Owa lesha ngoo nawanawa Eeshungonangelo dodula ei? Tala ngeenge oto mono omanyamukulo omapulo taa shikula:

Ongahelipi hatu ka mona ouwa, ngeenge otwa kongo efimbo tu popye, tu pwilikine nokudiladila kombinga yaJehova?

Ohatu ka ninga omatokolo opandunge, hatu ka ninga ovahongi ve li xwepo, hatu ka kala neitavelo la pamenena nohole yetu yokuhola Jehova otai ka kala yomoule. — w22.01, ep. 30-31.

Ohatu ka mona ouwa ulipi, ngeenge otwe lihongo okulineekela Jehova nosho yo ovo tava kwatele komesho mehangano laye?

Paife olo efimbo lokulihonga okulineekela onghedi omo Kalunga ha ningi oinima, ndele halo efimbo lokulimbililwa ewiliko nomatokolo ovakulunhuongalo. Ngeenge oudjuu munene owa hovele, ohatu ka kala twe lilongekida okudulika nokuli nonande otwa pewa omalombwelo oo tuhe udite ko, ile taa monika ehe li pandunge. — w22.02, ep. 4-6.

Omweengeli okwa li a hala okutya ngahelipi, eshi a lombwela Sakaria shi na sha ‘noholongodi meke [langoloneya] Serubbabel’? (Sak. 4:8-10)

Emoniko olo ola li la shilipaleka oshiwana shaKalunga kutya otembeli ipe, oyo ya li tai tungwa, otai ka manifwa okutungwa notai ka kala ngaashi Kalunga a hala i kale. — w22.03, ep. 16-17.

Ongahelipi hatu dulu okukala “oshihopaenenwa shiwa ngeenge tashi uya pokupopya”? (1 Tim. 4:12)

Omokukala hatu popi novanhu nonghenda nosho yo nefimaneko moukalele, hatu imbi nomutima aushe nokukufa ombinga pokwoongala pandjikilile, hatu popi oshili, hatu tungafana nokuhenuka eendjovo inadi koshoka. — w22.04, ep. 6-9.

Omolwashike oilyani (omauhamba) ine oyo ya tumbulwa muDaniel etukulwa 7 i na omaukwatya a faafana naao oshilyani osho sha tumbulwa mEhololo 13:1, 2?

Oshilyani osho sha tumbulwa mEhololo 13 itashi faneke ashike ouhamba umwe auke wokondadalunde, ngaashi waRoma. Ponhele yaasho, otashi faneke omapangelo aeshe omanaenghono opapolotika, oo taa pangele ovanhu. — w22.05, ep. 9.

Omonghedi ya denga mbada ilipi hatu dulu okuulika kutya otwe lineekela mouyuki waKalunga?

Ngeenge umwe e tu tuka, e tu handukifa, ile a nyona kufye, otu na okukendabala tuha handuke nokuhe mu kwatela onghone, ndele ohatu efele oinima momake aJehova. Jehova ota ka kufa po ouyehame aushe, oo wa etifwa kenyono. — w22.06, ep. 10-11.

Omumwatate oo ta ilikana pokwoongala oku na okukaleka shike momadiladilo?

Eilikano kali li omhito yokuyandja omayele pokwoongala, ile yokuninga omashiivifo. Katu na ‘okweendulula oinima ya faafana,’ unene tuu pehovelo lokwoongala. (Mat. 6:7) — w22.07, ep. 24-25.

Omonghedi ilipi ava “va longa owii,” tava ka ‘nyumukila etokolo’? (Joh. 5:29)

Itava ka tokolelwa owii, she likolelela konghalamwenyo yavo yomonakudiwa. Otava ka konakonwa she likolelela koikala nokelihumbato lavo konima eshi va nyumunwa. — w22.09, ep. 18.

Eendjovo ditunhula dilipi J. F. Rutherford a popya poshoongalele muSeptemba 1922?

Okwa popya poshoongalele muCedar Point, Ohio, U.S.A., a ti: “Ohamba otai pangele! Nye ovakalele vayo voku shi shiivifa. Hano udifeni, udifeni, udifeni Ohamba nOuhamba wayo.” — w22.10, ep. 3-5.

Jesaja etukulwa 30 okwa divilika eenghedi nhatu dilipi omo Kalunga he tu kwafele tu lididimike?

Etukulwa eli ola ulika kutya (1) oha pwilikine nokunyamukula omailikano etu, (2) he tu pe ewiliko (3) note tu nangeke noupuna paife nosho yo monakwiiwa. — w22.11, ep. 9.

Omolwashike hatu dulu okufika pexulifodiladilo kutya eendjovo dEpsalme 37:10, 11, 29, oda wanifwa mefimbo lonale notadi ka wanifwa monakwiiwa?

Eendjovo daDavid otadi ulike filufilu komanangeko noupuna, oo a li a pewa Israel, ngaashi pefimbo lokupangela kwaSalomo. Jesus okwa li ta ulike koparadisa yomonakwiiwa nokwa tofa ovelishe 11. (Mat. 5:5; Luk. 23:43) — w22.12, ep. 8-10, 14.