1-2. (a) Jehova oha popi ngahelipi novanhu? (b) Oshike hatu ka kundafana moshitukulwa eshi?

JEHOVA oku hole okupopya nafye. Monakudiwa, okwa li ha longifa ovaprofeti, ovaengeli nosho yo Omona waye, Kristus Jesus, opo a lombwele ovanhu omadiladilo aye. (Amos 3:7; Gal. 3:19; Eh. 1:1) Kunena, oha popi nafye okupitila mEendjovo daye, Ombiibeli. Okwe i tu pa opo tu shiive omadiladilo aye notu ude ko eendjila daye.

² Eshi Jesus a li kombada yedu, Jehova okwa li a popya okudja meulu poiningwanima oyo itatu. Natu ka kundafane osho Jehova a popya, osho hatu lihongo meendjovo daye nanghee hatu mono ouwa mwaasho a popya.

3. PaMarkus 1:9-11, Jehova okwa popya shike eshi Jesus a ninginifwa, neendjovo daye oda koleka oinima ya fimana itatu ilipi?

³ Markus 1:9-11 okwa popya oshiningwanima shotete opo Jehova a popya okudja meulu. (Lesha.) Okwa ti: “Oove Omona wange omuholike, onde ku hokwa.” Osho kasha li tuu sha kuma omutima waJesus eshi a uda Xe te mu lombwele kutya oku mu hole nonokutya okwe mu hokwa! Eendjovo daJehova oda koleka oinima itatu ya fimana kombinga yaJesus. Shotete, Jesus Omona waye. Oshitivali, Jehova oku hole Omona waye. Noshititatu, Jehova okwa hokwa Omona waye. Natu ka konakoneni noukeka kooshimwe.

4. Ekwatafano lipe lilipi Jesus a li e na naKalunga eshi a ninginifwa?

⁴ “Oove Omona wange.” Paendjovo odo, Jehova okwa ulika kutya okwa hovela ekwatafano lipe nOmona waye omuholike, Jesus. Eshi Jesus a li meulu, okwa li omona wopamhepo waKalunga. Ashike peninginifo laye, okwa li a vaekwa nomhepo  iyapuki. Kungaho, Jesus, e li omuvaekwa, okwa li a pewa eteelelo lokushuna meulu a ka ninge Ohamba nOmupristeli Omukulunhu. (Luk. 1:31-33; Heb. 1:8, 9; 2:17) Onghee osha yeleka eshi peninginifo laJesus Xe a ti: “Oove Omona wange.” — Luk. 3:22.

5. Ongahelipi hatu dulu okuhopaenena Jehova mokuulika ohole nokutwa vamwe omukumo?

⁵ “Oove . . . omuholike.” Oshihopaenenwa shaJehova shokuulika ohole nokutwa vamwe omukumo otashi tu dimbulukifa tu konge eemhito tu twe vamwe omukumo. (Joh. 5:20) Ohashi tu pameke ngeenge umwe oo tu hole e tu ulikila ohole nokwe tu pandula omolwouwa oo hatu ningi. Sha faafana, ovamwatate novamwameme meongalo nosho yo oilyo youkwaneumbo wetu, otwa pumbwa oku va ulikila ohole noku va twa omukumo. Eshi hatu pandula vamwe, ohatu pameke eitavelo lavo noku va kwafela va longele Jehova noudiinini. Ovadali ovo unene va pumbwa okutwa omukumo ovana vavo. Ngeenge ovadali ova pandula ovana tashi di komutima noku va ulikila ohole, otave va kwafele va pondole.

6. Omolwashike tu na elineekelo muJesus Kristus?

⁶ “Onde ku hokwa.” Eendjovo odo oda ulika kutya Jehova okwa li e na elineekelo kutya, Jesus ota ka longa noudiinini ehalo laYe. Molwaashi Jehova okwa li e na elineekelo la tya ngaho mOmona waye, nafye ohatu dulu okukala nelineekelo kutya Jesus ota ka wanifa po omaudaneko aeshe aJehova. (2 Kor. 1:20) Ngeenge otwa diladila koshihopaenenwa shaJesus, ohatu pameke etokolo letu lokulihonga kuye nokushikula oshihopaenenwa shaye. Ngaashi ashike Jehova a li e na elineekelo muJesus, oku na yo elineekelo kutya ovapiya vaye aveshe otava ka twikila okulihonga kOmona waye. — 1 Pet. 2:21.

7. PaMateus 17:1-5, oposhiningwanima shilipi Jehova a popya okudja meulu, nokwa popya shike?

⁷ Lesha Mateus 17:1-5. Oshikando oshitivali Jehova a popya okudja meulu osheshi Jesus a li a “shituka.” Jesus okwa li a kufa Petrus, Jakob naJohannes va ye pamwe naye komhunda ile unene. Ofimbo va li oko, ova li va mona emoniko lididilikwedi. Oshipala shaJesus osha li sha vema, noikutu yaye oya li ya yela. Ovalumenhu vavali, ve lile po Moses naElia, ova li va hovela okupopya naJesus kombinga yefyo nenyumuko laye. Nonande ovalumenhu ovo ova li va “umbwa eemhofi didjuu,” ova li va mona emoniko olo likumwifi eshi va penduka. (Luk. 9:29-32) Opo nee, ova li va tuvikilwa koshilemo shi yela nova uda ondaka ya dja moshilemo, ondaka yaKalunga. Ngaashi peninginifo laJesus, Jehova okwa li a ulika kutya okwa hokwa noku hole Omona waye, eshi a ti: “Ou Omona wange omuholike, onde mu hokwa.” Ashike pomhito oyo Jehova okwa weda ko a ti: “Mu udeni.”

8. Emoniko olo ola li la kuma ngahelipi Jesus nosho yo ovahongwa vaye?

⁸ Emoniko olo ola li la ulika efimano neenghono odo Jesus ta ka kala e na monakwiiwa e li Ohamba yOuhamba waKalunga. Kape na omalimbililo kutya Kristus okwa li a tuwa omukumo nokwa pamekwa omolwoixuna nefyo li yahameka olo a li te ke lididimikila. Emoniko olo ola li yo la pameka eitavelo lovahongwa. Ola li le va kwafela ve lilongekidile omayeleko oo va li tava ka shakeneka nosho yo oilonga idjuu oyo va li ve na okulonga. Lwanima konima yomido 30, omuyapostoli Petrus okwa li a popya kombinga yemoniko olo eshi Jesus a li a shituka, osho tashi ulike kutya okwa li te li dimbuluka nawa natango. — 2 Pet. 1:16-18.

9. Omayele taa longo elipi Jesus a li a pa ovahongwa vaye?

⁹ “Mu udeni.” Jehova okwa popya sha yela kutya okwa hala tu pwilikine keendjovo dOmona waye nokudulika kudo. Jesus okwa popya shike eshi a li kombada yedu? Okwa popya oinima ihapu ya fimanenena okupwilikinwa. Pashihopaenenwa, okwa honga pahole ovashikuli vaye nghee ve na okuudifa onghundana iwa, nokwe va dimbulukifa lwoikando va kale oupafi. (Mat. 24:42; 28:19, 20) Okwe va lombwela yo va kondje, nokwe va twa omukumo vaha tule omutwe kepepe. (Luk. 13:24) Jesus okwa popya kutya ovashikuli vaye ova pumbwa okukala ve holafane, ve li moukumwe nohava diinine oipango yaye. (Joh. 15:10, 12, 13) Okwa li yo a pa ovahongwa vaye omayele taa longo. Omayele oo okwa fimana nokunena ngaashi ashike pefimbo opo Jesus a li e a yandja.

10-11. Ongahelipi hatu dulu okuulika kutya ohatu pwilikine kuJesus?

¹⁰ Jesus okwa ti: “Keshe ou womoshili, ye ota udu ondaka yange.” (Joh. 18:37) Ohatu ulike kutya ohatu pwilikine kondaka yaye ngeenge hatu ‘lididimikilafana nokudiminafana po.’ (Kol. 3:13; Luk. 17:3, 4) Ohatu ulike yo kutya ohatu pwilikine kondaka yaye ngeenge hatu udifa nouladi onghundana iwa “mefimbo liwa nomefimbo lii.” — 2 Tim. 4:2.

¹¹ Jesus okwa ti: “Eedi dange ohadi udu ondaka yange.” (Joh. 10:27) Ovashikuli vaKristus ohava ulike kutya ihava pwilikine ashike kuye mokuyandja elitulemo keendjovo daye, ndele ohave di tula yo moilonga. Ihava piyaanekwa “koshisho shoipalwifa.” (Luk. 21:34) Ponhele yaasho, osha fimana kuvo okudulika koipango yaJesus, nokuli nomeenghalo didjuu. Ovamwatate vahapu otave lididimikile omayeleko a kwata moiti, mwa kwatela okuponokelwa kovapataneki, oluhepo nosho yo  oiponga yopaushitwe. Nonande ove li meenghalo adishe odo, ohava kala ovadiinini kuJehova kashi na nee mbudi kutya otava mono oixuna. Jesus okwe va udanekela a ti: “Ou e noipango yange ndele te i diinine, oye tuu ou e hole nge; ndele ou e hole nge, ota kala e holike kuTate.” — Joh. 14:21.

12. Omonghedi imwe vali ilipi hatu dulu okuulika kutya ohatu pwilikine kuJesus?

¹² Onghedi imwe vali omo hatu dulu okuulika kutya ohatu pwilikine kuJesus: omokulongela kumwe naavo a nangeka po ve tu kwatele komesho. (Heb. 13:7, 17) Ehangano laKalunga ola ninga omalunduluko mahapu omido opo da di ko, mwa kwatelwa okulongifa oilongifo neenghedi dipe moukalele, pokwoongala kwomokati koshivike nosho yo onghedi yokutunga, okuwapekulula nokukaleka Omalupale Ouhamba monghalo iwa. Otwa pandula unene ewiliko lopahole la tya ngaho. Ohatu dulu okukala tu na oushili kutya Jehova ota ka nangeka noupuna eenghendabala detu dokushikula ewiliko olo hatu pewa kehangano laye.

13. Omauwa elipi haa di mokupwilikina kuJesus?

¹³ Ohatu mono ouwa mokupwilikina koinima aishe oyo Jesus a honga. Jesus okwa udanekela ovahongwa vaye kutya omahongo aye otae ke va tulumukifa. Okwa ti: ‘Otamu monene eemwenyo deni etulumuko. Osheshi ondjoko yange oiwa nomutengi wange omupu.’ (Mat. 11:28-30) Eendjovo daKalunga, mwa kwatelwa omahokololo omavangeli ane e na sha nonghalamwenyo noukalele waJesus, ohadi tu tulumukifa, hadi pameke eitavelo letu nohadi tu pe ounongo. (Eps. 19:7; 23:3) Jesus okwa ti: “Ovanelao ovava tava udu eendjovo daKalunga ndele tave di diinine.” — Luk. 11:28.

14-15. (a) PaJohannes 12:27, 28, oposhiningwanima oshititatu shilipi Jehova a popya okudja meulu? (b) Omolwashike eendjovo daJehova da li da hekeleka nokupameka Jesus?

¹⁴ Lesha Johannes 12:27, 28. Evangeli laJohannes ola popya oshiningwanima oshititatu opo Jehova a popya okudja meulu. Omafiku manini ofimbo Jesus ina fya, okwa li muJerusalem a dane opaasa yaye yaxuuninwa. Okwa ti: “Omwenyo wange owa tukuluka.” Opo nee okwa ilikana a ti: “Tate, fimanekifa edina loye.” Xe okwa popya okudja meulu a ti: “Ame onde li fimanekifa nale, ndele ohandi li fimanekifa vali.”

 ¹⁵ Jesus okwa li a nyika oluhodi omolwoshinakuwanifwa shinene shokukala omudiinini kuJehova. Okwa li e shii kutya ota ka mona oixuna neenghono nokufya efyo linyanyalifi. (Mat. 26:38) Komesho yoinima aishe oyo, okwa li a hala okufimanekifa edina laXe. Okwa li ta patanekelwa oukolokoshi, nokwa li te lipula kutya efyo laye otali ka shekifa Kalunga. Ashike eendjovo daJehova oda li da pameka elineekelo laJesus. Okwa li ta dulu okukala e na oushili kutya edina laJehova otali ka fimanekifwa. Eendjovo daXe odi na okukala da li de mu hekeleka node mu pameka e lididimikile okumona oixuna oko a li ta ka shakeneka. Nonande otashi dulika pefimbo opo Jesus oye aeke a li e shii osho Xe a popya, Jehova okwa shangifa eendjovo odo omolwetu. — Joh. 12:29, 30.

16. Omolwashike omafimbo amwe tashi dulika tu lipule shi na sha nokushekifa edina laKalunga?

¹⁶ Ngaashi Jesus, nafye otashi dulika tu lipule shi na sha nokushekifa edina laJehova. Otashi dulika hatu ungaungiwa nafye shihe li pauyuki ngaashi Jesus. Ile otashi dulika tu piyaanekwe komahokololo oipupulu oo ovapataneki hava tandaveleke kombinga yetu. Otashi dulika tu diladile kutya omahokololo oo otaa shekifa edina laJehova nosho yo ehangano laye. Ngeenge osho tu udite ngaho, eendjovo daJehova otadi ka kala ehekeleko linene kufye. Inatu pumbwa okukala tu na oshisho unene. Ohatu dulu okukala noushili  kutya “ombili yaKalunga ei i dule eendunge adishe, otai ka amena omitima [detu] nomadiladilo [etu] muKristus Jesus.” (Fil. 4:6, 7) Jehova ita ka dopa nandenande okufimanekifa edina laye. Ngeenge Ouhamba waye owe uya, ota ka kufa po oinima aishe ii oyo Satana nounyuni waye wa etela ovapiya vaYe. — Eps. 94:22, 23; Jes. 65:17.

17. Metwokumwe naJesaja 30:21, Jehova oha popi ngahelipi nafye kunena?

¹⁷ Natango Jehova oha popi nafye kunena. (Lesha Jesaja 30:21.) Oshoshili kutya ihatu udu Kalunga ta popi nafye okudja meulu. Ashike ohe tu pe omalombwelo okupitila mEendjovo daye, Ombiibeli. Shikwao vali, omhepo yaJehova ohai linyengifa “omukeleli weumbo omudiinini” a twikile okupa ovapiya vaYe eendja. (Luk. 12:42) Ope na oishangomwa ihapu yapilindwa naayo i li kointaneta nosho yo ouvidio vahapu noishangomwa ya kwatwa momawi oyo tai dulu oku tu kwafela tu pameke eitavelo letu.

18. Eendjovo daJehova oda pameka ngahelipi eitavelo loye node ku pa ngahelipi ouladi?

¹⁸ Natu kaleke momadiladilo eendjovo odo Jehova a li a popya eshi Omona waye a li kombada yedu. Eendjovo daKalunga, odo di li mOmbiibeli, nadi tu pe elineekelo kutya oku wete oinima aishe nota ka kufa po oinima ii oyo twa etelwa kuSatana nokounyuni waye. Natu kale twa tokola toko okupwilikina noukeka kuJehova. Ngeenge otwa ningi ngaho, ohatu ke lididimikila nomupondo omaupyakadi oo tashi dulika tu taalele nosho yo omashongo oo hatu ka shakeneka. Ombiibeli oye tu dimbulukifa ya ti: “Otamu pumbwa elididimiko, opo mu wanife ehalo laKalunga, nokupewa eshi mwe shi udanekelwa.” — Heb. 10:36.