OSHITUKULWA SHOKUKONAKONWA 4
Jehova oha nangeke noupuna eenghendabala detu, opo tu kale pEdimbuluko
“Kaleni hamu shi ningi okudimbuluka nge.” — LUK. 22:19.
EIMBILO 19 Ouvalelo wOmwene
EXUKU LOSHITUKULWA a
1-2. Omolwashike hatu kala pEdimbuluko omudo keshe?
HANGA omido 2 000 da pita, Jesus okwa yandja omwenyo waye omolwetu, naasho oshe shi ningifa tashi shiiva, opo tu dule oku ka mona omwenyo waalushe. Oufiku oo wa tetekela efyo laye, Jesus okwa lombwela ovashikuli vaye va kale hava dimbuluka onghatu yaye yopahole mokukala hava dana oshivilo shi li paunafangwa sha kwatela mo omungome nomaviinyu. — 1 Kor. 11:23-26.
2 Ohatu dulika kelombwelo laJesus, molwaashi otu mu hole neenghono. (Joh. 14:15) Omudo keshe, pefimbo lEdimbuluko, ohatu ulike olupandu li na sha naasho e tu ningila mokukonga efimbo tu dilonge pamwe neilikano keityo lefyo laye. Ohatu kufa yo ombinga moukalele nehafo, opo tu shive vahapu ngaashi tashi shiiva ve tu waimine poshiningwanima osho she likalekelwa. Oshoshili kutya otwa tokola toko tuha efe nande osha shi tu imbe okukala pEdimbuluko.
3. Oshike hatu ka kundafana moshitukulwa eshi?
3 Moshitukulwa eshi, ohatu ka kundafana eenghedi dopatatu omo ovapiya vaJehova va ninga ngaashi tava dulu, opo va dane efyo laJesus: (1) mokudana Edimbuluko monghedi oyo Jesus e va honga, (2) mokushiva vamwe ve uye kEdimbuluko nosho yo (3) mokukala pEdimbuluko, nonande ova taalela eenghalo didjuu.
OKUDANA EDIMBULUKO MONGHEDI OYO JESUS A HONGA
4. Oshili ilipi hai divilikwa omudo keshe pEdimbuluko, nomolwashike tuhe na oku i kwata okahetengi? (Lukas 22:19, 20)
4 Omudo keshe pEdimbuluko, ohatu pwilikine koshipopiwa sha kanghamena kOmbiibeli osho hashi nyamukula omapulo mahapu. Ohatu lihongo kutya omolwashike ovanhu va pumbwa ekuliloyambo, nonokutya ongahelipi efyo lomunhu umwe tali dulu okufutila po omanyono avahapu. Ohatu dimbulukifwa kutya omungome nomaviinyu otai faneke shike, nonokutya olyelye e na okukufa ombinga mokulya nokunwa. (Lesha Lukas 22:19, 20.) Ohatu dilonga yo komanangeko noupuna omonakwiiwa, oo taa ka pewa ovo ve na eteelelo loku ka kala kombada yedu fiyo alushe. (Jes. 35:5, 6; 65:17, 21-23) Inatu pumbwa okukwata oshili ya tya ngaho okahetengi. Ovanhu omabiliyona kave i udite ko, nokave udite ko ongushu yekuliloyambo laJesus. Ihava dana yo Edimbuluko lefyo laJesus metwokumwe nonghedi oyo a tula po. Omolwashike shi li ngaho?
5. Oshike sha li sha ningwa po shi na sha nonghedi oyo Jesus a tula po, konima eshi ovayapostoli vahapu va fya?
5 Diva konima eshi ovayapostoli vahapu va fya, meongalo omwa li mwe li teyela Ovakriste ovanaipupulu. (Mat. 13:24-27, 37-39) Ova li va popya ‘oinima inai yuka nova hongolola ovahongwa ve va shikule.’ (Oil. 20:29, 30) Ovakriste ovo ovanaipupulu, ova li va hovela okuhonga shimwe ‘shomoinima oyo inai yuka,’ kutya Jesus ina yandja olutu laye “lumwe aluke, opo a dime po omatimba avahapu” ngaashi Ombiibeli ya popya. Ashike ekuliloyambo laye oli na okuningwa lwoikando noikando. (Heb. 9:27, 28) Kunena, ovanamitimadiwa vahapu ova itavela ehongo la tya ngaho loipupulu. Ohava ongala meengeleka pandjikilile, nomafimbo amwe efiku keshe, opo va dane osho hashi ifanwa “emisha liyapuki.” b Omalongelokalunga amwe ihaa dana luhapu efyo laJesus, ashike oilyo yao kai udite ko filufilu eityo lekuliloyambo laJesus. Vamwe ohave lipula kutya, ‘Mbela omatimba ange otaa dulu ngoo okudimwa po shili omolwefyo laJesus?’ Omolwashike hava pula epulo olo? Peemhito dimwe, ova nwefwa mo kwaavo va limbililwa kutya ekuliloyambo laJesus olo le shi ninga tashi shiiva, opo omatimba a dimwe po. Ongahelipi ovashikuli vashili vaJesus va li va kwafela ovanhu va ude ko eityo lekuliloyambo nosho yo onghedi ya yuka omo efyo laye li na okudanwa?
6. Mo 1872, ongudu yOvakonakoni vOmbiibeli oya li ya fika pexulifodiladilo lilipi?
6 Pexulilo lefelemudo eti-19, ongudu yOvakonakoni vOmbiibeli, oyo ya li tai kwatelwa komesho kuCharles Taze Russell, oya li ya hovela okukonakona moule Omishangwa. Ova li va hala okushiiva oshili i na sha nongushu yekuliloyambo laJesus nanghee efyo laye li na okudimbulukiwa. Mo 1872, ova li va fika pexulifodiladilo la kanghamena kOmbiibeli kutya Jesus okwa yandja ekuliloyambo omolwovanhu aveshe. Kava li va tuvikila oshili oyo ve lihonga. Ponhele yaasho, ova li ve i tandaveleka okupitila momambo, moifokundaneki nosho yo moifo. Diva konima yaasho, ova li va hovela okukala hava ongala lumwe momudo, opo va dane Edimbuluko, tava hopaenene Ovakriste votete.
7. Ohatu mono ouwa ngahelipi momapekapeko, oo a ningwa kOvakonakoni vOmbiibeli vonale?
7 Kunena, ohatu mono ouwa momapekapeko Ovakriste ovo ovanashili, oo a ningwa omido dihapu da ka lupuka. Ngahelipi mbela? Jehova okwe tu kwafela tu ude ko eityo lekuliloyambo laJesus nosho yo osho tali ka wanifa po. (1 Joh. 2:1, 2) Otwe lihonga yo kutya Ombiibeli oye tu yelifila kombinga yomateelelo opavali e na sha novanhu ovo hava hafifa Kalunga. Vamwe otava ka kala nomwenyo ihau fi meulu, ofimbo ovanhu omamiliyona tava ka kala nomwenyo waalushe kombada yedu. Ohatu ehene popepi elela naJehova, eshi hatu lihongo nghee e tu hole nonghee hatu dulu okumona ouwa pauhandimwe mekuliloyambo laJesus. (1 Pet. 3:18; 1 Joh. 4:9) Onghee hano, ngaashi ovamwatate vonale ovadiinini, ohatu shivi vamwe ve tu waimine pEdimbuluko olo hali ningwa metwokumwe nonghedi oyo ya tulwa po kuJesus.
OHATU SHIVI OVANHU KEDIMBULUKO
Oshike to dulu okuninga, opo u kufe ombinga pauyadi moshikonga shokushiva ovanhu kEdimbuluko? (Tala okatendo 8-10) e
8. Oshiwana shaJehova osha li sha ninga shike, opo shi shive ovanhu kEdimbuluko? (Tala efano.)
8 Oshiwana shaJehova osha kala hashi shivi ovanhu kEdimbuluko omido dihapu. Pehovelo lo 1881, ovamwatate novamwameme mo-United States, ova li va shivwa va ongale pamwe meumbo limwe li li moAllegheny, moPennsylvania, opo va dane oshiningwanima osho she likalekelwa. Lwanima, eongalo keshe ola li la dana Edimbuluko. MuMarsa 1940, ovaudifi ova li va lombwelwa kutya otava dulu okushiva keshe oo tava shakeneke moukalele e na ohokwe. Mo 1960, eongalo keshe ola li la tuminwa oufo veshivo oshikando shotete okudja kObetel. Okudja opo, opa kala hapa yandjwa oufo vokushiva ovanhu kEdimbuluko omabiliyona. Omolwashike hatu longifa efimbo lihapu nosho yo eenghono mokushiva ovanhu?
9-10. Oolyelye hava mono ouwa meenghendabala detu dokushiva ovanhu kEdimbuluko? (Johannes 3:16)
9 Etomheno limwe kutya omolwashike hatu shivi vamwe ve uye kEdimbuluko, ololo kutya otwa hala ovo tava ka kala po oshikando shotete ve lihonge oshili i na sha naasho Jehova naJesus ve tu ningila. (Lesha Johannes 3:16.) Otu na elineekelo kutya osho tava ka mona nokuuda pEdimbuluko otashi ke ve linyengifa ve lihonge shihapu nova ninge ovapiya vaJehova. Ashike ovanhu vamwe navo ohava mono ouwa.
10 Ohatu shivi yo ovo ihava longele vali Jehova. Ohatu ningi ngaho, opo tu va dimbulukife kutya Kalunga oku va hole natango. Vahapu ohava tambula ko eshivo letu nohatu kala twa hafa neenghono oku va mona. Okukala pEdimbuluko ohaku va dimbulukifa nghee va li hava hafele okulongela Jehova monakudiwa. Natu ka taleni koshihopaenenwa shaMonica. c Okwa li a ninga natango omuudifi e lipyakidila pefimbo lomukifi wekomba wo-COVID-19. Konima yEdimbuluko lomo 2021, okwa ti: “Edimbuluko eli ola li oshinima she likalekelwa kwaame. Onda li nda dula okuudifila ovanhu nosho yo oku va shiva kEdimbuluko oshikando shotete konima yomido 20. Onda ninga ngaashi handi dulu ndi shive vamwe, molwaashi onda pandula neenghono kwaashishe osho Jehova naJesus va ningila nge.” (Eps. 103:1-4) Kashi na nee mbudi kutya ovanhu otava ka tambula ko eshivo letu, ile hasho, ohatu shivi vamwe nouladi kEdimbuluko tu shii kutya Jehova okwa lenga eenghendabala detu.
11. Ongahelipi Jehova a nangeka noupuna eenghendabala detu dokushiva ovanhu kEdimbuluko? (Haggai 2:7)
11 Jehova okwa nangeka noupuna neenghono eenghendabala detu dokushiva ovanhu kEdimbuluko. Mo 2021, nonande opa li omangabeko oo a etifwa komukifi wekomba wo-COVID-19, pEdimbuluko opa li ovanhu 21 367 603. Omuvalu oo ou dulife omuvalu wEendombwedi daJehova mounyuni aushe hanga lwomapa avali netata. Oshoshili kutya Jehova iha yandje elitulemo komivalu. Ndele oha yandje elitulemo komunhu keshe pauhandimwe. (Luk. 15:7; 1 Tim. 2:3, 4) Ohatu dulu okukala noushili kutya, eshi hatu shivi vamwe kEdimbuluko, Jehova ohe tu kwafele tu mone ovanamitimadiwa. — Lesha Haggai 2:7.
OHATU KALA PEDIMBULUKO, NONANDE OTWA TAALELA EENGHALO DIDJUU
Jehova oha nangeke noupuna eenghendabala detu odo hatu ningi, opo tu kale pEdimbuluko (Tala okatendo 12) f
12. Eenghalo dilipi tadi dulu oku shi ningifa shidjuu kufye okukala pEdimbuluko? (Tala efano.)
12 Jesus okwa xunganeka kutya momafiku axuuninwa ohatu ka taalela eenghalo dihapu didjuu ngaashi okupatanekwa kovapambele, omahepeko, oita, omikifi dolutapo naikwao ihapu. (Mat. 10:36; Mark. 13:9; Luk. 21:10, 11) Omafimbo amwe, eenghalo odo ohadi shi ningifa shidjuu kufye okudana Edimbuluko lefyo laJesus. Ovamwatate novamwameme ova ninga po shike, opo va finde omashongo a tya ngaho, nongahelipi Jehova e va kwafela?
13. Ongahelipi Jehova a nangeka noupuna ouladi nosho yo etokolo laArtem lokuninga Edimbuluko, eshi a li modolongo?
13 Okutulwa modolongo. Ovamwatate, ovo va tulwa modolongo omolweitavelo lavo, ohava ningi ngaashi tava dulu, opo va dane Edimbuluko lefyo laJesus. Natu ka taleni koshihopaenenwa shaArtem. PEdimbuluko lomo 2020, okwa li a tulwa modolongo mokanduda kounene weemeta 3,3 nosho yo oule weemeta 5,2, omo va li mo ve li vatano. Nonande okwa li a tulwa modolongo, okwa li a dula okulikongela oinima oyo a li ta ka longifa i li omadidiliko Edimbuluko nokwa li a ninga omhangela e lipe oshipopiwa shEdimbuluko. Ashike ovo a li navo modolongo ova li hava shili omakaya nohava tu kana luhapu. Okwa li a ninga po shike? Okwa li e va pula vaha tukane novaha shile omakaya oule ashike wovili imwe. Nonande Artem ka li e shi teelela, ovanadolongo vakwao ova li va dimina vaha shile omakaya, ile vaha tukane pefimbo lEdimbuluko. Artem okwa popya a ti: “Onda li nda tokola oku va lombwela shi na sha nEdimbuluko.” Nonande ova li va popya kutya inava hala okuuda kombinga yoshiningwanima osho, konima eshi va mona nova uda Artem ta ningi Edimbuluko, ova li ve mu pula kombinga yalo.
14. Eenghendabala dilipi da li da ningwa po, opo ku danwe Edimbuluko, nonande opa li omukifi wekomba wo-COVID-19?
14 Omukifi wekomba wo-COVID-19. Eshi omukifi wekomba wa tukuka, oshiwana shaJehova kasha li sha dula okukala pEdimbuluko komudidi. Ashike osho inashi va imba va dane Edimbuluko. d Omaongalo oo e na ointaneta okwa li a dula okuninga Edimbuluko pavidio. Ndele ongahelipi shi na sha novanhu omamiliyona ovo vehe na ointaneta? Moilongo imwe, omwa li mwa ningwa omalongekido, opo oshipopiwa shi yandjwe okupitila mo-TV, ile moradio. Shikwao vali, oitaimbelewa oya li ya kwata oshipopiwa momalaka a konda 500, opo nokuli naavo ve li koitukulwa ye likalela va dule okudana Edimbuluko. Opa li yo pa ningwa omalongekido, opo ovamwatate ovadiinini va twale oshipopiwa osho sha kwatwa momawi kwaavo ve shi pumbwa.
15. Oshike hatu lihongo koshihopaenenwa shomukonakonimbiibeli wedina Sue?
15 Omapataneko okudilila kovapambele. Eyeleko limwe linene, olo vahapu va li va taalela pefimbo lEdimbuluko, omapataneko okudilila kovapambele. Natu ka kundafaneni oshihopaenenwa shomukonakonimbiibeli wedina Sue. Mo 2021, efiku olo la tetekela Edimbuluko, Sue okwa li a lombwela oo ha konakona naye Ombiibeli kutya ita ka dula okukala pEdimbuluko, molwaashi oha patanekwa kovaneumbo lavo. Oo ha konakona naye Ombiibeli okwa li a lesha Lukas 22:44. Opo nee okwe mu yelifila kutya ngeenge twa taalela omaudjuu, otu na okushikula oshihopaenenwa shaJesus shokwiilikana kuJehova nokukala twe mu lineekela filufilu. Efiku la landula ko, Sue okwa li a longekida omadidiliko e na sha nEdimbuluko nokwa li a tala Eenghundafana domushangwa wefiku we likalekelwa ko jw.org. Oufiku oo, ofimbo a li oye aeke monduda yaye, okwa li a denga ongodi, opo a kale pEdimbuluko. Lwanima, Sue okwa ka shangela oo ha konakona naye Ombiibeli, a ti: “Owa twa nge omukumo neenghono onghela. Onda ninga keshe osho hadi dulu, opo ndi kale pEdimbuluko, na Jehova okwa kwafela nge shili. Kandi na oitya nomatumbulo okuulika nghee nda hafa nonda pandula!” Mbela naave oto diladila kutya Jehova ota dulu oku ku kwafela, ngeenge wa taalela onghalo ya faafana?
16. Omolwashike twa pumbwa okukala tu na elineekelo kutya Jehova ota ka nangeka noupuna eenghendabala detu odo hatu ningi, opo tu kale pEdimbuluko? (Ovaroma 8:31, 32)
16 Jehova okwa lenga neenghono eenghendabala detu odo hatu ningi, opo tu kale pEdimbuluko lefyo laJesus. Ohatu dulu okukala noushili kutya ote ke tu nangeka noupuna, ngeenge hatu ulike olupandu letu li na sha naasho e tu ningila. (Lesha Ovaroma 8:31, 32.) Onghee hano, natu kaleni twa tokola toko okukala pEdimbuluko omudo ou nokuninga ngaashi hatu dulu, opo tu kufe ombinga momalipyakidilo opamhepo pefimbo lEdimbuluko.
EIMBILO 18 Otwa pandula omolwekuliloyambo
a MEtivali lomafiku 4 Aprili 2023, ovanhu omamiliyona mounyuni aushe otava ka dana Edimbuluko lefyo laKristus. Vahapu vomuvo otava ka kala po oshikando shavo shotete. Vamwe, ovo va efa po okulongela Jehova noinava kala hava dana Edimbuluko oule womido dihapu, navo opo tava ka kala. Vamwe otava ka finda omandangalati, opo va dule okukala po. Kashi na nee mbudi kutya eenghalo doye oda tya ngahelipi, oto dulu okukala noushili kutya Jehova ota ka kala a hafa, eshi to ningi eenghendabala u kale po.
b Oilyo yelongelokalunga oya itavela kutya pefimbo la tya ngaho, omungome nosho yo omaviinyu ohai lundulukile molutu nomohonde yaKristus. Ohava diladila kutya olutu nohonde yaJesus ohai yambwa efimbo keshe omunhu ta kufa ombinga mokunwa nokulya.
c Omadina oo hao ovanhu ovo lelalela.
d Tala yo oitukulwa yOshiingilisha ko jw.org i na oshipalanyole “2021 Memorial Commemoration.”
