1. Jesus okwa lombwela ovahongwa vaye shike shi na sha nexulilo, nokwe va pa elondwelo lilipi?

 OMAFIKU manini ofimbo Jesus ina fya, ovahongwa vaye vane ove mu pula va ti: ‘Oshike tashi ka kala edidiliko lomafiku axuuninwa ounyuni ou?’ (Mat. 24:3) Ovahongwa ovo otashi dulika va li tava pula nghee va li tava ka didilika mo kutya onaini Jerusalem notembeli yasho tai ka hanaunwa po. Eshi Jesus e va nyamukula, ina popya ashike shi na sha nexulilo laJerusalem notembeli yasho, ndele okwe va lombwela yo shi na sha ‘nomafiku axuuninwa ounyuni ou,’ omo tu li paife. Shi na sha nefimbo lexulilo, Jesus okwa ti: “Ndele shi na sha nefiku olo novili, kape na nande oumwe e i shii, kutya nee ovaengeli vomeulu ile Omona, ndele oTate aeke.” Opo nee okwa londwela ovahongwa vaye aveshe va ‘kale oupafi.’ — Mark. 13:32-37.

2. Omolwashike sha li sha fimana kOvakriste vopefimbo lovayapostoli va kale oupafi?

² Ovakriste Ovajuda vopefimbo lovayapostoli ova li ve na okukala oupafi, opo va xupife eemwenyo davo. Jesus okwa li a lombwela ovashikuli vaye osho ve na okutala kusho, opo va mone kutya Jerusalem notembeli yasho oi li pokuhanaunwa po. Okwa ti: “Ngeenge omwa mono Jerusalem sha kondekwa ketangakwaita, opo nee shiiveni kutya ehanauno lasho ola ehena popepi.” Pefimbo opo, ova li ve na okudulika kelondwelo laJesus ‘nokuya onhapo keemhunda.’ (Luk. 21:20, 21) Ovo va li va dulika kelondwelo olo ova li va xupa, eshi Ovaroma va li va hanauna po Jerusalem.

3. Oshike hatu ka kundafana moshitukulwa eshi?

 ³ Kunena, otu li pefimbo lexulilo lounyuni ou. Onghee nafye otwa pumbwa okukala ovanaendunge notu li oupafi. Moshitukulwa eshi, ohatu ka kundafana nghee hatu dulu okukala tu na ondjele, eshi hatu tale oiningwanima younyuni. Ohatu ka kundafana yo nghee hatu dulu okulipashukila fye vene nosho yo nghee hatu dulu okulongifa nawa efimbo olo la xupa ko.

4. Omolwashike tu na okukala tu na ohokwe mokutala nghee oiningwanima oyo tai ningwa mounyuni paife tai wanifa po omaxunganeko Ombiibeli?

⁴ Otu na omatomheno mawa kutya omolwashike tu na okukala tu na ohokwe mokutala nghee oiningwanima oyo tai ningwa mounyuni paife tai wanifa po omaxunganeko Ombiibeli. Pashihopaenenwa, Jesus okwa popya omusholondodo woiningwanima yokondadalunde, opo e tu kwafele tu shiive kutya onaini exulilo lounyuni waSatana tali ehene popepi. (Mat. 24:3-14) Omuyapostoli Petrus okwe tu ladipika tu yandje elitulemo kewanifo lomaxunganeko, opo eitavelo letu li kale la kola. (2 Pet. 1:19-21) Embo laxuuninwa lOmbiibeli ola hovela neendjovo tadi ti: “Eli ehololo olo Jesus Kristus a pewa kuKalunga, opo a ulikile ovapiya vaye oinima oyo tai ka ningwa diva.” (Eh. 1:1) Onghee otwa pumbwa okukala tu na ohokwe filufilu moiningwanima oyo tai ningwa paife mounyuni nokushiiva nghee tai wanifa po omaxunganeko Ombiibeli. Otashi dulika yo twa halelela okukundafana oiningwanima oyo novanhu vakwetu.

5. Oshike tu na okuhenuka, noshike tu na okuninga? (Tala yo omafano.)

⁵ Ngeenge hatu kundafana exunganeko lOmbiibeli, otu na okuhenuka okutengeneka kutya oshike tashi ka ningwa po. Omolwashike mbela? Omolwaashi inatu hala okupopya sha osho tashi dulu okunyona po oukumwe weongalo. Pashihopaenenwa, otashi dulika tu ude ovawiliki vomounyuni tava popi kombinga yokukandula po eenhamanana donhumba nokweeta ombili neameno. Ponhele yokutengeneka kutya osho otashi wanifa po exunganeko olo tali hangwa mo 1 Ovatessalonika 5:3, otwa pumbwa okweendela pamwe nouyelele u li pefimbo. Ngeenge otwa kanghamekele eenghundafana detu kouyelele, oo wa nyanyangidwa kehangano laJehova, ohatu ka kaleka eongalo la hangana noli na “etaleko la faafana.” — 1 Kor. 1:10; 4:6.

6. Oilihongomwa ilipi hatu lihongo mu 2 Petrus 3:11-13?

⁶ Lesha 2 Petrus 3:11-13. Omuyapostoli Petrus ote tu kwafele tu kale tu na etaleko li li pandjele, ngeenge tashi uya pomaxunganeko Ombiibeli. Okwe tu lombwela tu ‘kaleke momadiladilo efiku laJehova.’ Omolwashike? Hamolwaashi twa hala okushiiva “efiku novili” kutya onaini Jehova ta ka eta Armagedon. Ndele omolwaashi twa hala okulongifa nawa efimbo olo la xupa ko, opo tu kale tu na “elihumbato la koshoka nokulonga oilonga yometilokalunga.” (Mat. 24:36; Luk. 12:40) Oku shi popya noitya imwe, otwa hala okukala nelihumbato liwa nokushilipaleka kutya eenghendabala detu odo hatu ningi, eshi hatu longele Jehova, otadi ulike kutya otu mu hole neenghono. Opo tu yandje elitulemo kwaasho, otwa pumbwa okulipashukila fye vene.

7. Ohatu ulike ngahelipi kutya ohatu lipashukile? (Lukas 21:34)

⁷ Jesus ina lombwela ashike ovahongwa vaye va pashukile oiningwanima yomounyuni, ndele ove lipashukile yo. Oshitwa osho osha yelifwa nawa melondwelo olo li li muLukas 21:34. (Lesha.) Didilika eendjovo daJesus, odo tadi ti: “Lipashukileni.” Omunhu oo he lipashukile  oha lungamene oiponga oyo tai dulu okunyona po ekwatafano laye naJehova, noha katuka eenghatu e i henuke. Kungaho, oha kala e holike kuKalunga. — Omayel. 22:3; Jud. 20, 21.

8. Omuyapostoli Paulus okwa pa Ovakriste elondwelo lilipi?

⁸ Omuyapostoli Paulus okwa londwela Ovakriste ve lipashukile. Pashihopaenenwa, okwa lombwela Ovakriste vomuEfeso, a ti: “Pashukileni eenghatu deni muha ende ngaashi omalai, ndele ongaashi ovanaendunge.” (Ef. 5:15, 16) Satana ota twikile okukendabala okunyona po ekwatafano letu naJehova. Onghee Ombiibeli oye tu pa omayele tu ‘kale hatu konakona kutya ehalo laJehova olilipi,’ opo tu dule okuliamena komaponokelo aeshe aSatana. — Ef. 5:17.

9. Ongahelipi hatu dulu okushiiva ehalo laJehova li na sha nafye?

⁹ Ombiibeli inai tu lombwela oiponga aishe oyo tai dulu okunyona po ekwatafano letu naJehova. Luhapu, ohatu ningi omatokolo moinima oyo inai popiwa odikilila mOmishangwa. Opo tu ninge omatokolo opandunge, otwa pumbwa okushiiva “ehalo laJehova.” Ohatu dulu okuninga ngaho mokukala hatu konakona Eendjovo daKalunga pandjikilile nokudilonga kudo. Ngeenge otwa udu ko ehalo laJehova nokukendabala okukala tu na “omadiladilo aKristus,” ohatu ka enda ‘ngaashi ovanaendunge,’ nokuli nonande katu na eemhango dokondadalunde odo tadi wilike eenghatu detu. (1 Kor. 2:14-16) Oiponga imwe oshipu oku i didilika mo, ashike imwe oyomonanguwi.

10. Eenghalo dimwe da nyika oshiponga dilipi tu na okuhenuka?

¹⁰ Eenghalo dimwe da nyika oshiponga odo tu na okuhenuka ongaashi okulihumbatela vamwe monghedi tai kokele momilele, okunwa nokulya sha pitilila, okupopya eendjovo tadi yahameke vamwe, okutala omalihafifo a kwatela mo elongifo leenghono, okutala omafano oipala naikwao ya yukila oko. (Eps. 101:3) Omutondi wetu, Ondiaboli, ota twikile okukonga eemhito, opo a nyone po ekwatafano letu naJehova. (1 Pet. 5:8) Ngeenge katu li oupafi, Satana ota dulu okukuna momadiladilo etu nomomitima detu oinima ngaashi ondubo, okuhakala ovanashili, olwisho, outondwe, ounhwa nonghone. (Gal. 5:19-21) Potete, otashi dulika tu diladile kutya omaliudo a tya ngaho inaa nyika oshiponga. Ashike ngeenge inatu katuka onghatu meendelelo tu a dude mo, otaa ka twikila okukula ngaashi oshimeno shi na oudiyo, nokweetifa oupyakadi. — Jak. 1:14, 15.

11. Onghalo imwe yomonanguwi ya nyika oshiponga ilipi tu na okuhenuka, nomolwashike?

¹¹ Onghalo imwe yomonanguwi ya nyika oshiponga, eendafano lii. Natu ka taleni konghalo ei. Natu tye nee ngeno oho longo naumwe oo ehe fi Ondombwedi yaJehova. Owa hala omunailonga pamwe naave a kale e na etaleko liwa li na sha nEendombwedi daJehova, onghee oho ungaunga naye nolukeno noho mu kwafele. Otashi dulika yo u dimine okukala ho li pamwe naye omusha omafimbo amwe. Nomefimbo lixupi owa kala ho shi ningi pandjikilile. Omafimbo amwe, oha eta po eenghundafana inadi koshoka, odo pehovelo wa kendabala okuhenuka. Ndele lwanima, owa ka ikilila eenghundafana da tya ngaho noinadi kala vali hadi ku udifa nai. Opo nee efiku limwe, omunailonga pamwe naave okwe ku shiva mu ka nwe pamwe naye konima yoilonga, nowa dimina. Mokweendela ko kwefimbo, owa hovela okudiladila ngaashi ye. Itashi pula efimbo lile okuhovela okukala ho ningi oinima oyo ha ningi. Oshoshili kutya otu na olukeno notwa fimaneka ovanhu aveshe, ashike otu na okudimbuluka kutya ohatu ka nwefwa mo neenghono kwaavo hatu kala navo. (1 Kor. 15:33) Ngeenge otwa kala hatu lipashukile ngaashi Jesus e tu lombwela tu ninge, ohatu ka henuka eendafano inali pumbiwa naavo ihava kala metwokumwe  nomifikamhango daJehova. (2 Kor. 6:15) Ohatu ka mona oshiponga, ndele hatu shi henuka.

12. Ovahongwa vaJesus ova li ve na okuninga shike, ofimbo va li va teelela exulilo lounyuni?

¹² Jesus okwa li a hala ovahongwa vaye va kale ve lipyakidila, ofimbo va teelela exulilo lounyuni li uye. Jesus okwa li e va pa oilonga oyo ve na okulonga. Okwe va lombwela va udife onghundana iwa “muJerusalem, muJudea nomuSamaria ashishe nosho yo kombada yedu alishe.” (Oil. 1:6-8) Ovashikuli vaJesus kava li tuu va pewa oshinakuwanifwa shinene! Ova li ve na okulongifa nawa efimbo lavo mokuninga ngaashi tava dulu, opo va udifile ovanhu vakwao.

13. Omolwashike twa pumbwa okulongifa nawa efimbo letu? (Ovakolossi 4:5)

¹³ Lesha Ovakolossi 4:5. Opo tu lipashukile, otwa pumbwa okudiladila kunghee hatu longifa efimbo letu. “Oiningwanima yombadilila” otai dulu okukuma keshe umwe womufye. (Omuud. 9:11, NWT) Ohatu dulu okufya ombadilila.

14-15. Ongahelipi hatu dulu okulongifa nawa efimbo letu? (Ovaheberi 6:11, 12) (Tala yo efano.)

¹⁴ Ohatu dulu okulongifa nawa efimbo letu mokulonga ehalo laJehova nomokupameka ekwatafano letu naye. (Joh. 14:21) Otwa pumbwa ‘okukala twa pama, ihatu tengauka nokukala alushe hatu longo shihapu moilonga yOmwene.’ (1 Kor. 15:58) Opo nee ngeenge  exulilo ole uya, kutya nee olonghalamwenyo yetu, ile olounyuni ou woukolokoshi, itatu ke lipa oushima. — Mat. 24:13; Rom. 14:8.

¹⁵ Kunena, Jesus ota twikile okuwilika ovahongwa vaye, eshi tava udifa kombinga yOuhamba waKalunga kombada yedu alishe. Okwa wanifa po eudaneko laye. Jesus ohe tu deula okupitila mehangano laJehova nghee tu na okuudifa nokwe tu pa oilongifo aishe oyo twa pumbwa, opo tu tandaveleke onghundana iwa. (Mat. 28:18-20) Ohatu ningi osho Jesus a teelela tu ninge, eshi hatu longo noudiinini tu udifile ovanhu vakwetu noku va honga, nohatu kala oupafi ofimbo twa teelela Jehova a ete exulilo lounyuni ou. Ngeenge otwa tula moilonga omayele oo e li mOvaheberi 6:11, 12, ohatu ka kala tu na eteelelo “fiyo okexulilo.” — Lesha.

16. Otwa tokola toko okuninga shike?

¹⁶ Jehova okwa tula po efiku novili yokondadalunde, eshi ta ka xulifa po ounyuni waSatana. Ngeenge efiku olo ola fiki, Jehova ota ka wanifa po omaxunganeko oo a shanga mEendjovo daye. Ndele omafimbo amwe, otashi dulika tu diladile kutya exulilo lounyuni itali uya diva. Ashike efiku laJehova “itali kala ko.” (Hab. 2:3) Onghee natu kaleni twa tokola toko ‘okulyaamena omesho etu kOmwene,’ hatu ulike kutya ‘otwa teelela Kalunga kexupifo letu.’ — Mika 7:7.