1. Oshike osho Jesus ta ka ninga mafiku?

 OTU li pefimbo opo tapa ningwa omalunduluko manene. Mafiku, Jesus ota ka tokola ovanhu. Jesus okwa popya shi na sha nefimbo olo tali twalwa fiyo opetokolo olo, eshi a pa ovahongwa vaye “edidiliko” li na sha nokukala po kwaye nosho yo ‘lomafiku axuuninwa ounyuni ou.’ (Mat. 24:3) Exunganeko olo otali hangwa muMateus etukulwa 24 no 25 nosho yo momahokololo a pambafana oo e li muMarkus etukulwa 13 naLukas etukulwa 21.

2. Ohatu ka konakona shike moshitukulwa eshi, nomolwashike osho tashi ke tu kwafela?

² Jesus okwa longifa omafaneko opatatu taa londwele, opo e tu kwafele tu lilongekide. Omafaneko oo ongaashi efaneko leedi noikombo, loukadona ovanaendunge nomalai nosho yo loitalenti. Efaneko keshe otali ke tu kwafela tu ude ko kutya Jesus ota ka tokola omunhu she likolelela keenghatu daye. Eshi hatu konakona omafaneko oo, natu didilike mo oilihongomwa, nanghee hatu dulu oku i tula moilonga. Efaneko olo hatu ka kundafana tete oli na sha needi noikombo.

EEDI NOIKOMBO

3. Onaini Jesus ta ka tokola ovanhu?

³ Mefaneko li na sha needi nosho yo oikombo, Jesus okwa ti kutya ota ka tokola ovanhu she likolelela konghedi omo ve linyenga konghundana iwa, nongeenge ova yambidida ngoo ovamwaxe ovavaekwa. (Mat. 25:​31-46) Etokolo la tya ngaho otali ka ningwa pefimbo ‘loudjuu munene,’ ofimbo Armagedon  ina hovela. (Mat. 24:21) Ngaashi ashike omufita ha tongola mo eedi moikombo, Jesus naye ota ka tongola ko ovo hava yambidida noudiinini ovamwaxe ovavaekwa kwaavo ihave va yambidida.

4. She likolelela kuJesaja 11: 3, 4, omolwashike hatu dulu okukala noushili kutya Jesus ota ka tokola ovanhu pauyuki? (Tala yo efano )

⁴ Exunganeko limwe lopaMbiibeli ola ulika kutya Jesus, e li Omutokoli a nangekwa po kuJehova, ota ka tokola pauyuki. (Lesha Jesaja 11:​3, 4, KB-13.) Ota ka tala kwaasho ovanhu hava ningi, hava diladila, hava popi nanghee hava ungaunga novamwaxe vaye ovavaekwa. (Mat. 12:​36, 37; 25:40) Jesus ota ka kala e shii ovo va yambidida ovamwaxe ovavaekwa nosho yo oilonga yavo. a Ovo ve li ngaashi eedi ohava yambidida ovamwaxe vaKristus moku va kwafela noilonga yokuudifa. Ovo have va kwafele otava ka tokolwa ve li “ovayuki,” notava ka kala ve na eteelelo ‘lokukala nomwenyo’ fiyo alushe kombada yedu. (Mat. 25:46; Eh. 7:​16, 17) Olo ka li fi tuu eteelelo litunhula kwaavo va kanyatela oudiinini wavo! Ngeenge ova kala ovadiinini pefimbo loudjuu munene nosho yo konima, omadina avo otaa ka kala “membo lomwenyo.” — Eh. 20:15.

5. Oshilihongomwa shilipi shi li mefaneko leedi noikombo, noolyelye tava mono mo ouwa?

⁵ Ulika kutya ou li omudiinini. Efaneko laJesus li na sha needi noikombo otali longo unene kwaavo ve na eteelelo lokukala nomwenyo waalushe kombada yedu. Ihava ulike ashike eitavelo mokuyambidida ovamwaxe vaKristus moilonga yokuudifa, ndele ohave li ulike yo mokutambula ko ewiliko olo hava pewa kokangudu kanini kovamwatate ovavaekwa, ovo va hoololwa kuJesus. (Mat. 24:45) Ashike ovo ve na eteelelo loku ka kala meulu, navo ova pumbwa okuyandja elitulemo ketumwalaka lelondwelo, olo li li mefaneko olo. Omolwashike? Omolwaashi Jesus oha didilike osho hava ningi, hava diladila naasho hava popi. Navo ove na okukala ovadiinini. Natango, Jesus okwa popya omafaneko amwe avali, oo taa londwele ovavaekwa. Omafaneko oo otaa hangwa yo muMateus etukulwa 25. Natu ka kundafaneni efaneko li na sha noukadona ovanaendunge nosho yo omalai.

OUKADONA OVANAENDUNGE NOSHO YO OMALAI

6. Oukadona vatano ova ulika ngahelipi kutya ova li ovanaendunge? (Mateus 25:​6-10)

⁶ Mefaneko li na sha noukadona, Jesus okwa popya kombinga youkadona omulongo ovo va ka shakeneka omuhomboli. (Mat. 25:​1-4) Aveshe ova li va teelelika va ka kale pamwe nomuhomboli koshivilohombolo shaye. Jesus okwa popya kutya oukadona vatano “ovanaendunge,” ofimbo vakwao vatano “omalai.” Oukadona ovanaendunge ova li ve lilongekida nove li oupafi. Ova li ve lilongekida okuteelela omuhomboli, nokuli nonande okwa li ta fiki oufiku. Ova li nokuli va etelela eelamba davo domahooli, opo va kale ve wete ko oufiku. Okwa li yo va etelela omahooli mahapu, opo e va kwafele, ngeenge omuhomboli okwa shelelelwa. Onghee ova li ve lilongekida okukaleka eelamba davo da tema. (Lesha Mateus 25:​6-10.) Eshi omuhomboli a fika, oukadona ovanaendunge ova li va ya pamwe naye koshivilohombolo. Sha faafana, Ovakriste ovavaekwa, ovo va ulika kutya ove lilongekida mokukala ovanaendunge novadiinini fiyo osheshi Kristus e uya, otava ka pewa ondjabi, eshi tava ka waimina  Omuhomboli, Jesus, mOuhamba waye womeulu. b (Eh. 7:​1-3) Ongahelipi shi na sha noukadona vatano omalai?

7. Oshike sha li sha ningilwa oukadona vatano omalai, nomolwashike?

⁷ Oukadona vatano omalai kava li ve lilongekida, eshi omuhomboli a fika. Eelamba davo oda li pokudima, nokava li va etelela omahooli mahapu. Eshi va uda kutya omuhomboli oku li pokufika, ova li ve na okuya va ka lande omahooli. Kava li va hangika va aluka, eshi omuhomboli a fika. Pefimbo opo, “oukadona ovo va li ve lilongekida ova ya pamwe naye koshivilohombolo, ndele poshivelo tapa idilwa.” (Mat. 25:10) Lwanima, eshi oukadona omalai va aluka, nova li va hala okuya mo, omuhomboli okwe va lombwela a ti: “Kandi mu shii.” (Mat. 25:​11, 12) Oukadona ovo kava li ve lilongekida okuteelela omuhomboli efimbo lile. Ovavaekwa otave lihongo shike kwaasho?

8-9. Oshilihongomwa shilipi ovavaekwa tave lihongo mefaneko li na sha noukadona? (Tala yo efano.)

⁸ Ulika kutya owe lilongekida nou li oupafi. Jesus ka li ta xunganeke kutya otapa ka kala eengudu dopavali dovavaekwa. Vamwe ove lilongekida okuteelela fiyo exulilo lounyuni ou, ofimbo vamwe inave lilongekida. Ponhele yaasho, okwa li ta yelifa osho tashi dulu okuningilwa ovavaekwa, ngeenge ova kala inave lilongekida okulididimika fiyo okexulilo. Kungaho, ngeenge inave lilongekida itava ka pewa ondjabi. (Joh. 14:​3, 4) Osho oshinima sha kwata moiti neenghono. Kashi na nee mbudi kutya otu na eteelelo lokukala meulu, ile okombada yedu, atusheni otu na okukaleka momadiladilo elondwelo olo tali hangwa mefaneko li na sha noukadona. Atusheni natu kaleni oupafi, twe lilongekida okulididimika fiyo okexulilo. — Mat. 24:13.

⁹ Konima eshi Jesus a popya efaneko li na sha noukadona, opo a ulike nghee sha fimana okulilongekida nokukala oupafi, okwa popya vali shi na sha nefaneko loitalenti. Efaneko  olo ola divilika nghee sha fimana okulonga noudiinini.

OITALENTI

10. Ongahelipi ovapiya vavali va li va ulika kutya ovadiinini? (Mateus 25:​19-23)

¹⁰ Mefaneko li na sha noitalenti, Jesus okwa popya kombinga yovapiya vavali ovo va li ovadiinini komwene wavo nosho yo umwe, oo aha li omudiinini. (Mat. 25:​14-18) Ovapiya vavali ova li va ulika kutya ovadiinini, eshi va longa noudiinini va hapupalife oimaliwa yomwene wavo. Ofimbo omwene wavo ina ya kondje yoshilongo, okwa li e va pa oitalenti, oimaliwa oyo ya li ihapu. Ovapiya vavali ovadiinini ova li va longa noudiinini nova longifa oimaliwa pandunge. Oshidjemo? Eshi omwene wavo a aluka, ova hangwa va hapupalifa oimaliwa oyo a li e va pa. Omwene wavo okwa li e va pandula nova li va ‘hafela pamwe naye.’ (Lesha Mateus 25:​19-23.) Ndele ongahelipi shi na sha nomupiya omutitatu? Okwa li a longifa ngahelipi oimaliwa oyo a li a pewa komwene waye?

11. Oshike sha li sha ningilwa omupiya “omundedenhu,” nomolwashike?

¹¹ Omupiya omutitatu okwa li a pewa oshitalenti shimwe, ashike okwa li “omundedenhu.” Omwene waye okwa li a teelela a longife pandunge oshitalenti osho. Ndele ponhele yaasho, okwa li e shi holeka. Eshi omwene a aluka, omupiya oo ina hangika a likolela omwene waye oimaliwa ihapu. Omupiya oo ka li e na oikala iwa. Ponhele a yandje ombili, molwaashi ina likolela omwene waye oimaliwa ihapu, okwa li a ifana omwene waye “omulumenhu omukwanyanya.” Omupiya oo ka li a hokiwa komwene waye. Kakele kaasho, oshitalenti osho a li a pewa okwa li e shi kufwa, ndele ta umbwa mo meumbo lomwene waye. — Mat. 25:​24, 26-30.

12. Ovapiya vavali ovadiinini otava va faneke oolyelye kunena?

¹² Ovapiya vavali ovadiinini otava faneke Ovakriste ovavaekwa ovadiinini. Omwene Jesus ote va shivi ‘va hafe pamwe nomwene wavo.’ Ova pewa ondjabi yavo yomeulu, enyumuko lotete. (Mat. 25:​21, 23; Eh. 20:5b)  Kakele kaasho, oshihopaenenwa shii shi na sha nomupiya omundedenhu oshi li elondwelo kovavaekwa. Ngahelipi mbela?

13-14. Oshilihongomwa shilipi ovavaekwa tave lihongo mefaneko li na sha noitalenti? (Tala yo efano.)

¹³ Ulika kutya oho longo noudiinini. Mefaneko li na sha noitalenti nosho yo oukadona, Jesus ka li ta xunganeke kutya ovavaekwa otava ka kala ovandedenhu. Ponhele yaasho, okwa li ta yelifa osho tashi dulu oku va ningilwa, ngeenge ova kala vehe fi ovadiinini. Itava ka kala vamwe vomwaavo ‘va ifanwa nova hoololwa,’ noitava ka pitikwa va ye mOuhamba womeulu, ngeenge ova kala vehe fi ovadiinini. — 2 Pet. 1:10.

¹⁴ Omafaneko aJesus e na sha noukadona nosho yo oitalenti okwe shi yelifa nawa kutya ovavaekwa aveshe Ovakriste ove na okukala ve lilongekida nokulonga noudiinini. Ndele mbela Jesus okwa popya vali oshinima shimwe osho shi li elondwelo kovavaekwa? Heeno. Elondwelo olo otali hangwa mwaasho Jesus a popya muMateus 24:​40, 41.

OOLYELYE TAVA KA “KUFWA PO”?

15-16. Mateus 24:​40, 41 okwa ulika ngahelipi kutya ovavaekwa ova pumbwa okukala oupafi?

¹⁵ Ofimbo Jesus ina popya kombinga yomafaneko atatu, okwa popya kombinga yetokolo lovavaekwa olo tali ka ulika kutya olyelye a hokiwa. Okwa popya kombinga yovalumenhu vavali ve li mepya nosho yo ovakainhu vavali tava tu poshini. Moshiningwanima keshe, ova li tava monika va fa tava longo oshilonga sha faafana, ashike Jesus okwa ti kutya “umwe ota kufwa po, ndele umwe ota fiwa po.” (Lesha Mateus 24:​40, 41.) Opo nee okwa londwela ovashikuli vaye a ti: “Onghee hano, kaleni oupafi osheshi kamu shii efiku olo Omwene weni te uya.” (Mat. 24:42) Jesus okwa popya oshinima sha faafana, konima eshi a popya shi na sha nefaneko loukadona. (Mat. 25:13) Mbela oinima oyo otai tu kumwe? Osha fa shi li ngaho. Ovavaekwa ashike ovadiinini ovo ‘tava ka kufwa po’ kuJesus va twalwe mOuhamba womeulu. — Joh. 14:3.

¹⁶ Ulika kutya ou li oupafi. Omuvaekwa keshe oo ehe li oupafi itaka ongelwa pamwe ‘novahoololwa.’ (Mat. 24:31) Oshiwana ashishe shaKalunga, kashi na nee mbudi kutya oshi na eteelelo lilipi, oshi na okutala ko eendjovo daJesus di li elondwelo li na sha nokukala oupafi, nokutwikila okukala ovadiinini.

17. Omolwashike tuhe na okukala twa limbililwa, eshi Jehova ta hoolola ovavaekwa pefimbo letu?

¹⁷ Otwe lihonga kombinga yaJehova, notwe lineekela kutya keshe osho ta ningi ohe shi ningi pauyuki. Ihatu kala twa limbililwa, ngeenge Jehova ta hoolola okuvaeka ovanhu ovo ve li ovadiinini pefimbo letu. c Ohatu dimbuluka osho Jesus a popya shi na sha novanailonga ovo va li tava longo potundi 11 lwaapo, mefaneko laye li na sha noshikunino. (Mat. 20:​1-16) Ovo va li va shivwa va longe moshikunino pefimbo lomutenya navo ova li va pewa ondjabi ya faafana naavo va longa tete. Sha faafana, kashi na nee mbudi kutya ovavaekwa ova hoololwa naini, aveshe otava ka pewa ondjabi yokuya meulu, ngeenge ova twikile okukala ovadiinini.

YANDJA ELITULEMO KOMALONDWELO

18-19. Oilihongomwa nomalondwelo elipi twe lihonga?

¹⁸ Oshike twe lihonga? Ovo ve na eteelelo lokukala nomwenyo fiyo alushe kombada yedu, ova mona mefaneko li na sha needi noikombo nghee sha fimana okutwikila okukala ovadiinini kuJehova paife nosho yo pefimbo loudjuu munene. Monakwiiwa, Jesus ota ka  pa ovadiinini ‘omwenyo waalushe.’ — Mat. 25:46.

¹⁹ Otwa kundafana yo omafaneko avali, oo e li elondwelo kovavaekwa. Mefaneko laJesus li na sha noukadona ovanaendunge nosho yo omalai, vatano vomuvo ova li ovanaendunge. Ova li ve lilongekida nove li oupafi, va teelela omuhomboli. Ashike oukadona omalai kava li ve lilongekida. Onghee omuhomboli ka li e va pitikila moshivilohombolo shaye. Nafye natu kale twe lilongekida twa teelela fiyo osheshi Jesus a xulifa po ounyuni ou. Natango, mefaneko laJesus li na sha noitalenti, otwa kundafana kombinga yovapiya vavali ovadiinini, ovo va li hava longo noudiinini. Ova longela omwene wavo noudiinini, nokwa li e va hokwa. Ashike omupiya omundedenhu, ka li a hokiwa komwene waye. Oshike hatu lihongo? Natu kale twe lipyakidila moilonga yaJehova fiyo okexulilo. Xuuninwa, otwa konakona nghee ovavaekwa ve na okutwikila okukala oupafi, opo va ‘kufwe po’ kuJesus va ka pewe ondjabi yavo meulu. Ve na eteelelo olo momadiladilo, ova teelela nodjuulufi ‘okwoongala pamwe’ naJesus meulu. Konima yoita ya Armagedon, otava ka kala ovahombolwa vaJesus moshivilohombolo shOdjona. — 2 Tes. 2:1; Eh. 19:9.

20. Jehova ota ka ningila shike ovo hava dulika komalondwelo aye?

²⁰ Nonande etokolo oli li popepi, inatu pumbwa okukala twa tila. Ngeenge otwa kala ovadiinini, Tate yetu womeulu omunahole ote ke tu pa “eenghono di dule dopaushitwe,” opo tu dule okukala ofika “koshipala shOmona womunhu.” (2 Kor. 4:7; Luk. 21:36) Kashi na nee mbudi kutya otu na eteelelo loku ka kala meulu, ile okombada yedu, ohatu ka hafifa Tate yetu, ngeenge ohatu yandje elitulemo komalondwelo, oo taa hangwa momafaneko aJesus. Molwaashi Jehova omunanghenda, omadina etu otaa ka shangwa ‘membo lomwenyo.’ — Dan. 12:1; Eh. 3:5.