1. Okudilonga keudaneko laJehova li na sha nomwenyo waalushe ohaku tu kumu ngahelipi?

 JEHOVA okwa udaneka kutya ovo hava dulika kuye otava ka kala ‘nomwenyo waalushe.’ (Rom. 6:23) Ngeenge otwa dilonga kwaasho Jehova e tu udanekela, ohole yetu yoku mu hola otai ka kala yomoule. Diladila kwaashi: Tate yetu womeulu oku tu hole neenghono noina hala tu tukauke ko kuye.

2. Eudaneko lomwenyo waalushe ohali tu kwafele ngahelipi?

² Eudaneko laKalunga li na sha nomwenyo waalushe ohali tu kwafele tu lididimikile omayeleko, oo twa taalela paife. Nokuli nongeenge ovatondi vetu ove tu ningile omatilifo e na sha nefyo, ihatu liyandje. Omolwashike? Omolwaashi otu shii kutya ngeenge otwa fi tu li ovadiinini kuJehova, ote ke tu nyumuna nohatu ka kala neteelelo kutya katu na vali fiku tu fye. (Joh. 5:28, 29; 1 Kor. 15:55-58; Heb. 2:15) Omolwashike hatu dulu okukala noushili kutya ohatu dulu okukala nomwenyo fiyo alushe? Natu ka kundafaneni omatomheno taa shikula.

3. Omolwashike hatu dulu okukala noushili kutya Jehova ota dulu oku tu kaleka nomwenyo fiyo alushe? (Epsalme 102:12, 24, 27)

³ Otu shii kutya Jehova ota dulu oku tu kaleka nomwenyo fiyo alushe, molwaashi oye Odjo yomwenyo nota kala ko fiyo alushe. (Eps. 36:9) Didilika eevelishe dinini dOmbiibeli, odo da koleka kutya Jehova okwa kala ko nota kala ko fiyo alushe. Epsalme 90:2 ola ti kutya Jehova ota ‘kala ko alushe fiyo alushe.’ Epsalme 102 nalo ola popya oshitwa sha faafana. (Lesha Epsalme 102:12, 24, 27.) Omuprofeti Habakuk okwa shanga shi na sha naTate yetu womeulu, a ti: “Hamba haave Omwene, Kalunga kange omuyapuki okudja omafimbo onalenale? [Ove iho fi, NWT.]” — Hab. 1:12.

4. Mbela otu na okukala hatu lipula unene, ngeenge otu wete shidjuu okuuda ko ediladilo olo kutya Jehova okwa kala ko alushe? Shi yelifa.

 ⁴ Mbela oho mono shidjuu okuuda ko ediladilo olo kutya Jehova okwa kala ko ‘alushe’? (Jes. 40:28) Ovanhu vahapu ohava mono shidjuu oku shi uda ko. Elihu okwa popya shi na sha naKalunga, a ti: “Itatu dulu okushiiva omuvalu womido daye.” (Job 36:26, NWT) Ashike okukala tuhe udite ko oshinima shonhumba inashi hala okutya oshinima osho kashi fi shoshili. Pashihopaenenwa, nonande katu udite ko pauyadi nghee ouyelele hau longo, mbela osho osha hala okutya ouyelele kau ko? Hasho nandenande! Sha faafana, tu li ovanhu otashi dulika tuha ude ko pauyadi kutya ongahelipi Jehova a kala ko nota kala ko fiyo alushe. Ashike osho inashi hala okutya Kalunga ita kala ko fiyo alushe. Omushiti iha ngabekwa kwaasho hatu dulu, ile itatu dulu okuuda ko. (Rom. 11:33-36) Okwa kala ko fimbo ounyuni inau shitwa, mwa kwatelwa eedjo douyelele ngaashi etango. Otu na oushili kutya Jehova oye “a shita edu neenghono daye.” Okwa kala ko fimbo ‘eulu inali valelwa.’ (Jer. 51:15; Oil. 17:24) Onetomheno vali lilipi hatu dulu okukala noushili kutya ohatu dulu okukala nomwenyo fiyo alushe?

5. Ovalihomboli votete ova li ve na eteelelo lilipi?

⁵ Oinima aishe i na omwenyo, oyo Jehova a shitila kombada yedu, xuuninwa oya li i na okufya, kakele ashike kovanhu. Ovanhu okwe va pa eteelelo le likalekelwa lokuhafya. Jehova okwa li a londwela Adam, a ti: “Omuti wokushiiva ouwa nowii, ino u lya. Osheshi efiku tuu olo to u li, ou na okufya shili.” (Gen. 2:17) Ngeno Adam naEva ova dulikile kuJehova, ngeno inava fya. Oshi li pandunge okufika pexulifodiladilo kutya Jehova okwa li te ke va pitika va lye “komuti womwenyo.” Osho osha li tashi ka tya okwe va shilipaleka kutya otava ka ‘kala ve na omwenyo fiyo alushe.’ b — Gen. 3:22.

6-7. (a) Oshike vali tashi ulike kutya ovanhu kava li va shitwa va fye? (b) Oinima ilipi twa teelela nodjuulufi oku ka ninga? (Tala omafano.)

⁶ Ovanongononi vamwe ova mona oumbangi oo tau ulike kutya ouluvi wetu otau dulu okutuvikila ouyelele muhapu neenghono u dulife pwaao hatu dulu okutuvikila, pefimbo olo tu li momwenyo. Osho oshihokwifa neenghono. Mo 2010, oshitukulwa shimwe shoshifo Scientific American Mind osha ti kutya ouluvi wetu otau dulu okutuvikila ouyelele u fike hanga peegigabita omamiliyona 2,5. Ouyelele oo ou fike pamwe neeprograma doko-TV, odo tadi talwa oule weevili omamiliyona atatu  (oule weedula di dulife 300). Otashi dulika ouluvi wetu tau dulu okutuvikila ouyelele muhapu u dulife pwaao. Osho otashi ulike kutya Jehova okwa shita ouluvi wetu tau dulu okutuvikila ouyelele muhapu neenghono, u dulife pwaasho hatu lihongo moule womido 70, ile 80. — Eps. 90:10.

⁷ Jehova okwe tu shitila yo ehalo lokukala twa halelela okukala nomwenyo fiyo alushe. Ombiibeli oya popya shi na sha novanhu kutya Kalunga ‘okwa tula momitima davo oukwaalushe.’ (Omuud. 3:11) Olo olo etomheno limwe molwaashi twa tala ko efyo li li omutondi. (1 Kor. 15:26) Ngeenge hatu vele neenghono, mbela ohatu kala ashike twa mwena twa teelela okufya? Ahowe. Luhapu ohatu ka mona ndokotola, nomafimbo amwe ohatu nu omiti, opo tu veluke. Ohatu ningi keshe shimwe hatu dulu, opo tu kelele efyo. Ngeenge umwe oo tu hole a fya, kutya nee omunyasha, ile omukulunhu, mbela ihatu kala twa nyika oluhodi oule wefimbo lile? (Joh. 11:32, 33) Osho otashi ulike kutya Omushiti wetu omunahole okwe tu shita hatu dulu okulihonga fiyo alushe, notu na ehalo lokukala nomwenyo fiyo alushe. Ashike ope na vali omatomheno amwe oo tae tu itavelifa kutya ohatu dulu okukala nomwenyo fiyo alushe. Natu ka konakoneni eenghatu dimwe odo Jehova a li a katuka nosho yo odo ta katuka paife, odo tadi ulike kutya elalakano laye lopehovelo inali lunduluka.

8. Shi na sha nelalakano laJehova li na sha nafye, eshilipaleko lilipi hatu hange muJesaja 55:11?

⁸ Nonande Adam naEva ova nyona nova etela oludalo lavo efyo, Jehova ina lundulula omadiladilo aye e na sha nelalakano laye. (Lesha Jesaja 55:11.) Elalakano laye natango  ololo kutya ovanhu ovadiinini otava ka kala nomwenyo fiyo alushe. Osho otu shi shii omolwoinima oyo Jehova a popya nokwa ninga, opo a wanife po elalakano laye.

9. Kalunga okwe tu udanekela shike? (Daniel 12:2, 13)

⁹ Jehova okwa udaneka kutya ota ka nyumuna oonakufya note ke va pa omhito va kale nomwenyo fiyo alushe. (Oil. 24:15; Tit. 1:1, 2) Omulumenhu omudiinini Job okwa li e na oushili kutya Jehova okwa halelela okunyumuna ovo va fya. (Job 14:14, 15) Omuprofeti Daniel okwa li e shii kutya ovanhu ove na eteelelo loku ka nyumunwa nokumona omhito yokukala fiyo alushe. (Eps. 37:29; lesha Daniel 12:2, 13.) Ovajuda vopefimbo laJesus navo ova li ve shii kutya Jehova ota dulu okupa ovadiinini vaye “omwenyo waalushe.” (Luk. 10:25; 18:18) Jesus okwa popya lwoikando kombinga yeudaneko olo; naye mwene okwa li a nyumunwa kuXe. — Mat. 19:29; 22:31, 32; Luk. 18:30; Joh. 11:25.

10. Omanyumuko oo a ningwa monakudiwa otaa koleke shike? (Tala efano.)

¹⁰ Jehova oye Omuyandji wOmwenyo noku na eenghono dokwaalulila oonakufya momwenyo. Okwa li a pa omuprofeti Elia eenghono a nyumune omonamati womufiyekadi wokuSarefat. (1 Eeh. 17:21-23) Lwanima, kekwafo laKalunga, omuprofeti Elisa okwa li a alulila momwenyo omonamati womukainhu Omusunemi. (2 Eeh. 4:18-20, 34-37) Omanyumuko oo nosho yo makwao otaa ulike kutya Jehova oku na eenghono dokwaalulila ovanhu momwenyo. Eshi Jesus a li kombada yedu, okwa ulika kutya Xe okwe mu pa eenghono da tya ngaho. (Joh. 11:23-25, 43, 44) Paife Jesus oku li meulu nokwa pewa “eenghonopangelo adishe meulu nokombada yedu.” Kungaho, ota dulu okuwanifa po eudaneko olo kutya “aveshe ovo ve li meembiladimbuluko” otava ka nyumuninwa momwenyo ve na eteelelo lokukala nomwenyo fiyo alushe. — Mat. 28:18; Joh. 5:25-29.

11. Ongahelipi ekuliloyambo le shi ningifa tashi shiiva, opo tu ka kale nomwenyo fiyo alushe?

¹¹ Omolwashike Jehova a efa Omona waye omuholike a fye efyo li udifa omwenyo munyenye? Jesus okwa yandja enyamukulo kepulo olo, eshi a ti: “Molwaashi Kalunga oku hole ounyuni neenghono, okwa yandja Omona waye ewifa, opo keshe ou te mu itavele aha hanaunwe po ndele a ka mone omwenyo waalushe.” (Joh. 3:16) Eshi Kalunga a yandja Omona waye e li ekulilo, opo omatimba e tu a dimwe po, okwe shi ningifa tashi shiiva, opo tu ka mone omwenyo waalushe. (Mat. 20:28) Omuyapostoli Paulus okwa ngonga oshitukulwa osho sha fimana shelalakano laKalunga, eshi a ti: “Molwaashi efyo ole uya po okupitila momunhu umwe, enyumuko nalo ole uya po okupitila momunhu umwe. Ngaashi ashike ovanhu aveshe hava fi omolwaAdam, aveshe otava dulu oku ka kala nomwenyo okupitila muKristus.” — 1 Kor. 15:21, 22.

12. Ouhamba otau ka kwafela ngahelipi mokuwanifwa po kwelalakano laJehova li na sha nafye?

¹² Jesus okwa honga ovashikuli vaye va ilikane Ouhamba waKalunga u uye nosho yo ehalo laYe li longwe kombada yedu. (Mat. 6:9, 10) Oshi li oshitukulwa shelalakano laKalunga ovanhu va kale nomwenyo fiyo alushe kombada yedu. Opo osho shi wanifwe po, Jehova okwa nangeka po Omona waye e li Ohamba yOuhamba wopaMessias. Kalunga okwa kala ta ongele ovanhu 144 000 okudja kombada yedu va ka longe pamwe naJesus mokuwanifa po ehalo laYe. — Eh. 5:9, 10.

13. Jehova ota ningi shike paife, noshike u na okuninga?

¹³ Jehova ota ongele “ongudu inene” yovanhu note va deula va kale ovapangelwa vOuhamba waye. (Eh. 7:9, 10; Jak. 2:8) Nonande  ovanhu vahapu kunena mounyuni ova tukauka omolwoutondwe nosho yo oita, “ongudu inene” otai longo noudiinini, opo i efe po outondwe wa tya ngaho. Oya hambula omaongamukonda ayo a ninge omatemo oku shi popya pafaneko. (Mika 4:3) Ponhele yokukufa ombinga moita, oyo hai twaalele eemwenyo dihapu, otava kwafele ovanhu va mone “omwenyo washili” moku va honga kombinga yaKalunga kashili nomalalakano aye. (1 Tim. 6:19) Oilyo yomaukwaneumbo avo otashi dulika i va pataneke, ile tashi dulika va kale vehe na oimaliwa, molwaashi tava yambidida Ouhamba waKalunga. Ashike Jehova oha shilipaleke kutya ove na oinima aishe oyo va pumbwa. (Mat. 6:25, 30-33; Luk. 18:29, 30) Omaumbangi oo otae tu shilipaleke kutya Ouhamba waKalunga oshinima sholela nosho yo kutya otau twikile okuwanifa po elalakano laJehova.

14-15. Ongahelipi eudaneko laJehova li na sha nokuxulifa po efyo fiyo alushe xuuninwa tali ka wanifwa po?

¹⁴ Jesus paife oku li meulu nota ka wanifa po omaudaneko aeshe oo Jehova a udaneka. (2 Kor. 1:20) Okudja mo 1914, Jesus okwa kala nokufinda ovatondi vaye. (Eps. 110:1, 2) Mafiku, Jesus nosho yo ovo tava ka pangela pamwe naye, otava ka findana filufilu notava ka hanauna po ovakolokoshi. — Eh. 6:2.

¹⁵ Momukokomoko wOmido Eyovi dOkupangela kwaJesus, oonakufya otava ka nyumunwa, novanhu ovaduliki otava ka twalwa mewaneneno. Konima yeyeleko laxuuninwa, ovo  Jehova ta ka tala ko ovayuki ‘otava ka fyuulula oshilongo, ndele tava kala mo alushe.’ (Eps. 37:10, 11, 29) Shihafifa, “nefyo, olo li li omutondi waxuuninwa, otali ka xulifwa po.” — 1 Kor. 15:26.

16. Etomheno letu la fimanenena lokulongela Jehova olilipi?

¹⁶ Ngaashi twe shi mona moshitukulwa eshi, eteelelo letu lokukala nomwenyo fiyo alushe ola kanghamena filufilu kEendjovo daKalunga. Eteelelo olo otali dulu oku tu kwafela tu kale ovadiinini momafiku aa axuuninwa madjuu okukaliwa muo. Ashike opo tu hafife Jehova, otu na okulinyengifwa kushihapu shihe fi ashike okukala twa hala okukala nomwenyo. Etomheno letu la fimanenena lokukala ovadiinini kuJehova naJesus ololo kutya otu va hole neenghono. (2 Kor. 5:14, 15) Ohole ya tya ngaho, ohai tu linyengifa tu va hopaenene notu lombwele vamwe kombinga yeteelelo letu. (Rom. 10:13-15) Eshi hatu lihongo okukala tuhe lihole fye vene nohatu yandje, kungaho ohatu ka kala ovanhu ovo Jehova a hala va kale ookaume kaye fiyo alushe. — Heb. 13:16.

17. Oshinakuwanifwa shilipi tu na pauhandimwe? (Mateus 7:13, 14)

¹⁷ Mbela ohatu ka kala ngoo mokati kaavo tava ka kala nomwenyo fiyo alushe? Jehova okwe tu yeululila omhito ya tya ngaho. Otwa pumbwa ashike okuhoolola okweenda mondjila oyo tai twala komwenyo waalushe. (Lesha Mateus 7:13, 14.) Onghalamwenyo otai ka kala ya tya ngahelipi, eshi hatu ka kala nomwenyo fiyo alushe? Ohatu ka kundafana enyamukulo kepulo olo moshitukulwa tashi landula ko.