1. Diva fimbo omuyapostoli Petrus ina fya, okwa li a nwefwa mo a ninge shike?

 OMUYAPOSTOLI PETRUS okwa longela Jehova noudiinini oule womido dihapu. Okwa li a waimina Jesus moilonga yaye yokuudifa nokwa li a hovela oilonga yokuudifa mokati kaavo vehe fi Ovajuda, nolwanima okwa ka ninga oshilyo sholutuwiliki. Lwopexulilo longhalamwenyo yaye, eshi a li e shii kutya oku li pokufya, Jehova okwa li e mu pa oilonga ihapu. Mo 62-64 O.P. lwaapo, Petrus okwa li a nwefwa mo a shange eenhumwafo mbali, omambo Ombiibeli, Petrus wotete nomutivali. Okwa li e na elineekelo kutya eenhumwafo odo otadi ka kwafela Ovakriste konima yefyo laye. — 2 Pet. 1:​12-15.

2. Omolwashike eenhumwafo odo Petrus a shanga da li di li pefimbo lela?

² Petrus okwa shanga eenhumwafo daye pefimbo opo ovaitaveli vakwao va li tava ka taalela “eenghalo didjuu.” (1 Pet. 1:6) Ovalumenhu ovakolokoshi ova li tava kendabala okweeta omahongo oipupulu nosho yo omahongo inaa koshoka meongalo lopaKriste. (2 Pet. 2:​1, 2, 14) Ovakriste ovo va li muJerusalem ova li tava ka taalela “exulilo loinima aishe,” ehanauno loshilando osho notembeli yasho, olo la li tali ka etwa komatangakwaita aRoma. (1 Pet. 4:7) Nopehe na omalimbililo, eenhumwafo daPetrus oda li da kwafela Ovakriste va mone osho tava dulu okuninga, opo ve lididimikile omayeleko oo va li muo pefimbo opo nove lilongekidile omayeleko omonakwiiwa. b

3. Omolwashike tu na okukonakona eenhumwafo da nwefwa mo daPetrus?

 ³ Nonande Petrus okwa li a shangela Ovakriste ovo va li ko pefimbo opo, Jehova okwa kwatela eenhumwafo odo mEendjovo daYe. Onghee ohatu dulu okumona ouwa paife meenhumwafo odo. (Rom. 15:4) Ngaashi Ovakriste ovo, nafye otu li mounyuni omo ovanhu ve na elihumbato la xutuka, nohatu dulu okushakeneka omayeleko, oo taa dulu oku shi ningifa shidjuu, eshi hatu longele Jehova. Shikwao vali, mafiku ohatu ka taalela oudjuu munene u dulife oo wa li wa hanga Ovajuda, eshi Jerusalem notembeli yasho ya li ya hanaunwa po. Ohatu dulu okumona omadimbulukifo amwe a fimana meenhumwafo mbali daPetrus. Omadimbulukifo oo otae tu kwafele tu kale twa teelela efiku laJehova, tu finde oumbada notu kulike ohole yomoule yokuholafana. Omadimbulukifo a tya ngaho otaa dulu yo okukwafela ovakulunhuongalo va mone nghee tava dulu okufila oshisho nomupondo eemhumbwe doufita.

4. Ngaashi sha ulikwa muPetrus omutivali, etukulwa 3:3, 4, oshike tashi dulu okunghundipaleka eitavelo letu?

⁴ Otwa dingililwa kovanhu ovo inava itavela momaxunganeko Ombiibeli. Ovapataneki otashi dulika ve tu sheke, molwaashi twa kala twa teelela nodjuulufi oule womido exulilo li uye. Ovakembauli vamwe otashi dulika va tye kutya itali uya nandenande. (Lesha 2 Petrus 3:​3, 4.) Ngeenge otwa udu omatyekosha a tya ngaho komuneumbo, komunailonga pamwe nafye, ile koshilyo shoukwaneumbo wetu, otashi dulu okunghundipaleka eitavelo letu. Petrus okwa yelifa osho tashi dulu oku tu kwafela.

5. Oshike tashi dulu oku tu kwafela tu teelele nelididimiko exulilo lounyuni? (2 Petrus 3:​8, 9)

⁵ Osha fa shi li ngaha kuvamwe kutya Jehova ita eta diva exulilo lounyuni ou woukolokoshi. Eendjovo daPetrus otadi dulu oku tu kwafela tu kale tu na etaleko liwa kutya etaleko laJehova li na sha nefimbo ola yooloka ko neenghono kwaalo lovanhu. (Lesha 2 Petrus 3:​8, 9.) Omido eyovi kuJehova oda fa efiku limwe. Jehova omulididimiki noina hala nande oumwe a hanaunwe po. Ngeenge efiku laye ola fiki, ota ka xulifa po ounyuni ou. Katu na tuu oufembanghenda wokulongifa efimbo olo la xupa ko, opo tu udifile ovanhu vomoiwana aishe!

6. Ongahelipi hatu dulu ‘okukaleka momadiladilo’ efiku laJehova? (2 Petrus 3:​11, 12)

⁶ Petrus okwe tu ladipika tu ‘kaleke momadiladilo” efiku laJehova. (Lesha 2 Petrus 3:​11, 12.) Ongahelipi hatu dulu okuninga ngaho? Efiku keshe ohatu dulu okudiladila kunghee onghalamwenyo tai ka kala ya denga mbada mounyuni mupe. Faneka momadiladilo to fudile mo omhepo i yela, to li oikulya i na oukolele, to hambelele ovaholike voye ovo tava ka nyumunwa noto hongo ovanhu, ovo va li ko omido dihapudihapu da pita, kombinga yanghee omaxunganeko Ombiibeli a wanifwa. Okudilonga kwa tya ngaho otaku ke ku kwafela u kale wa teelela nodjuulufi noku ku shilipaleka kutya otu li momafiku axuuninwa. ‘Omolweshiivo la denga mbada olo tu na’ li na sha nonakwiiwa, itatu ka ‘pukifwa’ kovahongi ovanaipupulu. — 2 Pet. 3:17.

7. Oumbada wokutila ovanhu otau dulu oku tu kuma ngahelipi?

⁷ Molwaashi otu shii kutya efiku laJehova otali uya mafiku, otwa hala okuninga eenghendabala ngaashi hatu dulu tu udifile vamwe onghundana iwa. Ashike omafimbo amwe otashi dulika tu kale twa tila okupopya. Omolwashike mbela? Omolwaashi otashi dulika tu kale twa tila osho vamwe tava diladila kombinga yetu, ile ve tu ningile. Osho osha li sha ningilwa Petrus. Moufiku oo Jesus a li ta pangulwa,  Petrus okwa li a dopa okuliholola kutya oku li omuhongwa waJesus nokwa li nokuli e mu likala lwoikando kutya ke mu shii. (Mat. 26:​69-75) Omuyapostoli oye tuu oo lwanima okwa ka popya a tomhwa, a ti: “Inamu tila osho ovanhu hava tila, noinamu piyaanekwa kusha.” (1 Pet. 3:14) Eendjovo daPetrus otadi tu shilipaleke kutya ohatu dulu okufinda oumbada wokutila ovanhu.

8. Oshike tashi dulu oku tu kwafela tu finde oumbada wokutila ovanhu? (1 Petrus 3:15)

⁸ Oshike tashi dulu oku tu kwafela tu finde oumbada wokutila ovanhu? Petrus okwe tu lombwela, a ti: “Yapuleni Kristus momitima deni e li Omwene.” (Lesha 1 Petrus 3:15.) Osho osha kwatela mo okudilonga kondodo nosho yo keenghono dOmwene nOhamba yetu, Kristus Jesus. Ngeenge owa tila, ile owa mbadapala, eshi pa holoka omhito yokuudifila vamwe onghundana iwa, dimbuluka Ohamba yetu. I faneka tai pangele meulu ya dingililwa kovaengeli omamiliyona. Dimbuluka kutya oi na ‘eenghonopangelo adishe meulu nokombada yedu’ nosho yo kutya ‘oi li pamwe naave alushe fiyo omomafiku axuuninwa ounyuni ou.’ (Mat. 28:​18-20) Petrus okwe tu ladipika tu kale tu “shi shii,” ile tu tye tu kale twe lilongekida alushe okupopila eitavelo letu. Mbela ino hala okuudifa koilonga, kofikola, ile meenhele vali dimwe di lili? Diladila komesho yefimbo nghee tashi dulika to ke shi ninga, opo nee to lilongekida osho to ka popya. Ilikana u pewe ouladi,  nokukala u na elineekelo kutya Jehova ota dulu oku ku kwafela u finde oumbada wokutila ovanhu. — Oil. 4:29.

9. Ongahelipi Petrus a li a dopa okuulika ohole pomhito imwe? (Tala yo efano.)

⁹ Petrus okwe lihonga nghee e na okuulika ohole. Opo a li, eshi Jesus a ti: “Ohandi mu pe oshipango shipe kutya kaleni mu holafane, ndele kaleni mu holafane ngaashi ame nda kala ndi mu hole.” (Joh. 13:34) Kakele kaasho, Petrus lwanima okwe ke liyandja kefininiko nokwa li a anya okulya pamwe novamwatate novamwameme vomoiwana imwe. Omuyapostoli Paulus okwa li a popya osho Petrus a ninga kutya okwe “liningifa,” ile oku na oihelele. (Gal. 2:​11-14) Petrus okwa li a tambula ko epukululo olo nokwe lihonga kulo. Meenhumwafo daye adishe, okwa divilika kutya katu na ashike okukala tu udite tu hole ovamwatate novamwameme, ndele otu na yo okuulika ohole ya tya ngaho.

10. Oshike tashi tu kwafele tu ulike “ohole youmwainafana ihe na oihelele”? (1 Petrus 1:22)

¹⁰ Petrus okwa popya kutya otu na okukala ‘tu na ohole youmwainafana ihe na oihelele’ yokuhola ovaitaveli vakwetu. (Lesha 1 Petrus 1:22.) Ohole ya tya ngaho ohai etifwa kokudulika “kehongo loshili,” olo la kwatela mo ehongo olo kutya “Kalunga ke na okatongo.” (Oil. 10:​34, 35) Itatu dulu okudulika koshipango shaJesus shi na sha nohole, ngeenge otu hole ashike vamwe meongalo, ndele katu hole ovanhu aveshe. Otashi dulika tu kale tu na ekwatafano lopofingo navamwe, ngaashi Jesus a li a ninga. (Joh. 13:23; 20:2) Ashike Petrus okwe tu dimbulukifa kutya otu na okukendabala okukala tu na “ohole youmwainafana,” tu hole ovamwatate novamwameme aveshe. — 1 Pet. 2:17.

11. Oshike sha kwatelwa mokukala tu hole vamwe “tashi di komutima”?

¹¹ Petrus okwe tu ladipika tu kale tu “holafane tashi di komutima.” Movelishe oyo, outumbulilo ohole “tai di komutima,” ile yomoule owa hala okutya okuhola umwe nokuli nonande oshidjuu oku mu ulikila ohole. Pashihopaenenwa, ongahelipi ngeenge omumwatate okwe tu udifa nai, ile e tu ehameka monghedi yonhumba, ile yongadi? Potete otashi dulika tu kale twa hala okuungaunga naye monghedi omo a ungaunga nafye, ponhele yoku mu ulikila ohole. Ashike Petrus okwe lihonga kuJesus kutya elihumbato la tya ngaho ihali hafifa Kalunga. (Joh. 18:​10, 11) Petrus okwa shanga, a ti: “Inamu lishunifila owii ile omatukano. Ndele ponhele yaasho, nangekeni noupuna vakweni.” (1 Pet. 3:9) Ngeenge oho ulike ohole tai di komutima oto ka kala omunalukeno noto ka kala u na ko nasha nokuli naavo ve ku udifa nai.

12. (a) Ohole tai di komutima otai ke tu linyengifa tu ninge vali shike? (b) Oshike wa hala okukendabala okuninga, ngaashi sha ulikwa mokavidio Kala wa lenga oufembanghenda wokukala twa hangana?

¹² Monhumwafo yaye yotete, Petrus okwa longifa outumbulilo wa yukila oko ‘ohole yomoule.’ Ohole ya tya ngaho ohai tuvikile, hamatimba ashike manini, ndele “onduba yomatimba.” (1 Pet. 4:8) Petrus otashi dulika a li ta dimbuluka oshilihongomwa shokudimina po osho Jesus a li e mu honga omido da tetekela. Pefimbo opo, Petrus otashi dulika a li ta diladila kutya omunalukeno, eshi a li a popya kutya ota ka dimina po omumwaxe ‘lwoikando iheyali.’ Ashike Jesus okwe mu honga, nafye twa kwatelwa mo, okudimina po vamwe ‘lwo-77,’ sha hala kutya, pehe na ongaba. (Mat. 18:​21, 22) Ngeenge oho mono shidjuu okutula moilonga omayele oo, ino teka omukumo. Ovapiya aveshe vaJehova inava wanenena ohava mono shidjuu okudimina po. Ashike oshinima sha  fimana osho to dulu okuninga paife, okukatuka eenghatu da pumbiwa u dimine po omumwaxo nokupanga ombili naye. c

13. Oshike tashi dulu oku shi ningifa shidjuu kovakulunhuongalo okupashukila ovamwatate novamwameme?

¹³ Petrus ke na efiku a dimbwe osho Jesus e mu lombwela konima yenyumuko laye, a ti: “Lifa eedjona dange.” (Joh. 21:16) Ngeenge ou li omukulunhuongalo, ou shii kutya omayele oo okwa yukifwa yo kwoove. Ashike otashi dulu okukala eshongo komukulunhuongalo okukonga efimbo a wanife po oshinakuwanifwa osho sha fimana. Ovakulunhuongalo ove na okufila tete oshisho omaukwaneumbo avo palutu, pamaliudo nopamhepo. Ohava kwatele yo komesho oilonga yokuudifa, have lilongekida nokuyandja oitukulwa pokwoongala nosho yo poyoongalele inini naai ya kula. Vamwe ohava kwafele yo ve li oilyo yokOmitiye yOkukwatafana nOipangelo, ile va kwafele Oshikondo shomOshitukulwa shOkuduta nOkutunga. Ovakulunhuongalo ove li ovalumenhu ve lipyakidila neenghono shili.

14. Oshike tashi dulu okulinyengifa ovakulunhuongalo va life oufita? (1 Petrus 5:​1-4)

¹⁴ Petrus okwa ladipika ovakulunhuongalo vakwao, a ti: “Lifeni oufita waKalunga.” (Lesha 1 Petrus 5:​1-4.) Ngeenge ou li omukulunhuongalo, otu shii kutya ou hole ovamwatate novamwameme nowa hala oku va lifa. Ashike omafimbo amwe otashi dulika u kale u udite we lipyakidila, ile wa loloka unene noito dulu okuwanifa po oshinakuwanifwa osho. Oshike to dulu okuninga po? Mbubulila Jehova oisho yoye. Petrus okwa ti: ‘Ou ta yakula, ne shi ninge ngaashi oo a pewa eenghono kuKalunga.’ (1 Pet. 4:11) Ovamwaxo otashi dulika va taalela omaupyakadi oo itaa dulu okukandulwa po filufilu mounyuni ou. Ashike dimbuluka kutya “omufita munene,” Jesus Kristus, ota dulu oku va kwafela e dule keshe umwe. Ota dulu okuninga ngaho paife nosho yo mounyuni mupe. Kalunga okwa teelela ovakulunhuongalo va kale ve hole ovamwaxe, ve va life nokukala ve li “oshihopaenenwa koufita.”

15. Ongahelipi omukulunhuongalo umwe a lifa oufita? (Tala yo efano.)

¹⁵ William, oo a kala omukulunhuongalo oule womido dihapu, oku shii nghee sha fimana okulifa oufita. Eshi omukifi wekomba wo-COVID-19  wa tukuka, ye novakulunhuongalo vakwao ova li ve litulila po efimbo, opo va kwatafane oshivike keshe nomuudifi keshe pauhandimwe she likolelela keengudu davo doilonga yomomapya. Okwa yelifa kutya omolwashike, a ti: “Ovamwatate vahapu ova li hava di meumbo ovo aveke nova li tava dulu okukwatwa keamo lokudiladila koinima ii.” Ngeenge omumwatate, ile omumwameme e na oupyakadi, William oha pwilikine noukeka, opo a mone kutya otave lipula nashike nova pumbwa shike. Opo nee oha kendabala okukonga oishangomwa yokondadalunde, ile ouvidio ko-website yetu, oyo ta dulu okulongifa, opo a dule okutwa omukumo omumwatate, ile omumwameme. Okwa ti: “Okufila oshisho oufita okwa pumbiwa paife shi dulife nale. Ohatu ningi eenghendabala da mana mo tu kwafele ovanhu ve lihonge kombinga Jehova. Otwa pumbwa okuninga eenghendabala da faafana tu life oufita nokukwafela eedi daJehova di kale moshili.”

16. Omeenghedi dilipi hatu dulu okutula moilonga oilihongomwa oyo twe lihonga meenhumwafo daPetrus?

¹⁶ Otwa kundafana ashike oilihongomwa inini meenhumwafo mbali da nwefwa mo. Otashi dulika wa didilika onghalo yonhumba omo wa hala okuxwepopala. Pashihopaenenwa, mbela ino hala okukala ho dilonga luhapu komanangeko noupuna oo tae ke uya mounyuni mupe? Mbela owe litulila po ngoo elalakano lokuyandja oundombwedi koilonga, kofikola, ile meenhele vali dimwe? Mbela owa didilika eenghedi omo to dulu okuulikila ovamwatate novamwameme ohole yomoule pauyadi? Ovakulunhuongalo, omwa tokola ngoo okulifa eedi daJehova nehalo liwa? Ngeenge owe likonakona paushili, otashi dulika u ka didilike kutya ou na omaunghundi onhumba, ashike ino teka omukumo. “Omwene oku na olune” note ku kwafele u xwepopale. (1 Pet. 2:3) Petrus okwe tu shilipaleka, a ti: ‘Kalunga ota ka manifa oku mu deula. Ote ke mu pa eenghono, te mu kwafele mu kale ovadiinini nomwa pamenena.’ — 1 Pet. 5:10.

17. Ngeenge otwa twikile nokweefa Jehova e tu deule, oidjemo otai ka kala ya tya ngahelipi?

¹⁷ Potete, Petrus okwa li e udite ina wana okukala popepi nOmona waKalunga. (Luk. 5:8) Ashike kekwafo lopahole laJehova naJesus, Petrus okwa li a twikila okukala omushikuli waKristus. Kungaho, Petrus okwa li a pewa “omhito yokuya mOuhamba waalushe wOmwene nOmuxupifi wetu Jesus Kristus.” (2 Pet. 1:11) Ka li tuu a pewa ondjabi ya denga mbada! Ngaashi Petrus, ngeenge naave owa twikile nokweefa Jehova e ku deule, oto ka mona ondjabi yomwenyo waalushe. Oto ka kala ‘u shii kutya oto ka xupifwa omolweitavelo loye.’ — 1 Pet. 1:9.