1. Oshike osho atushe twa halela ovapambele vetu?

OMUMWAMEME wedina Pauline okwa ti: “Okudja eshi nda shiiva oshili onda kala nda halelela keshe umwe moukwaneumbo wetu a ka kale pamwe naame moParadisa. * Onda li nda halelela omushamane wange, Wayne, nomonamati wetu va kale tava longele Jehova pamwe naame.” Mbela naave ou na ovapambele ovo vehe shii Jehova? Ngaashi Pauline, otashi dulika naave wa halelela ovapambele voye va longele Jehova pamwe naave.

2. Omapulo elipi hatu ka kundafana moshitukulwa eshi?

² Itatu dulu okufininika ovapambele vetu va tambule ko onghundana iwa, ashike ohatu dulu oku va twa omukumo va diladile kombinga yetumwalaka lOmbiibeli. (2 Tim. 3:14, 15) Omolwashike tu na okuudifila ovapambele vetu? Omolwashike twa pumbwa oku va udila onghenda? Oshike hatu dulu okuninga opo tu kwafele ovapambele vetu va shiive Jehova? Nongahelipi ovamwatate aveshe meongalo tava dulu oku tu kwafela?

3. She likolelela ku 2 Petrus 3:9, omolwashike tu na okuudifila ovapambele vetu?

³ Mafiku Jehova ota ka xulifa po ounyuni ou. Ovo va ‘halelela oku ka mona omwenyo waalushe’ ovo ashike tava ka xupifwa. (Oil. 13:48) Ohatu longifa efimbo neenghono dihapu mokuudifila ovanhu ovo tuhe shii moshitukulwa shetu, onghee oshi li paushitwe okukala twa hala okuudifila ovapambele vetu opo va  dule okulongela Jehova pamwe nafye. Tate yetu omunahole, Jehova, ‘ina hala pa kane nande umwe, ndele okwa hala aveshe ve lialulukile melidilululo.’ — Lesha 2 Petrus 3:9.

4. Epuko lilipi tashi dulika tu ninge ngeenge hatu udifile ovapambele vetu?

⁴ Otwa pumbwa okukaleka momadiladilo kutya ope na onghedi i li mondjila nonghedi ya puka yokuudifa etumwalaka lexupifo. Otashi dulika hatu popi nelungi ngeenge hatu udifile ovanhu ovo tuhe shii, ashike ngeenge hatu udifile ovapambele vetu otashi dulika tu va tokole.

5. Oshike twa pumbwa okukaleka momadiladilo ngeenge hatu udifile ovapambele vetu?

⁵ Vahapu vomufye otashi dulika hatu lipe oushima ngeenge hatu diladila konghedi omo twa kendabala okuyandja oundombwedi kovapambele vetu nohatu diladila kutya ngeno otwe shi ningile monghedi imwe i lili. Omuyapostoli Paulus okwa yandja omayele kOvakriste a ti: “Eendjovo deni nadi kale alushe donghenda, da fingala omongwa, nye mu kale mu shi shii nhumbi mu nokunyamukula keshe umwe.” (Kol. 4:5, 6) Oshiwa okudimbuluka omayele oo ngeenge hatu udifile ovapambele vetu. Ngeenge otwa dopa okuninga ngaho, ohatu ke va udifa nai ponhele yoku va kwafela.

6-7. Yandja oshihopaenenwa osho tashi ulike kutya omolwashike sha fimana okukenukila kaume kopahombo oo ehe fi Ondombwedi.

⁶ Kala u na ko nasha navamwe. Pauline, oo a tumbulwa metetekelo, okwa ti: “Pehovelo onda li ashike handi kala nda hala okupopya nomushamane wange kombinga yaKalunga nOmbiibeli. Katwa li vali hatu popi kombinga yoinima yakwalukeshe.” Ashike Wayne, omushamane waPauline, ka li e shii shihapu kombinga yOmbiibeli, noka li e udite eityo laasho Pauline a  hala okutya. Wayne okwa li a tala ko kutya omukulukadi waye oha diladila ashike kombinga yongeleka yavo. Okwa li a limbililwa kutya pamwe omukulukadi waye ote limbwange melongelokalunga la nyika oshiponga nota pukifwa.

⁷ Pauline okwa dimina kutya okwa li ha tokelwa luhapu novamwatate nosho yo novamwameme nokukala navo momaxuliloshivike, tashi dulika pokwoongala, moukalele nosho yo pouvilo. Okwa ti: “Luhapu ngeenge Wayne e uya keumbo iha hange nge mo noha kala a fya oudja.” Oshi shii okuudiwa ko kutya Wayne oha kala a djuulukwa omuholike waye nosho yo omonamati wavo. Ka li e shii kutya oha kala noolyelye, nokwa li ha diladila kutya ookaume komukulukadi waye ovo va fimana kuye. Wayne okwa li a ningila Pauline omatilifo kutya ote mu henge po. Paife ou wete nee kutya omolwashike Pauline a li e na okuulika olukeno?

8. She likolelela ku 1 Petrus 3:1, 2, oshike osho ovapambele hava koneke unene?

⁸ Kala u li oshihopaenenwa shiwa. Luhapu, ovapambele vetu ohava koneke osho hatu ningi shi dulife osho hatu popi. (Lesha 1 Petrus 3:1, 2.) Pauline okwa li a didilika oushili woshinima osho. Okwa ti: “Onda kala ndi shii kutya Wayne oku tu hole noka li shili a hala okuhengana. Ashike omatilifo oo a li a ningila nge okwa dimbulukifa nge kutya onda pumbwa okutula moilonga osho tashi wapalele Jehova. Ponhele yokupopya shihapu, onda li nda pumbwa okutula po oshihopaenenwa shiwa.” Pauline okwa li a efa po okupopya naWayne kombinga yOmbiibeli, nokwa li a hovela okukala ha popi naye kombinga yoinima yakwalukeshe. Wayne okwa ka didilika kutya omuholike waye omunambili, nosho yo kutya omonamati wavo oha dulika. (Omayel. 31:18, 27, 28) Eshi Wayne  a didilika kutya Ombiibeli oya lundulula oukwaneumbo waye, naye okwa li a tambula ko etumwalaka lomEendjovo daKalunga. — 1 Kor. 7:12-14, 16.

9. Omolwashike twa pumbwa okutwikila okukwafela ovapambele vetu?

⁹ Twikila okukendabala okukwafela ovapambele voye. Jehova okwe tu tulila po oshihopaenenwa. “Efimbo keshe” oha pe ovanhu omhito va tambule ko onghundana iwa nova ka mone omwenyo. (Jer. 44:4) Omuyapostoli Paulus okwa li a lombwela Timoteus a twikile okukwafela vamwe. Omolwashike? Osheshi ngeenge te shi ningi, ote lixupifa ye mwene naava tave mu pwilikine. (1 Tim. 4:16) Molwaashi otu hole ovapambele vetu, otwa hala va shiive oshili oyo tai hangwa mEendjovo daKalunga. Eendjovo daPauline nosho yo eenghatu daye oda kwafela oukwaneumbo waye. Paife ota hafele okulongela Jehova pamwe nomushamane waye. Aveshe ove li ovakokolindjila, na Wayne oku li omukulunhuongalo.

10. Omolwashike twa pumbwa okukala ovalididimiki?

¹⁰ Kala omulididimiki. Eshi twa hoolola okukala metwokumwe nomifikamhango daKalunga, otashi dulika ovapambele va li vehe shi udite ko. Luhapu, oshinima shotete osho hava didilike mo oshosho kutya ihatu kufa vali ombinga moivilo yomalongelokalunga nosho yo mopolotika. Otashi dulika nokuli va kale ve tu handukila. (Mat. 10:35, 36) Ashike inatu diladila kutya osho ashike tava kala ve udite ngaho. Ngeenge otwa efa oku va kwafela va ude ko osho twa itavela, otwa fa ashike hatu va tokolele ko kutya inava wana oku ka mona omwenyo waalushe. Jehova ine tu pa oshinakuwanifwa shokutokola, ndele okwe shi pa Jesus. (Joh. 5:22) Ngeenge otu na elididimiko, ovapambele vetu otashi dulika va kale va hala okupwilikina ketumwalaka letu. — Tala oshimhungu “ Longifa o-website yetu u honge vamwe.”

11-13. Owe lihonga shike monghedi omo Alice a li a ungaunga novadali vaye?

¹¹ Kala omunanghenda noiho tengauka. (Omayel. 15:2) Diladila koshihopaenenwa shaAlice. Okwe lihonga kombinga yaJehova eshi a li kokule novadali vaye, ovo va li hava kufa ombinga mopolotika. Okwa li a mona kutya oku na oku va lombwela diva oinima iwa oyo a li te lihongo. Alice okwa ti: “Ngeenge owa efa pa pite efimbo ino lombwela ovapambele voye oinima oyo wa itavela naayo ho ningi, otava kala ve ku handukila unene.” Okwa li a shangela ovadali vaye onhumwafo te va pula kombinga yaasho omahongo Ombiibeli taa ti shi na sha noikundafanwa oyo tashi dulika ve na ohokwe muyo, ngaashi ohole. (1 Kor. 13:1-13) Okwa pandula ovadali vaye eshi ve mu tekula nove mu fila oshisho, nokwe va tumina omaano. Eshi e ke va talela po, okwa li a ninga keshe osho ta dulu opo a kwafele ina noinakuwanifwa yomeumbo. Potete, ovadali vaAlice kava li va hafa eshi e va lombwela kombinga yeitavelo laye lipe.

¹² Eshi Alice a li novadali vaye, okwa twikila okulesha Ombiibeli efiku keshe. Alice okwa ti: “Osho osha li sha kwafela meme a mone kutya Ombiibeli oya fimana kwaame.” Pomhito opo tuu opo, xe yaAlice okwa li a tokola okulihonga sha mOmbiibeli opo a mone kutya omolwashike omonakadona a lunduluka, nokwa li yo a hala a mone epuko mOmbiibeli. Alice okwa ti: “Onde mu pa Ombiibeli, nonde mu shangela okanhumwafo, ndele handi ka tula mo.” Oshidjemo osha li shike? Ponhele xe a mone mo omapuko, okwa li a kumwa kwaasho a lesha mEendjovo daKalunga.

¹³ Otwa pumbwa okukala tu na onghenda ndele ihatu tengauka, nokuli nonande ohatu lididimikile omayeleko. (1 Kor. 4:12b) Pashihopaenenwa, Alice okwa li e na okulididimika eshi a li ta patanekwa kuina. Okwa ti: “Eshi nda  ninginifwa meme okwa li ha ula nge omalaka mai, ta ti kutya ame ‘omunhu mwii.’” Alice okwa li a ninga po shike? Okwa ti: “Onda li nda tokola okupopila elongelokalunga lange lipe, nokanda li handi ka lundulula etokolo lange. Onda kendabala okuyelifila meme kutya ondi mu hole shili. Atushe otwa li twa lila, nonda li nde mu telekela oikulya iwa. Okudja opo, meme okwa li a dimina kutya Ombiibeli oya li tai kwafele nge ndi xwepopale.”

14. Omolwashike tuhe na okupitika ovapambele va lundulule etokolo letu li na sha nokulongela Jehova?

¹⁴ Otashi dulika shi pule efimbo opo ovapambele vetu va ude ko kutya omolwashike sha fimana kufye okulongela Jehova. Pashihopaenenwa, eshi Alice a li a tokola okukokola ondjila ponhele yokulalakanena eifano olo ovadali vaye va li ve mu halela, ina okwa li natango a lila. Ashike Alice okwa li a kanyatela ketokolo laye. Alice okwa ti: “Ngeenge owa pitike ovapambele voye va ye moshipala etokolo loye, otave ke ku ningila ko omatokolo moinima aishe. Ashike ngeenge ou na onghenda novapambele voye nowa kanyatela komatokolo oye, vamwe otashi dulika ve ku pwilikine.” Osho osho sha li sha ningilwa Alice. Ovadali vaye aveshe paife ovakokolindjila, na xe oku li omukulunhuongalo.

15. She likolelela kuMateus 5:14-16 nosho yo 1 Petrus 2:12, ongahelipi ‘oilonga iwa’ yavamwe tai dulu okukwafela ovapambele vetu?

¹⁵ Jehova oha nanene ovanhu kuye okupitila ‘moilonga iwa’ yeongalo lopaKriste. (Lesha Mateus 5:14-16; 1 Petrus 2:12.) Ngeenge kaume koye kopahombo ke fi Ondombwedi yaJehova, mbela okwa shakena ngoo nale noilyo yeongalo leni? Pauline, oo a tumbulwa metetekelo,  okwa li a shiva ovamwatate novamwameme keumbo lavo opo omushamane waye, Wayne, a dule oku va shiiva. Wayne ota dimbuluka nghee omumwatate umwe a li e mu kwafela a ude ko kutya Eendombwedi ovanhu naanaa va tya ngahelipi, okwa ti: “Okwa li a tula mo efudo koilonga opo e uye a tale etanga pamwe naame. Osho osha li sha kumwifa nge neenghono.”

16. Omolwashike tu na okushiva ovapambele vetu kokwoongala?

¹⁶ Onghedi imwe ya denga mbada omo hatu dulu okukwafela ovapambele vetu oku va shiva ve uye va ongale pamwe nafye. (1 Kor. 14:24, 25) Wayne okwa li pEdimbuluko oshikando shaye shotete pokwoongala molwaashi okwa li kwa ningwa konima yoilonga nokwa li kuxupi. Okwa ti: “Itandi dimbuluka filufilu kutya oshipopiwa osha li kombinga yashike, ashike ohandi dimbuluka nghee ovanhu va li va ungaunga naame. Ova li ve uya kwaame, tava minike nge noku popifa nge nohamu. Onda li nda mona kutya ovanashili.” Ovalihomboli vamwe ova li hava yambidida Pauline; have mu yakula nokaana ofimbo ve li pokwoongala nosho yo ngeenge ve li moukalele. Eshi Wayne a li a hala okuuda shihapu kombinga yeitavelo lipe laPauline, okwa li a pula omumwatate umwe va konakone naye Ombiibeli.

17. Oshike tuhe na okulipa oushima musho, nomolwashike tuhe na okudiladila kutya ovapambele vetu itava ka ninga omalunduluko?

¹⁷ Otwe lineekela kutya ovapambele vetu aveshe otave ke tu waimina tu longele Jehova pamwe. Ashike nonande otwa ningi eenghendabala tu va kwafele va ninge ovapiya vaJehova, otashi dulika vehe uye moshili. Ngeenge osho oshe tu ningilwa, inatu lipa oushima omolwomatokolo avo. Molwaashi itatu dulu okufininika ovanhu va tambule ko eitavelo letu. Ashike ngeenge ovapambele voye ova didilike kutya owa hafa eshi to longele Jehova otashi dulika shi va nwefe mo nawa. Va ilikanena. Popya navo nelungi. Ino fya ounye oku va kwafela. (Oil. 20:20) Kala u na elineekelo kutya Jehova ota ka nangeka noupuna eenghendabala doye. Nongeenge ovapambele voye ova pwilikine kwoove, otava ka xupifwa.