1-2. Omolwashike shiwa okukonakona ehokololo laSimson?

 OSHIKE hashi uya momadiladilo oye, ngeenge owa udu edina Simson? Otashi dulika ho diladila komulumenhu oo a li e na eenghono dinenenene. Ou li mondjila. Ashike Simson okwa li a ninga etokolo lihe li pandunge olo la li le mu etela oidjemo inyikifa oluhodi. Ndele nande ongaho, Jehova okwa li a yandja elitulemo koilonga aishe youdiinini yaSimson, oyo a shangififa mOmbiibeli omolwouwa wetu.

² Jehova okwa li a longifa Simson, opo a wanife po oinima ikumwifi, a kwafele oshiwana shaYe shOvaisrael. Omido omafele konima yefyo laSimson, Jehova okwa li a nwefa mo omuyapostoli Paulus a kwatele edina laSimson momusholondodo wovalumenhu ovo va li va ulika eitavelo monghedi ya tongomana. (Heb. 11:​32-34) Oshihopaenenwa shaSimson otashi tu tu omukumo. Okwa li e lineekela muJehova, nokuli naashi a li meenghalo didjuu. Moshitukulwa eshi, ohatu ka kundafana osho hatu lihongo kuSimson nanghee oshihopaenenwa shaye tashi dulu oku tu twa omukumo.

3. Simson okwa li a pewa oshilonga shilipi?

³ Eshi Simson a dalwa, Ovafilisti ova li tava pangele oshiwana shOvaisrael nova li tave shi fininike. (Ovatok. 13:1) Ovaisrael ova li tava mono oixuna neenghono, molwaashi Ovafilisti ova li tave va pangele nonyanya. Jehova okwa li a hoolola Simson a ‘xupife Israel momake Ovafilisti.’ (Ovatok. 13:5) Osho kasha li tuu oshilonga shidjuu neenghono! Simson okwa li e na okulineekela muJehova, opo a wanife po oshilonga osho shidjuu.

4. Ongahelipi Jehova a li a kwafela Simson e limangulule ko kOvafilisti? (Ovatokolipangeli 15:​14-16)

 ⁴ Natu ka taleni koshihopaenenwa osho tashi ulike nghee Simson a li e lineekela muJehova nosho yo meyambidido olo a li e mu pa. Pomhito imwe, etangakwaita enaenghono lOvafilisti ola li le uya okukwata po Simson muLehi, tashi dulika muJuda. Ovalumenhu Ovajuda ova li va tila, onghee ova li va tokola, opo va yandje Simson kovatondi. Oshiwana shaSimson osha li she mu manga neengodi mbali dipe sha diinina noku mu twala kOvafilisti. (Ovatok. 15:​9-13) Ashike ‘omhepo yOmwene oye uya’ muSimson nokwe limangulula mo meengodi. Opo nee “okwa mona oluhamama litalala londongi,” te li kufa, nokwe li longifa a dipae ovalumenhu Ovafilisti 1 000. — Lesha Ovatokolipangeli 15:​14-16.

5. Ongahelipi Simson a li a ulika kutya okwe lineekela muJehova, eshi a longifa ohamama yondongi?

⁵ Omolwashike Simson a li a longifa ohamama yondongi? Oshilongifo osho kasha li naanaa hashi longifwa. Nopehe na omalimbililo, Simson okwa li e shii kutya Jehova ote ke mu kwafela a finde Ovafilisti noshilongifo keshe osho a li e na. Onghee hano, omulumenhu oo omudiinini okwa li a longifa keshe osho e na, opo a wanife po ehalo laJehova. Molwaashi Simson okwa li e lineekela muJehova, Jehova okwa li e mu nangeka noupuna nokwa li a pondola neenghono.

6. Ngeenge hatu wanifa po oinakuwanifwa yetu yopakalunga, oshike hatu dulu okulihonga kuSimson?

⁶ Nafye Jehova ota dulu oku tu pameka, opo tu wanife po oinakuwanifwa yetu, nokuli naayo tai monika ya fa idjuu. Kalunga ota dulu oku tu kwafela monghedi oyo tashi dulika i tu kumwife. Kala u na elineekelo kutya Jehova, oo a li a pameka Simson, ota dulu yo oku ku kwafela u longe ehalo laYe, shimha ashike u na elineekelo muYe kutya ote ku kwafele. — Omayel. 16:3.

7. Oshihopaenenwa shilipi tashi ulike nghee sha fimana okukonga ewiliko kuJehova?

⁷ Ovamwatate novamwameme vahapu, ovo hava kwafele mokutunga eenhele detu delongelokalunga, ova ulika kutya ove lineekela muJehova. Mefimbo la pita, ovamwatate ova li hava dutu nokutunga Omalupale Ouhamba mape  mahapu nosho yo omatungo amwe. Ndele mokweendela ko kwefimbo, eshi ovanhu vahapu tava ninginifwa, ehangano ola li la mona kutya opa pumbwa okuningwa omalunduluko. Ovamwatate ovo tava kwatele komesho ova li va konga ewiliko kuJehova okupitila meilikano, nova kendabala eenghedi dipe, ngaashi okulanda eenhele noku di wapekulula. Robert, oo omido opo da di ko a kala ta longo meeprojeka dihapu dokutunga mounyuni, okwa ti: “Potete, kasha li shipu okutambula ko onghedi oyo ipe.” Okwa weda ko, a ti: “Oya yooloka ko filufilu kwaayo twa li hatu longifa oule womido. Ashike ovamwatate ova li ve na ehalo okuninga omalunduluko, naasho osha ulika kutya Jehova ota nangeke noupuna omalunduluko oo.” Osho oshi li ashike oshihopaenenwa shimwe shanghee Jehova ta wilike oshiwana shaye, opo shi wanife po ehalo laye. Efimbo nefimbo, atusheni otwa pumbwa okulipula kutya, ‘Mbela ohandi kongo ngoo ewiliko laJehova nokukala handi tifuka moilonga oyo handi mu longele?’

8. Pomhito imwe, eshi Simson a li a fya enota neenghono okwa li a ninga po shike?

⁸ Otashi dulika to dimbuluka oinima imwe ikumwifi oyo Simson a li a longa. Okwa li a dipaa onghoshi oye aeke, nolwanima Ovafilisti 30 muAskelon. (Ovatok. 14:​5, 6, 19) Simson okwa li e shii kutya ita dulu okuninga oinima oyo nopehe na ekwafo laJehova. Osho osha li shi liwetikile pomhito imwe, eshi a li a fya enota neenghono konima eshi a dipaa Ovafilisti 1 000. Okwa li a ninga po shike? Ponhele yokukala e lineekela muye mwene noku ka konga omeva, okwa li a pula ekwafo kuJehova. — Ovatok. 15:18.

9. Jehova okwa li e linyenga ngahelipi, eshi Simson e mu pula ekwafo? (Ovatokolipangeli 15:19)

⁹ Jehova okwa li a nyamukula Simson, eshi a li e mu pula e mu kwafele, moku mu pa omeva pashikumwifilonga. Eshi Simson a li a nwa omeva oo, ‘omhepo yaye ya aluka,’ ile tu tye eenghono daye oda aluka. (Lesha Ovatokolipangeli 15:19.) Osha fa shi li ngaha kutya ofifiya oyo ipe oya kala po omido donhumba, fiyo osheshi omuprofeti Samuel a li a nwefwa mo a shange embo lOvatokolipangeli. Ovaisrael ovo va mona ofifiya oyo otashi dulika va li va dimbulukifwa kutya, ngeenge ova kala ve lineekela muJehova, ote ke va pa ekwafo olo va pumbwa.

10. Oshike sha kwatelwa mo mokukonga ekwafo kuJehova? (Tala yo efano.)

¹⁰ Nafye otwa pumbwa okukonga ekwafo kuJehova, kashi na nee mbudi kutya otu na oitalenti, ile okudula kwa tya ngahelipi, ile oshosho twa longa nale moilonga yaye. Otu na okudimina nelininipiko oushili oo kutya ohatu dulu ashike okupondola lelalela, ngeenge otwe lineekela muJehova. Ngaashi ashike Simson a li a mona eenghono, eshi a nwa omeva oo Jehova e mu pa, nafye ohatu ka kala twa pama pamhepo, ngeenge otwa longifa omafiloshisho aeshe oo Jehova e tu pa. — Mat. 11:28.

11. Ongahelipi hatu dulu okulineekela mekwafo laJehova, noshike osho omumwatate nomumwameme umwe va li va ninga?

¹¹ Natu ka taleni koshihopaenenwa shaAleksey, umwe womovamwatate moRussia, oo te lididimikile omahepeko a kwata moiti. Oshike she mu kwafela e lididimikile onghalo oyo idjuu neenghono? Ye nomukulukadi waye, ohava konakona Ombiibeli pandjikilile nokuninga elongelokalunga loukwaneumbo. Okwa ti: “Ohandi kendabala, opo ndi kale handi ningi ekonakono lange lopaumwene nosho yo okulesha Ombiibeli efiku keshe. Ongula keshe, ame nomukulukadi wange, ohatu kundafana omushangwa wefiku nohatu ilikana kuJehova pamwe.” Osho otashi tu hongo shike? Ponhele yokukala twe lineekela mufye vene, otu na  okukala twe lineekela muJehova. Ngahelipi? Omokukala hatu ningi pandjikilile oinima oyo tai pameke eitavelo letu, ngaashi okukonakona Ombiibeli, okwiilikana, okukala pokwoongala nosho yo okuudifa. Opo nee Jehova ote ke tu pa ekwafo olo twa pumbwa, opo tu twikile oku mu longela. Kalunga okwa li a pameka Simson. Onghee ohatu dulu okukala noushili kutya nafye ote ke tu pameka.

12. Simson okwa li a ninga etokolo lihe li pandunge lilipi, nongahelipi osho sha li sha yooloka ko koimoniwa yaye ya tetekela?

¹² Ngaashi fye, Simson naye ka li a wanenena, onghee omafimbo amwe okwa li ha ningi omatokolo ehe li pandunge. Etokolo limwe olo a li a ninga ola li le mu etela oilanduliko inyikifa oluhodi. Konima eshi Simson a kala ta longo e li omutokoli oule wefimbo, okwa “hokwa omukainhu mefilu laSorek, edina laye Delila.” (Ovatok. 16:4) Metetekelo, Simson okwa li a hala okuhombola omukainhu Omufilisti. ‘Osho osha dja kOmwene, osheshi ye okwa konga omhito okutwila Ovafilisti ondubo.’ Lwanima, Simson okwa ka kala meumbo lombwada moshilando shOvafilisti, Gasa. Pomhito oyo Kalunga okwa li a pa Simson eenghono, opo a tumbe po omivelo doshilando, naasho osha li sha ningifa oshilando shi kale sha heva. (Ovatok. 14:​1-4; 16:​1-3) Ashike Delila otashi dulika a li Omuisrael, nekwatafano laye naye kala li tali ke mu pa omhito, opo a lwife Ovafilisti.

13. Ongahelipi Delila a li a ningifa Simson a ye monghalo ii?

¹³ Delila okwa li a pewa oimaliwa ihapu kOvafilisti, opo a kengelele Simson. Mbela Simson okwa li e hole Delila neenghono noka li a dula okudidilika osho Delila a li a hala okuninga? Kashi na nee mbudi kutya oshike, Delila okwa kala ta fininike Simson lwoikando, opo a holole odjo  yeenghono daye, noxuuninwa Simson okwa li e mu lombwela. Shinyikifa oluhodi, Simson okwa li a efa a ye monghalo oyo ye mu ningifa a kanife eenghono daye nosho yo okukala ina hokiwa kuJehova oule wefimbo. — Ovatok. 16:​16-20.

14. Simson okwa li a mona oilanduliko ilipi, molwaashi a li e lineekela Delila?

¹⁴ Simson okwa li a mona oilanduliko inyikifa oluhodi, molwaashi okwa li e lineekela Delila ponhele yaJehova. Ovafilisti ova li va kwata Simson noku mu twiyula omesho. Okwa li a tulwa modolongo muGasa, omo ovanhu va li ve mu fifa ohoni nove mu ninga omupika, ha tu oilya. Opo nee Ovafilisti ova li va eta Simson koshivilo shimwe shavo opo va li va ongala, opo ve mu fife ohoni. Ova li va yambela oshikalunga shavo Dagon eyambo linene a fa oye a li a yandja Simson momake avo. Ova li va kufa Simson modolongo ve mu eta koshivilo e va “shikile okaxumba,” opo ve mu yole. — Ovatok. 16:​21-25.

15. Ongahelipi Simson a li a ulika kutya okwe lineekela vali muJehova? (Ovatokolipangeli 16:​28-30) (Tala efano kombada yoshifo.)

¹⁵ Simson okwa li a ninga epuko la kwata moiti, ashike ka li a sholola. Okwa Ii a konga omhito, opo a wanife po oshilonga osho a li a pewa kuKalunga shokulwifa Ovafilisti. (Lesha Ovatokolipangeli 16:​28-30.) Simson okwa li a indila Jehova, a ti: ‘Kwafele nge ndi shiive okukwatela Ovafilisti onghone.’ Kalunga kashili okwa li a nyamukula eilikano laSimson nokwa li e mu pa vali eenghono pashikumwifilonga. Oshidjemo, Simson okwa li a dipaa Ovafilisti vahapu pomhito opo shi dulife osho a li a ninga nale.

16. Oshike hatu lihongo kepuko laSimson?

¹⁶ Nonande Simson okwa li a mona oilanduliko inyikifa oluhodi omolwepuko laye, ka li a efa po okukendabala okulonga ehalo laJehova. Nokuli nonande otu ninge epuko notwa pumbwa okupukululwa, ile tu kanife oufembanghenda wonhumba, inatu sholola. Dimbuluka kutya Jehova okwe lilongekida oku tu dimina po. (Eps. 103:​8-10) Nonande ohatu ningi omapuko, natango ohatu dulu okulongifwa kuJehova, ngaashi ashike Simson.

17-18. Oshike wa mona tashi tu omukumo moshihopaenenwa shaMichael? (Tala yo efano.)

¹⁷ Natu ka taleni koshihopaenenwa shomumwatate omunyasha wedina Michael. Okwa kala e lipyakidila moilonga yaJehova, e li omuyakuliongalo nosho yo omukokolindjila wondjikilile. Shinyikifa oluhodi, okwa li a ninga epuko olo le mu ningifa a kanife oinakuwanifwa yaye meongalo. Okwa ti: “Fiyo oposhitwa osho,  onda li nde lipyakidila neenghono moilonga yaJehova. Opo nee ombadilila, onda li ndi udite itandi dulu okuninga sha moilonga yaJehova. Nghi na fiku nda diladilile kutya Jehova okwa efa nge, ndele onda li handi lipula ngeenge ekwatafano lange naye otali ka kala ngoo vali ngaashi la li nale. Onda li handi lipula yo ngeenge ohandi ka dula ngoo vali okuyakula meongalo pauyadi ngaashi nale.”

¹⁸ Shihokwifa, Michael ka li a sholola. Okwa ti: “Onda yandja elitulemo kokutungulula ekwatafano lange naJehova mokupopya naye pandjikilile meilikano, mokukonakona nosho yo mokudilonga.” Mokweendela ko kwefimbo, Michael okwa ka pewa vali omaufembanghenda aye meongalo. Paife ota longo e li omukulunhuongalo nosho yo omukokolindjila wondjikilile. Okwa ti: “Eyambidido nosho yo etwomukumo olo nda mona, unene tuu okudja kovakulunhuongalo, ola kwafela nge ndi mone kutya Jehova oku hole nge natango. Ohandi dulu okuyakula vali meongalo ndi na eliudo la koshoka. Oshimoniwa osho osha honga nge kutya Jehova ota dulu okudimina po keshe oo e livela ombedi shili.” Ohatu dulu okukala nelineekelo kutya Jehova ote tu longifa note tu nangeke yo noupuna, nokuli nonande otwa ninga omapuko, shimha ashike hatu ningi keshe osho hatu dulu, opo tu yukife eendjila detu nokutwikila okukala twe mu lineekela. — Eps. 86:5; Omayel. 28:13.

19. Ongahelipi oshihopaenenwa shaSimson she ku pameka?

¹⁹ Moshitukulwa eshi, otwa kundafana oiningwanima itunhula inini yomonghalamwenyo yaSimson. Ka li a wanenena, ashike ka li a efa po okukendabala okulongela Jehova, nokuli nokonima eshi a li a ninga epuko naDelila. Jehova okwa twikila okulongifa Simson. Kalunga okwa li a longifa vali Simson monghedi ya tongomana. Jehova okwa li natango a tala ko Simson e li omulumenhu oo a ulika eitavelo monghedi ya tongomana nokwe mu kwatela momusholondodo wovadiinini, oo tau hangwa mOvaheberi etukulwa 11. Itashi tu tuu omukumo okushiiva kutya ohatu longele Tate yetu womeulu omunahole a tya ngaho, oo a halelela oku tu pameka, unene tuu ngeenge twa pumbwa ekwafo! Ngaashi Simson, natu indileni Jehova hatu ti: “Dimbulukwe nge, u pameke nge.” — Ovatok. 16:28.