1. Ongahelipi hatu dulu okuhopaenena Tate yetu omunahole, Jehova?

JEHOVA oku tu hole neenghono. (Joh. 3:16) Otwa hala okuhopaenena Tate yetu omunahole. Onghee hano, natu kendabaleni ‘okufilafana onghenda, okukala tu hole ovamwatate notu na olukeno,’ unene tuu “oovakwetu vomeitavelo.” (1 Pet. 3:8; Gal. 6:10) Ngeenge Ovakriste vakwetu va taalela omaupyakadi, ohatu kala twa hala oku va kwafela.

2. Oshike hatu ka kundafana moshitukulwa eshi?

² Aveshe ovo va hala okukala oshitukulwa shoukwaneumbo waJehova ove na okushakeneka omaupyakadi. (Mark. 10:29, 30) Otashi dulika tu lididimikile omaupyakadi mahapu eshi exulilo lounyuni ou tali ehene popepi. Ongahelipi hatu dulu okukwafelafana? Natu ka kundafaneni osho hatu lihongo koihopaenenwa yopaMbiibeli, shaLot, shaJob noshaNaomi. Ohatu ka kundafana yo omaupyakadi amwe oo ovamwatate novamwameme va taalela kunena, nokumona nghee hatu dulu oku va kwafela ve lididimikile omaupyakadi oo.

3. She likolelela ku 2 Petrus 2:7, 8, Lot okwa li a ninga etokolo la puka lilipi, nosha li sha eta oidjemo ilipi?

³ Lot okwa li a ninga etokolo la puka eshi a ka kala moshilando shaSodom omo mwa li mu na ovanhu va xutuka unene paenghedi. (Lesha 2 Petrus 2:7, 8.) Oshilando osho Sodom osha li sha punapala, ashike Lot okwa ka mona oixuna neenghono eshi a tembukila ko. (Gen. 13:8-13; 14:12) Otashi dulika omukulukadi waye a li e hole unene oshilando osho, ile ovanhu ovo va li mo nomolwaasho a li ina dulika kuJehova. Okwa kanifa omwenyo waye eshi Kalunga a li a hanauna po  oshilando osho nomundilo nosulfuri. Diladila kovanakadona vavali vaLot. Ova li va valekwa kovalumenhu ovo va fila muSodom. Lot okwa li a kanifa eumbo laye, omaliko aye nosho yo, osho shinyemateka unene, omukulukadi waye. (Gen. 19:12-14, 17, 26) Mbela Jehova okwa li a efa po okulididimikila Lot pefimbo olo lidjuu? Ahowe.

4. Jehova okwa li e lididimikila ngahelipi Lot? (Tala efano kombada yoshifo.)

⁴ Nonande Lot okwa li a tokola okukala muSodom, Jehova okwa li e mu kenukila eshi a tuma ovaengeli ve ke mu xupife noukwaneumbo waye. Ashike ponhele yokudulika diva koshipango shovaengeli shi na sha nokufiya po Sodom, Lot okwa li “ta ongaonga.” Ovaengeli ova li ve mu kwata momaoko noku mu kwafela nosho yo oukwaneumbo waye va fiye po oshilando. (Gen. 19:15, 16) Ovaengeli ova li ve mu lombwela a ye onhapo keemhunda. Ndele ponhele Lot a dulike kuJehova, okwa li a pula a ye koshilando osho shi li popepi. (Gen. 19:17-20) Jehova okwa li a pwilikina kuye nelididimiko nokwa li e mu efa a ye koshilando osho. Lwanima, Lot okwa ka kala a tila okukala moshilando osho nokwa li a tembukila keemhunda, oko Jehova a li e mu lombwela a ye pehovelo. (Gen. 19:30) Jehova ka li tuu e mu lididimikila monghedi i kumwifi! Ongahelipi hatu dulu oku mu hopaenena?

5-6. Ongahelipi hatu dulu okutula moilonga 1 Ovatessaloniki 5:14 eshi hatu hopaenene Kalunga?

⁵ Ngaashi Lot, oshilyo shoukwaneumbo waJehova otashi dulu okuninga etokolo la puka nokulietela omaupyakadi. Ngeenge osho osha ningwa, ohatu ke linyenga ngahelipi? Otashi dulika tu popye kutya ota teya osho a kuna, naasho oshoshili. (Gal. 6:7) Ashike ohatu dulu okuninga po sha. Ohatu dulu okuhopaenena onghedi omo Jehova a li a kwafela Lot. Ngahelipi mbela?

⁶ Jehova ka li ashike a tuma ovaengeli va ka londwele Lot, ndele noku mu kwafela yo a henuke oshiponga osho sha li sha hanga Sodom. Sha faafana, ohatu dulu okulondwela omumwatate ngeenge otu wete ta ningi oshinima osho tashi ke mu etela oupyakadi. Ndele ohatu dulu yo oku mu kwafela. Nonande ota ongaonga okutula moilonga omayele opaMbiibeli oo ta pewa, otwa pumbwa okukala ovalididimiki. Natu kale twa fa ovaengeli ovo vavali. Ponhele yokusholola nokuliyoolola ko komumwatate, natu konge eenghedi tadi longo omo hatu dulu oku mu kwafela. (Joh. 3:18) Otashi dulika twa pumbwa oku mu kwata mokwooko, oku shi popya pafaneko, noku mu kwafela a tule moilonga omayele mawa oo a pewa. — Lesha 1 Ovatessaloniki 5:14.

7. Ongahelipi hatu dulu okuhopaenena onghedi omo Jehova a li a tala ko Lot?

⁷ Jehova okwa li ta dulu okuyandja elitulemo komapuko aLot. Ponhele yaasho, okwa ka nwefa mo omuyapostoli Petrus a popye kutya Lot oku li omulumenhu omuyuki. Inatu hafa tuu eshi Jehova he tu dimine po omapuko etu! (Eps. 130:3) Mbela itatu dulu okuhopaenena onghedi omo Jehova a li a tala ko Lot? Ngeenge otwa yandje elitulemo komaukwatya mawa ovamwatate novamwameme, ohatu ke ve lididimikila. Naasho otashi ka kala shipu kuvo okutambula ko ekwafo olo hatu va pe.

8. Olukeno ohali tu linyengifa tu ninge shike?

⁸ Mepingafano naLot, Job ka li a mona oixuna molwaashi a ninga etokolo la puka. Ashike okwa li a shakeneka oupyakadi wa kwata moiti, a kanifa omamona aye, ondodo yaye momudingonoko nosho yo oukolele waye. Nokuli osho sha li shinyemateka unene, ye nomukulukadi waye ova li va filwa ovana vavo. Job okwa li yo ta lundilwa kookaume kaye  vatatu ovanaipupulu. Omolwashike ookaume kaJob vatatu ovanaipupulu ovo va li tave mu hekeleke va li inave mu ulikila olukeno? Kava li lela ve shii osho sha li tashi mu ningilwa. Oshidjemo, ova li va fika pexulifodiladilo la puka nova tokola Job nonyanya. Ongahelipi hatu dulu okuhenuka okuninga epuko la faafana? Didilika kutya Jehova oye aeke e shii oshili aishe kombinga yonghalo yomunhu. Pwilikina noukeka osho omunhu oo ta mono oixuna ta popi. Ninga shihapu shi dulife ashike okupwilikina; kendabala yo okukala u udite ngaashi ye. Kungaho, opo ashike to ka dula okuudila oukwao wananghali omumwatate ile omumwameme.

9. Olukeno ohali tu kwafele tuha ninge shike, nomolwashike?

⁹ Olukeno ohali tu kwafele tuha tandaveleke olwaambo kombinga yomaupyakadi oo vamwe va taalela. Omunhu oo ha tandaveleke olwaambo iha tungu eongalo, ndele ohe li tukaula. (Omayel. 20:19; Rom. 14:19) Ke na onghenda ndele omukwanyanya, neendjovo daye otadi dulu okuyahameka omunhu oo ta mono nale oixuna. (Omayel. 12:18; Ef. 4:31, 32) Otashi ka kala shiwa ngeenge otwa kala hatu tale komaukwatya mawa omunhu nokudiladila kunghee hatu dulu oku mu kwafela a ungaunge nomaupyakadi aye.

10. Eendjovo odo di li muJob 6:2, 3 otadi tu hongo shike?

¹⁰ Lesha Job 6:2, 3. Omafimbo amwe, Job okwa li ha popi oinima ya “puka.” Ashike lwanima, okwa ka dimina kutya osho a popya osha puka. (Job 42:6) Ngaashi Job, kunena omunhu oo te lididimikile oupyakadi ota dulu okupopya oinima ya puka oyo lwanima te ke lipa oushima. Otu na okulinyenga  ngahelipi? Ponhele yoku mu tokola, otwa pumbwa oku mu kenukila. Dimbuluka kutya Jehova ka li a hala atusheni tu kale tu na omaupyakadi oo hatu shakeneke kunena. Onghee oshi shii okuudiwa ko ngeenge omupiya waJehova omudiinini ta popi eendjovo dongaho eshi e li moupyakadi wa kwata moiti. Nonande ota popi oinima inai yuka kombinga yaJehova ile yetu, inatu endelela oku mu handukila ile oku mu tokola omolweendjovo daye. — Omayel. 19:11.

11. Ongahelipi ovakulunhuongalo tava dulu okuhopaenena Elihu ngeenge tava yandje omayele?

¹¹ Omafimbo amwe, omunhu oo te lididimikile oupyakadi okwa pumbwa omayele ile outekuduliko. (Gal. 6:1) Ovakulunhuongalo otava dulu ngahelipi okuungaunga noshinima osho? Ova pumbwa okuhopaenena Elihu, oo a li a pwilikina nolukeno kuJob. (Job 33:6, 7) Elihu okwa li a yandja omayele aye konima eshi a uda ko nawa osho Job ta diladila. Ovakulunhuongalo ovo hava shikula oshihopaenena shaElihu otava ka pwilikina noukeka nokukendabala okuuda ko onghalo yomunhu. Opo nee, ngeenge tava yandje omayele, otava ka hanga omutima womunhu oo tava kwafele.

12. Naomi okwa li a kumwa ngahelipi kefyo lomushamane waye nosho yo lovanamati vavo vavali?

¹² Naomi okwa li omukainhu omudiinini oo a li e hole Jehova. Ndele konima yefyo lomushamane waye novanamati vavo vavali, okwa li a hala okulundulula edina laye Naomi li ninge “Mara,” olo tali ti “oululu.” (Rut 1:3, 5, 20) Oshitenya shaNaomi, Rut, osha li sha kala pamwe naye momaudjuu aye. Rut ka li ashike a kwafela Naomi noinima oyo a li a pumbwa, ndele okwa li yo a popya naye nehekeleko. Rut okwa li a yambidida Naomi nokwe mu ulikila ohole noitya i li paunafangwa. — Rut 1:16, 17.

13. Omolwashike ovo va filwa ookaume kopahombo va pumbwa ekwafo letu?

¹³ Ngeenge omumwatate ile omumwameme okwa filwa kaume kaye kopahombo, okwa pumbwa ekwafo letu. Ovalihomboli otava dulu okufaafanifwa nomiti mbali odo da kula di li pamwe. Oule womido, omidi domiti odo ohadi liindakana. Ngeenge omuti umwe owa dudwa mo ndele tau fi, omuti mukwao ohau kumwa neenghono. Sha faafana, ngeenge umwe okwa filwa kaume kaye kopahombo, otashi dulika a kale e udite nai pamaliudo efimbo lile. Paula, * oo opo a filwa omushamane waye, okwa ti: “Onghalamwenyo yange oya li ya lunduluka filufilu, nohandi kala ndi udite ndihe na eenghono. Onda kanifa kaume kange kopofingo. Onda li handi lombwele omushamane wange keshe shimwe. Otwa kala hatu hafele pamwe noha yambidida nge momafimbo madjuu. Okwa kala alushe ha pwilikine kwaame shimha handi mu lombwele omaupyakadi ange. Onda li ndi udite nda tekauka.”

14-15. Ongahelipi hatu dulu okuhekeleka umwe oo a filwa kaume kopahombo?

¹⁴ Ongahelipi hatu dulu okuhekeleka umwe oo a filwa kaume kopahombo? Onghatu yotete ya fimana oyo okupopya naye nonande otashi dulika u udite ito dulu, ile uhe shii osho u na okutya. Paula, oo a popiwa metetekelo, okwa ti: “Ondi udite kutya efyo ohali ningifa ovanhu va kale inava manguluka. Ohave lipula kutya osho tava popi otashi dulika shi udife nai umwe. Ashike ngeenge ovanhu inava tya sha, ohashi kala shii unene shi dulife ngeenge va popya oshinima osho tava diladila kutya oshii.” Otashi dulika omunhu oo a nyika oluhodi inaa teelela tu tye sha shiwa. Paula okwa ti: “Ohandi shi pandula unene ngeenge ookaume kange tava ti, ‘Ombili eshi wa filwa.’”

 ¹⁵ William, oo omukulukadi waye a fya konima yomido donhumba, okwa ti: “Ohandi shi pandula ngeenge ovanhu tava popi oinima iwa kombinga yomukulukadi wange; ohashi ulikile nge kutya okwa li e holike nokwa fimanekwa. Eyambidido la tya ngaho oli li ekwafo linene kwaame. Eendjovo davo ohadi hekeleke nge unene, molwaashi omukulukadi wange okwa li e na ondilo kwaame nokwa li ha dana onghandangala ya fimana monghalamwenyo yange.” Omufiyekadi wedina Bianca okwa yelifa a ti: “Ohashi hekeleke nge ngeenge vamwe tava ilikana pamwe naame nokulesha pamwe naame omushangwa umwe ile mbali. Ohashi kwafele nge ngeenge tava popi kombinga yomushamane wange nosho yo ngeenge tava pwilikine eshi handi popi kombinga yaye.”

16. (a) Otu na okutwikila okuningila shike umwe oo a filwa kaume kopahombo? (b) She likolelela kuJakob 1:27, otu na oshinakuwanifwa shashike?

¹⁶ Ngaashi ashike Rut a kala nomufiyekadi Naomi, otwa pumbwa okutwikila okukwafela ovo va filwa ovaholike vavo. Paula, oo a popiwa metetekelo, okwa ti: “Konima eshi omushamane wange a fya, vahapu ova kala tava kwafele nge. Ndele mokweendelako kwefimbo, ovanhu ova ka kala ve lipyakidila nomalipyakidilo avo efiku keshe. Ashike onghalamwenyo yange oya lunduluka filufilu. Oshi li ekwafo linene ngeenge ovanhu ova mono kutya omunhu oo a nyika oluhodi okwa pumbwa ekwafo oule weemwedi, nokuli nokonima yomido eshi a filwa.” Oshoshili kutya ovanhu ova yoolokafana. Vamwe ohava ikilile diva eenghalo dipe. Ashike kuvamwe, efimbo keshe  tava ningi oinima oyo va li hava ningi novaholike vavo, ohashi va dimbulukifa efyo lookaume kavo. Ovanhu ohava nyika oluhodi meenghedi da yoolokafana. Natu dimbuluke kutya Jehova okwe tu pa oshinakuwanifwa shokufila oshisho ovo va filwa ookaume kopahombo. — Lesha Jakob 1:27.

17. Omolwashike ovo va fiwa po kookaume kopahombo va pumbwa ekwafo letu?

¹⁷ Ookaume kopahombo vamwe ohava kala ve na ouyahame wopamaliudo nosho yo ostresa ngeenge va fiwa po kookaume kavo. Joyce, oo a fiwa po komushamane waye, ndele ta ka kala nomukainhu umwe, okwa ti: “Eteyohombo ola yahameka nge unene shi dulife eshi ngeno omushamane wange a fya. Ngeno okwa file moshiponga ile kouyahame, ngeno ke na mo olunyala. Ashike paife, omushamane wange oye mwene a tokola okufiya nge po. Ondi udite nda shindwa noinandi fimanekwa.”

18. Oshike hatu dulu okuninga opo tu kwafele ovo vehe na vali ookaume kopahombo?

¹⁸ Ngeenge otwa longele vamwe ouwa ovo vehe na vali ookaume kopahombo, ohatu va ulikile kutya otu va hole shili. Paife ova pumbwa ookaume vawa shi dulife nale. (Omayel. 17:17) Ongahelipi to dulu okuulika kutya ou li kaume kavo? Oto dulu oku va shiva mu uye mu lye pamwe navo. Oto dulu okukala navo pomalihafifo onhumba ile moukalele. Omafimbo amwe oto dulu oku va shiva ve mu waimine pelongelokalunga loukwaneumbo. Ngeenge owa ningi ngaho, oto ka hafifa Jehova, molwaashi oku li “popepi nomitima da teyauka” noku li ‘omuyukifi wovafiyekadi.’ — Eps. 34:18; 68:5.

19. Tu na momadiladilo 1 Petrus 3:8, otwa tokola toko okuninga shike?

¹⁹ Mafiku, eshi Ouhamba waKalunga tau ka pangela edu, ‘omahepeko aeshe enya onale otaa ka dimbuwa.’ Otwa teelela efimbo olo eshi oinima ‘inya yonale itai ka dimbulukiwa vali, nongaashi kape na ou te ke i diladila momutima waye.’ (Jes. 65:16, 17) Fimbo twa teelela efiku olo, natu yambididafaneni, nokuulika meendjovo nomoilonga kutya otu hole ovamwatate novamwameme aveshe. — Lesha 1 Petrus 3:8.