1. Jehova otashi shivi ovalongeli vaye va ninge shike? (Tala yo efano.)

 OLYELYE tu na okuya kuye, ngeenge twa pumbwa ehekeleko newiliko? Otu shii enyamukulo kepulo olo. Ohatu dulu okwiilikana kuJehova Kalunga. Jehova ote tu shivi tu ninge ngaho. Okwa hala tu ilikane kuye lwoikando, hatu ‘ilikana tuhe na edimbuko.’ (1 Tes. 5:17) Ohatu dulu okupopya naye meilikano twa manguluka nokupula ewiliko kuye moinima aishe yonghalamwenyo. (Omayel. 3:5, 6) Molwaashi oku li Kalunga oo ha yandje, Jehova ina tula po ongaba kutya otu na okwiilikana kuye lwoikando i fike peni.

2. Oshike hatu ka kundafana moshitukulwa eshi?

² Otwa lenga oshali yeilikano. Ashike moinima aishe oyo tu na okuninga, otashi dulika tu mone shidjuu okukonga efimbo tu ilikane. Otashi dulika yo tu udite twa pumbwa okuxwepopaleka ongushu yomailikano etu. Ohatu pandula, eshi hatu dulu okumona etwomukumo lihapu nosho yo ewiliko okudja mOmishangwa. Moshitukulwa eshi, ohatu ka kundafana nghee hatu dulu okulitulila po efimbo tu ilikane mokukonakona oshihopaenenwa shaJesus. Ohatu ka kundafana yo nghee hatu dulu okuxwepopaleka ongushu yomailikano etu mokukwatela mo oitwa itano ya fimana.

3. Oshike Jesus e lihonga shi na sha neilikano?

³ Jesus okwe lihonga kutya Jehova okwa lenga eilikano. Ofimbo ine uya kombada yedu, okwa li ha mono Xe ta nyamukula  omailikano ovalumenhu novakainhu ovadiinini. Pashihopaenenwa, Jesus okwa li puXe, eshi a li ta nyamukula omailikano taa di komutima aHanna, aDavid nosho yo aElia, okutumbula po ashike vamwe. (1 Sam. 1:10, 11, 20; 1 Eeh. 19:4-6; Eps. 32:5) Nomolwaasho Jesus a honga ovahongwa vaye va ilikane lwoikando ve na elineekelo. — Mat. 7:7-11.

4. Oshike hatu lihongo momailikano aJesus?

⁴ Jesus okwa tulila po ovahongwa vaye oshihopaenenwa osho ve na okushikula okupitila momailikano aye, oo a ilikana kuJehova. Jesus okwa li ha ilikana lwoikando moukalele waye aushe. Okwa li he litulile po efimbo, opo a ilikane, molwaashi luhapu okwa li ha kala e lipyakidila nokwa dingililwa kovanhu vahapu. (Mark. 6:31, 45, 46) Okwa li ha kwata oxuxwa komulungu, opo a ilikane ofimbo e li oye aeke. (Mark. 1:35) Pomhito imwe, okwa li a ilikana oufiku aushe, ofimbo ina ninga etokolo la fimana. (Luk. 6:12, 13) Jesus okwa li a ilikana lwoikando oufiku, oo wa tetekela efyo laye, ofimbo ina manifa oshinakuwanifwa shaye shidjuu shokombada yedu. — Mat. 26:39, 42, 44.

5. Ongahelipi hatu dulu okuhopaenena Jesus, ngeenge hatu ilikana?

⁵ Oshihopaenenwa shaJesus otashi tu hongo kutya kashi na nee mbudi kutya ohatu kala twe lipyakidila shi fike peni, otwa pumbwa okulitulila po efimbo lokwiilikana. Ngaashi Jesus, otashi dulika twa pumbwa okulitulila po efimbo tu ilikane, tashi dulika tu penduke ongula inene, ile konguloshi. Ngeenge otwa ningi ngaho, ohatu ka ulikila Jehova kutya otwa pandula oshali oyo ye likalekelwa. Omumwameme wedina Lynne ota dimbuluka nghee a li a pandula, eshi e lihonga oshikando shotete shi na sha noufembanghenda weilikano. Okwa ti: “Eshi nde lihonga kutya ohandi dulu okupopya naJehova efimbo keshe, osha kwafela nge ndi mu tale ko e li Kaume kange kopofingo nonda li nda hala okuxwepopaleka omailikano ange.” Nopehe na omalimbililo, vahapu vomufye osho hatu kala tu udite ngaho. Natu ka kundafaneni oitwa ya fimana oyo tu na okukwatela momailikano etu.

6. Metwokumwe nEhololo 4:10, 11, Jehova okwa wana okupewa shike?

⁶ Tanga Jehova. Omuyapostoli Johannes okwa mona memoniko likumwifi ovakulunhu 24 meulu tava longele Jehova. Otava tange Kalunga nova ti kutya okwa wana okupewa  “efimano, etumbalo neenghono.” (Lesha Ehololo 4:10, 11.) Ovaengeli ovadiinini navo ove na omatomheno mahapu okutanga nokufimaneka Jehova. Ove li meulu pamwe naye nove mu shii nawanawa. Ohava mono omaukwatya aye okupitila mwaasho ta ningi. Ngeenge tava tale nghee Jehova ta katuka eenghatu, ohashi ve linyengifa ve mu tange. — Job 38:4-7.

7. Omolwashike tu na okutanga Jehova?

⁷ Nafye otu na okutanga Jehova momailikano etu. Ohatu dulu okuninga ngaho moku mu lombwela osho tu hole notwa pandula kombinga yaye. Eshi to lesha nokukonakona Ombiibeli, kendabala okudidilika mo omaukwatya oo a ulikwa kuJehova, unene tuu oo wa hokwa. (Job 37:23; Rom. 11:33) Opo nee lombwela Jehova nghee u uditile omaukwatya oo. Ohatu dulu yo okutanga Jehova, eshi he tu kwafele noha kwafele yo ovamwatate novamwameme aveshe. Ohe tu file oshisho alushe noku tu amena. — 1 Sam. 1:27; 2:1, 2.

8. Ohatu dulu okupandula Jehova omolwomatomheno amwe elipi? (1 Ovatessalonika 5:18)

⁸ Pandula Jehova. Otu na omatomheno mahapu okupandula Jehova meilikano. (Lesha 1 Ovatessalonika 5:18.) Ohatu dulu oku mu pandula omolwoshinima shiwa keshe osho tu na. Komesho yaaishe, oshali keshe iwa ohai di kuye. (Jak. 1:17) Pashihopaenenwa, ohatu dulu okuulika olupandu letu omolwewapalo ledu nosho yo eshito likumwifi. Ohatu dulu yo okuulika olupandu letu omolwomwenyo, oukwaneumbo, ookaume nosho yo eteelelo letu. Otwa hala okupandula Jehova, eshi e tu pitika tu hafele ekwatafano lopofingo naye.

9. Omolwashike tashi dulika twa pumbwa okukulika olupandu lokupandula Jehova?

⁹ Otashi dulika twa pumbwa okuninga eenghendabala de likalekelwa dokudiladila kombinga yomatomheno etu opaumwene kutya omolwashike tu na okupandula Jehova. Otu li mounyuni omo mu na ovanhu vehe na olupandu. Ovanhu luhapu ohava yandje elitulemo kwaasho va hala, ponhele yokuyandja elitulemo kwaasho tava dulu okuninga va ulike olupandu laasho ve na. Ngeenge otwa hovele okuhopaenena oikala ya tya ngaho, omailikano etu otaa dulu okukala omusholondodo waasho twa hala. Opo tu kelele osho shiha ningwe, otwa pumbwa okutwikila okukulika nokuulika olupandu laashishe osho Jehova e tu ningila. — Luk. 6:45.

10. Ongahelipi olupandu la kwafela omumwameme umwe e lididimike? (Tala yo efano.)

¹⁰ Olupandu otali dulu oku tu kwafela tu lididimikile eenghalo didjuu. Natu ka taleni koshimoniwa shaKyung-sook, tashi hangwa mOshungonangelo yo 15 Januali 2015. Okwa li a monika okankela yokomapunga. Okwa ti: “Omukifi oo owa li wa teya nge omukumo neenghono. Onda li ndi udite nda kanifa keshe shimwe, nonda li nda tila neenghono.” Oshike she mu kwafela e lididimike? Okwa ti kutya onguloshi keshe, ofimbo ina ka nangala, oha ilikana mokule kombinga yoinima itano oyo a pandula efiku olo. Osho oshe mu ningifa a kale e udite a hekelekwa, naasho oshe mu linyengifa a ulike  ohole yaye yokuhola Jehova. Okwa li a mona nghee Jehova ha kwafele ovapiya vaye ovadiinini, ngeenge va taalela omayeleko, nokwa li a didilika kutya otu na omanangeko noupuna mahapu e dule omayeleko. Ngaashi Kyung-sook, otu na omatomheno mahapu okupandula Jehova, nonande otwa taalela eyeleko. Ngeenge otwa kala hatu ulike olupandu letu momailikano, otashi dulu oku tu kwafela tu lididimike nokukala twa ngungumana.

11. Omolwashike ovahongwa vaJesus va li va pumbwa ouladi konima eshi Jesus a shuna meulu?

¹¹ Pula Jehova e ku pe ouladi moukalele. Ofimbo Jesus ina shuna meulu, okwa li a dimbulukifa ovahongwa vaye oshinakuwanifwa shavo shokuyandja oundombwedi kombinga yaye “muJerusalem, muJudea nomuSamaria ashishe nosho yo kombada yedu alishe.” (Oil. 1:8; Luk. 24:46-48) Diva konima yefimbo lixupi, ovawiliki vOshijuda ova li va kwata po omuyapostoli Petrus nosho yo Johannes nova li ve va twala kOmhangu yoPombada yOvajuda. Ova li va lombwela ovalumenhu ovo ovadiinini va efe po okuudifa, nova li nokuli ve va ningila omatilifo. (Oil. 4:18, 21) Petrus naJohannes ova li ve linyenga ngahelipi?

12. Metwokumwe nOilonga 4:29, 31, ovahongwa ova li va ninga po shike?

¹² Shi na sha nomatilifo ovawiliki velongelokalunga lOshijuda, Petrus naJohannes ova ti: “Tokoleni nye vene ngeenge osha yuka koshipala shaKalunga okupwilikina kunye ponhele yokupwilikina kuKalunga. Ndele fye itatu efa okupopya kombinga yoinima oyo twa mona notwa uda.” (Oil. 4:19, 20) Eshi Petrus naJohannes va mangululwa, ovahongwa ova li va ilikana pombada kuJehova shi na sha nokulonga ehalo laye. Ova li va ilikana va ti: ‘Kwafela ovapiya voye va twikile okupopya eendjovo doye nouladi.’ Jehova okwa li a nyamukula eilikano olo la dja komutima. — Lesha Oilonga 4:29, 31.

13. Oshike hatu lihongo koshihopaenenwa shaJin-hyuk?

¹³ Ohatu dulu okuhopaenena ovahongwa mokutwikila okuudifa nokuli nongeenge epangelo ole tu lombwela tuhe shi ninge vali. Natu ka taleni koshihopaenenwa shaJin-hyuk, omumwatate, oo a li a tulwa modolongo, molwaashi a anya okuya moukwaita. Eshi a li modolongo, okwa li a pewa oshinakuwanifwa shokufila oshisho ovanadolongo vamwe ovo va li mokanduda kodolongo ve litulilwa. Ndele okwa li ashike a pitikwa a popye navo kombinga yoinima oyo va li va pumbwa; ka li a pitikwa a popye navo kombinga yOmbiibeli. Okwa li a ilikana, opo a pewe ouladi nokukala e na elungi a udife pomhito keshe. (Oil. 5:29) Okwa ti: “Jehova okwa li a nyamukula omailikano ange, eshi a pa nge ouladi nosho yo ounongo, opo ndi hovele omakonakonombiibeli mahapu oule wominute nhano poivelo younduda vodolongo. Opo nee oufiku onda li handi shange eenhumwafo odo nda li handi yandje kovanadolongo vakwetu efiku la shikula ko.” Nafye ohatu dulu okukala nelineekelo kutya Jehova ote ke tu kwafela tu wanife po oukalele wetu. Ngaashi Jin-hyuk, ohatu dulu okwiilikana tu pewe ouladi nosho yo ounongo.

14. Oshike tashi dulu oku tu kwafela tu lididimikile omaupyakadi? (Epsalme 37:3, 5)

¹⁴ Pula ekwafo kuJehova u dule okulididimikila omaupyakadi. Vahapu vomufye ohatu ungaunga nomashongo opalutu, ile opamaliudo, twa filwa umwe oo tu hole, onghalo idjuu yomoukwaneumbo, omahepeko, ile omaupyakadi amwe vali. Oinima ngaashi omikifi dekomba nosho yo oita, oye shi ningifa shidjuu neenghono okulididimikila omashongo a tya ngaho. Onghee mbubulila Jehova omutima woye. Mu lombwela shi na sha nonghalo yoye, ngaashi ashike to lombwele kaume koye kopofingo. Shilipalekwa kutya Jehova ‘ote shi ningi,’ ile tu tye ote ku kwafele. — Lesha Epsalme 37:3, 5.

15. Ongahelipi eilikano tali dulu oku tu kwafela tu ‘lididimikile omaudjuu’? Yandja oshihopaenenwa.

 ¹⁵ Okwiilikana twa mana mo otaku dulu oku tu kwafela tu ‘lididimikile omaudjuu.’ (Rom. 12:12) Jehova oku shii eenghalo odo ovapiya vaye tava piti mudo “nonghuwo yavo ohe i udu.” (Eps. 145:18, 19) Omukokolindjila womido 29 wedina Kristie ota koleke oushili oo. Okwa li a monika omukifi wa kwata moiti ombadilila. Oshidjemo, okwa li a polimana neenghono. Lwanima, okwa li a mona kutya ina okwa kwatwa komukifi, oo wa li tau twala mefyo. Kristie okwa ti: “Onda li nda ilikana kuJehova nda mana mo, opo a pe nge eenghono, odo nda li nda pumbwa efiku keshe. Onda kendabala yo okushikula elandulafano lange lokuninga oinima yopamhepo pandjikilile, ngaashi okuya kokwoongala nokuninga ekonakono lopaumwene.” Okwa weda ko, a ti: “Eilikano ola kwafela nge ndi lididimike pomafimbo oo a li madjuu. Ondi shii kutya Jehova opo e li alushe, naasho ohashi hekeleke nge neenghono. Nonande oupyakadi wange wokuhe na oukolele kawa li wa kandulwa po pefimbo opo, Jehova okwa nyamukula omailikano ange, eshi a li a pa nge ombili yokomwenyo nosho yo omutima wa ngungumana.” Onghee inatu dimbwa kutya “Jehova oku shii okuxupifa ovatilikalunga momayeleko.” — 2 Pet. 2:9.

16. Omolwashike twa pumbwa ekwafo laJehova, opo tu finde eyeleko?

¹⁶ Konga ekwafo kuJehova u finde eyeleko. Molwaashi inatu wanenena, otwa pumbwa okukondjifa alushe eyeleko lokulonga osho sha puka. Satana ota ningi ngaashi ta dulu, opo e shi ningife shidjuu kufye. Onghedi imwe omokukendabala okunyateka omadiladilo etu okupitila momalihafifo inaa koshoka. Omalihafifo a tya ngaho, otaa dulu okutula momadiladilo etu oinima inai koshoka, oyo tai dulu okunyateka ounhu wetu womeni noku tu ningifa tu nyone enyono la kwata moiti. — Mark. 7:21-23; Jak. 1:14, 15.

17. Ongahelipi hatu dulu okukatuka metwokumwe neilikano letu tu henuke eyeleko? (Tala yo efano.)

¹⁷ Otwa pumbwa ekwafo laJehova, ngeenge  otwa hala okuhenuka eyeleko lokulonga osho sha puka. Jesus okwa kwatela eindilo olo meilikano laye, a ti: “Ino efa tu ye momayeleko, ndele tu xupifa komunawii.” (Mat. 6:13) Jehova okwa hala oku tu kwafela, ashike otwa pumbwa oku mu pula ekwafo. Otwa pumbwa yo okukatuka metwokumwe nomailikano etu. Ohatu dulu okuninga ngaashi hatu dulu tu henuke okulesha nokupwilikina komadiladilo a puka, oo e li mounyuni waSatana. (Eps. 97:10) Ohatu dulu okuyadifa omadiladilo etu noinima iwa mokulesha nokukonakona Ombiibeli. Ohatu ka amena yo omadiladilo etu, ngeenge otwa kala hatu kala pokwoongala nokukufa ombinga moukalele. Mepingafano naasho, Jehova okwa udaneka kutya ita ka efa tu yelekwe nomayeleko e dule eenghono detu. — 1 Kor. 10:12, 13.

18. Oshike twa pumbwa okuninga atusheni shi na sha neilikano?

¹⁸ Keshe umwe womufye okwa pumbwa okukala ta ilikana shi dulife nale, opo a kale omudiinini kuJehova momafiku aa axuuninwa madjuu. Litulila po efimbo, efiku keshe, u ilikane tashi di komutima. Jehova okwa hala tu ‘mu mbubulile omitima detu’ meilikano. (Eps. 62:8) Tanga Jehova noku mu pandula omolwaashishe osho ta ningi. Mu pula e ku kwafele u kale u na ouladi moilonga yokuudifa. Mu pula e ku kwafele u lididimikile oupyakadi keshe nou kondjife eyeleko keshe olo tashi dulika wa taalela. Ino efa nande osha, ile omunhu wonhumba e ku imbe u kale ho ilikana kuJehova pandjikilile. Ongahelipi Jehova ha nyamukula omailikano etu? Ohatu ka kundafaneni epulo olo la fimana moshitukulwa tashi shikula ko.