1-2. Omonghedi ilipi Omukriste ta dulu okuyelekanifwa netungo la londafana? (1 Ovakorinto 15:58)

 MO 1970 nasha, moTokyo, moJapan, omwa li mwa tungwa etungo lilelile. Ovanhu ova li tave lipula kutya ongahelipi la li tali ka kala li li ofika, molwaashi moshilando osho ohamu ningwa omakakamo edu luhapu. Eeindjiniya oda ninga po shike opo etungo olo liha we po kekakamo ledu? Oda duta etungo olo la kola, opo li dule okukala la fikama, nonande opa holoke ekakamo ledu. Ovakriste navo ova fa etungo olo. Omonghedi ilipi mbela?

² Omukriste oku na okukala e na ondjele, ngeenge tashi uya pokati kokukala a pama nokutifuka. Oku na okukala a pama noiha tengauka, ngeenge tashi uya pokudiinina eemhango nomifikamhango daJehova. (Lesha 1 Ovakorinto 15:58.) Oha “dulika nehalo liwa” noihe liyandje. Kakele kaasho, okwa pumbwa okukala e na “ondjele,” ile ha tifuka, ngeenge eenghalo otadi shi pitike, ile nokuli sha pumbiwa. (Jak. 3:17) Omukriste, oo e lihonga okukala e na etaleko olo li li pandjele, ota ka henuka okukala e na onyanya, ile okukala ha tifuka unene. Moshitukulwa eshi, ohatu ka kundafana nghee hatu dulu okukala ihatu tengauka. Ohatu ka kundafana eenghedi nhano odo Satana ha longifa, opo a kendabale okunghundipaleka etokolo toko letu. Ohatu ke lihonga yo nghee tu na okukondjifa eenghendabala daye.

3. Eemhango dOmuyandjimhango Munenenene dilipi tadi hangwa mOilonga 15:28, 29?

³ Jehova, e li Omuyandjimhango Munenenene, okwa ningifa eemhango daye di kale dipu koshiwana shaye, opo shi dule oku di uda ko. (Jes. 33:22) Pashihopaenenwa, olutuwiliki lopefimbo lOvakriste votete ola tumbula eenghedi nhatu omo Ovakriste ve na okukala ovadiinini: (1) omokuhenuka okulongela oikalunga nokulongela Jehova oye aeke, (2) omokufimaneka ouyapuki wohonde  nosho yo (3) mokudulika komifikamhango dOmbiibeli dopaenghedi da denga mbada. (Lesha Oilonga 15:28, 29.) Ongahelipi Ovakriste kunena tava dulu okudulika kuJehova meenghedi odo nhatu dokondadalunde?

4. Ongahelipi hatu dulu okulongela Jehova oye aeke? (Ehololo 4:11)

⁴ Ohatu henuka okulongela oikalunga, nohatu longele Jehova oye aeke. Jehova okwa lombwela Ovaisrael ve mu longele oye aeke. (Deut. 5:6-10) Eshi Jesus a li ta yelekwa kOndiaboli, okwa popya sha yela kutya otu na ashike okulongela Jehova oye aeke. (Mat. 4:8-10) Onghee hano, ihatu longele oikalunga. Ihatu longele yo ovanhu, kashi na nee mbudi kutya ovawiliki vomalongelokalunga, ovapangeli vopapolotika, ile omanyakwa momaudano, ile momalihafifo omounyuni, hatu ungaunga navo va fa ookalunga. Ohatu yambidida Jehova nokulongela ashike oo a “shita oinima aishe.” — Lesha Ehololo 4:11.

5. Omolwashike tu na okudulika komhango yaJehova i na sha nouyapuki womwenyo nosho yo wohonde?

⁵ Ohatu dulika komhango yaJehova i na sha nouyapuki womwenyo nosho yo wohonde. Omolwashike mbela? Omolwaashi Jehova okwa popya kutya ohonde oi lile po omwenyo, oshali i na ondilo oyo ya dja kuye. (Lev. 17:14) Eshi Jehova a li a pitika oshikando shotete ovanhu va lye ombelela, okwa li e va lombwela vaha lye ohonde. (Gen. 9:4) Okwa endulula oshipango osho, eshi a li a yandja Omhango yaMoses kOvaisrael. (Lev. 17:10) Okwa li a lombwela olutuwiliki lopefimbo lOvakriste votete li lombwele Ovakriste aveshe ve ‘likaleke kokule nohonde.’ (Oil. 15:28, 29) Ohatu dulika koshipango osho, ngeenge hatu ningi omatokolo e na sha nouhaku. b

6. Eenghendabala dilipi tu na okuninga, opo tu kale metwokumwe nomifikamhango daJehova dopaenghedi da denga mbada?

⁶ Ohatu dulika filufilu komifikamhango daJehova dopaenghedi da denga mbada. (Heb. 13:4) Omuyapostoli Paulus okwa longifa omupopyofano wa twa e tu pe omayele e na sha ‘nokudipaa’ oilyo yetu yolutu, sha hala okutya, tu katuke eenghatu twa mana mo, opo tu efe po omahalo a puka opambelela. Ohatu henuka okutala, ile okuninga sha osho tashi tu twala moluhaelo. (Kol. 3:5; Job 31:1) Ngeenge twa taalela eyeleko, ohatu henuka diva ediladilo, ile onghatu oyo tai dulu okunyona po ekwatafano letu naKalunga.

7. Otu na okukala twa tokola toko okuninga shike, nomolwashike?

⁷ Jehova okwa teelela tu ‘dulike nomutima aushe.’ (Rom. 6:17) Ewiliko laye alushe oli na sha nouwa wetu, noitatu dulu okulundulula eemhango daye. (Jes. 48:17, 18; 1 Kor. 6:9, 10) Otu na okuninga eenghendabala tu hafife Jehova nokuulika oikala ya fa yomupsalme oo a ti: “Omutima wange ohandi u ikifa, okuhala okuwanifa eenghedimhango doye alushe fiyo okoxuuninwa.” (Eps. 119:112) Ashike Satana ota ka kendabala okunghundipaleka etokolo toko letu. Eenghedi dilipi ha longifa?

8. Ongahelipi Satana ha longifa omahepeko, opo a nghundipaleke etokolo toko letu?

⁸ Omahepeko. Ondiaboli ohai longifa omaponokelo opalutu nopamaliudo, opo i nghundipaleke etokolo toko letu. Elalakano layo oku tu ‘xwaka po,’ opo i nyone po ekwatafano letu naJehova. (1 Pet. 5:8) Ovakriste vopefimbo lovayapostoli ova li hava ningilwa omatilifo, hava dengwa nokudipawa, molwaashi ova li va tokola toko okukala ovadiinini. (Oil. 5:27, 28, 40; 7:54-60) Satana ota twikile okulongifa omahepeko nokunena. Osho oshi liwetikile, eshi  ovapataneki tava hepeke nonyanya ovamwatate novamwameme moRussia nosho yo moilongo ikwao.

9. Yelifa nghee twa pumbwa okuhenuka omafininiko omonanguwi.

⁹ Omafininiko omonanguwi. Kakele komahepeko, Satana oha longifa yo ‘omakoto.’ (Ef. 6:11, esh.) Diladila koshihopaenenwa shomumwatate Bob, oo a li meembete moshipangelo omolwetando la kwata moiti. Okwa li a yelifila eendokotola kutya kashi na nee mbudi kutya eenghalo oda fa peni, ita ka dimina a tulwe ohonde. Eendokotola oda li da dimina kutya otadi ka fimaneka etokolo laye. Ashike oufiku oo wa tetekela etando, ndokotola umwe okwa li e uya oku mu talela po konima eshi oukwaneumbo waBob wa shuna keumbo. Ndokotola oo okwa li a lombwela Bob kutya ita ka tulwa ohonde, ashike otava ka kala ve i na, va ningila ngeenge oya ka kala ya pumbiwa. Ndokotola oo otashi dulika a li ta diladila kutya Bob ota ka lundulula omadiladilo aye, molwaashi oukwaneumbo waye kau po. Ndele Bob okwa kala a pama, nokwa popya kutya ita ka tambula ko ohonde, kashi na nee mbudi kutya oku li monghalo ya tya ngahelipi.

10. Omolwashike omatomhafano opanhu a nyika oshiponga? (1 Ovakorinto 3:19, 20)

¹⁰ Omatomhafano opanhu. Ngeenge otwa tale ko oinima pataleko lopanhu, otashi dulika tu ka efe po Jehova nosho yo omifikamhango daye. (Lesha 1 Ovakorinto 3:19, 20.) “Ounongo wounyuni ou” ohau nwefa mo luhapu ovanhu vaha dulike kuKalunga. Ovakriste vanini vomuPergamo naTiatira ova li va nwefwa mo kovanhu ovo ve va dingilila, ovo va li inava koshoka paenghedi nohava longele oikalunga. Jesus okwa li a pa omaongalo oo omayele a kwata moiti omolwokulipwililikila oluhaelo. (Eh. 2:14, 20) Kunena, ovanhu ovo ve tu dingilila otashi dulika va kendabale oku tu nwefa mo tu tambule ko omadiladilo a puka. Oilyo youkwaneumbo novashiivikile otashi dulika va kendabale oku tu tomha kutya otwa ngabekwa unene nosho yo kutya otu na okunyona eemhango daJehova. Pashihopaenenwa, otashi dulika va tye kutya inashi fimana okukala twa koshoka paenghedi nosho yo kutya omifikamhango dOmbiibeli dopaenghedi odonghuluyonale.

11. Oshike tu na okuhenuka, opo tu kale twa pama?

¹¹ Omafimbo amwe, otashi dulika tu tomhafane kutya ewiliko olo Jehova te tu pe inali wana. Otashi dulika nokuli tu yelekwe tu ‘koyelele osho sha shangwa.’ (1 Kor. 4:6) Ovawiliki vomalongelokalunga vopefimbo laJesus, ova li ve na ondjo omolwenyono olo. KOmhango ova li va weda ko eemhango davo vene, nova li ve shi ningifa shidjuu kovanhu vongaho okudulika kuyo. (Mat. 23:4) Jehova oha yandje ewiliko la yela okupitila mEendjovo daye nosho yo mehangano laye. Katu na etomheno lokuweda ko kewiliko olo he tu pe. (Omayel. 3:5-7) Onghee hano, katu na okukoyelela osho sha shangwa mOmbiibeli, ile tu tulile po ovaitaveli vakwetu eemhango di na sha noinima yopaumwene.

12. Ongahelipi Satana ha xumifa komesho “omatomhafano oipupulu”?

¹² Oipupulu. Satana oha longifa “omatomhafano oipupulu” nosho yo ‘omadiladilo oo taa dana onghandangala mounyuni,’ opo a pukife nokutukaula ovanhu. (Kol. 2:8) Pefimbo lovayapostoli, osho osha li sha kwatela mo omadiladilo opanhu, oo a kanghamena komatomhafano opanhu, komahongo Ovajuda ehe li pamishangwa nosho yo kehongo olo kutya Ovakriste ove na okudiinina Omhango yaMoses. Omahongo a tya ngaho okwa li taa pukifa ovanhu, molwaashi okwa li taa ehenifa ovanhu kokule nOdjo younongo washili, Jehova. Kunena, Satana oha longifa oikundaneki nosho yo omakwatafano opaintaneta, opo a tandavelife omahokololo oipupulu nosho yo eenghundana doipupulu, odo hadi xumifwa komesho kovawiliki vopapolotika.  Osho otwe shi mona pefimbo lomukifi wekomba wo-COVID-19. c Eendombwedi daJehova, odo da li da pwilikina kewiliko olo hatu pewa okupitila mehangano letu, oda li da henuka oisho, inai pumbiwa, oyo ya li ya wilila po ovo va li va pwilikina kouyelele wa puka. — Mat. 24:45.

13. Omolwashike twa pumbwa okulungama, opo tuha piyaanekwe?

¹³ Omapiyaaneko. Otwa pumbwa okukala hatu yandje elitulemo ‘koinima oyo ya fimanenena.’ (Fil. 1:9, 10) Omapiyaaneko otaa dulu okumana po efimbo letu lihapu noku tu imba tu yandje elitulemo koinima oyo tai tu etele ouwa. Oinima oyo hatu ningi pandjikilile, ngaashi okulya, okunwa, omalihafifo noilonga yomboloto, otai dulu oku tu piyaaneka, ngeenge otwa efa oyo tu kale twa pitifa komesho monghalamwenyo yetu. (Luk. 21:34, 35) Kakele kaasho, efiku keshe ohatu udu nokulesha kombinga yomakangha nosho yo oinima yopapolotika. Otwa pumbwa okushilipaleka kutya itatu piyaanekwa koinima ya tya ngaho. Ngeenge otwa efa tu piyaanekwe, otashi dulika tu ka hovele okukufa ombinga pamadiladilo nosho yo momutima. Satana oha longifa eenghedi adishe odo da tumbulwa pombada, opo a nghundipaleke etokolo letu lokulonga osho sha yuka. Natu ka kundafaneni nghee hatu dulu okukondjifa eenghendabala daye nokukala twa pama.

14. Oshinima shimwe shilipi tashi dulu oku tu kwafela tu kale twa pama, eshi hatu yambidida Jehova?

¹⁴ Diladila keliyapulo loye neninginifo. Owa katuka eenghatu odo, molwaashi owa halelela okuyambidida Jehova. Dimbuluka osho she ku kwafela, opo u kale wa tomhwa kutya owa mona oshili. Owa shiiva Jehova nowa hovela okukala we mu fimaneka nou mu hole e li Tate woye womeulu. Owa kulika eitavelo nole ku linyengifa u livele ombedi. Omutima woye owe ku linyengifa u efe po oilonga oyo inai koshoka nokulonga ehalo laKalunga. Owa li wa pepelelwa, eshi wa mona nghee Kalunga e ku dimina po. (Eps. 32:1, 2) Owa li wa hovela okukala pokwoongala kwopaKriste nokulombwela vamwe kombinga yoinima itunhula oyo we lihonga. U  li Omukriste e liyapulila Jehova nowa ninginifwa, paife oto ende mondjila oyo tai twala komwenyo waalushe nowa tokola toko uha kanduke mo. — Mat. 7:13, 14.

15. Omolwashike sha fimana okukonakona nokudilonga?

¹⁵ Konakona Eendjovo daKalunga nokudilonga kudo. Ngaashi ashike omuti hau dulu okukala ofika wa pamenena ngeenge ou na omidi da ya moule, nafye ohatu dulu okukala tu na eitavelo la pama, ngeenge ola kanghamena kEendjovo daKalunga. Eshi omuti tau ende tau kulu, omidi dao ohadi ende tadi i moule nokutandavela. Ngeenge otwa konakona nokudilonga, eitavelo letu ohali ende tali pamenene nohatu kala twa tomhwa kutya eendjila daKalunga oda denga mbada. (Kol. 2:6, 7) Diladila kunghee omalombwelo, ewiliko nosho yo eameno laJehova ya li ya kwafela ovapiya vaye vomefimbo la pita. Pashihopaenenwa, Hesekiel okwa li ta yandje elitulemo filufilu, eshi omweengeli a li ta mete otembeli oyo Hesekiel a li a mona memoniko. Emoniko olo ola li la pameka Hesekiel notali tu hongo oilihongomwa yokondadalunde i na sha nanghee tu na okudulika komifikamhango daJehova delongelokalunga la koshoka. d (Hes. 40:1-4; 43:10-12) Nafye ohatu mono yo ouwa, ngeenge otwa longifa efimbo tu konakone nokudilonga koinima yomoule oyo i li mEendjovo daKalunga.

16. Ongahelipi omutima wa pama wa li wa kwafela Bob? (Epsalme 112:7)

¹⁶ Kulika omutima wa pama. Ohamba David oya popya kutya inai hala nandenande okweefa po ohole yayo yokuhola Jehova, eshi ya ti: “Omutima wange u nouladi, Kalunga.” (Eps. 57:7) Nafye ohatu dulu okukala tu na omutima wa pama, notwe lineekela filufilu muJehova. (Lesha Epsalme 112:7.) Tala nghee osho sha li sha kwafela Bob, oo a tumbulwa metetekelo. Eshi a li a lombwelwa kutya ohonde otai kalekwa po, opo i dule okulongifwa ngeenge sha pumbiwa, okwa li a nyamukula diva kutya, ngeenge ope na omhito opo ta pumbwa okutulwa ohonde, ota ka fiya po oshipangelo diva. Lwanima, Bob okwa ka popya, a ti, “Kanda li nda limbililwa osho handi ningi nokanda li handi lipula naasho tashi dulika tashi ka ningwa po.”

17. Oshike hatu dulu okulihonga koshimoniwa shaBob? (Tala yo efano.)

 ¹⁷ Bob okwa li a pama, molwaashi okwa li a ninga etokolo lokukala omudiinini, ofimbo ina ya moshipangelo. Tete, okwa li a halelela okuhafifa Jehova. Oshitivali, okwa li a konakona noukeka osho Ombiibeli nosho yo oishangomwa yetu ya kanghamena kOmbiibeli ya popya kombinga youyapuki womwenyo nosho yo wohonde. Oshititatu, okwa li a tomhwa kutya okushikula ewiliko laJehova ohaku eta omanangeko noupuna taa kalelele. Nafye ohatu dulu okukala tu na omutima wa pama, kashi na nee mbudi kutya ohatu shakeneke omayeleko a tya ngahelipi.

18. Ongahelipi oshihopaenenwa shaBarak tashi tu hongo okulineekela muJehova? (Tala efano kombada yoshifo.)

¹⁸ Lineekela muJehova. Natu ka taleni nghee Barak a li a pondola, molwaashi a li e lineekela ewiliko laJehova. Pefimbo opo, oshiwana shaIsrael kasha li she lilongekidila olwoodi. Kasha li nokuli shi na oilwifo. Ashike Jehova okwa li a lombwela Barak a ye a ka lwife Sisera, ondjai yetangakwaita lOvakaanan, nosho yo etangakwaita laye, olo la li li na oilwifo ihapu. (Ovatok. 5:8) Omuprofeti Debora okwa li a lombwela Barak a kuluke a ye ponhele ya lalakana, opo a ka shakeneke Sisera nosho yo omatemba aye oita 900. Osha li tashi ka kala shidjuu ponhele ya lalakana kOvaisrael okulwifa omatemba oita oo haa endelele. Ndele nonande Barak okwa li e shi shii, okwa li a dulika. Eshi ovakwaita va li tava kuluka okudja komhunda yaTabor, Jehova okwa li a lokifa odula inene okudja meulu. Omatemba oita aSisera okwa li a dama meenhata, na Jehova okwa li a kwafela Barak a findane. (Ovatok. 4:1-7, 10, 13-16) Sha faafana, Jehova ote ke tu kwafela tu findane, ngeenge otwe mu lineekela nosho yo ewiliko olo ha yandje okupitila movakalelipo vaye. — Deut. 31:6.

19. Omolwashike wa hala okukala wa pama?

¹⁹ Otwa pumbwa okutwikila okukondja, opo tu kale twa pama, ofimbo tu li mounyuni ou. (1 Tim. 6:11, 12; 2 Pet. 3:17) Natu kaleni twa tokola toko, opo tuha twalwaatwalwe komahepeko, komafininiko omonanguwi, komatomhafano opanhu, komatomhafano oipupulu nosho yo komapiyaaneko. (Ef. 4:14) Ponhele yaasho, natu kaleni twa pama notuha tengauke, mokukala tu hole Jehova nokudulika koipango yaye. Pefimbo opo tuu opo, otwa pumbwa okukala tu na ondjele. Moshitukulwa tashi shikula ko, ohatu ka kundafana nghee Jehova naJesus ve li oihopaenenwa ya denga mbada i na sha nokukala nondjele.