1-2. Omweengeli okwa li a lombwela shike ovakainhu ovo va li pombila yaJesus, nelombwelo lilipi Jesus a li e va pa?

OSHA li efimbo longula mo 16 Nisan 33 O.P. eshi ovakainhu vamwe, ovo va li va nyika oluhodi novatilikalunga, va li va ya kombila omo mwa li mwa pakwa oshimhu shOmwene Jesus Kristus oule weevili di dulife 36. Eshi va fika pombila, opo ngeno va ka vaeke oshimhu oidimba i nyika nawa nomaadi mawa, ova li va kumwa eshi va mona kutya mombila kamu na sha. Omweengeli okwa li a lombwela ovahongwa ovo kutya Jesus okwa nyumuka, a ti: “Ote mu tetekele kuGalilea; oko tamu ke mu hanga.” — Mat. 28:1-7; Luk. 23:56; 24:10.

² Konima eshi ovakainhu ovo va dja po pombila, Jesus okwa li e ve lihololela, ndele te va lombwele ta ti: “Indeni mu ka lombwele ovamwatate va ye kuGalilea, oko tava ka hanga nge.” (Mat. 28:10) Jesus okwa li a pa ovahongwa vaye omalombwelo a fimanenena, pokwoongala oko a li a ninga oshikando shotete konima eshi a nyumuka.

3-4. Omolwashike hatu tile kutya oshipango osho shi li muMateus 28:19, 20 kasha li ashike sha lombwelwa ovayapostoli? (Tala efano kombada yoshifo.)

³ Lesha Mateus 28:16-20. Pokwoongala oko Jesus a li a ninga, okwa li a lombwela ovahongwa vaye shi na sha noshilonga sha fimana osho ve na okuwanifa po mefelemudo lotete, oshilonga osho hatu longo fiyo okunena. Jesus okwa ti: “Onghee hano, indeni mu ka ninge ovanhu vomoiwana aishe ovahongwa, . . . va hongeni okudiinina oinima aishe oyo nde mu lombwela.”

⁴ Jesus okwa hala ovashikuli vaye aveshe va udife. Ka li ashike a yandja elombwelo olo kovayapostoli ovadiinini 11. Otu shi shii ngahelipi? Mbela ovayapostoli ovo ashike va li po eshi oshipango  shokuninga ovanhu ovahongwa sha li tashi yandjwa komhunda muGalilea? Dimbuluka osho omweengeli a li a lombwela ovakainhu a ti: ‘Oko tamu ke mu hanga kuGalilea.’ Onghee otashi dulika ovakainhu ovo ovadiinini navo opo va li poshiningwanima osho. Ashike hasho ashike osho. Omuyapostoli Paulus okwa popya kutya Jesus “okwe ke lihololela ovamwatate ve dulife 500 ovo va li va ongala pomhito imwe.” (1 Kor. 15:6) Mbela okwe ve lihololela peni?

5. Oshike hatu lihongo mo 1 Ovakorinto 15:6?

⁵ Otu na omatomheno mawa okufika pexulifodiladilo kutya Paulus okwa li e na momadiladilo okwoongala oko kwa ningilwa muGalilea, oko taku hangwa muMateus etukulwa 28. Omatomheno elipi mbela? Lotete, ovahongwa vahapu vaJesus ova li Ovagalilea. Onghee osha li tashi wapalele okwoongala novanhu vahapu komhunda muGalilea, ponhele va ongale meumbo lonhumba muJerusalem. Etivali, konima eshi Jesus a nyumuka okwa hangwa nale a ongala pamwe novayapostoli 11 meumbo limwe muJerusalem. Ngeno Jesus okwa li a hala ovayapostoli ovo ashike va udife nokuninga ovanhu ovahongwa, ngeno okwe shi ninga ashike muJerusalem ponhele yokupula ovayapostoli, ovakainhu nosho yo vamwe va ongale muGalilea. — Luk. 24:33, 36.

6. Mateus 28:20 okwa ulika ngahelipi kutya oshipango shokuninga ovanhu ovahongwa otashi longo kunena, novanhu otava dulika ngahelipi koshipango osho?

⁶ Didilika etomheno etitatu. Oshipango shaJesus shokuninga ovanhu ovahongwa kasha li ashike sha nuninwa Ovakriste ovo va li ko mefelemudo lotete. Otu shi shii ngahelipi? Eshi Jesus a li ta yandje omalombwelo kovashikuli vaye okwa xulifa a ti: “Ondi li pamwe nanye alushe fiyo omomafiku axuuninwa ounyuni ou.” (Mat. 28:20) Ngaashi ashike Jesus a popya, ovanhu vahapu kunena otava ningi ovanhu ovahongwa. Diladila kwaashi. Omudo keshe, ovanhu hanga 300 000 ohava ninginifwa ve li Eendombwedi daJehova nokuninga ovahongwa vaJesus Kristus.

7. Ohatu ka kundafana shike paife, nomolwashike?

⁷ Vahapu ovo hava konakona Ombiibeli ohava ningi exumokomesho, ndele tava ninginifwa. Ashike vamwe ovo hava konakona Ombiibeli nafye, ohava kala va tila okuninga ovahongwa. Ohava hafele ekonakono, ashike ihava ningi exumokomesho lokuninginifwa. Atusheni ovo tu na ovakonakoni otwa hala oku va kwafela va tule moilonga osho tave lihongo nova ninge ovahongwa vaKristus. Moshitukulwa eshi, ohatu ka kundafana nghee hatu dulu okuhanga omitima dovakonakoni vetu noku va kwafela va kale ve na ekwatafano liwa naJehova. Omolwashike twa pumbwa okukundafana kombinga yaasho? Omolwaashi omafimbo amwe otashi dulika twa pumbwa okutokola ngeenge natu twikile okukonakona navo ile hasho.

8. Omolwashike omafimbo amwe hashi kala eshongo okuhanga omitima dovakonakoni?

⁸ Jehova okwa hala ovanhu ve mu longele molwaashi ve mu hole. Onghee hano, elalakano letu okukwafela ovakonakoni va shiive kutya Jehova oku na ko nasha navo pauhandimwe noku va hole unene. Otwa hala oku va kwafela va mone kutya Jehova “oye xe yeefiye nomuyukifi wovafiyekadi.” (Eps. 68:5) Ngeenge ovakonakoni voye ova mono kutya Kalunga oku va hole, navo otava ka kala ve mu hole. Ovakonakoni vamwe otashi dulika va mone shidjuu okwiitavela kutya Jehova oku li Xe omunahole molwaashi inava ulikilwa ohole kovadali vavo. (2 Tim. 3:1, 3) Onghee eshi tamu konakona, divilika omaukwatya aJehova a denga mbada. Kwafela ovakonakoni voye va shiive kutya Kalunga ketu omunahole okwa hala va ka mone omwenyo waalushe, nokwe  lilongekida oku va kwafela va hange elalakano olo. Oshike vali hatu dulu okuninga?

9-10. Omambo elipi tu na okulongifa pekonakonombiibeli, nomolwashike oo tu na okulongifa?

⁹ Longifa omambo “Oshike hatu lihongo mOmbiibeli?” nosho yo “Nghee to dulu okulikaleka mohole yaKalunga.” Oishangomwa oyo oya nuninwa oku tu kwafela opo tu dule okuhanga omitima dovakonakoni vetu. Pashihopaenenwa, etukulwa 1 lembo Lihonga mOmbiibeli ola nyamukula omapulo ngaashi: Kalunga oku na ngoo onghenda ile omukwanyanya?, Kalunga oha kala e udite ngahelipi ngeenge ovanhu tava mono oixuna?, nosho yo Oto dulu ngoo okuninga kaume kaJehova? Ongahelipi shi na sha nembo Okulikaleka mohole yaKalunga? Oshishangomwa osho otashi kwafele omukonakoni a shiive nghee okutula moilonga omafinamhango Ombiibeli tashi mu kwafele a xwepopaleke onghalamwenyo yaye noku ehene popepi naJehova. Nonande owa konakona nale oishangomwa oyo novanhu vamwe, kala ho lilongekidile nawa ekonakono keshe nokukaleka momadiladilo eemhumbwe domukonakoni keshe.

 ¹⁰ Oshike u na okuninga ngeenge omukonakoni oku na ohokwe moshikundafanwa shimwe osho sha kundafanwa moshishangomwa shihe li mOshikefa shetu shoilongifo yokuhonga? Oto dulu oku mu ladipika a leshe oshishangomwa osho kuye mwene opo mu twikile okukonakona moishangomwa oyo hai longifwa pekonakonombiibeli, ngaashi oyo ya tumbulwa nale.

11. Onaini tu na okuhovela nokuxulifa neilikano pekonakonombiibeli, nongahelipi hatu dulu okukwafela omukonakoni a ude ko kutya omolwashike sha fimana?

¹¹ Hovela neilikano ofimbo inamu tameka okukonakona. Osha fimana okuhovela nokuxulifa neilikano pekonakonombiibeli diva ngaashi tashi dulika, konima ashike yoivike inini eshi wa hovela okukonakona pandjikilile. Natu kwafele omukonakoni a mone kutya ohatu dulu ashike okuuda ko Eendjovo daKalunga kekwafo lomhepo yaYe iyapuki. Ovahongi vOmbibeli vamwe ova yelifila ovakonakoni kutya omolwashike sha fimana okwiilikana pekonakonombiibeli tava longifa Jakob 1:5, oo a ti: “Ngeenge ope na umwe womunye a pumbwa ounongo, na kale he u indile kuKalunga.” Opo nee oha pula omukonakoni kutya, “Ongahelipi hatu dulu okwiindila ounongo kuKalunga?” Omukonakoni otashi dulika a tye kutya otu na okwiilikana kuKalunga.

12. Ongahelipi to dulu okulongifa Epsalme 139:2-4 opo u kwafele omukonakoni a xwepopaleke onghedi yaye yokwiilikana?

¹² Honga omukonakoni woye nghee e na okwiilikana. Mu yelifila kutya Jehova okwa hala okupwilikina komailikano aye taa di komutima. Mu yelifila kutya ngeenge hatu ilikana paumwene, ohatu dulu okumbubulila Jehova omutima wetu, hatu mu lombwele oinima oyo tashi dulika itatu dulu okulombwela vamwe. Dimbuluka kutya Jehova oku shii osho hatu diladila. (Lesha Epsalme 139:2-4.) Ohatu dulu yo okuladipika omukonakoni wetu a pule Kalunga e mu kwafele a dule okulundulula omadiladilo aye a puka nosho yo okweefa po eenghedindjikilile dii. Pashihopaenenwa, omukonakoni otashi dulika e hole okukufa ombinga momadano oivilo oyo Ovakriste vehe na okukufa ombinga muyo. Oku shii kutya osha puka, ashike oushili oyoo kutya oha hafele oinima imwe oyo hai ningwa po. Mu ladipika a lombwele Jehova nghee e udite noku pule ekwafo opo a kale e hole oinima oyo Jehova e hole. — Eps. 97:10.

13. (a) Omolwashike twa pumbwa okushiva ovakonakonimbiibeli vetu kokwoongala diva ngaashi tashi dulika? (b) Ongahelipi hatu dulu okukwafela ovakonakonimbiibeli va kale va manguluka ngeenge ve li pOlupale lOuhamba?

¹³ Shiva omukonakonimbiibeli woye kokwoongala diva ngaashi tashi dulika. Osho omukonakoni woye ta udu nokumona pokwoongala kwopaKriste otashi dulu oku mu linyengifa a longele Jehova. Mu ulikila okavidio Oshike hashi ningwa kOlupale lOuhamba?, ndele to mu shivi mu ye pamwe naye. Opo u mu kwafele e uye kokwoongala, mu pa olefa ngeenge otashi shiiva. Osha fimana okukala ho i ko novamwatate va yoolokafana ngeenge tamu ka konakona naye. Kungaho, omukonakoni woye ota ka kala e shii ovanhu vahapu meongalo nota ka kala a manguluka ngeenge e li pokwoongala.

14. Oshike tashi dulu okukwafela omukonakonimbiibeli a kulike ekwatafano liwa naJehova?

¹⁴ Elalakano letu okukwafela omukonakonimbiibeli a ninge exumokomesho. (Ef. 4:13) Ngeenge omunhu okwa dimine okukonakona Ombiibeli nafye, otashi ke mu kwafela a mone ouwa pauhandimwe. Ashike ngeenge okwa kala e hole Jehova, ota ka diladila nghee ta dulu okukwafela vamwe, mwa kwatelwa ovo ve li nale oilyo yeongalo. (Mat. 22:37-39) Ino ongaonga okulombwela omukonakoni  woye kutya otu na oufembanghenda wokuyambidida pashimaliwa oilonga yOuhamba.

15. Ongahelipi hatu dulu okukwafela omukonakoni a kale e shii okukandula po oupyakadi ngeenge owa holoka po?

¹⁵ Honga omukonakoni woye osho e na okuninga po ngeenge opa holoka omaupyakadi. Natu tye nee ngeno pashihopaenenwa, omukonakoni woye, oo e li omuudifi ina ninginifwa, okwa udifwa nai kuumwe meongalo. Ponhele yokwaama olwaamambinga, mu ulikila mOmbiibeli osho e na okuninga po. Osho otashi ke mu kwafela a dimine po omumwaxe nokudimbwa osho sha ningwa po, ile a ka popye naye te shi ningi nolukeno nopahole opo e mu kwafele “a longe osho sha yuka.” (Yelekanifa naMateus 18:15.) Kwafela omukonakoni woye e lilongekide osho ta ka popya nomumwaxe. Mu ulikila nghee e na okulongifa JW Library^®, Elongifwambo lokukonga Omauyelele mOishangomwa yEendombwedi daJehova, nosho yo jw.org^® opo e lihonge nghee e na okukandula po oupyakadi. Ngeenge omukonakoni okwa deulwa nghee e na okupongolola po okuhaudafana ofimbo ina ninginifwa, otashi ke mu kwafela a kale ta longele kumwe novamwaxe meongalo nokonima eshi a ninginifwa.

16. Omukonakoni ota ka mona ouwa washike ngeenge owa kala ho i ko novaudifi va yoolokafana?

¹⁶ Kala ho i novaudifi va yoolokafana ngeenge tamu ka konakona nosho yo nomupashukilishikandjo ngeenge ta talele po eongalo leni. Omolwashike shiwa okuninga ngaho? Ngaashi sha popiwa pehovelo, otashi dulika ovaudifi vamwe va ka kwafele omukonakoni woye monghedi imwe vali. Pashihopaenenwa, natu tye nee ngeno omukonakoni okwa kala ta kondjo lwoikando okweefa po okushila omakaya. Oto dulu okushiva Ondombwedi imwe, oyo ya pita monghalo ya fa yaye, mu ye ko nayo. Eendombwedi dikweni otashi dulika di ka yandje omayele oo taa dulu okukwafela omukonakoni woye. Ngeenge iho kala wa manguluka okukwatela komesho ekonakono pe na omuudifi e na owino, oto dulu okupula omuudifi oo oye a kwatele komesho. Omukonakoni woye ota ka mona ouwa muhapu ngeenge owa kala ho i ko novaudifi ovo ve na owino. Kaleka momadiladilo kutya elalakano letu okukwafela ovakonakoni va kale ve na ekwatafano liwa naJehova.

17-18. Oshike wa pumbwa okuninga ofimbo ino xulifa po okukonakona naumwe?

¹⁷ Ngeenge omukonakonimbiibeli woye ita ningi exumokomesho, otashi dulika u lipule epulo kutya, ‘Mbela nandi xulife po okukonakona naye?’ Owa pumbwa okutala kokudula kwomunhu ofimbo ino ninga etokolo. Ovanhu vamwe ohava kwata oule wefimbo opo va ninge omalunduluko. Lipula kutya: ‘Mbela omukonakoni wange ota ningi exumokomesho okutala monghalo omu e li?’ ‘Mbela okwa hovela “okudiinina” ile okutula moilonga osho hatu lihongo?’ (Mat. 28:20) Otashi dulika omukonakoni ha ende kanini okuninga exumokomesho, ashike ota ende ngoo ta ningi omalunduluko monghalamwenyo.

 ¹⁸ Mbela ohatu ka ninga po shike ngeenge otwa konakona nomunhu oule wefimbo, ndele ita ningi exumokomesho? Natu taleni koshihopaenenwa tashi shikula: Natu tye nee ngeno omukonakoni woye okwa mana ko embo Lihonga mOmbiibeli notashi dulika a hovela nembo Okulikaleka mohole yaKalunga, ndele ina enda nande okokwoongala ile kEdimbuluko. Naluhapu oha kangheke ekonakono nomatomheno anafangwa. Monghalo ya tya ngaho, oto dulu okukundafana nomukonakoni woye kombinga yoshinima osho. *

19. Oshike tashi dulika wa pumbwa okuninga po ngeenge omukonakoni ita ningi exumokomesho, noshike u na okutala kusho?

¹⁹ Oto dulu okuhovela oku mu pula kutya, ‘Oshike naanaa tashi ku imbi okuninga Ondombwedi yaJehova?’ Otashi dulika omukonakoni a nyamukule kutya, ‘Onda hala ashike okukonakona, ndele inandi hala okuninga Ondombwedi yaJehova.’ Ngeenge omukonakoni osho e udite ngaho konima eshi mwa konakona oule wefimbo, oto dulu okweefa po okukonakona naye. Ndele nande ongaho, otashi dulika omukonakoni e ku lombwele osho tashi mu imbi okuninga exumokomesho. Pashihopaenenwa, otashi dulika a kale e na oumbada wokuudifa eumbo neumbo. Ngeenge owa kala u shii nghee omukonakoni e udite, otashi ke ku kwafela u dule oku mu kwafela.

20. Ongahelipi Oilonga 13:48 tai tu kwafele tu longife eendunge dokuyoolola ngeenge natu twikile okukonakona naumwe ile hasho?

²⁰ Shinyikifa oluhodi, ovakonakoni vamwe ova fa Ovaisrael vopefimbo laHesekiel. Jehova okwa li a lombwela Hesekiel shi na sha navo a ti: “Ndele tala, ove u li kuvo ngaashi eimbilo lohole, la imbwa nawa nola shikwa nawa nokaxumbafeta. Vo ohava udu eendjovo doye, ndelenee ihave di wanifa.” (Hes. 33:32) Otashi dulika tu mone shidjuu okulombwela omunhu kutya itatu twikile vali okukonakona naye. Onghee hano, natu kale tu shii kutya “efimbo olo la xupa ko olixupi.” (1 Kor. 7:29) Ponhele yokukala hatu konakona novanhu ovo itava ningi exumokomesho, natu yandje elitulemo kwaavo tava ulike kutya ova “halelela shili omwenyo waalushe.” — Lesha Oilonga 13:48.

21. Omushangwa wetu womudo 2020 otau ti ngahelipi, notau tu kwafele tu ninge shike?

²¹ Omushangwa womudo 2020 otau tu kwafele tu xwepopaleke ounghulungu wetu moilonga yokuninga ovanhu ovahongwa. Owa kanghamena keendjovo daJesus odo a popile komhunda muGalilea eshi a ti: “Indeni mu ka ninge ovanhu . . . ovahongwa, noku va ninginifa.” — Mat. 28:19.