Ngeenge omunhu ta ningi eano, oha popi ta koleke kutya oshinima shonhumba oshoshili, ile ote shi ningi. Luhapu ohali ningwa koshipala shaKalunga . . . e li ondombwedi. Ohali ningwa pakanya, ile pakushangwa.

Vamwe otashi dulika va diladile kutya osha puka okuninga eano, molwaashi Jesus okwa ti: “Inamu ana nandenande . . . Eendjovo deni ‘Heeno,’ nadi kale heeno, nosho yo ‘Ahowe,’ nai kale ahowe; edi da wedwa po oda dja momunawii.” (Mat. 5:33-37) Jesus okwa li e shii kutya paMhango yaMoses ovanhu ova li va teelelika va ninge eano moinima yonhumba. Okwa li e shii yo kutya ovapiya ovadiinini vaKalunga ova li va ana moinima imwe. (Gen. 14:22, 23; Ex. 22:10, 11) Okwa li yo e shii kutya Jehova naye mwene okwa li a ninga eano. (Heb. 6:13-17) Onghee hano, Jesus ka li a hala kutya katu na okwaana nandenande. Ndele ponhele yaasho, okwa li ta londwele ovanhu vaha anene oinima yongaho, ile oipolopolo. Otu na okutala ko eendjovo detu diyapuki notu na okukala metwokumwe naasho twa popya.

Oto ka ninga po shike, ngeenge owa pulwa u ninge eano? Tete, shilipaleka kutya oto dulu okuwanifa po eano loye. Ngeenge ku na oushili, otashi ka kala shiwa uha ninge eano. Eendjovo daKalunga oda londwela da ti: “Shi dule ove iho udaneke sha, ponhele ho udaneke ndelenee ito wanifa.” (Omuud. 5:5) Oshitivali, diladila komafinamhango opaMishangwa, oo a pamba eano, opo nee to katuka metwokumwe neliudo loye la deulwa. Omafinamhango amwe opaMishangwa oelipi po?

Okwaana kumwe oko ku li metwokumwe nehalo laKalunga. Pashihopaenenwa, Eendombwedi daJehova ohadi ningi eudaneko, ngeenge tadi hombola. Neudaneko la tya ngaho, oli li oludi leano. Omuhomboli nomuhombolwa ohava udaneke moipafi yaKalunga nosho yo yeendombwedi kutya otava ka kala ve holafane, va lengafana nova fimanekafana “fimbo aveshe ve li momwenyo.” (Ovalihomboli vamwe otashi dulika ihava popi eendjovo odo filufilu ngeenge tava hombola, ashike ohava ane koshipala shaKalunga.) Ohava ningi omushamane nomukulukadi, nohava kala pamwe ve li ovalihomboli onghalamwenyo yavo aishe. (Gen. 2:24; 1 Kor. 7:39) Elongekido la tya ngaho, otali wapalele noli li metwokumwe nehalo laKalunga.

Okwaana kumwe oku li omhinge nehalo laKalunga. Omukriste washili ita ka ninga eano, opo a kufe oilwifo a popile oshilongo shonhumba, ile a efe po eitavelo laye muKalunga. Ngeenge okwa ningi ngaho, ota ka nyona oipango yaKalunga. Ovakriste kave na okukala ‘oshitukulwa shounyuni ou.’ Onghee hano, katu na okukufa ombinga meenhamanana, ile moita, oyo tai ningwa mounyuni. — Joh. 15:19; Jes. 2:4; Jak. 1:27.

 Ovakriste ove na okuwilikwa keliudo lavo, ngeenge otava ka ninga eano lonhumba, ile hasho. Omafimbo amwe, otashi dulika twa pumbwa okukonakona eano letu noukeka hatu shi ningi metwokumwe nomayele aJesus, oo taa ti: “Eshi shOmukesari shi peni Omukesari, naasho shaKalunga shi peni Kalunga.” — Luk. 20:25.

Pashihopaenenwa, natu tye nee ngeno Omukriste okwa ninga eindilo a ninge omukwashiwana, ile li na sha nopasporta nokwa didilika kutya okwa teelelika a kale omudiinini keano lonhumba. Ngeenge okuninga eano la tya osha hala kutya oto ka ninga oshinima shi li filufilu omhinge nomhango yaKalunga, eliudo laye la deulwa kOmbiibeli itali ke mu pitika. Ashike epangelo otashi dulika li mu pitike a ninge mo omalunduluko onhumba, opo a ninge eano neliudo la yela.

Okuninga omalunduluko meano lonhumba otashi dulika shi li metwokumwe nefinamhango olo tali hangwa mOvaroma 13:1, olo tali ti: “Omunhu keshe na dulike kovapangeli.” Onghee hano, Omukriste otashi dulika e na okutokola kutya inashi puka okuninga eano moshinima osho Kalunga a teelela tu ninge.

Osha fimana yo okudulika keliudo loye la deulwa, ngeenge to pulwa u longife oshinima shonhumba, ile u ninge eudi lonhumba ngeenge to anifwa. Ovaroma vonale nosho yo Ovaskiti ova li hava ane paendjovo davo, naasho osha hala kutya ova li hava longifa edidiliko loshikalunga shomoita, osho shi li onga eudaneko kutya omunhu ota ka kala omudiinini. Ovagreka ova li hava yelula eke lavo pombada keulu, ngeenge tava ane. Onghee hano, ove ke shi mona mo kutya ope na eenghono daumwe, oo ovanhu tave ke lihokolola kuye, oo ha kala ta pwilikine osho tava popi noha mono osho tava ningi.

Oshoshili kutya omupiya waJehova ita ka ana nandenande kedidiliko lonhumba lopashiwana, olo li na ekwatafano nelongelokalunga loipupulu. Ndele mbela oto ka ninga po shike, ngeenge owa pulwa momhangu u tenheke eenyala doye kombada yOmbiibeli nokwaana kutya oto ka yandja oumbangi washili? Monghalo ya tya ngaho, oto dulu okutokola okuninga ngaho, molwaashi Omishangwa oda popya kombinga yovapiya vaKalunga vamwe ovadiinini, ovo va li va ninga eano va longifa eudi lonhumba. (Gen. 24:2, 3, 9; 47:29-31) Osha fimana yo okudimbuluka kutya ngeenge owa pulwa u ninge eano monghedi ya tya ngaho, oto ane koshipala shaKalunga kutya oto ka popya oshili. Owa pumbwa okulilongekida, opo u ka nyamukule epulo keshe mondjila olo tashi dulika to ka pulwa.

Molwaashi otwa lenga neenghono ekwatafano letu naJehova, otu na okwiilikana nokudiladila noukeka shi na sha neano olo tashi dulika twa teelelika tu ninge, nokushilipaleka kutya itali ka piyaaneka eliudo letu, ile li nyone omafinamhango Ombiibeli. Ngeenge owa tokola okuninga eano, shilipaleka kutya oto ka kala metwokumwe nalo. — 1 Pet. 2:12.