MBELA ope na oshinakuwanifwa shonhumba osho wa hala okulonga meongalo paife, ndele ito dulu oku shi longa? Otashi dulika oshinakuwanifwa osho tashi longwa kuumwe. Ile tashi dulika wa li u shi na nale, ndele omolwounamido, okuhenoukolele, ouxupilo ile oinakuwanifwa youkwaneumbo oye shi ningifa shidjuu kwoove oku shi wanifa po. Ile tashi dulika wa efa po oshinakuwanifwa osho wa li u na omolwomalunduluko oo a ningwa po mehangano. Kashi na nee mbudi kutya omolwetomheno lilipi, otashi dulika u udite kutya ito wanifa po oilonga yaKalunga ngaashi to dulu. Meenghalo da tya ngaho, oshi shii okuudiwa ko eshi omafimbo amwe tashi dulika u kale wa nyemata. Ndele oshike tashi dulu oku ku kwafela uha teke omukumo ile uha kale wa handuka? Ongahelipi to dulu okukaleka po ehafo loye?

Ohatu ke lihonga koshihopaenenwa shaJohannes Omuninginifi shi na sha nokukaleka po ehafo letu. Johannes okwa li ha hafele oinakuwanifwa yaye, ndele okwa ka ningilwa oshinima shonhumba osho a li ina teelela. Otashi dulika ka li a teelela okukala modolongo oule wefimbo li fike hanga pwaalo a kala ta udifa. Ashike nande ongaho, Johannes okwa twikila okukala a hafa moukalele waye. Oshike sha li she mu kwafela, nongahelipi hatu dulu okukala twa hafa nonande otwa uda nai?

Johannes okwa li a hovela oshinakuwanifwa shaye pefimbo lokwenye mo 29 O.P., shi na sha nokukwafela ovanhu ve lilongekidile okuuya kwaMessias, ta ti: “Lidilululeni, osheshi ouhamba weulu we uya popepi.” (Mat. 3:2; Luk. 1:12-17) Vahapu ova li va pwilikina kuye. Eengudu dovanhu da dja kokule oda li de uya okupwilikina ketumwalaka laye, navahapu ova li ve lidilulula nova ninginifwa. Johannes okwa li yo a londwela nouladi ovawiliki vomalongelokalunga ovo va li ve lishii ouyuki kutya otava ka tokolwa ngeenge inave lidilulula. (Mat. 3:5-12) Okwa li a longa oshilonga sha fimanenena moukalele waye eshi a ninginifa Jesus pexulilo lo 29 O.P. Okudja opo Johannes okwa li a kwafela vamwe va shikule Jesus, Messias omuudanekwa. — Joh. 1:32-37.

Johannes okwa li a dana onghandangala ya fimana, nomolwaashi Jesus a ti: “Mwaava va dalwa kovakainhu kaku nomunene e dule Johannes [Omuninginifi NW].” (Mat. 11:11) Ohatu dulu okukala noushili kutya Johannes okwa li a hafela  omanangeko noupuna oo a pewa. Vahapu kunena navo ova nangekwa noupuna kuKalunga ngaashi Johannes. Natu ka taleni koshihopaenenwa shomumwatate Terry. Ye nomukulukadi waye Sandra ova kala moilonga yefimbo li yadi oule womido di dulife 50. Terry okwa ti: “Onda li ndi na omaufembanghenda mahapu oilonga. Onda li omukokolindjila, Omubetel, omukokolindjila e likalekelwa, omupashukilishikandjo, omupashukili omweendi, nopaife ondi li vali omukokolindjila e likalekelwa.” Oshihafifa okukala u na omaufembanghenda moilonga yaJehova, ndele ngaashi hatu ke lihonga moshihopaenenwa shaJohannes, otashi pula ombuda opo tu kaleke po ehafo ngeenge eenghalo detu tadi lunduluka.

Osho sha kwafela Johannes aha kanife ehafo laye, okukala e na olupandu omolwomaufembanghenda oo a li e na. Natu ka taleni koshihopaenenwa. Konima yeninginifo laJesus, ovahongwa vaJohannes ova li va hovela okuninipala, ofimbo vaJesus va li tava hapupala. Ovahongwa vaJohannes ova li ve shi kuminwa, ndele tava ti kuye: “Tala, Oye ta [ninginifa NW], naaveshe otava i kuye.” (Joh. 3:26) Johannes okwa ti: “Ou e nomuhombolwa, oye omuhomboli; ndelenee kaume komuhomboli ou e li ofika ndele te mu pwilikine, oye ta hafele shili ondaka yomuhomboli. Ehafo eli lange paife ola wanenena.” (Joh. 3:29) Johannes ka li a ninga efiyafanepo naJesus, noka li ta diladila kutya oilonga yaye oyongaho okuyelekanifa noilonga yaJesus ya fimanenena. Mepingafano naasho, Johannes okwa kala a hafa molwaashi okwa li a lenga onghandangala yaye e li “kaume komuhomboli.”

Etaleko laJohannes ola li le mu kwafela a kale a hafa nonande oshinakuwanifwa shaye kasha li shipu. Pashihopaenenwa, Johannes okwa li Omunasiri okudja kedalo, ashike ka li a pitikwa okunwa omaviinyu. (Luk. 1:15) Jesus okwa popya shi na sha nonghalamwenyo yaJohannes i li paunafangwa a ti: “Johannes okwe uya, oye ita li noita nu.” Mepingafano naasho, Jesus novahongwa vaye kava li va tulilwa po omangabeko oo, ova li ashike ngaashi ovanhu vakwao. (Mat. 11:18, 19) Shimwe vali, Johannes ka li a longa nande oshikumwifilonga, ndele okwa li e shii kutya ovahongwa vaJesus, navamwe nokuli ovo va li have mu shikula, ova pewa eenghono dokulonga oikumwifilonga. (Mat. 10:1; Joh. 10:41) Ponhele yokupiyaanekwa keyooloko olo la li pokati kavo, Johannes okwa kala e lipyakidila noinakuwanifwa oyo a pewa kuJehova.

Ngeenge nafye otwa kala twa lenga oshinakuwanifwa osho tu na paife moilonga yaJehova, ohatu dulu okukaleka po ehafo letu. Terry oo a popiwa metetekelo okwa ti: “Onda kala handi yandje elitulemo koshinakuwanifwa keshe osho nda pewa.” Okwa popya shi na sha nonakudiwa yaye moilonga yefimbo li yadi a ti, “Inandi lipa oushima, ndele ohashi dimbulukifa nge oinima itunhula.”

Ohatu dulu okukaleka po ehafo letu moilonga yaKalunga mokudilonga kwaasho hashi ningifa oinakuwanifwa yetu i kale tai ti sha. Oshi li oufembanghenda okukala “ovalongi pamwe naKalunga.” (1 Kor. 3:9) Oshinima shi na ondilo otashi dulu okukala tashi monika nawa ngeenge ohatu shi file oshisho. Sha faafana, nafye ohatu ka kala twa hafa ngeenge otwa kala hatu dilonga koufembanghenda oo tu na wokulonga pamwe naJehova. Ohatu ka henuka okuyelekanifa omaliyambo etu naao haa ningwa kuvamwe. Itatu ka diladila kutya oinakuwanifwa yetu oi dulike kwaayo Jehova a yandja kuvamwe. — Gal. 6:4.

Johannes otashi dulika a li e shii kutya oukalele waye itau ka twikila efimbo lile, ndele ka li e shii kutya otau ka xula ngahelipi. (Joh. 3:30) Mo 30 O.P., konima yeemwedi hamano, eshi Johannes a ninginifa Jesus, Johannes okwa li a tulwa modolongo kohamba Herodes. Natango Johannes okwa li a ninga ngaashi ta dulu opo a twikile okuyandja oundombwedi. (Mark. 6:17-20) Oshike sha li she mu kwafela a kale a hafa nonande opa li eenghalo odo? Okwa kala ta yandje elitulemo koinima yopamhepo.

Fimbo Johannes a li modolongo, okwa li a uda eenghundana di na sha nokutamunuka mo kwoukalele waJesus. (Mat. 11:2; Luk. 7:18) Johannes okwa li a tomhwa kutya Jesus oye Messias, ashike okwa li te lipula kutya ongahelipi Jesus a li ta ka wanifilwa oinima aishe oyo Omishangwa da popya kutya otai ka wanifilwa Messias. Molwaashi Messias ota ka ninga ohamba, okwa li te lipula kutya, mbela Jesus ota ka hovela diva okupangela? Mbela okupangela kwaye  otaku ka mangululifa mo Johannes modolongo? Ndele molwaashi Johannes okwa li a halelela okuuda onghandangala oyo Jesus ta dana, okwa li a tuma ovahongwa vaye vavali va ka pule Jesus kutya: “Oove tuu ou onakuuya, ile natu teelele umwe?” (Luk. 7:19) Eshi va aluka, Johannes oku na okukala a li ta pwilikine kuvo nelitulemo eshi tave mu hepaululile nghee Jesus a velula ovanhu pashikumwifilonga nokwe va tuma ve ke mu lombwele kutya: “Ovapofi paife ove wete ko, oingudu otai ende, ovanashilundu otava velulwa, ovafitamatwi ove udite ko, ovafi otava nyumunwa neehepele otadi udifilwa onghundana iwa.” — Luk. 7:20-22.

Johannes oku na okukala a li a pamekwa kehokololo lavo. Ehokololo olo otali ulike kutya Jesus ota wanifa po osho sha xunganekelwa Messias. Nonande okuuya kwaJesus hako kwa li taku ka mangululifa Johannes modolongo, Johannes okwa li e shii kutya oilonga yaye otai ti sha. Johannes okwa kala a hafa nonande okwa li a taalela eenghalo didjuu.

Ngaashi Johannes, nafye ngeenge otwa kala hatu yandje elitulemo koinima yopamhepo, ohatu ka dula okukala twa hafa notu na elididimiko. (Kol. 1:9-11) Ohatu dulu okuninga ngaho ngeenge otwa kala hatu lesha Ombiibeli nokudilonga kuyo, naasho otashi ke tu kwafela tu mone kutya oilonga oyo twa pewa kuJehova otai ti sha. (1 Kor. 15:58) Sandra okwa ti: “Okulesha etukulwa lOmbiibeli efiku keshe osha kwafela nge ndi ehene popepi naJehova. Osha kwafela nge ndi kale handi yandje elitulemo kuye, ndele hakwaame mwene.” Ngeenge otwa kala hatu yandje elitulemo koilonga oyo ovamwatate novamwameme tava longele Jehova, otashi ke tu kwafela tuha kale ashike hatu diladila kombinga yetu vene. Sandra okwa ti: “O-JW Broadcasting^® oye tu kwafela tu kale tu udite tu li popepi nehangano, nohai tu kwafele tu kale twa hafa eshi hatu wanifa po oinakuwanifwa yetu.”

Johannes Omuninginifi okwa wanifa po oshinakuwanifwa shaye moule wefimbo li xupi “momhepo nomeenghono daElia,” ndele ngaashi Elia, naye ‘okwa li omunhu ngaashi fye.’ (Luk. 1:17; Jak. 5:17) Ngeenge otwa shikula oshihopaenenwa shaye shi na sha nolupandu nokuyandja elitulemo koinima yopamhepo, nafye ohatu ka kala twa hafa eshi hatu longele Jehova, kashi na nee mbudi kutya otwa taalela onghalo ya tya ngahelipi.