1. Omolwashike tuhe na okukala twa kumwa, eshi ovanhu vahapu mounyuni kunena inave lineekelafana?

 OVANHU mounyuni waSatana kave shii kutya nave lineekele lyelye. Luhapu ohava udifwa nai kelihumbato lovanangeshefa, kovanapolotika nosho yo kovawiliki vomalongelokalunga. Naasho oshe va ningifa vehe lineekele ookaume kavo, ovashiinda nosho yo nokuli ovapambele. Osho kashi na oku tu kumwifa. Ombiibeli oya xunganeka ya ti: “Momafiku axuuninwa . . . , ovanhu otava ka kala . . . vehe fi ovadiinini, . . . ovalundili, . . . ovakengeleledi.” Osho osha hala okutya, ovanhu otava ka kala ngaashi Satana, kalunga kefimbo lounyuni ou, oo itatu dulu nande okulineekela. — 2 Tim. 3:1-4; 2 Kor. 4:4.

2. (a) Olyelye tu na okulineekela filufilu? (b) Vamwe otashi dulika ve lipule ngahelipi?

² Tu li Ovakriste otu shii kutya ohatu dulu okulineekela filufilu muJehova. (Jer. 17:7, 8) Otu shii kutya oku tu hole ‘noita efa’ ookaume kaye. (Eps. 9:10) Ohatu dulu yo okulineekela muJesus Kristus, molwaashi okwa yandja omwenyo waye omolwetu. (1 Pet. 3:18) Noimoniwa yetu otai ulike kutya Ombiibeli otai yandje ewiliko li shii okulineekelwa. (2 Tim. 3:16, 17) Otwa tomhwa kutya ohatu dulu okulineekela muJehova, muJesus nosho yo mOmbiibeli. Ashike vamwe otashi dulika ve lipule ngeenge otava dulu ngoo okulineekela alushe ovamwatate novamwameme meongalo. Ngeenge enyamukulo oheeno, omolwashike tu na oku ve lineekela?

3. Otu na oufembanghenda munene ulipi? (Markus 10:29, 30)

³ Jehova okwe tu hoolola tu kale oshitukulwa shoukwaneumbo waye womounyuni aushe wovalongeli vaye. Oo oufembanghenda we likalekelwa, oo tau tu etele ouwa muhapu. (Lesha Markus 10:29, 30.) Otu na ovamwatate novamwameme mounyuni aushe, ovo ve hole Jehova ve tu fa nohava ningi ngaashi tava dulu va tule moilonga omifikamhango daye. Otu va hole, nonande opo ashike  hatu shakene navo oshikando shotete, kashi na nee mbudi kutya ohatu popi elaka lilipi, otwa dja meputuko la tya ngahelipi nohatu djala twa yooloka ko kuvo. Otu hole unene okukala navo tu tange Tate yetu womeulu omunahole noku mu longela. — Eps. 133:1.

4. Omolwashike twa pumbwa ovamwatate novamwameme?

⁴ Otwa pumbwa okukala twa hangana novamwatate novamwameme paife shi dulife nale. Omafimbo amwe, ohave tu kwafele mokuhumbata omitengi detu. (Rom. 15:1; Gal. 6:2) Ohave tu tu yo omukumo, opo tu kale twe lipyakidila moilonga yaJehova notu kale twa pama pamhepo. (1 Tes. 5:11; Heb. 10:23-25) Diladila ashike kutya ngeno ohatu kala tu udite ngahelipi, ngeno kapa li eongalo olo hali tu kwafele, opo tu dule okukondjifa ovatondi vetu Satana Ondiaboli nosho yo ounyuni waye wa kolokosha! Satana nosho yo ovo ta pangele, mafiku otava ka ponokela ovapiya vaKalunga. Ashike pefimbo opo, ohatu ka kala twa hafa neenghono, eshi ovamwatate novamwameme tave ke tu kwafela.

5. Omolwashike tashi dulika omafimbo amwe shi kale shidjuu kuvamwe okulineekela ovamwatate novamwameme?

⁵ Vamwe ohava mono shidjuu okulineekela ovamwatate novamwameme, molwaashi tashi dulika va lombwela omwiitaveli mukwao oshiholekwa, ndele te shi lombwele vamwe. Ile tashi dulika umwe meongalo a popya sha, ile a ninga oshinima osho she va yahameka neenghono. Oimoniwa ya tya ngaho, otai dulu oku shi ningifa shidjuu okulineekela vamwe. Mbela oshike tashi dulu oku tu kwafela tu kale twe lineekela ovaitaveli vakwetu?

6. Ongahelipi ohole tai dulu oku tu kwafela tu kale tu na elineekelo? (1 Ovakorinto 13:4-8)

⁶ Otwa pumbwa ohole, opo tu kale tu na elineekelo. Ovakorinto votete etukulwa 13 ova  popya oiteelelwa ihapu yohole oyo tai tu kwafele tu tunge, ile tu tungulule elineekelo letu muvamwe. (Lesha 1 Ovakorinto 13:4-8.) Pashihopaenenwa, ovelishe 4 oya ti: “Ohole oi na onheni nolune.” Jehova ohe tu tale onheni nokuli nongeenge twa nyona kuye. Onghee hano, otu na okutala ovamwatate onheni, ngeenge va popya sha, ile va ninga sha osho she tu udifa nai, ile she tu yahameka. Ovelishe 5 oya weda ko ya ti: “[Ohole] ihai kenyanana noihai dimbuluka owii ye u ningilwa.” Inatu hala ‘okudimbuluka owii twe u ningilwa,’ mokudimbuluka oinima ii oyo ovamwatate ve tu ningila. Omuudifi 7:9 okwa ti kutya ‘ino endelela okuhanduka.’ Oshi li pandunge okutula moilonga eendjovo odo tadi hangwa mOvaefeso 4:26, tadi ti: “Inamu efa etango li ningine mwa handuka.”

7. Ongahelipi omafinamhango, oo taa hangwa muMateus 7:1-5, tae tu kwafele tu pameke elineekelo letu?

⁷ Ohatu dulu yo okupameka elineekelo letu mokukala hatu tale ko ovamwatate novamwameme ngaashi Jehova he va tale ko. Kalunga oku va hole noiha kala ta konenene omanyono avo. Nafye katu na okuninga ngaho. (Eps. 130:3) Ponhele yokuyandja elitulemo komapuko avo, otu na okukendabala okutala komaukwatya avo mawa nokudiladila koinima iwa oyo tava dulu okuninga. (Lesha Mateus 7:1-5.) Otu neitavelo kutya ova hala okuninga osho shiwa noinava hala oku tu udifa nai, molwaashi ohole ‘ohai itavele aishe.’ (1 Kor. 13:7) Outumbulilo oo inau hala okutya Jehova okwa teelela tu lineekele vamwe nopehe na etomheno liwa, ndele otu ve lineekele, molwaashi ova ulika kutya ovalineekelwa. *

8. Ongahelipi to dulu okulihonga okulineekela ovamwaxo?

⁸ Ngaashi efimaneko, elineekelo nalo ola pumbwa okulilongelwa notashi pula efimbo. Ongahelipi to dulu okulihonga okulineekela ovamwaxo? Owa pumbwa oku va shiiva nawa. Kala ho popi navo pokwoongala. Ninga oshilaye mu longe pamwe navo moukalele. Ve lididimikila u va pe omhito va ulike kutya ovalineekelwa. Potete, otashi dulika uha popye omadiladilo nomaliudo oye aeshe komunhu, oo opo ashike tamu lishiiva naye. Ashike eshi ekwatafano leni tali ende tali kulu, otashi dulika u kale wa manguluka oku mu lombwela omaliudo oye. (Luk. 16:10) Ndele ongahelipi ngeenge omumwaxo okwa yeleke elineekelo loye? Ino endelela okuxulifa po oukaume weni, ndele efa pa pite efimbo. Noino efa eenghatu davamwe di ku ningife u kale ino lineekela vali ovamwaxo. Moshinima eshi, ohatu ka tala koshihopaenenwa shovapiya vahapu vaJehova ovadiinini, ovo nonande ova li va udifwa nai kuvamwe, ova kala ve ve lineekela.

9. (a) Ongahelipi Hanna a twikila okulineekela melongekido laJehova, nonande ovo va li tava kwatele komesho ova li tava nyono? (b) Oshimoniwa shaHanna otashi tu hongo shike shi na sha nokulineekela melongekido laJehova? (Tala efano.)

⁹ Mbela ope na efimbo limwe wa li wa udifwa nai kelihumbato lomumwatate, oo e na oshinakuwanifwa? Ngeenge osho, otashi dulika u mone ouwa mokutala koshihopaenenwa shaHanna. Pefimbo opo, omupristeri munene Eli oye a li ta kwatele komesho elongelokalunga laJehova muIsrael. Ashike oilyo youkwaneumbo waye kaya li oshihopaenenwa shiwa. Ovanamati vaye, ovo va li ovapristeri, ova li hava ningi oinima ififohoni nokulihumbata monghedi inai koshoka efimbo keshe. Ashike xe ka li a ninga ngaashi ta dulu e va pukulule. Jehova ka li a kufa diva Eli ondodo yokukala omupristeri munene. Ashike nande ongaho, Hanna okwa twikila okudulika kelongekido laKalunga nokulongela Jehova ketwali, nonande Eli oye a li omupristeri munene. Eshi Eli a li a  mona Hanna ta ilikana a nyika oluhodi neenghono, okwa li a fika pexulifodiladilo la puka kutya okwa kolwa. Ponhele yokukonakona a mone oushili aushe, okwa kembaula omukainhu, oo a li a nyika oluhodi neenghono. (1 Sam. 1:12-16) Nonande ongaho, Hanna okwa li a ana kutya, ngeenge okwa mono okaana okamati ote ke ka yandja ka longe ketwalihangano, koshi yepashukilo laEli. (1 Sam. 1:11) Mbela oshinima osho sha kwatela mo ovanamati vaEli osha li natango sha pumbwa okuyukifwa? Heeno, na Jehova okwa li a katuka onghatu peufwafimbo laye. (1 Sam. 4:17) Mokweendela ko kwefimbo, Kalunga okwa li a nangeka noupuna Hanna, eshi e mu pa omonamati, Samuel. — 1 Sam. 1:17-20.

10. Ongahelipi ohamba David ya twikila okulineekela vamwe, nokuli nonande vamwe ove mu kengelela?

¹⁰ Mbela ope na efiku wa li u udite wa kengelelwa kukaume koye kopofingo? Ngeenge osho, natu ka taleni koshimoniwa shohamba David. Umwe womookaume kaye okwa li omulumenhu wedina Ahitofel. Ashike eshi Absalom, omonamati waDavid, a li a kendabala okunyeka xe ouhamba, Ahitofel okwa li a waimina ounashibofa waAbsalom. Osho oshi na okukala sha li sha udifa nai David, eshi a li ita yambididwa vali komonamati nosho yo komulumenhu, oo a li a tala ko e li kaume kaye. Ashike David ka li a efa oukengeleledi wa tya ngaho u mu efife po okulineekela vamwe. Okwa li a twikila okulineekela kaume kaye umwe omudiinini, Husai, oo a li a anya okuwaimina ounashibofa. David okwa li e na omatomheno a femba oku mu lineekela. Husai okwa li a ulika kutya oku li kaume muwa, nokwa li a tula omwenyo waye moshiponga, opo a kwafele David. — 2 Sam. 17:1-16.

11. Omonghedi ilipi omupiya umwe waNabal a ulika elineekelo?

¹¹ Natu ka taleni yo koshihopaenenwa shomupiya umwe waNabal. David novalumenhu vaye ova li va amena pahole ovapiya vOmuisrael wedina Nabal. Lwanima, David okwa li a pula oshipuna Nabal shi pe ovalumenhu vaye oikulya, keshe ngoo osho Nabal a li ta dulu oku va pa. Eshi Nabal a anya eindilo la tya ngaho, David okwa li a handuka neenghono nokwa li a tokola okudipaa ovalumenhu aveshe vomoukwaneumbo waNabal. Omupiya umwe okwa li a lopota oshinima osho kuAbigail, omukulukadi waNabal. E li oshilyo shoukwaneumbo oo, okwa li e shii kutya Abigail ota dulu okuxupifa omwenyo waye. Ponhele yokufaduka po, okwa li e lineekela kutya Abigail  ota ka yukifa onghalo. Okwa li e na elineekelo olo, molwaashi keshe umwe okwa li e shii kutya Abigail omukainhu omunaendunge. Osho sha ka ningwa po, osha ulika kutya okwa li e na omatomheno a femba oku mu lineekela. Abigail okwa li a katuka nouladi, opo a kelele David aha wanife po omhangela yaye. (1 Sam. 25:2-35) Okwa li e lineekela kutya David ota ka katuka pandunge.

12. Jesus okwa li a ulika ngahelipi kutya okwe lineekela ovahongwa vaye, nonande ova li hava ningi omapuko?

¹² Jesus okwa li e lineekela ovahongwa vaye, nonande ova li hava ningi omapuko. (Joh. 15:15, 16) Eshi Jakob naJohannes va li va pula Jesus ondodo ye likalekelwa mOuhamba, Jesus ka li a limbililwa omalinyengotomheno avo okulongela Jehova. Ka li yo e va kufa oufembanghenda wokukala ovayapostoli. (Mark. 10:35-40) Lwanima, ovahongwa aveshe vaJesus ova li ve mu fiya po oufiku, oo a kwatwa po. (Mat. 26:56) Ashike Jesus ka li a kanifa elineekelo muvo. Nonande okwa li e shii nawa okuhawanenena kwavo, okwa li “e va hole fiyo exulilo longhalamwenyo yaye.” (Joh. 13:1) Konima eshi Jesus a nyumunwa, okwa li nokuli a pa ovayapostoli vaye ovadiinini 11 oshinakuwanifwa sha kwata moiti shokukwatela komesho oilonga yokuninga ovanhu ovahongwa nokufila oshisho eedi daye di na ondilo. (Mat. 28:19, 20; Joh. 21:15-17) Okwa li e na omatomheno mawa okulineekela ovalumenhu ovo inava wanenena. Aveshe ova li va longa noudiinini, fiyo osheshi va mana oweenda wavo wokombada yedu. Hanna, David, omupiya waNabal, Abigail nosho yo Jesus ova tula po oshihopaenenwa shiwa shokulineekela ovanhu inava wanenena.

13. Oshike tashi dulu oku shi ningifa shidjuu tu lineekele vamwe?

¹³ Mbela ope na efiku limwe wa lombwelele omumwaxo oshiholekwa, ndele lwanima owa ka mona kutya ke fi omulineekelwa? Osho oshi nyemateka neenghono. Pomhito imwe, omumwameme umwe okwa li a lombwela omukulunhuongalo oshinima shopaumwene nelineekelo kutya ite ke shi lombwela vamwe. Efiku la shikula ko, omukulukadi womukulunhuongalo oo okwa li a dengela omumwameme e mu twe omukumo. Osha yela kutya okwa li a uda osho omukulunhuongalo a li a lombwelwa meholeko. Osho osha ningifa omumwameme aha kale vali e lineekela omukulunhuongalo oo. Omumwameme okwa li a ninga oshinima shi li mondjila, eshi a li a pula umwe ekwafo. Okwa li a popya nomukulunhuongalo umwe kombinga yoshinima osho, nokwa li e mu kwafela a kale vali e lineekela ovakulunhuongalo.

14. Oshike sha kwafela omumwatate umwe a kale vali e lineekela vamwe?

¹⁴ Omumwatate umwe okwa kala a handukila ovakulunhuongalo vavali ovo a li e udite kutya ita dulu oku ve lineekela. Ashike okwa li a hovela okudiladila kombinga yoshinima shimwe, osho sha li sha popiwa komumwatate, oo a fimaneka neenghono. Oo a ti: “Satana oye omutondi wetu, ndele havamwatate.” Omumwatate okwa li a dilonga noukeka koshitwa osho, naasho a li ta ka ninga po. Konima eshi a ilikana kuJehova e mu kwafele, okwa li a panga vali ombili novakulunhuongalo ovo.

15. Omolwashike tashi dulika shi kwate efimbo okulineekela vali vamwe? Yandja oshihopaenenwa.

¹⁵ Mbela owa kanifa oshinakuwanifwa meongalo? Osho oshimoniwa shiyahameka neenghono. Grete nameme waye ova li Eendombwedi didiinini muNazi moGermany, eshi oilonga yetu ya li ya shilikwa, momukokomoko wo 1930 nasha. Grete okwa kala ta hafele oufembanghenda wokutopatopa eekopi dOshungonangelo dovaitaveli vakwao. Ashike eshi ovamwatate va uda kutya xe okwa li ta pataneke oshili, ova li ve mu kufa oshinakuwanifwa ve na oumbada kutya xe otashi dulika a ka yandje ouyelele u na sha neongalo kovapataneki. Oo hao ashike oupyakadi oo Grete a li e na okulididimikila. Momukokomoko wOita Itivali  yOunyuni, ovamwatate kava li hava pe Grete nameme waye oifo nokava li hava popi navo, ngeenge va shakena mepandavanda. Osho osha li shinyemateka neenghono! Osha li sha yahameka Grete neenghono, nokwa popya kutya oshe mu pula efimbo lile, opo a dimine po ovamwatate ovo nokukala e ve lineekela natango. Mokweendela ko kwefimbo, okwa ka mona kutya Jehova oku na okukala e va dimina po, onghee naye okwa pumbwa oku va dimina po. *

16. Omolwashike tu na okulonga noudiinini, opo tu lihonge okulineekela ovamwatate novamwameme?

¹⁶ Ngeenge ou na oshimoniwa shiyahameka, longa noudiinini u kale we lineekela vali vamwe. Otashi dulika wa pumbwa efimbo, ashike eenghendabala doye otadi ti sha. Ohatu dulu oku shi faneka ngaha, ngeenge otwa lile nale oikulya ya nyonauka, otashi dulika tu ka kale twa lungamena neenghono osho hatu li. Ashike oikulya oyo ya nyonauka itai tu ningifa tuha lye vali. Sha faafana, itatu ka efa oshimoniwa shimwe shii shi nghundipaleke elineekelo letu movamwatate novamwameme aveshe, ovo tu shii kutya inava wanenena. Ngeenge otwa kala twe lineekelafana vali, ohatu ka kala twa hafa. Ohatu ka dula yo okuyandja elitulemo kwaasho hatu dulu okuninga, opo tu xumife komesho omhepo yelineekelafano meongalo.

17. Omolwashike elineekelo la fimanenena, noshike hatu ka kundafana moshitukulwa tashi landula ko?

¹⁷ Elineekelo ola pumba mounyuni waSatana, ashike ohatu dulu okulineekela ovamwatate novamwameme, molwaashi otu holafane. Elineekelo la tya ngaho, otali xumifa komesho ehafo letu nosho yo oukumwe paife notali ke tu amena, eshi hatu ka taalela eenghalo didjuu monakwiiwa. Ongahelipi ngeenge owa li wa udifwa nai kuumwe? Kendabala okukala ho tale ko oinima ngaashi Jehova, ho tula moilonga omafinamhango Ombiibeli, ho kulike ohole yokuhola ovamwaxo nokulihonga koihopaenenwa yopaMbiibeli. Ohatu dulu okufinda omaliudo mai nokukala twe lineekela vali vamwe. Eshi hatu ningi ngaho, ohatu ka hafela enangeko noupuna lokukala tu na ookaume vehe fi okuyelekwa, ovo “ve dule ovamwaina ovalumenhu mokulineekelwa.” (Omayel. 18:24) Hafye ashike tu na oku ve lineekela, ndele navo ove na yo oku tu lineekela. Moshitukulwa tashi landula ko, ohatu ka kundafana nghee hatu dulu okuulika kutya ohatu dulu okulineekelwa kovamwatate.