,” okwa tumbulwa ashike pauxupi mOmbiibeli. Ashike Jehova oku mu shii nokwa li e mu pa oufembanghenda wokumona okahanana Jesus nosho yo okuxunganeka kombinga yokaana naina yako. (Luk. 2:22, 25-35) Diladila yo shi na sha nomuprofeti omufiyekadi Anna. Okwa li e na omido 84, ndele okwa “kala alushe ha i kotembeli.” Molwaashi okwa li ha i kokwoongala pandjikilile, Jehova okwa li e mu nangeka noupuna a mone okahanana Jesus. Simeon naAnna, aveshe ova li ve na ondilo momesho aJehova. — Luk. 2:36-38.

8-9. Oshike omumwameme umwe a ninga mehangano laJehova, eshi e li omufiyekadi?

⁸ Pefimbo letu, ovanamido vahapu ovadiinini ove li oshihopaenenwa sha denga mbada kovanyasha. Diladila koshimoniwa shomumwameme Lois Didur. Okwa li ashike e na omido 21, eshi a hovela okulonga e li omukokolindjila e likalekelwa moCanada. Konima yaasho, ye nomushamane waye John, ova kala moilonga youpashukili omweendi oule womido dihapu. Opo nee ova ka longa mObetel yaCanada oule womido di dulife po 20. Eshi Lois a li e na omido 58, ye naJohn ova li va shivwa va ka longele koUkraine. Ova li va ninga po shike? Mbela ova li va fika pexulifodiladilo kutya ova kulupa noitava dulu oku ka longela koshilongo shimwe? Ova li va tambula ko oshinakuwanifwa osho, na John okwa li a nangekwa po e li oshilyo shOkomitiye yOshitaimbelewa koshilongo osho. Konima yomido heyali, eshi John a fya, Lois okwa li a tokola okutwikila noshinakuwanifwa shaye. Paife Lois oku na omido 81, ndele ota twikile okulongela Jehova noudiinini noku holike kOvabetel vomoshitaimbelewa shaUkraine.

⁹ Ovafiyekadi ngaashi Lois, otashi dulika vaha didilikwe mo vali, molwaashi ovashamane vavo va fya. Ashike nande ongaho, ove na ondilo momesho aJehova. Jehova okwa lenga neenghono ovamwameme, ovo va kala nokuyambidida ovashamane vavo oule womido nosho yo eshi tava twikile oku mu longela fiyo opaife. (1 Tim. 5:3) Ove li yo etwomukumo kovanyasha.

10. Oshihopaenenwa sha denga mbada shilipi sha tulwa po kuTony?

¹⁰ Ovanamido vahapu ovadiinini, ovo ve li moipangelo nosho yo momaumbo ovakulupe, navo ove li omamona opamhepo e na ondilo. Pashihopaenenwa, omumwatate Tony oku li monhele ya tya ngaho. Okwa ninginifilwa moPennsylvania, U.S.A., muAuguste 1942, eshi a li e  na omido 20. Konima eshi a ninginifwa okwa li a anya okuya moukwaita nokwa tulwa modolongo oule womido mbali netata. Ye nomukulukadi waye Hilda, ova tekulila ounona vavo vavali moshili. Oule womido dihapu, Tony okwa kala ta longo momaongalo atatu e li omupashukili omuunganeki (oo paife ha ifanwa omuunganeki wolutu lovakulunhuongalo) nosho yo e li omupashukili woshoongalele shoshikandjo. Okwa li ha talele po ovanadolongo, oku va ningila okwoongala nokukonakona navo Ombiibeli. Eshi Tony a wanifa omido 98, ka li a efa po okulongela Jehova. Okwa li a ninga eenghendabala ngaashi ta dulu, opo a longele Jehova pamwe novamwatate novamwameme vomeongalo lavo.

11. Ongahelipi hatu dulu okuulika kutya otwa lenga ovo ve li momaumbo ovakulupe?

¹¹ Ongahelipi hatu dulu okuulika kutya otwa fimaneka ovanamido, ovo hava di momaumbo ovakulupe? Ngeenge otashi shiiva, ovakulunhuongalo otava dulu okukwafela ovanamido va tya ngaho, va kale hava kala pokwoongala nokukufa ombinga moilonga yokuudifa. Ohatu ka ulika kutya otu na ko nasha novanamido ovo, ngeenge otwa kala hatu va talela po, ile hatu popi navo pavidio. Otwa hala okuyandja elitulemo le likalekelwa kovanamido, ovo ve li keenhele odo di li kokule nomaongalo avo. Molwaashi ngeenge inatu lungama, ohatu dulu oku va dimbwa. Ovanamido vamwe otashi dulika va mone shidjuu kuvo okupopya kombinga yavo vene, ngeenge hatu popi navo. Ashike ohatu ka mona ouwa muhapu, ngeenge otwa kala hatu longifa efimbo tu kale navo nokupwilikina eshi tave tu lombwele kombinga yoimoniwa itunhula oyo va mona mehangano laJehova.

12. Ovamwatate novamwameme ovo ve li momaongalo etu otu va shii shi fike peni?

¹² Otashi dulika shi ke tu kumwife, ngeenge otwa mono kutya momaongalo etu omu na ovanamido, ovo ve li oihopaenenwa ya denga mbada. Omumwameme Harriette okwa kala ta longele Jehova noudiinini oule womido meongalo lavo moNew Jersey, mo U.S.A. Opo nee okwa tembukila konhele imwe i li kokule a ka kala nomonakadona waye. Ovamwatate vokeongalo oko a tembukila ova li hava kongo efimbo, opo ve mu shiive nova li va mona kutya oku li emona londilo. Okwa kala he va tu omukumo moku va lombwela kombinga yoilonga yokuudifa, eshi opo a li e lihongo oshili mo 1920 nasha. Okwa kala alushe ha i nokalikushifo kaye kokomayoo, ngeenge ta ka udifa, a ningila ngeenge okwa kwatwa po. Oikando ivali mo 1933 okwa li a tulwa modolongo oule woshivike. Pefimbo opo, omushamane waye, oo ehe fi Ondombwedi noku li omunahole, okwa li ha file oshisho ounona vavo vatatu. Oshoshili kutya ovanamido, ovo ve li ngaashi omumwameme Harriette, ova pumbwa okufimanekwa.

13. Oshike we lihonga shi na sha nonghandangala oyo tai danwa kovanamido mehangano laJehova?

¹³ Ovamwatate novamwameme ovanamido otava dana onghandangala ya fimana mehangano laJehova. Ova mona meenghedi dihapu nghee Jehova a kala noku va nangeka noupuna pauhandimwe nosho yo ehangano laye. Ove lihonga oilihongomwa ya fimana komapuko avo. Onghee hano, va tala ko ve li “ofifiya younongo” nokulihonga koimoniwa yavo. (Omayel. 18:4) Ngeenge owa kongo efimbo lokukala navo opo u va shiive, eitavelo loye otali ka pama noto ke lihonga shihapu kuvo.

14. Deuteronomion 32:7 ota ladipike ovanyasha va ninge shike?

¹⁴ Litulila po elalakano lokukala ho popi novanamido. (Lesha Deuteronomion 32:7.) Oshoshili kutya omesho avo kae wete ko vali, ohava ende kanini nohava popile pedu. Ashike nande ongaho, ova hala okukala ve lipyakidila  nove liningile “edina la fimana” momesho aJehova. (Omuud. 7:1) Kaleka momadiladilo kutya omolwashike Jehova e va lenga. Twikila okukala we va fimaneka, ngaashi Elisa. Okwa li a tokola toko okukala popepi naElia efiku lavo laxuuninwa lokukala pamwe. Elisa okwa popya lwoikando itatu ta ti: “Itandi ku fii po!” — 2 Eeh. 2:2, 4, 6.

15. Omapulo elipi hatu dulu okupula ovanamido?

¹⁵ Ulika kutya ou na ko nasha novanamido moku va pula omapulo. (Omayel. 1:5; 20:5; 1 Tim. 5:1, 2) Oto dulu okupula omapulo ngaashi: “Eshi wa li omunyasha, oshike she ku tomha u mone kutya ei oyo oshili?” “Oimoniwa yoye oye ku kwafela ngahelipi u ehene popepi elela naJehova?” “Oshike she ku kwafela u kale wa hafa, eshi to longele Jehova?” (1 Tim. 6:6-8) Opo nee pwilikina nelitulemo, eshi tava hokolola.

16. Ngeenge omunamido nomunyasha tava popi, ohashi va etele ngahelipi ouwa?

¹⁶ Ngeenge omunamido nomunyasha tava popi, aveshe ohava mono mo ouwa. (Rom. 1:12) Osho otashi ka kwafela omunyasha a kale e na olupandu li na sha nonghedi omo Jehova ha file oshisho ovapiya vaye ovadiinini. Omunamido ota ka mona kutya oku holike. Ota ka kala a hafa, eshi ta lombwele omunyasha nghee Jehova a kala noku mu nangeka noupuna.

17. Omolwashike hatu tile kutya ovanamido ovadiinini ova enda tava wapala unene momukokomoko womido?

¹⁷ Ouwa wokoshipala ohau ende tau kana po omolwoukulupe, ashike ovo va diinini kuJehova ohava ende tava wapala omudo nomudo. (1 Tes. 1:2, 3) Omolwashike hatu tile ngaho? Omolwaashi oule womido, ova pitika omhepo iyapuki yaKalunga i va deule noku va kwafela va kulike omaukwatya mawa. Ohatu ka tala ko ovamwatate novamwameme ovanamido ve li omamona ondilo, ngeenge otwa kala hatu kongo efimbo tu va shiive nawa, tu lihonge kuvo nokukala twe va fimaneka.

18. Oshike hatu ka kundafana moshitukulwa tashi shikula ko?

¹⁸ Eongalo otali ka kala la pama, ngeenge ovanyasha ova kala va fimaneka ovanamido nosho yo ngeenge ovanamido ova kala va lenga ovanyasha. Moshitukulwa tashi shikula ko ohatu tala nghee ovanamido tava dulu okuulika kutya ova lenga ovanyasha ovo ve li meongalo.