1. Oshike hashi weda ko kehafo letu?

 JEHOVA okwa hala tu kale twa hafa. Osho otu shi shii, molwaashi ehafo oli li oshiimati shomhepo yaye iyapuki. (Gal. 5:22) Ngeenge hatu kufa ombinga moilonga yokuudifa nosho yo okukwafela ovamwatate novamwameme meenghedi di lili noku lili, ohatu mono ehafo, molwaashi okuyandja ohaku eta ehafo shi dulife okupewa. — Oil. 20:35.

2-3. (a) Metwokumwe nOvagalati 6:4, oinima ivali ilipi tai ke tu kwafela tu kaleke po ehafo letu, eshi hatu longele Jehova? (b) Oshike hatu ka kundafana moshitukulwa eshi?

² Ngaashi sha yelifwa mOvagalati 6:4, omuyapostoli Paulus okwa tumbula oinima ivali oyo tai tu kwafele tu kaleke po ehafo letu. (Lesha.) Shotete, natu kale hatu pe Jehova osho sha denga mbada, naasho osho shi na okukala elalakano letu. Ngeenge hatu pe Jehova osho sha denga mbada, ohatu kala twa hafa. (Mat. 22:36-38) Oshitivali, otwa pumbwa okuhenuka okuliyelekanifa novanhu vakwetu. Otwa pumbwa okupandula Jehova omolwoukolele, edeulo olo he tu pe nosho yo omolwokudula oko tu na. Osho sha fimanenena oshosho kutya keshe osho tu na osha dja kuJehova. Onghee hano, ngeenge ovanhu vakwetu ohava pondola ve tu dule, tashi dulika moukalele, otwa pumbwa okukala hatu va pandula, molwaashi otava longifa owino wavo, opo va hambelele Jehova, ndele haku lifimanekifa vo vene. Ponhele yokukala hatu liyelekanifa navo, otwa pumbwa okulihonga kuvo.

³ Moshitukulwa eshi, ohatu ka tala nghee hatu dulu okufinda ounghundi wokukala tu udite twa ngabekwa, ile itatu longo shihapu moilonga yaJehova. Ohatu ka kundafana yo nghee hatu dulu okulongifa eeshali odo tu na nosho yo okulihonga koihopaenenwa yavamwe.

4. Onghalo ilipi tai dulu okuteya omunhu omukumo? Yandja oshihopaenenwa.

⁴ Ovapiya vaJehova vamwe ova taalela eenghalo didjuu, omolwomangabeko oo haa etifwa koukulupe, ile kokuhe na oukolele. Osho osha ningilwa omumwameme Carol. Okwa li e na oufembanghenda wokulongela koshitukulwa oko ku na omhumbwe inene yovaudifi. Pefimbo opo, okwa li ha konakona Ombiibeli novanhu 35. Okwa kwafela ovanhu vonhumba ve liyapulile Jehova nokuninginifwa. Carol okwa li ha mono oidjemo itunhula moukalele. Opo nee okwa ka hakukilwa kouyahame wa kwata moiti, noka li vali ha di mo meumbo. Carol okwa ti: “Ohandi kala meumbo omolwokuhe na oukolele. Ihandi dulu vali okulonga shihapu, ngaashi ovanhu vakwetu. Osho ohashi ningifa nge ndi diladile kutya kandi fi omudiinini. Ihandi dulu vali okuninga keshe shimwe ngaashi nale. Osho osha ningifa nge ndiha dule okulididimika.” Carol okwa hala okupa Jehova osho sha denga mbada, naasho oshi shii okupandulwa. Otu na oushili kutya Kalunga ketu omunalukeno oha pandula eenghendabala odo tadi ningwa kuCarol, opo e mu longele.

5. (a) Oshike tu na okukaleka momadiladilo omolwomangabeko etu? (b) Omumwatate okwa kala ta yandje ngahelipi kuJehova osho sha denga mbada, ngeenge hatu tale komafano oo?

⁵ Ngeenge omafimbo amwe oho kala wa teka omukumo omolwomangabeko, lipula kutya, ‘Jehova okwa teelela ndi ninge shike?’ Okwa teelela u mu pe osho sha denga mbada, she likolelela konghalo oyo u li muyo paife. Diladila koshihopaenenwa tashi shikula: Omumwameme womido 80 a teka omukumo, molwaashi ita dulu vali okulonga shihapu, ngaashi a li ha ningi nale, eshi a li e na omido 40. Oha diladila kutya Jehova ina hokwa osho te mu pe, nonande ohe mu pe osho sha denga mbada. Ndele mbela oshoshili tuu? Diladila kwaashi. Omumwameme oo ina efa okupa Jehova osho sha denga mbada. Eshi a li e na omido 40 okwa li ha ningi ngaashi ta dulu, opo a pe Jehova osho sha denga mbada, ndele naashi e na omido 80 ota twikile okuninga sha faafana. Ngeenge otu udite kutya itatu dulu okupa Jehova osho sha denga mbada, otwa pumbwa okukaleka momadiladilo kutya Jehova oye a tula po omifikamhango di na sha naasho hashi mu hafifa. Ngeenge otwa ningi ngaashi hatu dulu, Jehova ota ka lombwela keshe umwe womufye ta ti: “Owa ninga nawa!” — Yelekanifa naMateus 25:20-23.

6. Oshike hatu lihongo moshihopaenenwa shaMaria?

⁶ Ohatu ka kala twa hafa, ngeenge ohatu yandje elitulemo kwaasho hatu dulu okuninga, ponhele yokuyandja elitulemo kwaasho itatu dulu okuninga. Diladila koshihopaenenwa shomumwameme wedina Maria, oo e na oudu, oo hau mu imbi okulonga shihapu moukalele. Pehovelo okwa li a polimana noku udite ehe na oshilonga. Opo nee okwa li a diladila kombinga yomumwameme umwe, oo iha di mo mombete, nokwa li a tokola oku mu kwafela. Maria okwa ti: “Onda ninga omalongekido, opo tu kale hatu udifa naye hatu denge eengodi nokushanga eenhumwafo. Efimbo keshe handi uya keumbo, konima eshi twa longa pamwe, ohandi kala nda hafa nonda wanenwa, molwaashi onda dula okukwafela omumwameme.” Nafye ohatu dulu okuweda ko kehafo letu, ngeenge otwa kala hatu yandje elitulemo kwaasho hatu dulu okuninga, ponhele yokuyandja elitulemo kwaasho itatu dulu okuninga. Ndele ongahelipi ngeenge ohatu dulu okulonga shihapu moilonga yaJehova, ile hatu dulu okutamununa mo oukalele wetu?

7. Omayele taa longo elipi omuyapostoli Petrus a pa Ovakriste?

⁷ Omuyapostoli Petrus okwa lombwela ovamwaxe monhumwafo yaye yotete ya nwefwa mo kutya nava longife eeshali odo ve na, opo va tungafane nOvakriste vakwao. Petrus okwa ti:  “Ngaashi omalenga oo haa longo noudiinini nokwa ulikilwa efilonghenda laKalunga meenghedi di lili noku lili, yakulafaneni keshe umwe she likolelela koshali oyo a pewa.” (1 Pet. 4:10) Onghee hano, inatu kala twa tila okulongifa pauyadi eeshali odo twa pewa, molwaashi twa tila kutya vakwetu otava ka kala ve tu twila ondubo, ile va teke omukumo. Itatu ka pa Jehova osho sha denga mbada, ngeenge otwa tila okulongifa pauyadi eeshali odo tu na.

8. Metwokumwe no 1 Ovakorinto 4:6, 7, omolwashike twa pumbwa okuhenuka okulitangela eeshali odo tu na?

⁸ Otwa pumbwa okulongifa eeshali odo tu na pauyadi, ashike otu na okukala twa lungama tuhe di litangele. (Lesha 1 Ovakorinto 4:6, 7.) Pashihopaenenwa, natu tye nee ngeno oho pondola mokuhovela omakonakonombiibeli. Ino ongaonga okulongifa oshali ya tya ngaho. I longifa pauyadi, ndele inai ku ningifa u kale u na ounhwa. Natu tye nee ngeno ou na oshimoniwa shitunhula shi na sha noukalele, wa hovela okukonakona Ombiibeli naumwe efimbo opo la di ko. Owa halelela neenghono okulombwela ongudu yeni yoilonga yomomapya oshimoniwa osho. Eshi mwa ka shakena pelongekido, omumwameme umwe okwa hovela okupopya kombinga yoshimoniwa shaye shitunhula shi na sha nanghee a yandja oshifo. Ye okwa yandja oshifo, ofimbo ove wa hovela okukonakona Ombiibeli naumwe. Mbela oto ka ninga po shike? Ou shii kutya ongudu yeni yoilonga yomomapya otai ka tuwa omukumo koshimoniwa shoye. Otashi dulika shiwa u i kufile ko koshimoniwa osho efiku limwe. Molwaashi ngeenge owe i lombwele efiku olo, omumwameme oo a yandja oshifo ota ka kala e udite ina pondola. Kungaho, oto ulike kutya ou na onghenda. Ashike ino efa po okukala ho konakona Ombiibeli novanhu. Longifa oshali yoye pauyadi.

9. Otu na okulongifa ngahelipi eeshali detu?

⁹ Natu kale tu shii kutya okudula keshe oko tu na oku li oshali ya dja kuKalunga. Otwa pumbwa okulongifa eeshali da tya ngaho, opo tu tunge eongalo, ndele haku litumbalekifa fye vene. (Fil. 2:3) Ngeenge hatu longifa eenghono nosho yo okudula kwetu tu longe ehalo laKalunga, otu na etomheno lokukala twa hafa. Hamolwaashi ngeno kutya ohatu pondola tu dule vamwe, ile hatu kendabala okukala tu li xwepo tu va dule. Ndele omolwaashi hatu longifa eeshali detu tu fimanekife Jehova.

10. Omolwashike shihe li pandunge okuliyelekanifa novanhu vakwetu?

¹⁰ Ngeenge inatu lungama, otashi dulika tu ye momwiyo wokuyelekanifa osho hatu dulu okuninga, naasho vakwetu itava dulu okuninga. Pashihopaenenwa, natu tye nee ngeno omumwatate oha yandje oipopiwa iwa yomoipafi. Ohe i denge komutwe lelalela. Ndele momutima waye otashi dulika a kale a dina omumwatate, oo iha yandje  oipopiwa iwa. Ashike omumwatate, oo iha yandje oipopiwa iwa, otashi dulika e hole okuyakula ovaenda, ha deula ovana vaye, ile e na ouladi moukalele. Inatu pandula tuu eshi tu na ovamwatate novamwameme vahapu, ovo hava longifa eeshali davo, opo va longele Jehova nokukwafela ovanhu vakwao!

11. Omolwashike tu na okukendabala okushikula oshihopaenenwa shaJesus?

¹¹ Nonande inatu pumbwa okuliyelekanifa navamwe, ohatu ka mona ouwa, ngeenge otwe lihongo koihopaenenwa yovapiya vaJehova ovadiinini. Jesus oku li oshihopaenenwa sha denga mbada osho hatu dulu okulihonga kusho. Nonande okwa li a wanenena, ohatu dulu okulihonga komaukwatya aye mawa nosho yo koinima iwa oyo a ninga. (1 Pet. 2:21) Ngeenge otwa ningi ngaashi hatu dulu tu shikule oshihopaenenwa shaye filufilu, ohatu ka kala ovapiya vaJehova ve li xwepo nohatu ka pondola moukalele.

12-13. Oshike hatu lihongo kohamba David?

¹² MEendjovo daKalunga omu na oihopaenenwa ihapu yovalumenhu novakainhu, ovo hatu dulu okuhopaenena, nonande kava li va wanenena. (Heb. 6:12) Jehova okwa popya shi na sha nohamba David a ti: “Omulumenhu oo ha hafifa omutima wange.” (Oil. 13:22) David ka li a wanenena. Oshoshili kutya okwa li a nyona sha kwata moiti. Ashike nande ongaho, oku li oshihopaenenwa shiwa kufye. Omolwashike mbela? Omolwaashi ka li ta kendabala okulipopila, eshi a pukululwa. Ponhele yaasho, okwa li a tambula ko omayele a kwata moiti, oo a li a pewa, nokwe livela ombedi tashi di komutima. Oshidjemo? Jehova okwa li e mu dimina po. — Eps. 51:3, 4, 10-12.

¹³ Ohatu dulu okulihonga kuDavid mokulipula omapulo aa: ‘Ohandi linyenge ngahelipi, ngeenge handi pewa omayele? Ohandi dimine ngoo diva omapuko ange, ile ohandi kala handi lipopile? Mbela ohandi vele ombedi diva vakwetu? Ohandi kendabala ngoo okuhenuka ndiha endulule epuko la faafana?’ Otwa pumbwa okulipula omapulo a fela oko, ngeenge hatu lesha kombinga yovalumenhu novakainhu ovadiinini ovo va tumbulwa mOmbiibeli. Mbela ova taalela omashongo a fa oo nda taalela? Omaukwatya a denga mbada elipi va ulika? Monghalo keshe, lipula kutya: ‘Ongahelipi handi dulu okukala nda fa omupiya waJehova ou omudiinini?’

14. Ongahelipi hatu dulu okumona ouwa mokutala koihopaenenwa iwa yovaitaveli vakwetu?

¹⁴ Ohatu dulu okumona ouwa mokutala koihopaenenwa iwa yovaitaveli vakwetu, kutya nee oyovanyasha, ile oyovakulunhu. Pashihopaenenwa, mbela meongalo leni omu na Omukriste oo te lididimikile eyeleko lonhumba, tashi dulika efininiko loomakula, omapataneko  omoukwaneumbo, ile okuhe na oukolele? Mbela ou wete omaukwatya mawa mOmukriste oo nowa hala oku mu hopaenena? Ngeenge owe lihongo koshihopaenenwa shaye shiwa, otashi dulika u ka mone osho tashi dulu oku ku kwafela u lididimikile eshongo olo wa taalela. Mbela inatu hafa tuu eshi tu na oihopaenenwa iwa yovapiya vaJehova ovadiinini vokunena! — Heb. 13:7; Jak. 1:2, 3.

15. Omuyapostoli Paulus okwe tu pa omayele elipi, oo tae tu kwafele tu hafele oilonga oyo hatu longele Jehova?

¹⁵ Keshe umwe womufye okwa pumbwa okuninga ngaashi ta dulu, opo a xumife komesho ombili nosho yo oukumwe meongalo. Natu ka taleni kOvakriste ovo va li ko pefimbo lovayapostoli vaJesus. Ova li ve na eeshali noinakuwanifwa ya yoolokafana. (1 Kor. 12:4, 7-11) Ashike osho inashi va ningifa va kale ve na omhepo yefiyafanepo, ile va tukauke. Ponhele yaasho, Paulus okwa ladipika keshe umwe a ninge ngaashi ta dulu, opo a “tunge olutu laKristus.” Paulus okwa shangela Ovaefeso a ti: “Ngeenge oilyo aishe otai longo nawa, olutu otali ka kula nawa notali ke litunga pahole.” (Ef. 4:1-3, 11, 12, 16) Ovakriste ovo kunena hava tula moilonga omayele aPaulus ohava xumifa komesho ombili noukumwe meongalo.

16. Otu na okukala twa tokola toko okuninga shike? (Ovaheberi 6:10)

¹⁶ Kala wa tokola toko okuheliyelekanifa navamwe. Ponhele yaasho, shikula oshihopaenenwa shaJesus nokuhopaenena omaukwatya aye. Mona ouwa mokukonakona oihopaenenwa yovapiya vaJehova ovadiinini, ovo va tumbulwa mOmbiibeli nosho yo vokunena. Ngeenge owa twikile okupa Jehova osho sha denga mbada, kala u na oushili kutya ‘ke fi omuhenouyuki a dimbwe ngeno oilonga yoye.’ (Lesha Ovaheberi 6:10.) Twikila okukala wa hafa, eshi to longele Jehova, molwaashi ou shii kutya okwa pandula eenghendabala doye, eshi to mu longele nomwenyo woye aushe.