1. Luhapu Jehova oha nyamukula ngahelipi omailikano ovapiya vaye?

 MBELA owa shiiva ngoo kutya oto dulu okulongifwa kuJehova a nyamukule eilikano laumwe tali di komutima? Oto dulu, kashi na nee mbudi kutya ou li omukulunhuongalo, omuyakuliongalo, omukokolindjila, ile omuudifi meongalo. Oto dulu yo, kashi na nee mbudi kutya ou li omunyasha, omukulunhu, omumwatate, ile omumwameme. Ngeenge umwe oo e hole Jehova okwa kongo ekwafo kuye, Kalunga ketu luhapu oha longifa ovakulunhuongalo nosho yo ovapiya vaye vamwe ovadiinini, opo va ‘hekeleke neenghono’ omunhu a tya ngaho. (Kol. 4:11) Kashi fi tuu oufembanghenda okulongela Jehova nokukwafela ovamwatate momukalo wa tya ngaho! Ohatu dulu okuninga ngaho, ngeenge pa holoka omukifi, oshiponga shopaushitwe, ile omahepeko.

2. Omolwashike tashi dulu okukala eshongo okukwafela vamwe, ngeenge pa tukuka omukifi?

² Ngeenge pa tukuka omukifi, otau dulu oku shi ningifa shidjuu kufye okukwafelafana. Pashihopaenenwa, otashi dulika tu kale twa hala okutalela po ookaume ketu, ashike kashi li eameno okuninga ngaho. Otashi dulika yo tu kale twa hala okushiva ovo va hepa painiwe va lye pamwe nafye, ashike nasho itashi shiiva. Otashi dulika tu kale twa hala okukwafela vamwe, ndele osho otashi dulu okukala eshongo, ngeenge oilyo youkwaneumbo wetu otai mono oixuna. Ashike nande ongaho, otwa hala okuhafifa ovamwatate, notashi ka hafifa Jehova, eshi hatu ningi ngaashi hatu dulu. (Omayel. 3:27; 19:17) Oshike hatu dulu okuninga?

3. Oshike hatu lihongo koshihopaenenwa shovakulunhuongalo vomeongalo looDesi? (Jeremia 23:4)

³ Osho ovakulunhuongalo tava dulu okuninga. Ngeenge ou li omukulunhuongalo, shiiva nawa eedi. (Lesha Jeremia 23:4.) Desi,  omumwameme oo a tumbulwa moshitukulwa sha tetekela, okwa ti: “Ovakulunhuongalo vomongudu yetu yoilonga yomomapya, ova kala hava waimine nge nosho yo vamwe moukalele. Ova li yo have tu waimine tu hafele pamwe moinima imwe vali.” b Eenghendabala dovafita ovo ode shi ningifa shipu kuvo, opo va kwafele Desi konima eshi omukifi wekomba wo-COVID-19 wa tukuka nokwa filwa oilyo youkwaneumbo imwe omolwomukifi oo.

4. Omolwashike ovakulunhuongalo va li va dula okukwafela Desi, noshilihongomwa oshilipi?

⁴ Desi okwa yelifa, a ti: “Molwaashi onda li nale ndi shii ovakulunhuongalo nove li ookaume kange, osha li shipu kwaame oku va lombwela nghee ndi udite nosho yo osho nda li handi lipula nasho.” Oshilihongomwa kovakulunhuongalo oshilipi? Ningeni mukundede litetuka fimbo eyelu inali uya, mu pashukile ovo ve li koshi yepashukilo leni, ofimbo oudjuu inau hovela. Panga oukaume navo. Ngeenge opa holoka omukifi, oo tau ku imbi u va talele po komudidi, kwatafana navo meenghedi dimwe vali. Desi okwa ti: “Omafimbo amwe, ovakulunhuongalo va yoolokafana ova li hava dengele nge, ile va tumine nge omatumwalaka mefiku limwe. Omishangwa odo va pa nge oda kuma nge neenghono, nonande eevelishe odo ondi di shii nawa.”

5. Ongahelipi ovakulunhuongalo tava dulu okushiiva kutya ovamwaxe ova pumbwa shike noku va kwafela?

⁵ Onghedi imwe to dulu okumona osho ovamwaxo va pumbwa, omoku va pula omapulo, oo itae va fifa ohoni. (Omayel. 20:5) Mbela ove na oikulya ya wana, omiti nosho yo oipumbiwa ikwao? Mbela ove li pokukanifa oilonga, ile omaumbo avo? Mbela ova pumbwa okukwafelwa, opo va ninge eindilo va kwafelwe kepangelo? Desi okwa li a kwafelwa painiwe kovaitaveli vakwao. Ashike osho sha li she mu kwafela unene a pite momashongo oo, ekwafo lopamaliudo nosho yo lopamhepo olo a li a pewa kovakulunhuongalo. Okwa ti: “Ovakulunhuongalo ova li va ilikana pamwe naame. Nokuli nonande itandi dimbuluka filufilu osho va li va popya, ohandi dimbuluka nghee nda li ndi udite. Jehova okwa fa oye a li ta ti: ‘Ku li oove auke.’” — Jes. 41:10, 13.

6. Oshike vahapu meongalo tava dulu okuninga, opo va kwafele vamwe? (Tala efano.)

⁶ Osho vamwe tava dulu okuninga. Otwa teelela ovakulunhuongalo va file oshisho ovamwatate novamwameme meongalo. Ashike Jehova ote tu shivi atushe tu twe omukumo nokukwafela vakwetu. (Gal. 6:10) Nokuli nongeenge otwa ningi oshinima shinini, opo tu kwafele umwe oo ta vele neenghono, otashi dulu oku mu twa omukumo. Okaana otaka dulu okutuma okakalata, ile ka fanekele omumwatate efano, opo ke mu twe omukumo.  Omunyasha ota dulu oku ka landa ko koinima yomumwameme. Vamwe meongalo otava dulu okutelekela umwe, oo ta vele neenghono noku mu twaalela oikulya keumbo laye. Oshoshili kutya ngeenge opa holoka omukifi wonhumba, oo hau tandavele, keshe umwe meongalo oha kala a pumbwa etwomukumo. Ohatu dulu okukala po okafimbo kanini konima yokwoongala tu kundafane novamwatate novamwameme kutya nee okomudidi, ile opavidio. Ovakulunhuongalo navo ova pumbwa etwomukumo. Eendombwedi dimwe oda tumina omatumwalaka olupandu ovakulunhuongalo, ovo va kala ve lipyakidila ngeenge pa tukuka omukifi. Itashi ka kala tuu shiwa, ngeenge otwa longo ko ombinga yetu tu ‘twikile okutwaafana omukumo nokutungafana’! — 1 Tes. 5:11.

7. Oshike tashi dulu okukala eshongo konima yoshiponga shopaushitwe?

⁷ Oshiponga shopaushitwe otashi dulu okudjuupaleka onghalamwenyo yomunhu mepakumo leisho. Ovo va ninga oihakanwa otashi dulika va kanifa oiniwe yavo, omaumbo avo, ile nokuli va filwa ovaholike vavo. Ovamwatate novamwameme inava lya olusha lokuhahangwa koiningwanima inyanyalifa ya tya ngaho. Oshike hatu dulu okuninga, opo tu va kwafele?

8. Oshike ovakulunhuongalo nosho yo omitwe domaukwaneumbo tadi dulu okuninga, ofimbo inapa holoka oshiponga shopaushitwe?

⁸ Osho ovakulunhuongalo tava dulu okuninga. Ovakulunhuongalo, kwafeleni ovamwaxo va kale ve lilongekida, ofimbo oshiponga shopaushitwe inashi hovela. Shilipalekeni kutya aveshe meongalo ove shii eenghatu odo ve na okukatuka, opo va kale meameno nova kwatafane novakulunhuongalo. Margaret, oo a popiwa moshitukulwa sha tetekela, okwa ti: “Ovakulunhuongalo ova li ve tu londwela meemhumbwe deongalo kutya epeya otashi dulika li holoke natango. Ova ti kutya ngeenge ovakwanepangelo ove tu lombwele tu fiye po omaumbo etu, ile ngeenge eenghalo oda naipala, natu dje mo meendelelo.” Ouyelele wa tya ngaho owa li u li pefimbo, molwaashi epeya lomundilo la nyika oshiponga ola ka holoka konima yoivike itano. Pefimbo lelongelokalunga loukwaneumbo, omitwe domaukwaneumbo otadi dulu okukundafana osho oshilyo keshe shoukwaneumbo tashi dulu okuninga. Ngeenge ove nounona voye omwa kala mwe lilongekida, otamu ka kala mwa ngungumana, shimha pa holoka oshiponga shopaushitwe.

9. Ongahelipi ovakulunhuongalo tava dulu okuunganeka oilonga yavo, fimbo oshiponga shopaushitwe inashi hovela, nokonima yasho?

⁹ Ngeenge ou li omupashukili wongudu yoilonga yomomapya, shilipaleka kutya ou na eengodi nosho yo eendjukifi di li mondjila daaveshe ovo ve li mongudu yeni, nou na oku shi ninga fimbo inapa holoka oshiponga. Ninga omusholondodo noku u kaleka u li pefimbo. Opo nee ngeenge opa ka holoka oshiponga shopaushitwe, oto ka dula okukwatafana nomuudifi keshe noku mu pa ekwafo olo a pumbwa. Tumina ouyelele oo diva komuunganeki wolutu lovakulunhuongalo, oo te ke u tumina komupashukilishikandjo. Ngeenge ovamwatate ovo ova longele kumwe, otava ka kwafela monghedi ya denga mbada. Konima eshi pa li pa tukuka omundilo, omupashukilishikandjo wooMargaret okwa kala oupafi oule weevili 36. Okwa kala ta unganeke oilonga yovakulunhuongalo, opo va kwatafane nokufila oshisho ovamwatate novamwameme 450, ovo va tembulwa. (2 Kor. 11:27) Kungaho, aveshe ovo va li va pumbwa onhele yokukala, ova li ve i mona.

10. Omolwashike ovakulunhuongalo ve na okutala ko etalelepo loufita la fimana? (Johannes 21:15)

¹⁰ Ovakulunhuongalo ove na oshinakuwanifwa shokuyandja etwomukumo kovamwaxe okudja mOmbiibeli nokukwafela ovo va wililwa po. (1 Pet. 5:2) Ngeenge pa holoka oshiponga shopaushitwe, ovakulunhuongalo ove na okushilipaleka tete kutya omumwatate nomumwameme keshe oku li meameno, e na oikulya, oikutu nonhele yokukala. Ashike ngeenge pa piti eemwedi dihapu,  ovamwatate novamwameme va tya ngaho, otashi dulika va kale va pumbwa okuyambididwa pamhepo nosho yo pamaliudo. (Lesha Johannes 21:15.) Harold, oo ha longo mOkomitiye yOshitaimbelewa, nokwa shakeneka ovamwatate novamwameme vahapu ovo va kumwa koiponga yopaushitwe, okwa ti: “Ohashi kwata efimbo lile, opo omunhu a xwepopale. Otashi dulika va hovele okweefa okudiladila koiniwe yavo, ashike ihava efa po diva okudiladila kovaholike vavo ovo va fya, ile onghalo ya nyika oshiponga omo va li. Eenghalo da tya ngaho, otadi dulu okukala hadi va nyikifa oluhodi efimbo nefimbo. Oshi li paushitwe okukala ve udite ngaho, ndele inashi hala okutya kave na eitavelo.”

11. Omaukwaneumbo otashi dulika a twikile okukala a pumbwa shike?

¹¹ Ovakulunhuongalo ove na okutula moilonga omayele oo taa ti, “lileni pamwe naavo tava lili.” (Rom. 12:15) Ovo va xupa moshiponga shopaushitwe otashi dulika va pumbwa okushilipalekwa kutya Jehova nosho yo ovamwaxe ove va hole. Ovakulunhuongalo otava ka kwafela omaukwaneumbo a kale e na onghedindjikilile yokuninga oinima yopamhepo ngaashi okwiilikana, okukonakona, okukala pokwoongala nokukufa ombinga moilonga yokuudifa. Otava dulu yo okukwafela ovadali va kwafele ounona vavo va yandje elitulemo koinima oyo itai dulu okunyonwa po koshiponga shopaushitwe. Ovadali, dimbulukifeni ounona veni kutya Jehova ota ka kala alushe kaume kavo note ke va kwafela alushe. Va yelifileni yo kutya otava dulu okukala oshitukulwa shoukwaneumbo womounyuni aushe wovamwatate novamwameme, ovo ve lilongekida oku va kwafela. — 1 Pet. 2:17.

12. Oshike vamwe tava dulu okuninga, opo va kwafele koshikondo shokuyandja oikwafa? (Tala efano.)

¹² Osho vamwe tava dulu okuninga. Ngeenge oshiponga shopaushitwe osha holoka popepi naave, pula ovakulunhuongalo nghee to dulu okukwafela. Oto dulu okuyandja onhele pakafimbo tashi dulika kwaavo va tembulwa, ile kwaavo tave liyambe moilonga yokutunga. Oto dulu yo okuyandja oikulya nosho yo oipumbiwa ikwao kovaudifi ovo ve na omhumbwe. Ngeenge oshiponga shopaushitwe osha ningwa konhele i li kokule naave, natango oto dulu okukwafela. Ngahelipi mbela? Omokwiilikanena ovo va kumwa. (2 Kor. 1:8-11) Oto dulu yo okuyambidida oshikondo shokuyandja oikwafa mokuyandja omayambidido opashimaliwa e na sha noilonga yomounyuni aushe. (2 Kor. 8:2-5) Ngeenge oto dulu okuya konhele oyo ya kumwa, pula ovakulunhuongalo shi na sha nokuliyamba. Ngeenge owa shivwa u ka kwafele, otashi dulika u ka pewa edeulo lonhumba, opo u dule okukwafela monghedi ya denga mbada.

13. Omashongo elipi ovamwatate va taalela moilongo omo oilonga yetu ya shilikwa?

¹³ Omahepeko okwa djuupaleka onghalamwenyo moilongo omo oilonga yetu ya shilikwa. Ovamwatate ovo ve li moilongo ya tya ngaho, natango ova taalela omashongo opashimaliwa, hava vele notava filwa ovaholike vavo. Ashike omolwokushilikwa kwa tya ngaho, ovakulunhuongalo otashi dulika itava dulu okuya, ile okukwatafana va manguluka naavo va pumbwa etwomukumo. Osho osha li sha ningilwa Andrei, oo a popiwa moshitukulwa sha tetekela. Omumwameme womongudu yavo yomomapya okwa li e na oupyakadi wopashimaliwa. Opo nee okwa li a ya moshiponga shohauto. Okwa li a pumbwa omatando e lili noku lili noka li ta dulu okulonga. Nonande opa li eendjidikila nosho yo omukifi wekomba, ovamwatate ova li va ninga ngaashi tava dulu va kwafele, na Jehova okwa li e wete osho tashi ningwa po.

14. Ongahelipi ovakulunhuongalo tava dulu okutula po oshihopaenenwa mokulineekela Jehova?

¹⁴ Osho ovakulunhuongalo tava dulu okuninga. Andrei okwa li a ilikana nokuninga ngaashi ta dulu. Jehova okwe linyenga ngahelipi? Okwa li e linyengifa ovaitaveli vakwao meongalo, ovo va li tava dulu okuninga shihapu, opo ve mu kwafele. Vamwe ova li va twala omumwameme noyeendifo yavo kundokotola. Vamwe ove mu kwafela pashimaliwa. Jehova okwa li e ve linyengifa va ninge ngaashi tava dulu, nokwa li a shilipaleka kutya ovamwatate novamwameme meongalo ove mu pa ashishe osho a pumbwa. (Heb. 13:16) Ovakulunhuongalo, ngeenge oilonga oya tulilwa po eendjidikila, puleni ekwafo kuvamwe. (Jer. 36:5, 6) Naasho sha fimanenena, lineekeleni Jehova. Ota dulu oku mu kwafela mu wanife po eemhumbwe dovamwatate novamwameme.

15. Ongahelipi hatu dulu okukaleka po oukumwe wetu wopaKriste, ngeenge hatu hepekwa?

¹⁵ Osho vamwe tava dulu okuninga. Ngeenge oilonga yetu ya shilikwa, otashi dulika twa pumbwa okwoongala moungudu vanini. Onghee osha fimana neenghono shi dulife nale okukala tu na ombili. Natu kondjifeni Satana, ndele havakwetu. Inatu yandja elitulemo komapuko ovamwatate, ndele natu kendabale okukandula po oupyakadi meendelelo. (Omayel. 19:11; Ef. 4:26) Kala we lilongekida okukwafela vamwe. (Tit. 3:14) Ekwafo olo vamwe va li va pa omumwameme, oo e li momhumbwe, ola li la etela ongudu yoilonga yomomapya ouwa. Ova kala nekwatafano la kola, ngaashi oukwaneumbo. — Eps. 133:1.

16. Metwokumwe nOvakolossi 4:3, 18, ongahelipi hatu dulu okukwafela ovamwatate novamwameme ovo tava hepekwa?

¹⁶ Ovamwatate novamwameme omayovi omilongo  otava longele Jehova, nonande ova tulilwa po eendjidikila komapangelo. Vamwe vomuvo ova tulwa modolongo omolweitavelo lavo. Ohatu dulu oku va ilikanena nosho yo omaukwaneumbo avo. Ohatu dulu yo okwiilikanena ovo hava katuka nouladi, opo va yambidide ovamwatate novamwameme, ovo va tulwa modolongo, nonande otashi dulu oku va tulifa modolongo. Ohava tu ovamwatate omukumo, opo va kale ve lineekela muJehova, have va pe osho va pumbwa noku va popila momhangu. c (Lesha Ovakolossi 4:3, 18.) Inamu dimbwa kutya omailikano eni otaa dulu okukwafela ovamwatate novamwameme aveshe ovo. — 2 Tes. 3:1, 2; 1 Tim. 2:1, 2.

17. Ongahelipi to dulu okulilongekidila omahepeko paife?

¹⁷ Ove nosho yo oukwaneumbo woye otamu dulu okulilongekidila omahepeko paife. (Oil. 14:22) Ino kendabala okudiladila kombinga yoinima aishe ii oyo tai dulu okuningwa. Ponhele yaasho, pameka ekwatafano loye naJehova nokukwafela ounona voye va ninge sha faafana. Ngeenge oho kala wa wililwa po omafimbo amwe, mbubulila Kalunga omutima woye. (Eps. 62:7, 8) Mu li oukwaneumbo, kundafaneni omatomheno kutya omolwashike tamu dulu okulineekela Kalunga. d Ngaashi ashike tashi kwafele ounona voye ngeenge we lilongekidila oshiponga shopaushitwe, otashi ke va kwafela yo ngeenge owe lilongekidila omahepeko. Otava ka kala ve na ouladi nova ngungumana, molwaashi owe va honga ve lineekele muJehova.

18. Oshike twa tuvikililwa monakwiiwa?

¹⁸ Ombili yaKalunga ohai tu ningifa tu kale tu udite twa amenwa. (Fil. 4:6, 7) Jehova oha ngungumaneke omitima detu okupitila mombili ya tya ngaho, nonande otwa taalela omikifi, oiponga yopaushitwe nosho yo omahepeko, oo taa dulu oku tu kuma kunena. Oha longifa ovakulunhuongalo ovo hava longo noudiinini, opo ve tu pashukile. Okwe tu pa atushe oufembanghenda wokukwafelafana. Ombili oyo hatu hafele paife otai tu longekida, eshi hatu ka taalela omaudjuu a kwata moiti e li popepi nokuli ‘noudjuu munene.’ (Mat. 24:21) Pefimbo opo, ohatu ka pumbwa okukaleka po ombili yetu nokukwafela vamwe va ninge sha faafana. Ashike konima yoshiningwanima osho, itatu ka taalela vali omaupyakadi, oo tae tu etele oisho. Xuuninwa, ohatu ka hafela osho Jehova a li e tu halela, ewaneneno nombili yaalushe. — Jes. 26:3, 4.