OSHITUKULWA SHOKUKONAKONWA 19
Ohole nouyuki mounyuni wa kolokosha
“Ove ku fi Kalunga ha hokwa oulunde. Omunawii ke nokukala pwoove.” — EPS. 5:4.
EIMBILO 142 Tu kanyateleni keteelelo letu
EXUKU LOSHITUKULWA *
1-3. (a) She likolelela kEpsalme 5:4-6, Jehova oha kala e uditile ngahelipi oulunde? (b) Omolwashike hatu tile kutya okuhepeka ounona pamilele oku li omhinge ‘nomhango yaKristus’?
JEHOVA KALUNGA oku tonde oludi keshe loukolokoshi. (Lesha Epsalme 5:4-6.) Oku tonde neenghono okuhepeka ounona pamilele, oko kunyanyalifi nokutondifa. Tu li Eendombwedi daJehova, ohatu hopaenene Jehova notu tonde okuhepekwa kwounona pamilele noihatu ku pitikile mo meongalo lopaKriste. — Rom. 12:9; Heb. 12:15, 16.
2 Okuhepeka ounona pamilele oku li omhinge ‘nomhango yaKristus.’ (Gal. 6:2) Omolwashike hatu tile ngaho? Ngaashi twe lihonga moshitukulwa sha tetekela, omhango yaKristus, oyo i li oinima aishe oyo Jesus a honga okupitila meendjovo nomoshihopaenenwa shaye, oya kanghamena kohole nohai xumifa komesho ouyuki. Molwaashi Ovakriste vashili ohava dulika komhango oyo, ohava ungaunga nounona monghedi oyo tai va ningifa va kale ve udite va amenwa nove holike shili. Ashike okuhepeka ounona pamilele oku li onghedi yokuliholamwene, ihe li pauyuki nohai ningifa okaana ka kale ke udite inaka amenwa noka ke holike.
3 Shinyikifa oluhodi, okuhepeka ounona pamilele ohaku ningwa mounyuni aushe, nosha kuma Ovakriste vashili. Omolwashike? Omolwaashi “ovanhu vai novakengeleledi” otava xumu komesho, navamwe otava kendabala okuuya meongalo. (2 Tim. 3:13) Shikwao vali, vamwe ovo va li hava longele Jehova ove liyandja komahalo opambelela nova hepeka ounona pamilele. Natu ka kundafaneni kutya omolwashike okuhepeka ounona pamilele ku li enyono la kwata moiti. Ohatu ka kundafana yo kutya ovakulunhuongalo ohava ningi po shike ngeenge umwe meongalo okwa nyono enyono la kwata moiti, mwa kwatelwa okuhepeka ounona pamilele, nanghee ovadali tava dulu okwaamena ovana. *
ENYONO LA KWATA MOITI
4-5. Omolwashike okuhepeka ounona pamilele ku Ii enyono kwaao a ninga oshihakanwa?
4 Okuhepeka ounona pamilele ohaku kumu ovanhu efimbo lile. Ohaku kumu ounona nosho yo ovo tave va file oshisho, ngaashi ovapambele nosho yo ovamwatate novamwameme. Okuhepeka ounona pamilele oku li enyono la kwata moiti.
5 Okuhepeka ounona pamilele oku Ii enyono kwaao a ninga oshihakanwa. * Oshi li enyono lokuyahameka vamwe noku va ningifa va mone oixuna. Ngaashi hatu ke shi mona moshitukulwa tashi landula ko, omuhepeki wokaana ohe ka yahameke meenghedi di nyanyalifi. Nonande okaana ohaka kala ke mu lineekela, ohe ka yahameke owina nohe ka ningifa ka kale ke udite inaka amenwa. Ounona ova pumbwa okwaamenwa koinima ya tya ngaho, naavo va li va hepekwa pamilele eshi va li vanini ova pumbwa ehekeleko nokukwafelwa. — 1 Tes. 5:14.
6-7. Omolwashike okuhepeka ounona pamilele ku Ii enyono keongalo nosho yo komapangelo opanhu?
6 Okuhepeka ounona pamilele oku Ii enyono keongalo. Oshilyo sheongalo osho sha hepeka okaana pamilele ohashi shekifa eongalo. (Mat. 5:16; 1 Pet. 2:12) Kashi li pauyuki okupopya kutya eongalo lopaKriste ola pitika okuhepekwa kwounona pamilele, molwaashi Ovakriste ovadiinini otava “kondjele eitavelo.” (Jud. 3) Ihatu pitike ovanhu ovo hava ningi oinima ii noinave livela ombedi nosho yo ovo hava shekifa edina leongalo va kale meongalo.
7 Okuhepeka ounona pamilele oku Ii enyono komapangelo opanhu. Ovakriste ove na ‘okudulika kovapangeli ava have va pangele.’ (Rom. 13:1) Ohatu ulike kutya ohatu dulika mokufimaneka eemhango doshilongo. Ngeenge oshilyo sheongalo osha nyono omhango, ngaashi okuhepeka okaana pamilele, osha nyona komapangelo opanhu. (Yelekanifa nOilonga 25:8.) Nonande ovakulunhuongalo kave na oufemba wokutokola ovo va nyona omhango yoshilongo, ihava amene oo a hepeka okaana pamilele koilanduliko yopaveta yenyono laye. (Rom. 13:4) Omunyoni oha teya osho a kuna. — Gal. 6:7.
8. Jehova oha tale ko ngahelipi omanyono oo a ningilwa ovanhu?
8 Komesho yaaishe, okuhepeka ounona pamilele oku Ii enyono kuKalunga. (Eps. 51:4) Ngeenge omunhu okwa nyono komunhu mukwao, okwa nyona yo kuKalunga. Diladila koshihopaenenwa shomOmhango oyo Kalunga a li a pa Ovaisrael. Omhango oya li ya popya kutya, ngeenge omulumenhu e likufila ile a nyeka sha shamukwao ita ‘dulika kOmwene.’ (Lev. 6:2-4) Onghee hano, oshilyo sheongalo osho sha hepeka okaana pamilele, sha nyona po eameno lokaana, itashi dulika kuKalunga. Omuhepeki oha shekifa edina laJehova. Onghee okuhepeka ounona pamilele oku na okutokolwa, molwaashi oku li enyono la kwata moiti kuKalunga.
9. Ehangano laJehova ola kala nokunyanyangida ouyelele wopaMbiibeli ulipi oule womido, nomolwashike?
9 Oule womido, ehangano laJehova ola kala nokunyanyangida ouyelele wopaMbiibeli muhapu u na sha nokuhepeka ounona pamilele. Pashihopaenenwa, oitukulwa oyo hai kala mOshungonangelo nomo-Awake! oya kundafana nghee ovo va hepekwa pamilele tava dulu okuungaunga nouyahame wopamaliudo, nghee vamwe tava dulu oku va kwafela noku va twa omukumo nosho yo nghee ovadali tava dulu okwaamena ovana. Ovakulunhuongalo ova pewa edeulo lopaMbiibeli li na sha nanghee ve na okuungaunga nenyono li na sha nokuhepeka okaana pamilele. Ehangano otali twikile okutala onghedi omo omaongalo haa ungaunga nenyono li na sha nokuhepeka okaana pamilele. Omolwashike? Opo li shilipaleke kutya onghedi omo hatu ungaunga noshinima osho, oi li metwokumwe nomhango yaKristus.
OKUUNGAUNGA NOMANYONO A KWATA MOITI
10-12. (a) Ngeenge ovakulunhuongalo tava ungaunga nenyono la kwata moiti, ohava kaleke shike momadiladilo nohave lipula nashike? (b) She likolelela kuJakob 5:14, 15, ovakulunhuongalo ohava kendabala okuninga shike?
10 Ngeenge ovakulunhuongalo tava ungaunga noshinima shi na sha nenyono la kwata moiti, ohava kaleke momadiladilo kutya omhango yaKristus otai pula va ungaunge noufita pahole nokuninga osho sha yuka momesho aKalunga. Ove na okudiladila noukeka kombinga yoinima yonhumba, ngeenge va udu kutya umwe okwa nyona enyono la kwata moiti. Ovakulunhuongalo ohava kala tave lipula unene nokuyapulifa edina laKalunga. (Lev. 22:31, 32; Mat. 6:9) Natango ohave lipula shi nasha noupamhepo wovamwatate novamwameme meongalo nova hala okukwafela keshe oo a hepekwa pamilele.
11 Natango, ngeenge oo a nyona enyono la kwata moiti okwe livela ombedi, ovakulunhuongalo ohava kendabala oku mu kwafela opo a kale vali e na ekwatafano liwa naJehova. (Lesha Jakob 5:14, 15.) Omukriste oo he liyandje komahalo a puka, ndele ta nyono enyono la kwata moiti, ota yahama pamhepo. Osho osha hala okutya ke na vali ekwatafano liwa naJehova. * Monghedi ya tya ngaho, ovakulunhuongalo ove li eendokotola dopamhepo. Ohava kendabala ‘okuvelula omunaudu [sha hala okutya omunyoni].’ Ohava longifa omayele opaMbiibeli opo ve mu kwafele a kale vali e na ekwatafano liwa naJehova, ndele ongeenge ashike e livela ombedi shili. — Oil. 3:19; 2 Kor. 2:5-10.
12 Osha yela kutya, ovakulunhuongalo ove na oinakuwanifwa ya fimana. Ohava file oshisho eongalo olo ve lineekelelwa kuKalunga. (1 Pet. 5:1-3) Ova hala ovamwatate novamwameme va kale ve udite va amenwa meongalo. Onghee ohava katuka diva ngeenge ova lopotelwa enyono la kwata moiti, mwa kwatelwa okuhepeka okaana pamilele. Konakona epulo olo li li pehovelo lokatendo 13, 15 nosho yo 17.
13-14. Mbela ovakulunhuongalo ohava dulika ngoo keemhango doshilongo di na sha nokulopota enyono li na sha nokuhepeka okaana pamilele? Shi yelifa.
13 Mbela ovakulunhuongalo ohava dulika ngoo keemhango doshilongo di na sha nokulopota enyono li na sha nokuhepeka okaana pamilele komapangelo opanhu? Heeno. Moilongo omo mu na eemhango da tya ngaho, ovakulunhuongalo ohava kendabala okudulika keemhango doshilongo di na sha nokulopota enyono li na sha nokuhepeka okaana pamilele. (Rom. 13:1) Eemhango da tya ngaho, itadi kondjifafana nomhango yaKalunga. (Oil. 5:28, 29) Ngeenge ovakulunhuongalo ova lopotelwa kutya ope na okaana ka hepekwa pamilele, ohava pula oshitaimbelewa kutya ove na okudulika ngahelipi keemhango di na sha nokulopota.
14 Ngeenge ovakulunhuongalo ova popi naao a ninga oshihakanwa nosho yo ovadali vaye, ile vamwe ovo ve shii kombinga yoshinima osho, ohave va lombwele kutya ova manguluka oku ke shi lopota kopolifi. Ndele ongahelipi ngeenge nakulopotwa oku li oshilyo sheongalo, ndele oshinima osho tashi shiivika momudingonoko? Mbela Omukriste oo e shi lopota okwa pumbwa okukala e udite kutya okwa shekifa edina laKalunga? Ahowe. Nakulonga omunyonena oo oye a shekifa edina laKalunga.
15-16. (a) She likolelela ku 1 Timoteus 5:19, omolwashike pa pumbiwa eendombwedi mbali ofimbo ovakulunhuongalo inava katuka onghatu yopamhangu? (b) Ovakulunhuongalo ohava ningi po shike ngeenge ova udu kutya oshilyo shimwe sheongalo otashi fekelwa sha hepeka okaana pamilele?
15 Ofimbo ovakulunhuongalo inava katuka onghatu yopamhangu meongalo, omolwashike pa pumbiwa eendombwedi mbali? Oshiteelelwa osho oshi li oshitukulwa shomifikamhango dOmbiibeli di na sha nouyuki. Ngeenge omunyoni ote likale, ope na okukala pe na eendombwedi mbali di popile oshinima osho ofimbo ovakulunhuongalo inava tota po okomitiye yopamhangu meongalo. (Deut. 19:15; Mat. 18:16; lesha 1 Timoteus 5:19.) Mbela osho osha hala okutya ope na okukala eendombwedi mbali ofimbo oshinima osho inashi lopotwa kopolifi? Ahowe. Inapa pumbwa eembangi mbali opo ngeno ovakulunhuongalo ile vamwe va ka lopote kopolifi omunhu oo taa fekelelwa omunyonena wa tya ngaho.
16 Ngeenge ovakulunhuongalo ova udu kutya oshilyo shimwe sheongalo otashi fekelwa kutya osha hepeka okaana pamilele, otava shikula eemhango doshilongo moku ka lopota oshinima osho, notava ka tala kutya Ombiibeli otai ti shike kombinga yaasho. Ngeenge omufekelwa ote likale, ovakulunhuongalo ohava konakona oumbangi oo va lombwelwa keendombwedi odo. Ngeenge omupataneki nosho yo umwe ova ti kutya omunhu oo okwa hepeka okaana pamilele ile okaana kamwe ke lili oshikando sha pita, ovakulunhuongalo otava ka tota po okomitiye yopamhangu meongalo. * Okukala po kwondombwedi onhivali itashi ti kutya oo a lopota oshinima tete ita popi oshili. Nokuli nonande kape na eendombwedi mbali di koleke kutya omunhu oo okwa hepeka okaana pamilele, otashi dulika ovakulunhuongalo ve shii kutya omufekelwa okwa ninga oshinima shii osho sha yahameka vamwe neenghono. Ovakulunhuongalo otava ka twikila okukwafela vamwe ovo va yahamekwa. Shikwao vali, ovakulunhuongalo otava ka kala nokutala eenghatu domunhu oo, opo aha longele eongalo oushada. — Oil. 20:28.
17-18. Yelifa oshinakuwanifwa shovakulunhuongalo ovo ve li mokomitiye yopamhangu meongalo.
17 Oshinakuwanifwa shokomitiye yopamhangu meongalo oshashike? Oshitya “pamhangu” inashi hala okutya ovakulunhuongalo ohava tokola, ile hava yandje omalombwelo kutya omunyoni oku na okuhandukilwa kepangelo eshi a tauluka omhango. Ovakulunhuongalo ihave lidopo moinima yepangelo ngeenge tashi uya pokutokolela ovanyoni omahandukilo; ohava efele oinima ya tya ngaho momake epangelo. (Rom. 13:2-4; Tit. 3:1) Ponhele yaasho, ohava tokola ngeenge omunyoni na kale meongalo ile hasho.
18 Oshinakuwanifwa shovakulunhuongalo ovo ve li mokomitiye yopamhangu meongalo, osho okuungaunga noinima oyo ya kwatela mo ekwatafano lomunhu naKalunga nosho yo ovaitaveli vakwao. Ohava longifa Omishangwa opo va tokole kutya omunyoni okwe livela ombedi ile hasho. Ngeenge ine livela ombedi, oha kondwa mo meongalo neshiivifo ohali ningwa meongalo. (1 Kor. 5:11-13) Ngeenge okwe livela ombedi, ota dulu okukala meongalo. Ashike ovakulunhuongalo otave ke mu lombwela kutya ita ka kala e na oinakuwanifwa meongalo. Molwaashi ovakulunhuongalo ove na ko nasha nonghalonawa younona, otashi dulika va lombwele ovadali vounona meongalo opo va kale tava pashukile ovana ngeenge ve li popepi nomunyoni oo. Ngeenge ovakulunhuongalo tava lombwele ovadali oshinima sha tya ngaho, ihava yandje ouyelele womunhu oo a ningilwa omunyonena.
NGHEE U NA OKWAAMENA OVANA VOYE
Ovadali tava amene ovana komahepeko opamilele eshi tava kundafana navo ouyelele tau wapalele kombinga yomilele. Opo ovadali mu ninge ngaho, longifeni ouyelele oo wa nyanyangidwa kehangano laJehova. (Tala oshitukulwa shokukonakonwa oshi-19, okatendo 19-22)
19-22. Oshike osho ovadali ve na okuninga opo va amene ovana? (Tala efano kombada yoshifo.)
19 Oolyelye ve na oshinakuwanifwa shokwaamena ounona? Ovadali. * Ounona ove li ‘oshali ya dja kuJehova’ oyo e mu lineekelela. (Eps. 127:3) Jehova okwe mu pa oshinakuwanifwa shokwaamena ovana veni. Oshike u na okuninga opo u amene ovana voye vaha longelwe ominyonena?
20 Shotete, shiiva shihapu kombinga yokuhepeka ounona pamilele. Shiiva shihapu kombinga yovanhu ovo hava hepeke ounona pamilele nosho yo eemwiyo odo hava longifa opo ve va yule. Kala wa lungamena ovanhu ovo tava monika va nyika oshiponga. (Omayel. 22:3; 24:3) Dimbuluka kutya peemhito dihapu, omuhepeki oha kala omunhu oo okaana ke shii noke lineekela.
21 Oshitivali, kala u na ekwatafano liwa novana voye. (Deut. 6:6, 7) Osho osha kwatela mo okukala omupwilikini muwa. (Jak. 1:19) Dimbuluka kutya ounona ovo va hepekwa pamilele ohava kala va tila oku shi lombwela vamwe. Otashi dulika va kale va tila kutya kape na oo ta ka itavela osho tava popi, ile ovo ve va hepeka ve va ningila omatilifo kutya inave shi popya. Ngeenge owa didilike kutya ope na sha sha puka, va pula omapulo noukeka nokupwilikina komanyamukulo avo nelididimiko.
22 Oshititatu, honga ovana voye. Popya navo kombinga yomilele she likolelela komido davo. Va honga osho ve na okutya nokuninga ngeenge umwe te va kwata monghedi inai wapala. Longifa ouyelele oo ehangano laJehova la nyanyangida u na sha nanghee u na okwaamena ovana voye. — Tala oshimhungu “ Shiiva shihapu nokuhonga ovana voye.”
23. Ohatu tale ko ngahelipi omahepeko oo haa ningilwa ounona pamilele, nepulo lilipi tali ka nyamukulwa moshitukulwa tashi shikula ko?
23 Tu li Eendombwedi daJehova, ohatu tale ko omahepeko oo haa ningilwa ounona pamilele e li enyono la kwata moiti noku li omunyonena. Molwaashi ohatu dulika komhango yaKristus, ihatu amene oo a hepeka okaana pamilele koilanduliko yenyono laye. Mbela oshike hatu dulu okuninga po opo tu kwafele ovo va hepekwa pamilele? Oshitukulwa tashi shikula ko otashi ka nyamukula epulo olo.
EIMBILO 103 Ovafita ove li eeshali
^ par. 5 Oshitukulwa eshi otashi ka kundafana nghee ounona tava dulu okwaamenwa opo vaha hepekwe pamilele. Ohatu ke lihonga nghee ovakulunhuongalo hava amene eongalo, nanghee ovadali tava dulu okwaamena ounona vavo.
^ par. 3 OUTUMBULILO WA YELIFWA: Okuhepeka okaana pamilele ohaku ningwa ngeenge omukulunhu ta longifa okaana opo a wanife po omahalo aye opamilele. Osho osha kwatela mo oluhaelo, okulongifa okanya ongoshilongifo shokunangalafana ile okweendafana konima, okukwatakwata koilyo yoludalo, ngaashi komavele ile komatako, ile oinima imwe vali. Nonande oukadona ovo unene hava ningi oihakanwa, ovamati vahapu navo ohava hepekwa yo pamilele. Nonande ovalumenhu ovo unene hava hepeke ounona pamilele, ovakainhu vamwe navo ohave va hepeke.
^ par. 5 OUTUMBULILO WA YELIFWA: Moshitukulwa eshi naashi tashi shikula ko, oshitya “oshihakanwa” osha yukifa komunhu oo a hepekwa pamilele eshi a li okaana. Otwa longifa oshitya osho opo tu yelife kutya okaana oka yahamekwa, noka ke na ondjo.
^ par. 11 Ngeenge umwe okwa nyono enyono la kwata moiti, ke na okulipopila kutya ota yahama pamhepo. Omunyoni oku na okuungaunga noilanduliko yomatokolo noyeenghatu daye da puka, na Jehova ote ke mu tokola. — Rom. 14:12.
^ par. 16 Okaana iha ka kala po eshi omuhepeki wako ta pulwapulwa. Omudali ile omukulunhu umwe oo e lineekelwa kokaana noke mu lombwela osho sha ningwa po, ota dulu okulombwela ovakulunhuongalo osho ka popya nokungaho okaana itaka ka yahamekwa unene pamaliudo.
^ par. 19 Ovadali ova kwatela mo yo ovo tave va tekula, ile vamwe ovo ve na oshinakuwanifwa shoku va fila oshisho.
