1. Ovakriste ove na okuninga shike opo va mane efiyafano loku ka mona omwenyo?

OVAKRISTE ove li mefiyafano loku ka mona omwenyo. Kutya nee opo twa hovele okutondoka, ile otwa kala hatu tondoka oule womido, otwa pumbwa okutwikila fiyo osheshi twa mana efiyafano. Onhumwafo oyo omuyapostoli Paulus a li a shangela Ovakriste vomuFilippi otai tu tu omukumo tu dule okumana efiyafano. Vamwe meongalo lomefelemudo lotete ova hangwa nale va longela Jehova oule womido eshi Paulus e va shangela onhumwafo. Ova hangwa nale hava longele Jehova noudiinini, ashike Paulus okwa li e va dimbulukifa va twikile okutondoka nelididimiko. Okwa li a hala va shikule oshihopaenenwa shaye ‘shokulotokela kefikilo.’ — Fil. 3:14.

2. Omolwashike omayele oo Paulus a li a pa Ovafilippi a li e li pefimbo?

² Omayele oo Paulus a li a yandja kOvafilippi okwa li e li pefimbo. Ovamwatate ova li va taalela omahepeko okudja ashike eshi eongalo la totwa po. Mefelemudo 50 O.P. Paulus naSilas ova li va dulika eshi Kalunga e va lombwela a ti: “Yaukila oku, u uye kuMakedonia.” Onghee ova li va ya kuFilippi va ka udife onghundana iwa. (Oil. 16:9) Ova li va shakena ko nomukainhu wedina Lidia, oo a li ‘ta pwilikine, nOmwene okwa li a yeulula omutima waye’ opo a pwilikine konghundana iwa. (Oil. 16:14) Okwa li a ninginifwa diva pamwe noukwaneumbo waye. Ashike Ondiaboli oya li ya hovela diva oku va etela omaupyakadi. Ovalumenhu vomoshilando ova li va twala Paulus naSilas kovapangeli vomoshilando, ndele tave va lundile kutya ova eta omapiyaano. Oshidjemo, Paulus naSilas ova li va dengwa, va tulwa modolongo, nokonima ova li va lombwelwa va fiye po oshilando. (Oil. 16:16-40) Mbela ova li va sholola? Ahowe. Ovamwatate novamwameme vomeongalo olo opo la li la totwa po ova li va ninga po shike? Ova tula po oshihopaenenwa  shiwa molwaashi navo ova li ve lididimika. Kape na omalimbililo, ova li va tuwa omukumo koshihopaenenwa shiwa osho Paulus naSilas ve va tulila po.

3. Oshike Paulus a li e shii, nomapulo elipi hatu ka kundafana?

³ Paulus okwa li a tokola aha sholole. (2 Kor. 4:16) Okwa li e shii kutya opo a dule okutondoka fiyo okefindano, okwa li e na okuyandja elitulemo kondjabi. Oshike hatu lihongo moshihopaenenwa shaPaulus? Oihopaenenwa yeitavelo ilipi tu na kunena oyo tai ulike kutya ohatu dulu okulididimika nonande ope na omaupyakadi? Nongahelipi elineekelo letu li na sha nonakwiiwa tali tu kwafele tuha sholole?

4. Ongahelipi Paulus a li a dula okulipyakidila noilonga yaJehova nonande okwa li a taalela eenghalo didjuu?

⁴ Diladila kwaasho Paulus a li te lipula nasho eshi ta shangele Ovafilippi. Okwa li e li modolongo yomeumbo muRoma. Ka li ta dulu okudja mo a ka udife. Ashike okwa li ha kala e lipyakidila nokuudifila ovo have uya oku mu talela po nosho yo okushanga eenhumwafo di ye komaongalo amwe. Sha faafana nokunena, Ovakriste vahapu ovo ihava dulu okudja mo momaumbo ohava longifa omhito keshe opo va udifile onghundana iwa ovo tave va talele po momaumbo avo. Ohava shangele yo eenhumwafo detwomukumo ovaneumbo ovo ihava dulu okushakena navo.

5. She likolelela keendjovo daPaulus odo di li mOvafilippi 3:12-14, oshike sha li she mu kwafela a kale a tala kondjabi?

⁵ Paulus ka li a efa a piyaanekwe koinima iwa ile ii oyo a li a ninga monakudiwa. Ponhele yaasho, okwa ti kutya oku na ‘okudimbwa ei yokonima’ opo a ‘lalakanene ei yokomesho,’ kokutya, okumana efiyafano. (Lesha Ovafilippi 3:12-14.) Oinima imwe ilipi ya li tai dulu okupiyaaneka Paulus? Shotete, Paulus okwa li e na onghalamwenyo youdjeko ofimbo ina ninga Omukriste. Ashike okwa li e i tala ko i li “oimbodi yongaho.” (Fil. 3:3-8) Oshitivali, nonande okwa li e livela ombedi omolwonghedi omo a li a ungaunga nOvakriste, kasha li she mu efifa po okulongela Jehova. Noshititatu, ka li ha diladila kutya okwa longela Jehova sha wana nokwa pumbwa okweefa po oku mu longela noudiinini. Paulus okwa longa shihapu moukalele, nonande okwa li a shakeneka omashongo mahapu, ngaashi okwiidililwa modolongo, okudengwa, okudengwa nomamanya, okuningina noshikepa nosho yo okuhe na oikulya ya wana noikutu. (2 Kor. 11:23-27) Ashike okwa li e shii kutya oku na okutwikila okulongela Jehova, kashi na nee mbudi kutya okwa li a pondola shike nokwa mona oixuna shi fike peni. Nafye otu na okuninga sha faafana.

6. Oinima imwe “ei yokonima” ilipi tashi dulika twa pumbwa okudimbwa?

⁶ Ongahelipi hatu dulu okushikula oshihopaenenwa shaPaulus ‘mokudimbwa ei yokonima’? Vamwe vomufye otashi dulika twa pumbwa okweefa po okulipula unene omolwomapuko etu omonakudiwa. Ngeenge osho, omolwashike ito hovele nekonakono lopaumwene kombinga yekuliloyambo laKristus? Ngeenge otwa konakona, twa dilonga nokwiilikana kombinga yekuliloyambo, otashi dulika tuha kale vali hatu yandje elitulemo koinima oyo ihe na oshilonga. Otashi dulika nokuli tuhe livele vali ombedi omolwomanyono oo Jehova e tu dimina po nale. Diladila koshinima shimwe vali osho hatu dulu okulihonga kuPaulus. Vamwe otashi dulika va efa po oilonga oyo hai futu nawa opo va longele Jehova pauyadi. Ngeenge osho, mbela itatu dulu okudimbwa ei yokonima mokuha kala hatu diladila koinima yopamaliko oyo twa kanifa? (Num. 11:4-6; Omuud. 7:10) Oinima “ei yokonima” otashi dulika ya kwatela mo oinima oyo twa pondola ile omashongo oo twe lididimikila monakudiwa. Oshoshili kutya ngeenge  otwa kala hatu diladila kunghee Jehova e tu nangeka noupuna naashi e tu yambidida oule womido, otashi ke tu ehenifa popepi naTate yetu. Ashike inatu hala nande okudiladila kutya otwa longela Jehova sha wana. — 1 Kor. 15:58.

7. Metwokumwe 1 Ovakorinto 9:24-27 oshike tu na okuninga opo tu ka mone kondjabi yomwenyo? Shi yelifa.

⁷ Paulus okwa li e udite ko nawanawa eendjovo daJesus odo tadi ti: ‘Kondjeni mwa mana mo.’ (Luk. 13:23, 24) Ngaashi Kristus, okwa li e shii kutya oku na okukondja onghalamwenyo yaye aishe. Onghee okwa faafanifa onghalamwenyo yOmukriste nefiyafano. (Lesha 1 Ovakorinto 9:24-27.) Omulotoki oo e li mefiyafano oha yandje elitulemo kefikilo noha henuka keshe osho tashi mu imbi a ka fike. Pashihopaenenwa, ovalotoki otashi dulika va lotoke mopate omo mu na eefitola ile oinima imwe vali oyo tai dulu oku va piyaaneka. Mbela oto diladila kutya omulotoki otashi dulika a fikame opo a tale oinima oyo tai ulikwa mofitola okupitila momakende? Ite ke shi ninga ngeenge okwa hala okufindana. Nafye otu na okuhenuka keshe osho tashi tu imbi tu ka mone omwenyo waalushe. Ngeenge otwa yandje elitulemo kelalakano letu, hatu kondjo twa mana mo ngaashi Paulus, nafye ohatu ka mona ondjabi.

8. Omashongo atatu elipi hatu ka konakona?

⁸ Natu ka konakoneni omashongo atatu oo haa yeleke eitavelo letu. Lotete, ongeenge inatu wanifilwa oinima yonhumba oyo twa li twa teelela ngeno i ningwe. Etivali, okukanifa oukolele omolwoukulupe. Etitatu, okulumba nonghalo yonhumba efimbo lile. Ohatu dulu okumona ouwa mokulihonga kunghee vamwe va li va dula okuungaunga neenghalo da tya ngaho. — Fil. 3:17.

9. Ohatu kala tu udite ngahelipi ngeenge inatu wanifilwa oinima yonhumba?

⁹ Ngeenge inatu wanifilwa oinima yonhumba. Ohatu kala twa teelela nodjuulufi oinima iwa oyo Jehova a udaneka. Eshi omuprofeti waJehova, Habakuk, a li a halelela Jehova a xulife po oukolokoshi oo wa li muJuda, Jehova okwa li e mu lombwela a ‘teelele.’ (Hab. 2:3) Nafye otashi dulika tuha kale vali tu na ouladi nosho yo ondjungu ngeenge oinima oyo twa li twa teelela inai ningwa. Otashi dulika nokuli tu teke omukumo.  (Omayel. 13:12) Osho osha li sha ningilwa ovamwatate vamwe mo 1914. Pefimbo opo, Ovakriste vahapu ovavaekwa ova li va teelela okuya meulu momudo oo. Ovakriste ovadiinini ova li va ungaunga ngahelipi nonghalo oyo eshi va li inava wanifilwa osho va li va diladila?

10. Ovalihomboli vamwe ova li va ninga po shike eshi oinima oyo va li va teelela inai wanifwa?

¹⁰ Natu ka tale koshihopaenenwa shOvakriste vavali ovadiinini ovo va pita meshongo la tya ngaho. Omumwatate Royal Spatz okwa ninginifwa mo 1908 eshi a li e na omido 20. Okwa li e na elineekelo kutya mafiku ota ka ya meulu. Eshi a li pokuhombola Pearl, mo 1911, okwa li e mu lombwela a ti: “Ou shii nawanawa eshi tashi ka ningwa mo 1914. Ngeenge ohatu ka hombola, natu shi ninge diva.” Mbela ovalihomboli ovo Ovakriste ova li va fya ounye eshi va li inava ya meulu mo 1914? Ahowe, molwaashi elalakano lavo ola li okuwanifa po ehalo laKalunga, ndele kala li okuya meulu. Ova li va tokola okulididimika. Oshidjemo, Royal naPearl ova kala ve lipyakidila novadiinini fiyo osheshi va mana oweenda wavo wokombada yedu omido da ka lupuka. Kape na omalimbililo kutya naave owa halelela oku ka mona eshi Jehova ta ka yukipalifa edina laye nosho yo ounamapangelo waye, naashi ta ka wanifa po omaudaneko aye. Kala u na oushili kutya oinima oyo otai ka wanifwa po peufwafimbo laJehova. Ofimbo twa teelela, natu twikile okulongela Kalunga ketu, inatu teka omukumo eshi oinima oyo twa teelela inai wanifwa.

11-12. Omolwashike tu na okutwikila okulongela Jehova nonande ka tu na oukolele we lixwapo? Yandja oshihopaenenwa.

¹¹ Okukanifa oukolele omolwoukulupe. Omulotoki okwa pumbwa eenghono dihapu opo a dule okukala mefiyafano, ashike ove ino pumbwa okukala u na eenghono dopalutu opo u kale u na eitavelo nosho yo oudiinini. Vahapu ovo va kanifa oukolele omolwoukulupe natango ova halelela okulongela Jehova noudiinini. (2 Kor. 4:16) Pashihopaenenwa, eshi omumwatate Arthur Secord * a li e na omido 88, okwa hangwa nale a longa koBetel oule womido 55, noka li e na oukolele we lixwapo. Efiku limwe omupangi umwe okwa li e uya oku mu fila oshisho. Omupangi okwa li e mu tala, ndele ta ti kuye newi li talala: “Omumwatate Secord, owa longa shihapu moilonga yaJehova.” Ashike nande ongaho, omumwatate Arthur ka li ta yandje elitulemo kwaasho a longa monakudiwa. Okwa tala komupangi, ndele te mu nyamukula te limemesha a ti: “Oshoshili. Ashike osho twa longa hasho sha fimana. Osho sha fimana okukala ovadiinini paife.”

¹² Otashi dulika wa kala to longele Jehova oule womido ndele paife owa mona kutya ito dulu vali okulonga shihapu omolwokuhe na  oukolele. Ngeenge osho, ino teka omukumo. Shiiva kutya Jehova okwa lenga neenghono oilonga youdiinini oyo wa kala to mu longele monakudiwa. (Heb. 6:10) Ashike dimbuluka kutya okulonga shihapu moilonga yaJehova hasho hashi ulike kutya otu mu hole. Ponhele yaasho, ohatu ulike kutya otu mu hole ngeenge otu na elihumbato liwa nokuninga eenghendabala ngaashi hatu dulu. (Kol. 3:23) Jehova oku shii omangabeko etu noina teelela tu ninge shihapu shi dulife pwaasho hatu dulu. — Mark. 12:43, 44.

13. Oshihopaenenwa shaAnatoly naLidiya otashi tu ladipike ngahelipi tu twikile okulongela Jehova, kashi na nee mbudi kutya otwa taalela omayeleko e fike peni?

¹³ Okulumba nonghalo yonhumba efimbo lile. Ovapiya vaJehova vamwe ova kala nokulididimikila omayeleko nosho yo omapataneko oule womido. Pashihopaenenwa, Anatoly Melnik * okwa li e na omido 12 eshi xe a tulwa modolongo, nokwa li a tuminwa koSiberia, kokule noukwaneumbo waye moMoldova oule weekilometa 7 000. Konima yodula imwe, Anatoly, ina nosho yo inakulu naxekulu navo ova li va tuminwa koSiberia. Lwanima, ova li va dula okuya kokwoongala momukunda umwe, ashike ova li ve na okweenda oule weekilometa 30 mo-snow, tave lididimikile onghalo yomhepo italala neenghono. Lwanima, omumwatate Melnik okwa li a tulwa modolongo oule womido natu, nokwa li a fiya po omukulukadi waye, Lidiya, nosho yo okamonakadona kavo ke na odula imwe. Nonande Anatoly noukwaneumbo waye ova li va taalela omashongo, ova li va twikila okulongela Jehova noudiinini. Anatoly oku na omido 82 paife, nota longo e li oshilyo shOkomitiye yOshitaimbelewa muAsia loPokati. Ngaashi Anatoly naLidiya, natu longele Jehova ngaashi hatu dulu, nokutwikila okulididimika ngaashi twe shi ninga monakudiwa. — Gal. 6:9.

14. Paulus okwa li a didilika kutya oku na okuninga shike opo a hange elalakano laye?

¹⁴ Paulus okwa li e na elineekelo kutya ota ka mana efiyafano nota ka hanga elalakano laye. E li Omukriste omuvaekwa, okwa li a teelela oku ka mona ‘ondjabi yefindano oyo Kalunga e i mu ifanena neifano lopombada.’ Ashike opo a hange elalakano olo, okwa li a didilika kutya okwa pumbwa okutwikila ‘okulotoka.’ (Fil. 3:14) Paulus okwa li a longifa efaneko lihokwifa opo a kwafele Ovafilippi va yandje elitulemo kelalakano lavo.

15. Paulus okwa li a longifa ngahelipi efaneko li na sha noukwashiwana opo a kwafele Ovakriste Ovafilippi va twikile ‘okulotoka fiyo okefikilo’?

¹⁵ Paulus okwa li a dimbulukifa Ovafilippi oukwashiwana  wavo womeulu. (Fil. 3:20) Omolwashike va li va pumbwa okudimbulukifwa oshinima osho? Pefimbo olo, ovanhu ova li hava kala va hala oukwashiwana waRoma molwaashi osha li hashi va pefa omauwa mahapu. * Ashike Ovakriste ovavaekwa ova li ve na oukwashiwana wa denga mbada, oo wa li tau ke va pefa omauwa mahapu. Okukala noukwashiwana waRoma okwa li ku na ongushu inini okuyelekanifa noukwashiwana wepangelo lomeulu. Onghee, Paulus okwa li a ladipika Ovafilippi va ‘kale ashike nokweenda nokuwapalela evaengeli laKristus.’ (Fil. 1:27) Ovakriste ovavaekwa kunena ova tula po oshihopaenenwa shiwa eshi hava yandje elitulemo kelalakano lavo loku ka kala nomwenyo fiyo alushe meulu.

16. She likolelela kOvafilippi 4:6, 7, otu na okutwikila okuninga shike, kashi na nee mbudi kutya otu na eteelelo loku ka kala meulu ile okombada yedu?

¹⁶ Kutya nee otu na eteelelo loku ka kala nomwenyo fiyo alushe meulu ile omoparadisa kombada yedu, natu twikile okulotoka twa tala kondjabi. Kashi na nee mbudi kutya otwa kala hatu lididimike shi fike peni, inatu pumbwa okukala hatu diladila konakudiwa yetu nosho yo okweefa oshinima keshe shi tu imbe okulongela Jehova. (Fil. 3:16) Otashi dulika twa kala twa teelela efimbo lile okumona nghee omaudaneko aJehova taa wanifwa, ile tashi dulika twa ninga ovanamido noka tu na vali eenghono. Otashi dulika twe lididimikila omaupyakadi nosho yo omapataneko oule womido dihapu. Kashi na nee mbudi kutya ou li monghalo ilipi, ino ‘kala u na nande oshisho shasha.’ Ponhele yaasho, shiivifila Kalunga omailikano nomaindilo oye, note ke ku pa ombili oyo i dule kokule ke sho osho to diladila. — Lesha Ovafilippi 4:6, 7.

17. Oshike hatu ka konakona moshitukulwa tashi landula?

¹⁷ Ngaashi omulotoki ha kala ta lalakanene okufika kefikilo, nafye natu yandje elitulemo kelalakano letu lokumana efiyafano loku ka mona omwenyo. Ngaashi omulotoki ha yandje elitulemo ngeenge e li pokufika, nafye natu yandje elitulemo komaudaneko a tunhula e na sha nonakwiiwa eshi hatu ende twa yuka pexulilo loku ka mona ondjabi. Oshike tu na okuninga opo tu lotoke mondjila ya yuka noponhapo oyo hatu dulu? Oshitukulwa tashi shikula otashi ke tu kwafela tu mone kutya oshike twa pumbwa okupitifa tete komesho nanghee hatu dulu okushiiva “okutongola oinima ei iwa unene.” — Fil. 1:9, 10.