1. Omolwashike tu na okupwilikina kelondwelo laJesus?

JESUS okwa xunganeka shi na sha nomafiku a xuuninwa a ti: ‘Lipashukileni, omitima deni diha lolokifwe koshisho shoipalwifa’ ile tu tye koisho yonghalamwenyo. (Luk. 21:34) Otwa pumbwa okupwilikina kelondwelo olo. Omolwashike mbela? Kunena, atusheni ohatu shakeneke omaupyakadi a faafana.

2. Ovamwatate novamwameme ohava shakeneke omaupyakadi elipi?

² Omafimbo amwe, ohatu shakeneke omaupyakadi a yoolokafana poshikando shimwe. Diladila koihopaenenwa tai shikula. Ondombwedi yedina John, * oyo ya kala tai mono oixuna komukifi oo hau lemaneke eendjila domaliudo, oya li ya nyemata neenghono eshi ya fiwa po komukulukadi wayo konima yomido 19 odo va kala mohombo. Ovanakadona vayo vavali ova li va efa po okulongela Jehova. Ovalihomboli vamwe, Bob naLinda, ova li va taalela omaupyakadi a yooloka ko kwaao aJohn. Aveshe ova li va kanifa oilonga nova li ve na okudja mo meumbo lavo. Kakele ashike komaupyakadi oo, Linda okwa li a monika oudu womutima oo wa li tau dulu oku mu dipaa nosho yo vali omukifi umwe oo wa li wa hovela okunghundipaleka ovakwaita vaye volutu.

3. She likolelela kOvafilippi 4:6, 7, ohatu dulu okukala noushili washike?

³ Ohatu dulu okukala noushili kutya Omushiti naTate yetu omunahole, Jehova, oku shii nghee omaupyakadi oo hae tu kumu. Okwa hala oku tu kwafela tu ungaunge nomaupyakadi oo hatu shakeneke. (Lesha Ovafilippi 4:6, 7.) MEendjovo daKalunga omu na omahokololo mahapu a popya omaupyakadi oo ovapiya vaye va li ve lididimikila. Omwa popiwa yo nghee Jehova a li e va kwafela va ungaunge neenghalo odo. Natu ka konakoneni oihopaenenwa yonhumba.

4. Elia okwa li a shakeneka omaupyakadi elipi, nokwa li e uditile ngahelipi Jehova?

⁴ Elia okwa li ha longele Jehova pefimbo lidjuu neenghono nokwa li a shakeneka omaupyakadi a kwata moiti. Ohamba Ahab, imwe yomeehamba odo da li dihe fi di diinini mondjokonona yOvaisrael, oya li ya hombola omukolokoshi Isabel, omulongeli waBaal. Aveshe vavali ova li va yadifa oshilongo nomahongo aBaal nova li va dipaifa ovaprofeti vaJehova vahapu. Elia okwa li a dula okuya onhapo. Okwa li yo a xupa kunakaidi kahalwenya mokukala e lineekela Jehova. (1 Eeh. 17:2-4, 14-16) Shimwe vali, Elia okwa li e lineekela muJehova eshi a li ta popi novaprofeti nosho yo ovalongeli vaBaal. Okwa li a ladipika Ovaisrael va longele Jehova. (1 Eeh. 18:21-24, 36-38) Elia okwa li e na oumbangi muhapu kutya Jehova okwa li te mu yambidida pefimbo olo la li lidjuu.

5-6. She likolelela ke 1 Eehamba 19:1-4, Elia okwa li e udite ngahelipi, nongahelipi Jehova a li a ulika kutya oku mu hole?

⁵ Lesha 1 Eehamba 19:1-4. Elia okwa li a tila eshi ohambakainhu Isabel ya li ye mu ningila omatilifo oku mu dipaa. Okwa li a ya onhapo kuBerseba. Okwa li a teka omukumo nomolwaasho a li ‘a pula a fye.’ Oshike sha li she mu ningifa a teke omukumo? Elia okwa li omulunde, “omunhu ngaashi fye.” (Jak. 5:17) Otashi dulika a li e udite a wililwa po koupyakadi nosho yo keloloko. Otashi dulika Elia a li e udite kutya eenghendabala daye dokuxumifa komesho elongelokalunga lashili odoshimha, kape na sha muIsrael sha xwepopala  nosho yo kutya oye aeke ta longele Jehova. (1 Eeh. 18:3, 4, 13; 19:10, 14) Otashi dulika onghedi omo omuprofeti oo omudiinini a li e linyenga i tu kumwife. Ashike Jehova okwa li e udite ko nghee Elia a li e udite.

⁶ Jehova ka li a hanyena Elia eshi a li te mu lombwele omaliudo aye. Ponhele yaasho, okwa li a kwafela Elia a kale vali e na omukumo. (1 Eeh. 19:5-7) Lwanima, Jehova okwa li a kwafela Elia a lundulule omadiladilo aye moku mu ulikila eenghono daYe dikumwifi. Jehova okwa li a popya kutya muIsrael omu na natango ovanhu 7 000 ovo va anya okulongela Baal. (1 Eeh. 19:11-18) Jehova okwa li a ulika kutya oku hole Elia eshi a li e mu lombwela ngaho.

7. Elineekelo lilipi hatu dulu okukala tu na muJehova okutala konghedi omo a li a kwafela Elia?

⁷ Mbela oto ungaunga noupyakadi wonhumba? Itashi hekeleke tuu okushiiva kutya Jehova okwa li e udite ko nghee Elia a li e udite! Otashi tu hekeleke okushiiva kutya oku shii yoo omaupyakadi etu. Oku shii omangabeko etu, noku shii nokuli osho hatu diladila nanghee tu udite. (Eps. 103:14; 139:3, 4) Ngeenge otwa hopaenene Elia mokukala twe lineekela muJehova, ote ke tu kwafela tu ungaunge nomaupyakadi oo hae tu etele ostresa. — Eps. 55:22.

8. Ongahelipi Jehova ta dulu oku ku kwafela u ungaunge noupyakadi?

⁸ Oupyakadi otau dulu oku ku diladilifa kutya onghalo yoye kai na efiku i lunduluke, tau ku ningifa u teke omukumo. Ngeenge osho osha ningwa, dimbuluka kutya Jehova ote ke ku kwafela u ungaunge noupyakadi. Ote ke ku kwafela ngahelipi mbela? Ote ku shivi u mu lombwele omaupyakadi oye. Note ke ku pa ekwafo olo we mu pula. (Eps. 5:3; 1 Pet. 5:7) Onghee ilikana kuJehova luhapu kombinga yomaupyakadi oye. Ita ka popya naave odikilila ngaashi a li a popya naElia, ndele ota ka popya naave okupitila mEendjovo daye, Ombiibeli, nosho yo mehangano laye. Omahokololo oo wa lesha mOmbiibeli otaa dulu oku ku hekeleka noku ku pa eteelelo. Natango, ovamwatate novamwameme otava dulu oku ku twa omukumo. — Rom. 15:4; Heb. 10:24, 25.

9. Ongahelipi kaume omulineekelwa ta dulu oku tu kwafela?

⁹ Eshi Jehova a li a lombwela Elia a yandje oshinakuwanifwa kuElisa, okwa li e mu pa kaume muwa oo a li ta dulu oku mu kwafela aha teke omukumo. Sha faafana, ngeenge otwa lombwele kaume ketu nghee tu udite, ote ke tu kwafela tu lididimikile omaupyakadi etu. (2 Eeh. 2:2; Omayel. 17:17) Ngeenge ou udite kutya kape na oo to dulu okulombwela nghee u udite, ilikana kuJehova e ku kwafele u mone Omukriste a pyokoka oo ta dulu oku ku twa omukumo.

10. Ongahelipi oshimoniwa shaElia tashi tu tu omukumo, nongahelipi eudaneko olo li li muJesaja 40:28, 29 tali tu kwafele?

¹⁰ Jehova okwa li a kwafela Elia e lididimikile oupyakadi waye noku mu longele noudiinini oule womido dihapu. Oshimoniwa shaElia otashi tu tu omukumo. Omafimbo amwe, otashi dulika tu lihange momaupyakadi a kwata moiti oo hae tu lolola palutu nopamadiladilo. Ashike ngeenge otwe lineekela muJehova, ote ke tu pa eenghono odo twa pumbwa opo tu twikile oku mu longela. — Lesha Jesaja 40:28, 29.

11-13. Ongahelipi omaupyakadi a li a kuma ovapiya vaKalunga vatatu vopefimbo lonale?

¹¹ Vamwe ovo va tumbulwa mOmbiibeli navo ova li va shakeneka omaupyakadi manene. Pashihopaenenwa, Hanna okwa li e lididimikila  okukala ongadji nosho yo okushekwa kunyamunghwao. (1 Sam. 1:2, 6) Oupyakadi waHanna owa li we mu handukifa nokwa li a lila nokwa kanifa ehalo lokulya. — 1 Sam. 1:7, 10.

¹² Omafimbo amwe, ohamba David nayo oya li ya wililwa po koupyakadi. Diladila koupyakadi oo ya li ya taalela. Oya li i udite ondjo omolwomapuko mahapu oo ya li ya ninga. (Eps. 40:12) Omonamati wayo Absalom ka li a dulika kuye, nolwanima okwa ka dipawa. (2 Sam. 15:13, 14; 18:33) David okwa li yo a kengelelwa kukaume kaye kopofingo. (2 Sam. 16:23–17:2; Eps. 55:12-14) Omapsalme mahapu oo David a shanga okwa popya nghee a li a teka omukumo nosho yo elineekelo laye muJehova ihaa li tengauka. — Eps. 38:5-10; 94:17-19.

¹³ Lwanima, omupsalme okwa li a hovela okutwila ondubo onghedi yokukalamwenyo yovakolokoshi. Omushangi wepsalme olo otashi dulika a li umwe womoludalo laAsaf, Omulevi, nokwa li ha yakula “mouyapuki waKalunga.” Omupsalme oo okwa kala e udite nai pamaliudo, naasho osha li she mu ningifa aha kale a hafa nokwa wanenwa. Okwa li nokuli a hovela okukala a limbililwa omanangeko noupuna oo haa di mokulongela Kalunga. — Eps. 73:2-5, 7, 12-14, 16, 17, 21.

14-15. Oshike hatu lihongo moihopaenenwa itatu yopaMbiibeli shi na sha nokukonga ekwafo kuJehova?

¹⁴ Ovapiya vaKalunga vatatu ovo va tumbulwa, aveshe ova li ve lineekela mekwafo laJehova. Ova li va ilikana kuJehova tave mu lombwele oisho yavo. Ova li va popya naye va manguluka kutya omolwashike va stresa. Ova li va twikila okuya kongulu yOmwene. — 1 Sam. 1:9, 10; Eps. 55:22; 73:17; 122:1.

¹⁵ Jehova okwa li e va ulikila aveshe olukeno. Hanna okwa li a mona ombili  yopamadiladilo. (1 Sam. 1:18) David okwa shanga a ti: “Omaudjuu omuyuki oku li mahapu, ndelenee Omwene ote mu xupifa mwaaeshe.” (Eps. 34:19) Nolwanima, omupsalme okwa kala e udite kutya Jehova ‘okwa kala e mu kwete kolulyo laye,’ note mu wilike nomayele opahole. Okwa imba a ti: “Okukala popepi naKalunga, osho elao lange; elineekelo lange onde li tula mOmwene Kalunga.” (Eps. 73:23, 24, 28) Oshike hatu lihongo koihopaenenwa oyo? Omafimbo amwe, otashi dulika tu kale twa wililwa po komaupyakadi oo hae tu etele ostresa. Ashike ohatu dulu okulididimika ngeenge otwa dilonga kunghee Jehova a li a kwafela vamwe, hatu mu ilikana, nokudulika kuye mokuninga osho ta pula tu ninge. — Eps. 143:1, 4-8.

16-17. (a) Omolwashike tuhe na okuliyoolola ko kuJehova nokovapiya vaye? (b) Ongahelipi hatu dulu okutuwa vali omukumo?

¹⁶ Oihopaenenwa oyo itatu otai tu hongo oshilihongomwa vali sha fimana kutya, katu na okuliyoolola ko kuJehova nokovapiya vaye. (Omayel. 18:1) Nancy, oo a li a shakeneka oupyakadi wa kwata moiti eshi omushamane waye e mu fiya po, okwa ti: “Omafiku mahapu  onda li handi kala inandi hala okumona ile okupopya novanhu. Ashike shimha nde liyoolola ko, ohandi kala unene ndi udite nai.” Oinima oya li ya lunduluka eshi Nancy a li a konga eemhito a kwafele vamwe ovo va li ve li momaupyakadi. Okwa ti: “Onda li handi pwilikine kuvamwe eshi tava lombwele nge omaupyakadi avo. Onda li nda didilika kutya, shimha handi yandje elitulemo kuvo nokomaupyakadi avo, ohandi yandje elitulemo linini kwaame mwene nokomaupyakadi ange.”

¹⁷ Ohatu dulu okukala tu na omukumo mokukala hatu i kokwoongala. Ngeenge tu li pokwoongala, ohatu pe Jehova omhito ya wedwa po yokukala ‘ekwafo nehekeleko’ letu. (Eps. 86:17) Pokwoongala opo Jehova he tu pameke nomhepo yaye iyapuki, nEendjovo daye nosho yo noshiwana shaye. Ngeenge tu li pokwoongala ohatu mono omhito ‘yokuhekelekafana.’ (Rom. 1:11, 12) Omumwameme Sophia okwa ti: “Jehova noumwainafana wetu ohava kwafele nge ndi lididimike. Osho sha fimanenena kwaame osho okwoongala. Onda mona kutya, shimha nde lipyakidila noukalele nosho yo nokwoongala, ohandi ungaunga nawa nomaupyakadi ange.”

18. Jehova ote ke tu pa shike ngeenge otwa teka omukumo?

¹⁸ Ngeenge twa teka omukumo, natu dimbuluke kutya Jehova ihe tu udanekele ashike kutya ota ka kufa po omaupyakadi oo monakwiiwa, ndele ohe tu kwafele yo opo tu ungaunge nao paife. Ohe tu pe ‘eenghono nekwafo’ opo tu finde etekomukumo notu lididimike nomupondo. — Fil. 2:13, NW.

19. Ovaroma 8:37-39 ove tu udanekela shike?

¹⁹ Lesha Ovaroma 8:37-39. Omuyapostoli Paulus okwe tu udanekela kutya kape na osho tashi dulu oku tu tukula ko kohole yaKalunga. Ongahelipi hatu dulu okukwafela ovamwatate novamwameme ovo tava kendabala okulididimikila omaupyakadi? Oshitukulwa tashi shikula ko otashi ka kundafana nghee hatu dulu okuhopaenena Jehova mokuulika olukeno nomokuyambidida ovamwatate novamwameme ngeenge ve li momaupyakadi.