1. Oolyelye va li va kwafela mokutota po eongalo lomuFilippi?

ESHI omuyapostoli Paulus, Silas, Lukas naTimoteus va fika moshitukulwa shaFilippi, osho sha li tashi kolonyekwa kuRoma, ova li va hanga mo ovanhu vahapu tava pwilikine ketumwalaka lOuhamba. Ovamwatate ovo vane ovaladi ova kwafela mokutota po eongalo, novahongwa aveshe ova li va hovela okwoongala pamwe, tashi dulika meumbo laLidia. — Oil. 16:40.

2. Eshongo lilipi la li la taalelwa keongalo olo?

² Eongalo olo lipe lwanima ola ka taalela eshongo lonhumba. Satana okwa li a nwefa mo ovapataneki va ye moshipala oilonga yokuudifa yOvakriste ovo ovadiinini. Paulus naSilas ova li va mangwa po, va langaulwa neengola nokutulwa modolongo. Eshi va mangululwa, ova ka talela po ovahongwa noku va twa omukumo. Opo nee Paulus, Silas naTimoteus ova ka fiya po oshilando, ofimbo tashi dulika Lukas a li a fyaala po. Ovamwatate vomeongalo olo lipe ova li tava ka ninga po shike? Kekwafo laJehova, ova li va pula komesho moilonga yaye. (Fil. 2:12) Paulus okwa li e na etomheno liwa lokukala e va uditile etumba.

3. Paulus okwa li a ilikana kombinga yashike, ngaashi sha popiwa mOvafilippi 1:9-11?

³ Konima yomido omulongo, Paulus okwa li a shangela eongalo lokuFilippi onhumwafo. Eshi to lesha onhumwafo  oyo, oto dulu okumona noupu kutya Paulus okwa li e hole ovamwatate ovo neenghono. Okwa shanga a ti: ‘Onde mu djuulukwa nohole yokomwenyo yaKristus Jesus.’ (Fil. 1:8) Okwe va shangela a ti kutya ohe va ilikanene. Okwa li a pula Jehova e va kwafele opo ohole yavo i hapupale, va shiive okutongola oinima ei iwa unene, va kale va koshoka, novaha limbilike nande omunhu nosho yo okutwikila okukulika oiimati youyuki. Kunena, nafye ohatu dulu okulihonga shihapu meendjovo daPaulus odo da dja komutima. (Lesha Ovafilippi 1:9-11.) Moshitukulwa eshi, ohatu ka kundafana oinima oyo a li a tumbula, nanghee hatu dulu oku i tula moilonga.

4. (a) She likolelela ku 1 Johannes 4:9, 10, Jehova okwe tu ulikila ngahelipi kutya oku tu hole? (b) Mbela otu na okukala tu hole Kalunga shi fike peni?

⁴ Jehova okwa ulika ohole yaye eshi a li a tuma Omona waye kombada yedu e tu file. (Lesha 1 Johannes 4:9, 10.) Molwaashi Jehova oku tu hole, ohashi tu linyengifa tu kale tu mu hole. (Rom. 5:8) Mbela otu na okukala tu mu hole shi fike peni? Jesus okwa nyamukula epulo olo eshi a lombwela Omufarisai a ti: “Hola Omwene Kalunga koye nomutima woye aushe nomwenyo woye aushe neendunge doye adishe.” (Mat. 22:36, 37) Inatu hala okukala tu hole Kalunga netatamutima. Ponhele yaasho, otwa hala okuulika kutya otu mu hole efiku keshe. Paulus okwa lombwela Ovafilippi kutya ohole yavo nai “hapupale alushe.” Oshike tu na okuninga po opo tu kale tu hole Kalunga tau pu mo?

5. Ongahelipi hatu dulu okukala tu hole Jehova unene?

⁵ Otu na okushiiva Kalunga tete opo tu kale tu mu hole. Ombiibeli oya ti: “Ou ehe nohole, oye ina shiiva Kalunga, osheshi Kalunga Oye ohole.” (1 Joh. 4:8) Omuyapostoli Paulus okwa popya da yuka eshi a ti kutya ngeenge otwa kala tu hole Kalunga, ohatu ke mu ‘shiiva noku mu koneka’ alushe. (Fil. 1:9) Eshi opo twa tameke okukonakona Ombiibeli, otwa hovela okukala tu hole Kalunga nonande otwa li ashike tu shii kanini kombinga yaye. Ndele eshi twa hapupalifa eshiivo letu li na sha naJehova, otwa hovela okukala tu mu hole unene. Nomolwaasho twa lenga okulesha pandjikilile Eendjovo daKalunga mokukalamwenyo kwetu nokudilonga kudo. — Fil. 2:16.

6. Oshike hatu lihongo mu 1 Johannes 4:11, 20, 21 shi na sha nokuhapupalifa ohole?

⁶ Molwaashi Kalunga oku tu hole, nafye ohatu ka kala yo tu hole ovamwatate. (Lesha 1 Johannes 4:11, 20, 21.) Otashi dulika tu diladile kutya oshipu okukala tu hole ovamwatate molwaashi ohatu longele Jehova nohatu kendabala okuhopaenena omaukwatya aye. Ohatu landula oshihopaenenwa shaJesus, oo e tu fila omolwohole yaye ya twa kekipa. Ashike omafimbo amwe ohashi kala shidjuu okudulika koshipango shokuhola vakwetu. Diladila konghalo oyo ya li meongalo laFilippi.

7. Oshike hatu lihongo komayele oo Paulus a li a pa Euodia naSintike?

⁷ Euodia naSintike ovamwameme ovadiinini ovo va li va longa “pamwe” nomuyapostoli Paulus. Ashike otashi dulika pokati kavo pa li pa holoka okuhaudafana nokava li vali omaume. Paulus okwa li a tumbula Euodia naSintike komadina monhumwafo oyo a li a shangela eongalo lavo nokwa li e va pa omayele “va kale va twa omhango imwe mOmwene.” (Fil. 4:2, 3) Paulus okwa li yo a lombwela eongalo alishe a ti: “Aishe i longeni muhe nomapulapulo nomu he nomalimbililo.” (Fil. 2:14) Kape na omalimbililo kutya omayele oo aPaulus okwa li a kwafela ovamwameme ovo  ovadiinini nosho yo eongalo alishe li kulike ekwatafano la kola.

8. Oshike tashi dulu oku shi ningifa shidjuu okukala tu hole ovamwatate, noshike tashi dulu oku tu kwafela?

⁸ Ngaashi Euodia naSintike, nafye otashi dulika tu shakeneke eshongo lokuha kala tu hole vamwe; tu na eamo lokuyandja elitulemo komapuko avo. Atushe ohatu ningi omapuko efiku keshe. Ngeenge otwa kala hatu yandje elitulemo komapuko avamwe, otashi ka kala shidjuu kufye okukala tu va hole. Pashihopaenenwa, otashi dulika tu ude nai ngeenge omumwatate okwa dimbwa okuuya okuwapaleka Olupale lOuhamba. Nokuli ngeenge otwa hovele okudiladila komapuko aeshe oo omumwatate a ninga, otashi ke tu udifa nai unene noitatu ka kala tu mu hole. Ngeenge owe lihange monghalo ya fa oyo, otashi ka kala shiwa okudiladila koushili oo kutya: Jehova oku shii omapuko etu nosho yo ovamwatate. Ashike nonande ohatu ningi omapuko, natango oku tu hole atushe. Nomolwaasho twa pumbwa okuhopaenena nghee Jehova ha ulike ohole nokukala tu na etaleko liwa li na sha novamwatate. Ohatu ka kala twa hangana novamwatate ngeenge otwa kendabala okukala tu va hole. — Fil. 2:1, 2.

9. Oshike sha kwatelwa mo “moinima ei iwa unene” oyo Paulus a tumbula monhumwafo oyo a li a shangela Ovafilippi?

⁹ Paulus okwa li a nwefwa mo komhepo iyapuki a lombwele Ovakriste vOmufilippi va “shiive okutongola oinima ei iwa unene.” Nafye kunena otwa pumbwa okuninga sha faafana. (Fil. 1:10) Oinima ei iwa unene oya kwatela mo okuyukipalifwa kwedina laJehova, okuwanifwa kwomaudaneko aye nosho yo ombili noukumwe meongalo. (Mat. 6:9, 10; Joh. 13:35) Ngeenge otwa kala twa lenga oinima oyo, ohatu ka ulika kutya otu hole Jehova.

10. Jehova ote ke tu tala ko tuhe na oshipo ngeenge otwa ningi shike?

¹⁰ Paulus okwa ti yo kutya natu kale tuhe “na oshipo.” Osho inashi hala okutya ngeno ihatu ningi omapuko. Itatu dulu okukala twa koshoka filufilu ngaashi Jehova. Ashike Jehova ote ke tu tala ko tuhe na oshipo ngeenge otwa kendabala okukala tu hole vamwe nokushiiva okutongola oinima ei iwa unene. Onghedi imwe omo hatu dulu okuulika kutya otu hole vamwe omokukendabala tuhe va pundukife.

11. Omolwashike tu na okuhenuka okupundukifa vamwe?

¹¹ Elondwelo lokuhenuka okupundukifa vamwe ola kwata moiti shili. Ongahelipi hatu dulu okupundukifa vamwe? Otashi dulika tu shi ninge okupitila monghedi yetu yokuhoolola omalihafifo, oikutu oyo hatu djala, ile nokuli oilonga. Osho hatu ningi otashi dulika musho vene inashi puka. Ashike osha kwata moiti ngeenge omatokolo oo hatu ningi okwa kumu omaliudo avamwe, ile tae va pundukifa. Jesus okwa ti kutya oshi li xwepo komunhu a tya ngaho a mangelwe emanya loshini mofingo nokuninginifwa moule wefuta ponhele yokupundukifa nande oimwe yomeedi daye. — Mat. 18:6.

12. Oshike hatu lihongo moshihopaenenwa shovalihomboli ovakokolindjila?

¹² Didilika nghee ovalihomboli vamwe ovakokolindjila va li va tula moilonga osho Jesus a popya. Ova li meongalo limwe novalihomboli ovo va li opo va ninginifwa nova dja meputuko li na eemhango da kitakana. Ovalihomboli ovo ova li va itavela kutya Ovakriste kave na okutala eemuvi nandenande, mwa kwatelwa naado da koshoka. Ova li va kumwa eshi va uda kutya ovalihomboli ovakokolindjila ova ile komuvi. Okudja opo ovalihomboli ovakokolindjila ova li va efa po okuya keemuvi  fiyo osheshi ovalihomboli ovo vape va deula eliudo lavo nokukala ve na ondjele. (Heb. 5:14) Kungaho, ovalihomboli ovakokolindjila ova li va ulika moilonga nomeendjovo kutya ove hole ovamwatate ovo vape. — Rom. 14:19-21; 1 Joh 3:18.

13. Ongahelipi hatu dulu okupundukifa vamwe?

¹³ Onghedi imwe vali omo hatu dulu okupundukifa vamwe, omoku va ningifa va nyone. Osho otashi dulu okuningwa ngahelipi? Diladila konghalo tai shikula. Osha pula efimbo neenghendabala opo omukonakoni umwe a efe po okukala a pikwa koikunwa yoalkoholi. Okwa li a mona kutya okwa pumbwa okweefa po filufilu okunwa. Okwa ninga omalunduluko mahapu ndele ta ninginifwa. Lwanima, okwa li a shivwa kokavilo komumwatate umwe ndele te mu pe oshikunwa shoalkoholi, ta ti: “Paife owa ninga Omukriste nou na omhepo yaJehova. Elipangelo oli li oshitukulwa shomhepo iyapuki. Ngeenge ou na elipangelo, oto ka dula okunwa kanini.” Itashi ka kala tuu shinyemateka ngeno omumwatate oo mupe okwa pwilikinine komayele a puka ndele ta kala vali a pikwa koikunwa yoalkoholi!

14. Okwoongala kwetu kwopaKriste ohaku tu kwafele ngahelipi tu tule moilonga omayele oo e li mOvafilippi 1:10?

¹⁴ Okwoongala kwetu kwopaKriste ohaku tu kwafele tu tule moilonga omayele oo e li mOvafilippi 1:10 meenghedi dihapu. Yotete, osho hatu kundafana pokwoongala ohashi tu ulikile kutya Jehova okwa pitifa shike komesho. Onhivali, ohatu tula moilonga osho twe lihonga opo tuha kale noshipo. Onhinhatu, otwa ladipikwa “tu twaafane omukumo mohole  nomoilonga iwa.” (Heb. 10:24, 25) Ohatu ka kala tu hole Kalunga nosho yo ovamwatate shi dulife nale ngeenge ove tu tu omukumo. Ngeenge otu hole Kalunga nosho yo ovamwatate nomutima aushe, ohatu ka henuka oku va pundukifa.

15. Osha hala okutya shike ‘okuyadifwa noiimati youyuki’?

¹⁵ Paulus okwa li a ilikana a mana mo opo Ovafilippi va ‘yadifwe noiimati youyuki.’ (Fil. 1:11) Osha yela kutya “oiimati youyuki” oya kwatela mo okukala ve hole Jehova noshiwana shaye. Osho osha kwatela mo yo okulombwela vamwe kombinga yeitavelo lavo muJesus nosho yo eteelelo litunhula. Ovafilippi 2:15 ova longifa vali efaneko limwe li na sha ‘nokuvilima mokati kavo ngaashi eenyofi mounyuni.’ Osho otashi wapalele molwaashi Jesus okwa popya kutya ovahongwa vaye ove li “ouyelele wounyuni.” (Mat. 5:14-16) Okwa li yo a lombwela ovashikuli vaye va ‘ka ninge ovanhu ovahongwa,’ nokwa ti kutya otava ka ‘ninga eendombwedi daye fiyo okominghulo dounyuni.’ (Mat. 28:18-20; Oil. 1:8) Ohatu imike “oiimati youyuki” ngeenge hatu kufa ombinga pauyadi moilonga oyo ya fimanenena.

16. Ovafilippi 1:12-14 ova ulika ngahelipi kutya ohatu dulu okuvilima ngaashi eenyofi nokuli nonande otu li meenghalo dinyemateka? (Tala efano kombada yoshifo.)

¹⁶ Kashi na nee mbudi kutya otu li monghalo ya tya ngahelipi, ohatu dulu okuvilima ngaashi eenyofi. Omafimbo amwe, oinima oyo tai dulu oku tu imba tu udife otashi dulika lwanima i ke tu pe omhito yokuudifa. Pashihopaenenwa, omuyapostoli Paulus okwa li e li modolongo yomeumbo muRoma eshi a shangela Ovafilippi onhumwafo. Ashike nonande okwa li momalyenge, okwa li a dula okuudifila ovakeleli  vodolongo nosho yo ovo have mu talele po. Paulus okwa li a udifa nouladi meenghalo da tya ngaho, naasho osha li sha twa ovamwaxe omukumo va popye “eendjovo daKalunga vehe noumbada.” — Lesha Ovafilippi 1:12-14; 4:22.

17. Ovamwatate novamwameme ova li va dula ngahelipi okutwikila okuudifa nonande osha li shidjuu?

¹⁷ Ovamwatate novamwameme vahapu ohava ulike ouladi ngaashi Paulus. Ohava kala moilongo omo ihava dulu okuudifa momapandavanda ile eumbo neumbo, onghee ohava kongo eenghedi dimwe vali dokuudifa. (Mat. 10:16-20) Moilongo ya tya ngaho, ovapashukilishikandjo ova li va ladipika omuudifi keshe a udifile ovapambele, ovashiinda, ovanafikola vakwao, ovanailonga pamwe naye nosho yo ookaume. Meni ashike lomido mbali, omuvalu womaongalo omoshitukulwa osho owa li wa hapupala meendelelo. Otashi dulika tu li moshilongo omo twa manguluka okuudifa. Ashike nande ongaho, ohatu dulu okulihonga oshilihongomwa sha fimana moshihopaenenwa shovamwatate novamwameme ovo: Okukonga alushe eemhito tu kufe ombinga moukalele pauyadi, tu na elineekelo kutya Jehova ote ke tu pa eenghono opo tu dule okufinda omashongo. — Fil. 2:13.

18. Otu na okukala twa tokola toko okuninga shike?

¹⁸ Natu kale twa tokola toko okutula moilonga omayele oo taa hangwa monhumwafo oyo Paulus a li a shangela Ovafilippi. Onghee natu shiive okutongola oinima ei iwa unene, twa koshoka, hatu henuka okupundukifa vamwe nosho yo okukulika oiimati youyuki. Opo nee, ohatu ka kala tu na ohole ya xwama nohatu ka fimanekifa Tate yetu omunahole, Jehova.