1. Ongahelipi hatu dulu okudidilika mo kutya omunhu omulineekelwa?

 OMUNHU omulineekelwa oha kendabala okuwanifa po omaudaneko aye noha popi oshili. (Eps. 15:4) Ovanhu ohava kala ve shii kutya otava dulu oku mu lineekela. Otwa hala ovamwatate novamwameme va kale ve tu uditile ngaho. Oshike tashi dulu oku tu kwafela, opo va kale ve tu lineekela?

2. Ongahelipi hatu dulu okuulika kutya otu li ovalineekelwa?

² Itatu dulu okufininika ovanhu vakwetu ve tu lineekele. Otu na oku va ulikila okupitila mwaasho hatu ningi kutya otu li ovalineekelwa. Okulineekelwa okwa faafanifwa noimaliwa. Ohai monika noudjuu nohai kana po diva. Jehova okwe tu lineekela filufilu. Ohatu dulu okukala twe mu lineekela alushe, molwaashi ‘omudiinini moilonga yaye aishe.’ (Eps. 33:4) Okwa teelela tu mu hopaenene. (Ef. 5:1) Natu ka kundafaneni oihopaenenwa imwe yovapiya vaJehova ovo va li va hopaenena Xe womeulu, nova li va ulika kutya ove li ovalineekelwa. Ohatu ka kundafana yo omaukwatya atano, oo tae tu kwafele tu kale ovalineekelwa.

3-4. Ongahelipi omuprofeti Daniel a ulika kutya oku li omulineekelwa, naasho otashi tu linyengifa tu lipule omapulo elipi?

³ Omuprofeti Daniel okwe tu tulila po oshihopaenenwa sha denga mbada shokukala ovalineekelwa. Nonande okwa li a twalwa moukwatwa kuBabilon, okwa li a ulika diva kutya omudiinini nota dulu okulineekelwa. Ovanhu ova li ve mu lineekela neenghono, eshi Jehova e mu kwafela a fatulule eendjodi dohamba yaBabilon Nebukadnesar. Pomhito imwe, Daniel okwa li e na okulombwela ohamba kutya Jehova ine i hokwa, etumwalaka olo  la li tali dulu okuudifa nai ohamba. Daniel okwa li a pumbwa ouladi, opo a twale etumwalaka la tya ngaho, molwaashi Nebukadnesar okwa li omuhandunhu. (Dan. 2:12; 4:20-22, 25) Konima yomido dihapu da pita, Daniel okwa li vali a ulika kutya omulineekelwa, eshi a li a fatulula eshangelo lihe shiivike, lokekuma, mombala yaBabilon. (Dan. 5:5, 25-29) Lwanima, Darius, Omumedia, nosho yo omalenga aye navo ova li va didilika kutya Daniel oku na “omhepo yomayele mahapu.” Ova li va mona kutya Daniel “okwa li omudiinini, ndele muye inamu monika oshileda ile oshilonga inashi yuka.” (Dan. 6:3, 4) Nokuli novapangeli ovo inava itavela muKalunga, ova li va didilika kutya omupiya oo waJehova ota dulu okulineekelwa.

⁴ Tu na oshihopaenenwa shaDaniel momadiladilo, ohatu dulu okulipula kutya: ‘Onda talika ko ngahelipi kwaavo vehe fi Eendombwedi daJehova? Mbela onda shiivikila ngoo handi wanifa po oinakuwanifwa yange nondi li omulineekelwa?’ Omolwashike sha fimana okulipula omapulo oo? Omolwaashi ngeenge otwa kala ovalineekelwa, ohatu ka fimanekifa Jehova.

5. Omolwashike Hanania a li a shiivika e li omulineekelwa?

⁵ Mo 455 K.O.P., konima eshi ngoloneya Nehemia a tungulula ekuma laJerusalem, okwa li a konga ovalumenhu ovalineekelwa ovo va li tava ka fila oshisho oshilando. Nehemia okwa hoolola mokati kavo Hanania a kale omukulunhu wohotengulu. Ombiibeli oya popya kutya Hanania “okwa li omulumenhu e shii kulineekelwa ndele ha tila Kalunga, e dule vahapu.” (Neh. 7:2) Ohole yokuhola Jehova nosho yo oumbada wokutila oku mu nyemateka, oyo ya li ye linyengifa  Hanania a longe noudiinini oshinakuwanifwa keshe osho a li a pewa. Omaukwatya oo otae ke tu kwafela yo nafye tu kale ovalineekelwa moilonga yaKalunga.

6. Tikikus okwa li a ulika ngahelipi kutya oku li kaume omulineekelwa komuyapostoli Paulus?

⁶ Didilika oshihopaenenwa shaTikikus, omumwatate, oo a li e lineekelwa komuyapostoli Paulus. Eshi Paulus a li modolongo yomeumbo, okwa li e lineekela Tikikus nokwe mu popya e li ‘omupiya omudiinini.’ (Ef. 6:21, 22) Paulus ka li ashike e mu lineekela, molwaashi a twala eenhumwafo kovamwatate kuEfeso nokuKolossi, ndele okwa li yo e va twa omukumo noku va hekeleka. Tikikus ote tu dimbulukifa ovalumenhu ovadiinini nove shii okulineekelwa, ovo hava wanifa po eemhumbwe detu dopamhepo kunena. — Kol. 4:7-9.

7. Oshike to dulu okulihonga shi na sha nokukala omulineekelwa kovakulunhuongalo nokovayakuliongalo vomeongalo leni?

⁷ Kunena, ohatu shi pandula neenghono, eshi tu na ovakulunhuongalo novayakuliongalo ve shii okulineekelwa. Ngaashi Daniel, Hanania naTikikus, ohava wanifa po oinakuwanifwa yavo nelitulemo. Pashihopaenenwa, ngeenge tu li pokwoongala kwomokati koshivike, ohatu kala tu shii kutya oitukulwa aishe yokwoongala oya pewa ovo tave i yandje. Ovakulunhuongalo ohave shi pandula neenghono, ngeenge ovamwatate novamwameme ovo va pewa oitukulwa pokwoongala ove i lilongekida notave i yandje. Opo tu shi faneke, ihatu ongaonga okushiva ovakonakonimbiibeli vetu kokwoongala kwomexuliloshivike, molwaashi twa tila kutya otashi dulika oo a pewa oshipopiwa shomoipafi ine shi lilongekida. Ohatu kala yo tu na elineekelo kutya otu na oishangomwa oyo twa pumbwa moukalele. Ovamwatate, ovo ovadiinini, ohave tu file oshisho, nohatu pandula Jehova omolwavo. Omeenghedi dilipi hatu dulu okuulika kutya otu li ovalineekelwa?

8. Ongahelipi hatu dulu okukala tu na ondjele, ngeenge hatu ulike kutya otu na ko nasha navamwe? (Omayeletumbulo 11:13)

⁸ Otu hole ovamwatate novamwameme nohatu kala twa hala okushiiva shi na sha nonghalonawa yavo. Ashike otu na okukala tu na ondjele notwa fimaneka oinima yavo yopaumwene. Vamwe meongalo lopaKriste lopefimbo lovayapostoli, ova li hava ‘ambe vakwao, have lidopo moinima yavamwe nokupopya oinima oyo inai va pamba.’ (1 Tim. 5:13) Inatu hala okukala twe va fa nandenande. Ndele natu tye nee ngeno umwe okwe ku lombwela ouyelele waye wopaumwene, nokwe ku lombwela uhe u lombwele vamwe. Pashihopaenenwa, omumwameme otashi dulika e ku lombwele oupyakadi waye wokuhe na oukolele, ile eshongo limwe vali olo a taalela, nokwe ku lombwela u shi kaleke oshiholekwa. Otu na okuninga ngaashi e tu lombwela. * (Lesha Omayeletumbulo 11:13.) Paife natu ka kundafaneni eenghalo dimwe omo sha fimana okudiinina oiholekwa.

9. Ongahelipi oilyo youkwaneumbo hai ulike kutya oi li ovalineekelwa?

⁹ Ulika kutya ou li omulineekelwa moukwaneumbo. Keshe umwe moukwaneumbo oku na oshinakuwanifwa shokuhalombwela vamwe oiholekwa youkwaneumbo. Pashihopaenenwa, omukainhu Omukriste otashi dulika e na onghedindjikilile yokuninga oinima oyo omushamane waye ha mono i yolifa. Mbela ote ke i lombwela vamwe, osho tashi ka fifa ohoni omukulukadi waye? Hasho nandenande! Oku hole omukulukadi waye, noina hala okuninga sha osho tashi mu udifa nai. (Ef. 5:33) Ovanyasha ove hole okuungaungiwa navo nefimaneko.  Ovadali otava ningi nawa, ngeenge ova kaleke oshinima osho momadiladilo. Itava ka fifa ohoni ovana vavo mokulombwela vamwe omapuko avo. (Kol. 3:21) Ounona ova pumbwa okulihonga okukala ve na elungi, opo vaha lombwele ovanhu vokomaumbo oinima oyo tai dulu okufifa ohoni oilyo ikwao youkwaneumbo wavo. (Deut. 5:16) Ngeenge keshe umwe moukwaneumbo okwa kaleke oinima oyo ya pamba oukwaneumbo oiholekwa, oukwaneumbo otau ka kala u na ekwatafano la kola.

10. Oshike sha kwatelwa mokukala kaume kashili? (Omayeletumbulo 17:17)

¹⁰ Kala kaume e shii okulineekelwa. Omafimbo amwe, vahapu vomufye ohatu kala twa hala okulombwela ookaume ketu kopofingo nghee tu udite. Nomafimbo amwe, otashi dulika shi kale shidjuu okuninga ngaho. Otashi dulika inatu ikilila okuhololela vamwe omaliudo etu omoule, notashi dulika shi tu udife nai neenghono, ngeenge otwa ka mona kutya kaume ketu okwa lombwela vamwe osho twe mu lombwela. Mepingafano naasho, ohatu pandula ovo hava diinine oiholekwa. Ove li ‘ookaume,’ ile tu tye, ookaume kashili. — Lesha Omayeletumbulo 17:17.

11. (a) Ongahelipi ovakulunhuongalo novakulukadi vavo hava ulike kutya ovalineekelwa? (b) Oshilihongomwa shilipi hatu lihongo komukulunhuongalo, oo ha ungaunga noiholekwa yeongalo nolwanima ihe ke i lombwela oukwaneumbo waye? (Tala efano.)

¹¹ Kala u shii okulineekelwa meongalo. Ovakulunhuongalo ovo hava diinine oiholekwa, ove li kovamwaxe “oshikelelifo shokukelela omhepo nongaashi ehondameno lokuyaama.” (Jes. 32:2) Otu shii kutya ohatu dulu okulombwela ovalumenhu va tya ngaho oiholekwa yetu twa manguluka, tu shii kutya osho twe va lombwela itave ke shi holola. Ihatu va fininike ve tu lombwele oiholekwa. Kakele kaasho, ohatu pandula ovakulukadi vovakulunhuongalo, molwaashi ihava kendabala okufina ovashamane vavo ve va lombwele oiholekwa yavamwe. Oshi li lela enangeko noupuna kovakulukadi vovakulunhuongalo, eshi ihava lombwelwa oiholekwa yovamwaxe. Omukulukadi umwe womukulunhuongalo okwa ti: “Onda pandula neenghono, eshi omushamane wange iha lombwele nge  oiholekwa i na sha naavo a talela po petalelepo loufita, ile yaavo va pumbwa ekwafo lopamhepo, noiha lombwele nge nokuli omadina avo. Ohandi shi pandula neenghono, eshi omushamane wange ha diinine oiholekwa, opo ndiha kale handi lipula nomaupyakadi, oo itandi dulu okuninga po sha shi na sha nao. Omolwoshinima osho, ohandi kala nda manguluka okupopya nakeshe umwe meongalo. Ondi na elineekelo kutya, ngeenge onda lombwele omushamane wange omaliudo ange, ile omaupyakadi ange opaumwene, nao ote ke a kaleka oshiholekwa.” Oshoshili kutya atusheni otwa hala okukala twa shiivika tu li ovalineekelwa. Ndele mbela omaukwatya elipi tae ke tu kwafela tu hange elalakano olo? Natu ka kundafaneni atano omuo.

12. Omolwashike hatu dulu okutya ohole oi li oukwatya wa fimanenena, oo tau dulu oku tu kwafela tu kale ovalineekelwa? Yandja oshihopaenenwa.

¹² Ohole oi li oukwatya wa fimanenena, oo tau dulu oku tu kwafela tu kale ovalineekelwa. Jesus okwa ti kutya oipango ivali inenenene oyo okuhola Jehova nosho yo ovanhu vakwetu. (Mat. 22:37-39) Ohole yetu yokuhola Jehova otai ke tu linyengifa tu shikule oshihopaenenwa shaye sha denga mbada shokukala omulineekelwa. Pashihopaenenwa, ohole yetu yokuhola ovamwatate novamwameme otai ke tu linyengifa tuha holole oinima yavo yopaumwene. Katu na okuholola oinima oyo tai dulu oku va yahameka, oku va fifa ohoni, ile oku va udifa nai. — Joh. 15:12.

13. Omonghedi ilipi elininipiko tali tu kwafele tu kale ovalineekelwa?

¹³ Elininipiko otali ke tu kwafela tu kale ovalineekelwa. Omukriste oo omulininipiki iha kendabala a kale oye wotete okuholola oshiholekwa. (Fil. 2:3) Iha kendabala yo okuningifa vamwe va diladile kutya oku shii oinima oyo i li oiholekwa. Elininipiko otali ke tu kwafela yo tu henuke okulombwela ovanhu vahapu omataleko etu e na sha noinima oyo inai popiwa mOmbiibeli, ile moishangomwa yetu.

14. Ongahelipi eendunge dokuyoolola tadi tu kwafele tu kale ovalineekelwa?

¹⁴ Eendunge dokuyoolola otadi dulu okukwafela Omukriste a yoolole pokati ‘kefimbo lokumwena nefimbo lokupopya.’ (Omuud. 3:7) Momaputuko amwe, omu na outumbulilo tau ti: “Okupopya oku li ngaashi oshisilveri, nokumwena oku li ngaashi oshingoli.” Oku shi popya noitya imwe, ope na omafimbo amwe opo hashi kala shiwa okumwena ponhele yokupopya. Nomolwaasho Omayeletumbulo 11:12, a ti: “Omulumenhu e neendunge ta mwena.” Natu ka taleni koshihopaenenwa. Omukulunhuongalo umwe a pyokoka, luhapu oha pulwa a ka kwafele komaongalo amwe, oo taa ungaunga nomaupyakadi a kwata moiti. Didilika osho omukulunhuongalo mukwao a popya kombinga yaye, a ti: “Oha kala alushe a lungama, opo aha popye omauyelele e na sha nomaongalo makwao.” Molwaashi omukulunhuongalo oo omunaendunge, ovakulunhuongalo vakwao meongalo lavo ove mu fimaneka. Ove shii kutya ita ka hololela vamwe oiholekwa yavo.

15. Yandja oshihopaenenwa osho tashi ulike kutya omolwashike vamwe tave ke ku lineekela, ngeenge ou li omunashili.

¹⁵ Okukala omunashili oshi li oshinima shimwe osho twa pumbwa, ngeenge otwa hala okukala ovalineekelwa. Ohatu kala twe lineekela omunhu oo omunashili, molwaashi otu shii kutya oha popi alushe oshili. (Ef. 4:25; Heb. 13:18) Pashihopaenenwa, natu tye nee owa hala okuxwepopaleka onghedi yoye yokuhonga. Opo nee owa pula umwe a pwilikine koshipopiwa shoye, opo e ku pe omaetepo taa longo e na sha nanghee u na okuxwepopala. Olyelye to ke lineekela e ku pe omayele e li paushili? Mbela oyoo te ke ku lombwela osho tashi ku wapalele, ile oyoo te ku lombwele oshili? Enyamukulo ola  yela. Ombiibeli oya ti: “Okuhanyenwa pombada ku dule ohole ya holekwa. Omadengo ookaume e shii kulineekelwa.” (Omayel. 27:5, 6) Nonande otashi dulika shi kale shidjuu potete, omatyekosha akaume e li paushili, otae ke ku kwafela mokweendela ko kwefimbo.

16. Omayeletumbulo 10:19 okwa divilika ngahelipi kutya otwa pumbwa elipangelo?

¹⁶ Osha fimanenena okukala tu na elipangelo, ngeenge otwa hala vamwe va kale ve tu lineekela. Oukwatya oo ohau tu kwafele tu kale twa mwena, ngeenge hatu yelekwa tu holole oinima oyo twa lombwelwa tuhe i popye. (Lesha Omayeletumbulo 10:19.) Otashi dulu okukala shidjuu okukala tu na elipangelo, ngeenge hatu longifa omapandja etu okointaneta. Ngeenge inatu lungama, ohatu dulu okuhololela ongudu inene oiholekwa inatu shi nongela. Shimha twa tandavelifa ouyelele paelektronika, itatu ka dula vali okupangela nghee ovanhu ve na okulongifa ouyelele wa tya ngaho, ile omaupyakadi mahapu, oo tau ka etifa. Elipangelo ohali tu kwafele yo tu kale twa mwena, ngeenge ovapataneki vetu tava kendabala oku tu yula tu holole oinima oyo tai dulu okutulifa moshiponga ovamwatate novamwameme. Osho otashi dulu okuningwa, ngeenge hatu pulwaapulwa kopolifi moilongo omo oilonga yetu ya shilikwa, ile ya tulilwa po eendjidikila. Ohatu dulu okutula moilonga monghalo oyo, ile meenghalo vali dikwao efinamhango olo tali ti: “Onda hala okuyukifa okanya kange noshitomo.” (Eps. 39:1) Otwa pumbwa okukala ovalineekelwa, kashi na nee mbudi kutya ohatu ungaunga nomaukwaneumbo etu, nookaume ketu, novamwatate novamwameme, ile nakeshe umwe. Otwa pumbwa elipangelo, opo tu kale ovalineekelwa.

17. Ongahelipi hatu dulu okuxumifa komesho elineekelafano meongalo letu?

¹⁷ Inatu pandula tuu eshi Jehova e tu nanena kovamwatate ovo ovanahole nove shii okulineekelwa! Atusheni otu na oshinakuwanifwa shokukala twe lineekelwa kovamwatate novamwameme. Ngeenge otwa longo noudiinini tu kale ovanahole, ovalininipiki, ovanashili, tu na eendunge dokuyoolola nelipangelo, ohatu ka xumifa komesho okulineekelafana meongalo letu. Otu na okutwikila okulonga noudiinini, opo tu ulike kutya otu li ovalineekelwa. Natu hopaeneneni Kalunga ketu, Jehova, nokutwikila okuulika kutya otu li ovalineekelwa.