1-2. (a) Omaliudo elipi hatu kala tu na, ngeenge hatu diladila konghalamwenyo nokoukalele waJesus? (b) Ohatu ka kundafana shike moshitukulwa eshi?

 NGEENGE twa filwa umwe oo tu hole, ohatu kala twe mu djuulukwa neenghono. Potete, otashi dulika tu kale twa nyika oluhodi, ngeenge hatu diladila komafiku oo a tetekela efyo laye, unene tuu ngeenge okwa li ta mono oixuna, ofimbo ina fya. Ndele mokweendela ko kwefimbo, otashi dulika tu kale twa hafa, ngeenge hatu diladila kwaasho e tu honga, ile kombinga yaasho e tu ningila noyaasho a popya, opo e tu twe omukumo, ile e tu hafife.

² Sha faafana, ohashi tu nyikifa oluhodi, ngeenge hatu lesha kombinga yokumona oixuna nokufya kwaJesus. Pefimbo lEdimbuluko, ohatu mono omhito yokudiladila kunghee ekuliloyambo laye la fimana. (1 Kor. 11:24, 25) Kakele kaasho, ohatu mono yo ehafo linene mokudiladila koinima aishe oyo Jesus a popya nokwa ninga, eshi a li kombada yedu. Ohashi tu tu yo omukumo ngeenge hatu diladila kombinga yaasho ta ningi paife nosho yo osho te ke tu ningila monakwiiwa. Okudilonga koinima oyo nosho yo kohole yaye yoku tu hola otashi tu linyengifa, opo tu ulike olupandu letu meenghedi tadi longo, ngaashi hatu ke shi mona moshitukulwa eshi.

3. Omatomheno elipi tu na okuulika olupandu omolwekuliloyambo?

³ Ohatu kala twa hafa neenghono, ngeenge hatu diladila konghalamwenyo nosho yo kefyo laJesus. Eshi Jesus a li kombada yedu, okwa li a honga ovanhu kombinga yomanangeko noupuna oo taa ka etwa kOuhamba waKalunga. Otwa pandula neenghono  oshili yOuhamba ya tya ngaho. Otwa pandula yo ekuliloyambo, molwaashi ole tu yeululila omhito yokuhafela ekwatafano lopofingo naJehova nosho yo naJesus. Ovo ve na eitavelo muJesus ove na yo eteelelo loku ka kala nomwenyo fiyo alushe nosho yo loku ka mona vali oonakufya vavo ovaholike. (Joh. 5:28, 29; Rom. 6:23) Omanangeko noupuna a tya ngaho, inatu a longela sha nokatu na fiku tu shunifile Kalunga naKristus omolwaashishe osho ve tu ningila. (Rom. 5:8, 20, 21) Ashike ohatu dulu okuulika kutya otwe va pandula neenghono. Ngahelipi mbela?

4. Maria Magdalena okwa li a ulika ngahelipi olupandu laasho Jesus e mu ningila? (Tala efano.)

⁴ Natu ka taleni koshihopaenenwa shomukainhu Omujuda wedina Maria Magdalena. Okwa li ta mono oixuna neenghono, molwaashi okwa li ta hepekwa keendemoni heyali. Oku na okukala a li e wete kutya kape na oo a li ta dulu oku mu kwafela. Diladila kunghee a li a pandula neenghono, eshi Jesus a li e mu mangulula ko kenwefemo leendemoni odo. Olupandu laye ola li le mu linyengifa a ninge omushikuli waJesus nokwa li a longifa efimbo laye, eenghono nosho yo oiniwe, opo e mu yambidide. (Luk. 8:1-3) Nonande Maria okwa li a pandula osho Jesus a li e mu ningila pauhandimwe, otashi dulika ka li e shii ngeenge ote ke mu ningila shihapu monakwiiwa. Okwa li ta ka yandja omwenyo waye omolwovanhu aveshe, “opo keshe ou te mu itavele” a ka dule okuhafela omwenyo waalushe. (Joh. 3:16) Ashike Maria okwa li a ulika kutya okwa pandula osho Jesus e mu ningila mokukala omudiinini. Eshi Jesus a li ta mono oixuna komuti womahepeko, Maria okwa li ofika popepi naye, molwaashi okwa li e na ko nasha naye nokwa li a hala okuhekeleka ovo va li po. (Joh. 19:25) Konima eshi Jesus a fya, Maria nosho yo ovakainhu vakwao vavali ova li va eta oihemba kombila, opo ve mu longekidile epako. (Mark. 16:1, 2) Maria okwa li a nangekwa noupuna omolwoudiinini waye. Okwa li a hafela oufembanghenda wokushakena nomunyumunwa Jesus nosho yo okupopya naye, osho ovahongwa vahapu vali inava mona omhito yoku shi ninga. — Joh. 20:11-18.

5. Ongahelipi hatu dulu okuulika olupandu letu laashishe osho Jehova naJesus ve tu ningila?

 ⁵ Nafye ohatu dulu okuulika olupandu letu laashishe osho Jehova naJesus ve tu ningila mokulongifa efimbo letu, eenghono nosho yo oiniwe yetu, opo tu xumife komesho oilonga yOuhamba. Pashihopaenenwa, ohatu dulu okukwafela mokutunga nokukaleka monghalo iwa omatungo oo taa longifwa melongelokalunga la koshoka.

6. Omolwashike hatu dulu okutya ekuliloyambo oshali oyo twa pewa pauhandimwe?

⁶ Ngeenge otwa konakona kutya Jehova naJesus ove tu hole shi fike peni, otashi ke tu linyengifa nafye tu kale tu va hole. (1 Joh. 4:10, 19) Ngeenge otwa didilike kutya Jesus okwe tu fila pauhandimwe, otashi ke tu linyengifa tu kale tu mu hole unene. Omuyapostoli Paulus okwa dimina oushili oo nokwa ulika olupandu laye, eshi a shangela eongalo lokuGalatia, a ti: ‘Omona waKalunga oku hole nge nokwe liyandja omolwange.’ (Gal. 2:20) Pakanghameno lekuliloyambo, Jehova okwe ku nanena kuye, opo u dule okuninga kaume kaye. (Joh. 6:44) Mbela itashi hekeleke omutima woye okukala u shii kutya Jehova okwa mona sha shiwa mwoove nokwa futa ondilo, opo u kale wa wana okuninga kaume kaye? Mbela itashi pameke ohole yoye yokuhola Jehova naJesus? Oshiwa okulipula kutya, ‘Ohole oyo otai linyengifa nge ndi ninge shike?’

7. Ngaashi sha ulikwa mefano, ongahelipi atushe hatu dulu okuulika ohole yetu yokuhola Jehova naJesus? (2 Ovakorinto 5:14, 15; 6:1, 2)

⁷ Ohole yetu yokuhola Kalunga naKristus ohai tu linyengifa, opo tu ulikile ovanhu vakwetu ohole. (Lesha 2 Ovakorinto 5:14, 15; 6:1, 2.) Onghedi imwe omo hatu ulike ohole omokukufa ombinga nouladi moilonga yokuudifa. Ohatu popi novanhu aveshe ovo hatu shakeneke. Ihatu henuka okupopya novanhu, molwaashi veputuko la yooloka ko kuletu, ndele ohatu popi novanhu  aveshe, kashi na nee mbudi kutya oipuna, eehepele, ovahongwanhu, ile ovovo inava hongwa. Monghedi ya tya ngaho, ohatu longo metwokumwe nelalakano laJehova “oo a hala ovanhu vomaludi aeshe va xupifwe nova shiive nawa oshili.” — 1 Tim. 2:4.

8. Ongahelipi hatu dulu okuulika kutya otu hole ovamwatate novamwameme?

⁸ Ohatu ulike yo kutya otu hole Kalunga nosho yo Kristus mokuulikila ovamwatate novamwameme ohole. (1 Joh. 4:21) Ohatu ulike kutya otu na ko nasha navo pauhandimwe nohatu va yambidida, ngeenge va taalela omayeleko. Ohatu va hekeleke ngeenge va filwa umwe oo ve hole, hatu va talele po, ngeenge tava yahama nohatu ningi ngaashi hatu dulu tu va twe omukumo, ngeenge va teka omukumo. (2 Kor. 1:3-7; 1 Tes. 5:11, 14) Ohatu va ilikanene yo, molwaashi otu shii kutya “eindilo lomuyuki oli na eenghono notali dulu okukwafela.” — Jak. 5:16.

9. Omonghedi vali imwe ilipi hatu dulu okuulika kutya otu hole ovamwatate novamwameme?

⁹ Ohatu ulike yo kutya otu hole ovamwatate novamwameme mokulonga noudiinini, opo tu kaleke po ombili pokati ketu navo. Ohatu kendabala okushikula oshihopaenenwa shaJehova shokudimina po. Ngeenge Jehova okwa yandja nehalo liwa Omona waye a fye omolwomatimba etu, mbela nafye katu na okukala twe lilongekida okudimina po ovamwatate novamwameme ngeenge ve tu ninga nai? Inatu hala okukala twa fa omupiya omukolokoshi, oo a popiwa meyele limwe laJesus. Nokuli nokonima eshi omwene waye e mu dimina po eendjo daye dihapu, omupiya oo okwa li a dopa okudimina po omupiya mukwao, oo a li e na eendjo daye dinini. (Mat. 18:23-35) Ngeenge ope na okuhaudafana pokati koye naumwe meongalo, mbela ito dulu okukatuka eenghatu tete, opo u pange ombili naye, ofimbo Edimbuluko inali fika? (Mat. 5:23, 24) Ngeenge owa ningi ngaho, oto ka ulika kutya ou hole Jehova naJesus neenghono.

10-11. Ongahelipi ovakulunhuongalo tava dulu okuulika kutya ove hole Jehova naJesus? (1 Petrus 5:1, 2)

¹⁰ Ongahelipi ovakulunhuongalo tava dulu okuulika kutya ove hole Jehova naJesus? Onghedi ya fimana omokufila oshisho eemhumbwe deedi daJesus. (Lesha 1 Petrus 5:1, 2.) Jesus okwa li a yelifila omuyapostoli Petrus oshitwa osho. Konima eshi a li e lidimbika Jesus lwoikando itatu, Petrus okwa li a halelela okuulika kutya oku hole Jesus. Konima yenyumuko laye, Jesus okwa li a pula Petrus, a ti: “Simon omona waJohannes, ou hole nge tuu?” Ohatu dulu okukala noushili kutya Petrus okwa li ta dulu okuninga keshe shimwe, opo a ulike kutya oku hole Omwene waye. Jesus okwa lombwela Petrus, a ti: “Lifa eedjona dange.” (Joh. 21:15-17) Mokukalamwenyo kwaye akushe, Petrus okwa kala ta file oshisho pahole eedi dOmwene, ta ulike kutya oku hole Jesus.

¹¹ Ovakulunhuongalo, ongahelipi tamu dulu okumona kutya eendjovo odo Jesus a li a lombwela Petrus oda fimana kunye moivike oyo ya tetekela Edimbuluko nosho yo konima yalo? Otamu dulu okuulika kutya omu hole Jehova naJesus shi fike peni mokukala hamu tu omukumo pandjikilile ovamwatate novamwameme, nokuninga keshe osho tamu dulu, opo mu kwafele ovo inave lipyakidila vali va alukile kuJehova. (Hes. 34:11, 12) Otamu dulu yo okutwa omukumo ovakonakonimbiibeli nosho yo ovanhu, ovo va ulika ohokwe, ovo va li pEdimbuluko. Otwa hala oku va tambula ko, molwaashi otu na elineekelo kutya navo otava ka ninga ovashikuli vaJesus monakwiiwa.

12. Omolwashike okudiladila keendjovo odo Jesus a popya oufiku oo wa tetekela efyo laye, taku tu pe ouladi? (Johannes 16:32, 33)

¹² Moufiku oo wa tetekela efyo laye, Jesus okwa lombwela ovahongwa vaye, a ti: “Otamu ka shakeneka omaudjuu mounyuni, ashike  kaleni mu na omukumo. Ame onda finda ounyuni.” (Lesha Johannes 16:32, 33.) Oshike sha kwafela Jesus a taalele ovatondi vaye nouladi noku kale omudiinini fiyo okefyo? Okwa li e lineekela muJehova. Molwaashi okwa li e shii kutya ovashikuli vaye ova li tava ka shakeneka omayeleko a faafana, Jesus okwa pula Jehova e va pashukile. (Joh. 17:11) Omolwashike osho tashi tu pe ouladi? Omolwaashi Jehova oku na eenghono e dule omutondi wetu keshe. (1 Joh. 4:4) Jehova oku wete keshe shimwe. Otwa tomhwa kutya ngeenge otwa kala twe lineekela muJehova, ohatu ka finda oumbada nokuulika ouladi.

13. Ongahelipi Josef Omuarimatia a li a ulika ouladi?

¹³ Natu ka taleni koshihopaenenwa shaJosef Omuarimatia. Okwa li a lengwa neenghono kOvajuda. Okwa li oshilyo shOmhangu yoPombada yOvajuda. Ndele eshi Jesus a li kombada yedu, Josef ka li e na ouladi. Johannes okwa ti kutya okwa li “omuhongwa waJesus ndele ina holola eitavelo laye moipafi molwaashi a li a tila Ovajuda.” (Joh. 19:38) Nonande Josef okwa li e na ohokwe metumwalaka lOuhamba, ka li a holola moipafi kutya oku na eitavelo muJesus. Nopehe na omalimbililo, okwa li a tila okukanifa ondodo yaye ya fimana momudingonoko wavo. Ashike Ombiibeli oye tu lombwela kutya konima eshi Jesus a fya, Josef “okwe linyatipaleka nokuya kuPilatus ndele ta pula a pewe oshimhu shaJesus.” (Mark. 15:42, 43) Josef ka li vali a kendabala okuholeka kutya oku li omuhongwa waJesus.

14. Oshike to dulu okuninga po, ngeenge oto kondjo noumbada wokutila ovanhu?

¹⁴ Mbela naave oho tila ovanhu ngaashi Josef? Ngeenge u li kofikola, ile koilonga, mbela omafimbo amwe oho kala wa tila okuliholola kutya ou li umwe womEendombwedi daJehova? Mbela oto ongaonga okuninga omuudifi, ile okuninginifwa, molwaashi to lipula kutya vamwe otava ka diladila shike kombinga yoye? Ino efa omadiladilo a tya ngaho e ku efife po okulonga osho u shii kutya osha yuka. Ilikana kuJehova wa mana mo. Mu pula e ku pe ouladi, opo u longe ehalo laye. Eshi to ka mona nghee Jehova ta nyamukula omailikano oye, otashi ke ku pameka noto ka kala u na ouladi. — Jes. 41:10, 13.

15. Konima eshi Jesus a li e lihololela ovahongwa vaye, ehafo lavo ola li le ve linyengifa va ninge shike? (Lukas 24:52, 53)

¹⁵ Ovahongwa ova li va nyika oluhodi neenghono, eshi Jesus a fya. Litula meenghaku davo. Kava li ashike va kanifa kaume oo ve hole, ndele ova li yo va kanifa eteelelo. (Luk. 24:17-21) Ashike eshi Jesus a li e ve lihololela, okwa  li a kufa efimbo, opo e va kwafele va ude ko onghandangala oyo ta dana mokuwanifwa po kwomaxunganeko Ombiibeli. Okwa li yo e va pa va longe oshilonga sha fimana. (Luk. 24:26, 27, 45-48) Lwanima, konima yomafiku 40, eshi Jesus a li ta londo a ye meulu, oluhodi lovahongwa vaye ola li la shituka ehafo. Ova li va hafa neenghono, molwaashi ova li ve shii kutya Omwene wavo oku na omwenyo, note va kwafele va wanife po oshilonga shavo shipe. Ehafo lavo ola li le ve linyengifa va tange Jehova nopehe na okusholola. — Lesha Lukas 24:52, 53; Oil. 5:42.

16. Ongahelipi hatu dulu okuhopaenena ovahongwa vaJesus?

¹⁶ Ongahelipi hatu dulu okuhopaenena ovahongwa vaJesus? Ohatu dulu okumona ehafo mokulongela Jehova, hapefimbo ashike lEdimbuluko, ndele omomukokomoko womudo aushe. Osho osha hala okutya otu na okupitifa komesho tete Ouhamba waKalunga monghalamwenyo yetu. Pashihopaenenwa, vahapu ova ninga omalunduluko moilonga yavo, opo va dule okukufa ombinga moilonga yokuudifa, va kale hava kala pokwoongala nokuninga elongelokalunga loukwaneumbo pandjikilile. Vamwe ova tokola vehe likongele oinima yopamaliko, oyo vamwe va tala ko kutya oya pumbiwa, opo va dule okulongifwa meongalo, ile va dule oku ka longa oko ku na omhumbwe inene yovaudifi vOuhamba. Nonande otwa pumbwa elididimiko, opo tu twikile okulongela Jehova, okwe tu udanekela kutya ote ke tu nangeka noupuna, ngeenge otwa pifa tete komesho oinima yOuhamba monghalamwenyo yetu. — Omayel. 10:22; Mat. 6:32, 33.

17. Owa tokola toko okuninga shike pefimbo eli lEdimbuluko? (Tala efano.)

¹⁷ Otwa teelela nodjuulufi oku ka dana Edimbuluko mEtivali, 4 Aprili. Ashike ino teelela ashike efiku lEdimbuluko, opo u diladile kombinga yonghalamwenyo nefyo laJesus nosho yo kohole oyo ye naJehova ve tu ulikila. Longifa omhito keshe momukokomoko woivike oyo tai tetekele Edimbuluko, opo u ninge ngaho. Pashihopaenenwa, oto dulu okulitulila po efimbo, opo u leshe nokudilonga kombinga yoiningwanima oyo i li moshimhungu “Oshivike shaxuuninwa shaJesus,” tashi hangwa mokambo Okalongifwambo kokukonakona Eendjovo daKalunga. Eshi to ningi ngaho, konga oitukulwa yOmbiibeli oyo tai ku kwafele u kale u na olupandu, ohole, ouladi nosho yo ehafo. Opo nee tala eenghedi dokondadalunde omo to dulu okuulika olupandu loye tali di komutima. Oto dulu okukala noushili kutya Jesus okwa lenga ashishe osho to dulu okuninga, opo u mu dimbuluke pefimbo eli lEdimbuluko. — Eh. 2:19.