1. Diva fimbo Jesus ina fya, oshike a li a lombwela omukolokoshi, oo a li polwamba laye? (Lukas 23:39-43)

 JESUS nosho yo ovakolokoshi vavali, ovo va li polwamba laye, ova li ve udite ouyahame, eshi va li tava kondjo nomwenyo. (Luk. 23:32, 33) Ovakolokoshi aveshe ova li tava sheke Jesus, naasho otashi ulike filufilu kutya kava li ovahongwa vaye. (Mat. 27:44; Mark. 15:32) Ashike umwe womuvo okwa li a lundulula oikala yaye. Okwa ti: “Jesus, dimbulukwe nge ngeenge wa i mOuhamba woye.” Jesus okwa ti: “Oshili ohandi ku lombwele nena eli, oto ka kala pamwe naame mOparadisa.” (Lesha Lukas 23:39-43.) Kape na oumbangi oo tau ulike kutya omukolokoshi oo, okwa li a tambula ko etumwalaka li na sha ‘nOuhamba womeulu,’ olo Jesus a li a udifa pefimbo loukalele waye. Jesus ina popya yo kutya omulumenhu oo ota ka ya mOuhamba. (Mat. 4:17) Jesus okwa li ta popi kombinga yOparadisa yomonakwiiwa, oyo tai ka kala kombada yedu. Omolwashike hatu tile ngaho?

2. Oshike tashi ulike kutya omukolokoshi, oo a li e livela ombedi, okwa li Omujuda?

² Omukolokoshi, oo a li e livela ombedi, otashi dulika a li Omujuda. Omukolokoshi oo okwa lombwela mukwao, a ti: “Iho tila Kalunga eshi atusheni twa pewa etokolo la faafana?” (Luk. 23:40) Ovajuda ova li hava longele Kalunga umwe, ashike ovanhu vomoiwana imwe ova li va itavela moikalunga ihapu. (Ex. 20:2, 3; 1 Kor. 8:5, 6) Ngeno ovalumenhu ovakolokoshi ovo ova li vomoiwana imwe, ngeno omukolokoshi otashi dulika a pula, ta ti: “Iho tila oikalunga?” Shikwao vali, Jesus ka li a tuminwa kovanhu vomoiwana imwe, ndele ‘okeedi odo da kana domeumbo  laIsrael.’ (Mat. 15:24) Kalunga okwa li a lombwela Ovaisrael kutya ota ka nyumuna ovafi. Omukolokoshi, oo a li e livela ombedi, otashi dulika a li e shii kombinga yaasho. Ngaashi eendjovo daye de shi ulika, omukolokoshi oo, okwa li e na elineekelo kutya Jehova ota ka nyumuna Jesus a ka pangele mOuhamba waYe. Omulumenhu oo otashi dulika a li e na eteelelo olo kutya Kalunga ote ke mu nyumuna yo.

3. Oshike tashi dulika sha li she uya momadiladilo omukolokoshi, oo e livela ombedi, eshi Jesus a tumbula Oparadisa? Shi yelifa. (Genesis 2:15)

³ Molwaashi omukolokoshi, oo a li e livela ombedi, okwa li Omujuda, otashi dulika a li e shii kombinga yaAdam naEva nosho yo Oparadisa omo Jehova a li e va tula. Onghee omukolokoshi oo otashi dulika a li a didilika kutya Oparadisa oyo ya tumbulwa kuJesus, oya li tai ka kala moshikunino shiwa kombada yedu. — Lesha Genesis 2:15.

4. Eendjovo daJesus, odo a lombwela umwe womovakolokoshi, otadi tu diladilifa kombinga yashike?

⁴ Eendjovo daJesus, odo a lombwela omukolokoshi, otadi tu diladilifa kombinga yanghee onghalamwenyo tai ka kala mOparadisa. Ohatu dulu okulihonga kombinga yoshinima shonhumba shi na sha nOparadisa kepangelo lombili lohamba Salomo. Ohatu dulu okukala nelineekelo kutya Jesus, oo munene kuSalomo, ota ka longa pamwe naavo tava ka pangela pamwe naye va ninge edu oparadisa iwa. (Mat. 12:42) Oshi shii okuudiwa ko eshi “eedi dimwe” di na ohokwe mwaasho da pumbwa okuninga, opo di kale da wana oku ka kala mOparadisa fiyo alushe. — Joh. 10:16.

5. Oshike wa teelela shi na sha nonghalamwenyo mOparadisa?

⁵ Oshike hashi uya momadiladilo oye, ngeenge to diladila kombinga yonghalamwenyo mOparadisa? Otashi dulika ho diladila koshikunino shiwa sha fa shaEden. (Gen. 2:7-9) Otashi dulika ho diladila kexunganeko olo li li muMika, olo la popya kutya oshiwana shaKalunga otashi ka kala omutumba “keshe umwe, momudile womuviinyu waye nowomukwiyu waye.” (Mika 4:3, 4) Otashi dulika yo to dimbuluka eevelishe donhumba mOmbiibeli, odo da popya kutya otaku ka kala oikulya ya henena. (Eps. 72:16; Jes. 65:21, 22) Onghee otashi dulika to lifaneke u li moshikunino shiwa, u li omutumba poshitaafula shi yadi eendja tadi tokola elaka. Otashi dulika to diladila kedimba liwa tali di momiti nosho yo meengala. Otashi dulika yo u lifaneke u li novaneumbo leni nosho yo ookaume koye, mwa kwatelwa ovanyumunwa, tamu likufa oindjola notamu hafele eendafano. Oinima aishe oyo kai fi ondjodi yongaho, ndele otai ka ningwa shili. Nopehe na omalimbililo, aishe oyo otai ka ningwa oku kombada yedu. Kakele kaasho, mOparadisa otamu ka kala yo mu na oilonga tai tulumukifa.

6. Oshike hatu ka ninga mOparadisa? (Tala efano.)

 ⁶ Jehova okwe tu shita hatu dulu okuhafela oilonga yetu. (Omuud. 2:24) Ohatu ka kala twe lipyakidila, unene tuu momukokomoko wOmido Eyovi dEpangelo laKristus. Ovo tava ka xupa poudjuu munene nosho yo ovanhu omamiliyona, ovo tava nyumunwa, otava ka pumbwa oikutu, oikulya neenhele dokukala. Opo tu wanife po oinima oyo, ohatu ka pumbwa okulonga oilonga ihapu ihafifa. Ngaashi ashike Adam naEva va li ve na okulonga oshikunino shavo, ohatu ka kala tu na oufembanghenda wokulonga Eduparadisa. Diladila nghee tashi ka kala shitunhula, eshi hatu ka honga ovanhu omamiliyona, ovo tava ka nyumunwa, ovo ve shii kanini kombinga yaJehova nosho yo elalakano laye! Diladila yo nghee hatu ka kwafela ovadiinini, ovo va li ko fimbo Jesus ine uya kombada yedu, ve lihonge shihapu!

7. Ohatu dulu okukala nelineekelo lilipi, nomolwashike?

⁷ Ohatu dulu okukala nelineekelo kutya ovanhu mOparadisa monakwiiwa otava ka kala ve yadi ombili, va hepuluka nova unganekwa nawa. Omolwashike mbela? Omolwaashi Jehova okwe tu ulikila nale nghee onghalamwenyo tai ka kala koshi yepangelo lOmona waye. Osho otu shi liwetele mehokololo lepangelo lohamba Salomo.

8. Eendjovo odo di li mEpsalme 37:10, 11, 29, oda wanifwa ngahelipi konima eshi da popiwa kohamba David? (Tala “Omapulo a dja kovaleshi” moshifo eshi.)

⁸ Ohamba David oya nwefwa mo i shange kombinga yanghee onghalamwenyo tai ka kala, eshi ohamba yomonakwiiwa inaendunge noidiinini tai ka pangela. (Lesha Epsalme 37:10, 11, 29.) Ngeenge hatu kundafana novanhu kombinga yOparadisa oyo tai uya, luhapu ohatu va leshele Epsalme 37:11. Otu na etomheno liwa lokuninga ngaho, molwaashi Jesus okwa tumbula eendjovo odo meudifo laye lokomhunda, tau ulike kutya otadi ka wanifwa monakwiiwa. (Mat. 5:5) Ashike eendjovo daDavid oda ulika yo nghee onghalamwenyo ya li tai ka kala pefimbo lohamba Salomo. Eshi Salomo a li ta pangele muIsrael, oshiwana shaKalunga osha li tashi hafele ombili nehepuluko medu “li yadi omashini nomaadi eenyiki.” Kalunga okwa ti: “Nye ngeenge tamu ende meenghedimhango  dange . . . , Ame ohandi ka yandja yo ombili moshilongo, opo mu shiive okunangala nokutulumukwa paha kale sha tashi mu etele omahaluhalu.” (Lev. 20:24; 26:3, 6) Omaudaneko oo okwa li a wanifwa, eshi Salomo a li ta pangele. (1 Omaf. 22:9; 29:26-28) Jehova okwa li a udaneka kutya ovakolokoshi itava ka “kala po vali.” (Eps. 37:10) Onghee hano, eendjovo odo di li mEpsalme 37:10, 11, 29, oda li da wanifwa mefimbo lonale notadi ka wanifwa yo monakwiiwa.

9. Ohambakainhu yokuSeba oya popya shike shi na sha nepangelo lohamba Salomo?

⁹ Ohambakainhu yokuSeba oya li ya uda shi na sha nombili nosho yo ehepuluko olo la li tali hafelwa kOvaisrael, eshi ohamba Salomo ya li tai pangele. Molwaashi eemhata okakuva kehe po, omukainhu oo okwa li e lidenga ondjila ile a ya kuJerusalem, opo a ka tale onghalo oyo kuye mwene. (1 Eeh. 10:1) Konima eshi a konakona ouhamba waSalomo, okwa ti: “Etata lomusho inandi li lombwelwa. . . . [Ovalumenhu, NW] voye ovanelao, naava have ku yakula ovanelao, naaveshe hava udu ounongo wokanya koye.” (1 Eeh. 10:6-8) Eenghalo domepangelo laSalomo, oda li ashike da ulika osho Jehova ta ka ningila ovanhu koshi yepangelo lOmona waye, Jesus.

10. Omeenghedi dilipi Jesus e dule kokule Salomo?

¹⁰ Jesus oku dule kokule Salomo meenghedi adishe. Salomo okwa li omulumenhu ina wanenena, oo a li ha ningi omapuko a kwata moiti ngeenge a li ta tokola, oo mokweendela ko kwefimbo a li a etela omaupyakadi oshiwana shaKalunga. Mepingafano naasho, Jesus, e li Omupangeli a wanenena, iha ningi omapuko. (Luk. 1:32; Heb. 4:14, 15) Jesus okwa kala omudiinini kuKalunga, nonande okwa li a yelekwa kuSatana nomayeleko a kwata moiti. Kristus okwa ulika kutya ita ka nyona nandenande, ile a ninge sha osho tashi ka ehameka ovapangelwa vaye ovadiinini. Oshi li oufembanghenda okukala tu mu na e li Ohamba yetu.

11. Oolyelye tava ka pangela pamwe naJesus?

¹¹ Jesus ota ka pangela pamwe novanhu 144 000, opo va file oshisho ovanhu nokuwanifa po elalakano laJehova li na sha nedu. (Eh. 14:1-3) Ova li ve lididimikila omayeleko mahapu nosho yo omaudjuu, eshi va li kombada yedu. Onghee otava ka kala ovapangeli ve na olukeno. Ndele mbela ovapangeli ovo otava ka longa shike kondadalunde?

12. Jehova ota ka pa ovanhu 144 000 oilonga ilipi?

¹² Oshilonga osho sha pewa Jesus nosho yo ovapangeli pamwe naye oshi dule kokule osho sha li sha pewa Salomo. Ohamba Salomo oya li i na okufila oshisho ovanhu omamiliyona ovo va li ashike moshilongo shimwe. Ashike ovo tava ka pangela mOuhamba waKalunga, otava ka fila oshisho ovanhu omabiliyona ovo ve li mounyuni aushe. Jehova ina pa tuu ovanhu 144 000 oufembanghenda munene!

13. Ovo tava ka pangela pamwe naJesus otava ka kala ve na oshinakuwanifwa she likalekelwa shilipi?

¹³ Ngaashi Jesus, ovanhu 144 000 otava ka ninga eehamba novapristeri. (Eh. 5:10) Koshi yOmhango yaMoses, ovapristeri ova li unene hava fi oshisho, opo oshiwana shi kale shi na oukolele wopalutu nowopamhepo. Omhango oya li “omudidimbe woinima iwa oyo tai ke uya.” Onghee oshi li pandunge okufika pexulifodiladilo kutya ovo tava ka pangela pamwe naJesus otava ka kwafela mokufila oshisho oshiwana shaKalunga palutu noku shi ehenifa popepi naYe. (Heb. 10:1) Paife katu shi shii nghee eehamba novapristeri tava ka kwatafana novapangelwa vOuhamba, ovo tava ka kala kombada yedu. Kashi na nee mbudi kutya Jehova ota ka unganeka oinima ngahelipi, otu na elineekelo kutya mOparadisa oyo tai uya, ovo tava ka kala kombada yedu otava ka mona ewiliko olo va pumbwa. — Eh. 21:3, 4.

14. Ekwatafano lilipi li li pokati ‘keedi dimwe’ nosho yo ovamwaxe vaKristus?

¹⁴ Jesus okwa popya ovo tava ka pangela pamwe naye ve li ‘okangudu kanini.’ (Luk. 12:32) Okwa popya yo ongudu onhivali i li “eedi dimwe.” Eengudu odo dopavali oda ninga oshiunda shimwe. (Joh. 10:16) Eengudu odo ohadi longele kumwe nale, notadi ka twikila, eshi edu tali ka ninga Oparadisa. Opo nee ovo ‘vokangudu kanini’ otava ka ya meulu, ‘needi dimwe’ otadi ka kala di na eteelelo lokuhafela onghalamwenyo kombada yedu fiyo alushe. Ndele ope na oinima imwe oyo “eedi dimwe” da pumbwa okuninga paife, opo di kale da wana okukala mOparadisa.

15. (a) “Eedi dimwe” ohadi longele kumwe ngahelipi novamwaxe vaKristus? (b) Ongahelipi to dulu okushikula oshihopaenenwa shomumwatate oo e li mofitola? (Tala efano.)

¹⁵ Omukolokoshi, oo e livela ombedi, okwa fya ina mona omhito yokuulika olupandu laasho Kristus e mu ningila. Mepingafano naasho, “eedi dimwe” odi na eemhito dihapu paife dokuulika nghee di uditile Jesus. Pashihopaenenwa, ohatu ulike kutya otu mu hole okupitila monghedi omo hatu ungaunga novamwaxe ovavaekwa. Jesus okwa popya kutya ota ka tokola eedi pakanghameno olo. (Mat. 25:31-40) Ohatu dulu okuyambidida ovamwaxe vaKristus moku va kwafela noudiinini moilonga yokuudifa nokuninga ovanhu ovahongwa. (Mat. 28:18-20) Nomolwaasho twa hala okukala hatu longifa noukeka oilongifo oyo twa pewa tu longife ngeenge hatu ningi omakonakonombiibeli, ngaashi embo Nghee to dulu okuhafela onghalamwenyo fiyo alushe! Ngeenge iho konakona Ombiibeli naumwe fiyo opapa, omolwashike ito shi ningi elalakano loye u konakone Ombiibeli navahapu ngaashi tashi dulika?

16. Oshike hatu dulu okuninga paife, opo tu lilongekide okukala ovapangelwa vOuhamba waKalunga?

¹⁶ Inatu pumbwa okuteelela fiyo osheshi twa ya mOparadisa, opo tu ninge ovanhu ovo Jehova a hala va ka kale mo. Ohatu dulu okulihonga okukala ovanashili paife meendjovo detu, meenghatu nokukala tu na ondjele. Ohatu dulu okukala ovadiinini kuJehova, kookaume ketu kopahombo nokOvakriste vakwetu. Ngeenge  otwa kala hatu dulika filufilu komifikamhango daKalunga ofimbo tu li mounyuni ou woukolokoshi, otashi ka kala shipu kufye oku ka kala mOparadisa. Ohatu dulu yo okukulika ounghulungu nosho yo omaukwatya, opo tu ulike kutya otwe lilongekida oku ka kala mo. Tala oshitukulwa moshifo eshi “Mbela owe lilongekida ngoo oku ka ‘fyuulula edu’?”

17. Mbela otu na okukala twa teka omukumo omolwomanyono etu omonakudiwa? Shi yelifa.

¹⁷ Otu na yo okukendabala okweefa po okukala tu udite ondjo omolwomanyono etu a kwata moiti omonakudiwa. Oshoshili kutya katu na okutala ko ekuliloyambo li li omhito ‘yokunyonena owina.’ (Heb. 10:26-31) Ashike ohatu dulu okukala noushili kutya ngeenge otwe livele ombedi omolwenyono letu la kwata moiti, hatu kongo ekwafo kuJehova nokulundulula elihumbato letu, ote ke tu dimina po filufilu. (Jes. 55:7; Oil. 3:19) Dimbuluka eendjovo daJesus odo a li a lombwela Ovafarisai a ti: “Ame inandi endela ovayuki, ndele ovalunde.” (Mat. 9:13) Ekuliloyambo oli na eenghono dokutuvika omatimba etu aeshe.

18. Oto ka kala wa hala okupopya kombinga yashike nomukolokoshi, oo a li a valelwa pamwe naJesus?

¹⁸ Mbela oto dulu okufaneka momadiladilo u li mOparadisa to popi nomukolokoshi, oo a li a popya naJesus? Nopehe na omalimbililo, amushe otamu ka ulika nghee mwa pandula ekuliloyambo laJesus. Otashi dulika u ke mu pule e ku kufile ko shi na sha naasho sha li sha ningwa po meevili daxuuninwa donghalamwenyo yaJesus kombada yedu, nanghee Jesus e mu nyamukula. Shikwao vali, otashi dulika e ke ku pule kutya onghalamwenyo oya li ya tya ngahelipi momafiku axuuninwa mounyuni waSatana. Itashi ka kala tuu oufembanghenda okukonakona Eendjovo daKalunga novanhu ovo va fa omulumenhu oo! — Ef. 4:22-24.

19. Omolwashike onghalamwenyo mOparadisa itai ka kala ififa oudja nandenande? (Tala efano lokombada.)

¹⁹ Onghalamwenyo mOparadisa itai ka kala ififa oudja nandenande. Ohatu ka shakeneka alushe ovanhu va hokwifa nohatu ka longa oilonga tai ti sha. Naasho sha denga mbada, efiku keshe ohatu ka enda hatu shiiva nawa Tate yetu womeulu nokuhafela omafiloshisho aye. Ohatu ka kala tu na shihapu osho tu na okulihonga kombinga yaye nosho yo kombinga yeshito laye. Ngeenge otwa ka kala ko efimbo lile, ohole yetu yokuhola Kalunga otai ka enda tai ningi yomoule. Otwa pandula unene, eshi Jehova naJesus ve tu udanekela kutya ohatu dulu okukala fiyo alushe mOparadisa.