1. Otu shi shii ngahelipi kutya Jehova okwa hala tu ehene popepi naye?

 JEHOVA ote tu shivi tu ehene popepi naye. (Jak. 4:8) Okwa hala okukala Kalunga ketu, Tate yetu naKaume ketu. Oha nyamukula omailikano etu nohe tu kwafele momafimbo madjuu. Oha longifa ehangano laye, opo e tu honge noku tu amena. Ndele oshike tu na okuninga, opo tu ehene popepi naJehova?

2. Ongahelipi hatu dulu okweehena popepi naJehova?

² Ohatu dulu okweehena popepi naJehova mokwiilikana kuye, mokulesha Eendjovo daye nokudilonga kudo. Ngeenge otwa ningi ngaho, olupandu nohole yetu yoku mu hola otai ka hapupala. Otashi ke tu linyengifa tu dulike kuye noku mu tanga, molwaashi okwa wana okulongelwa filufilu. (Eh. 4:11) Shi fike ngoo opo hatu ende hatu shiiva Jehova, ohatu ka kala twe mu lineekela nosho yo ehangano laye, olo a yandja, opo e tu kwafele.

3. Ondiaboli ohai kendabala ngahelipi oku tu amuna ko kuJehova, ndele oshike tashi tu kwafele tuha efe po Kalunga ketu nosho yo ehangano laye? (Epsalme 31:13, 14)

³ Ondiaboli ohai kendabala oku tu amuna ko kuJehova, unene tuu ngeenge twa taalela omayeleko. Ohai shi ningi ngahelipi? Ohai kendabala okunghundipaleka kanini nakanini elineekelo letu muJehova nomehangano laye. Ashike ohatu dulu okuhenuka eemwiyo dayo. Ngeenge otwa kala tu na eitavelo la pama nelineekelo muJehova ihali tengauka, itatu ka efa po Kalunga ketu nosho yo ehangano laye. — Lesha Epsalme 31:13, 14.

4. Oshike hatu ka kundafana moshitukulwa eshi?

⁴ Moshitukulwa eshi, ohatu ka kundafana omashongo atatu, oo tashi dulika a dilile kondje yeongalo. Eshongo keshe otali dulu okuyeleka elineekelo letu muJehova nomehangano laye. Ongahelipi omashongo oo taa dulu oku tu amuna ko kuJehova? Oshike tu na okuninga, opo tu finde eenghendabala daSatana?

5. Ongahelipi omaupyakadi taa dulu okunghundipaleka elineekelo letu muJehova nosho yo mehangano laye?

⁵ Omafimbo amwe, ohatu kala twa taalela omaupyakadi ngaashi, omapataneko okudilila kovapambele, ile okukanifa oilonga yomboloto. Ongahelipi omaupyakadi a tya ngaho taa dulu okunghundipaleka elineekelo letu mehangano laJehova noku tu amuna ko kuye? Ngeenge hatu lididimikile omaupyakadi oule wefimbo lile, otashi dulika tu kale tu udite tuhe na oshilonga notwa wililwa po. Satana oha longifa eemhito da tya ngaho nohe tu ningifa tu kale twa limbililwa ohole yaJehova yoku tu hola. Ondiaboli oya hala tu kale hatu lipula kutya eshi hatu mono oixuna omolwaJehova nosho yo ehangano laYe. Oshinima osho osha li sha ningilwa Ovaisrael ovo va li muEgipiti. Potete, ova li va itavela kutya Jehova okwa nangeka po Moses naAron, opo ve va mangulule moupika. (Ex. 4:29-31) Ashike lwanima, eshi Farao a ka djuupaleka onghalamwenyo yavo, ova li va vela ombedi Moses naAron omolwomaupyakadi avo, nove va lombwela va ti: ‘Nye mwe tu tondifa momesho aFarao nomomesho ovapiya vaye, osheshi mwa yandja meke lavo eongamukonda vo ve tu dipae.’ (Ex. 5:19-21) Ova li va vela ombedi ovapiya ovadiinini vaKalunga. Osho kashi nyikifa tuu oluhodi! Ngeenge owa kala to lididimikile omaupyakadi efimbo lile, ongahelipi to dulu okutwikila okukala we lineekela muJehova nomehangano laye?

6. Oshike hatu lihongo komuprofeti Habakuk shi na sha nanghee tu na okuungaunga nomaupyakadi? (Habakuk 3:17-19)

⁶ Mbubulila Jehova omutima woye meilikano nokukonga ekwafo kuye. Omuprofeti Habakuk okwa li a taalela omaudjuu mahapu. Pomhito imwe, okwa li ta monika a fa a limbililwa, ngeenge Jehova oku na ko ngoo nasha naye. Onghee okwa li a lombwela Jehova omaliudo aye meilikano. Okwa ti: ‘Akutu Omwene, fiyo onaini ame ndi nokwiingida ekwafo, ndelenee Ove ito udu ko? Oshike ndi nokutala eshunduko?’ (Hab. 1:2, 3) Jehova okwa li a nyamukula eilikano tali di komutima lomupiya waye omudiinini. (Hab. 2:2, 3) Konima eshi Habakuk a dilonga kunghee Jehova a xupifa oshiwana shaye, oshe mu kwafela a kale a hafa natango. Okwa li a tomhwa kutya Jehova oku na ko nasha naye nota dulu oku mu kwafela e lididimikile eyeleko keshe. (Lesha Habakuk 3:17-19.) Oshilihongomwa kufye oshilipi? Ngeenge wa taalela omaupyakadi, ilikana kuJehova noku mu lombwela nghee u udite. Opo nee ote ke ku yambidida. Ngeenge owa ningi ngaho, oto ka kala u na elineekelo kutya Jehova ote ke ku pa eenghono odo wa pumbwa, opo u dule okulididimika. Ngeenge owa mono kutya Jehova ote ku yambidida, eitavelo loye muye otali ka kala la pamenena.

7. Ovapambele vaShirley ova li va kendabala oku mu tomha shi na sha nashike, noshike she mu kwafela aha efe po eitavelo laye muJehova?

⁷ Kala we lipyakidila noinima yopamhepo. Natu ka kundafaneni nghee omumwameme Shirley, wokoPapua New Guinea, a li a ninga ngaho, eshi a li a taalela omaupyakadi. b Oukwaneumbo wooShirley owa li wa hepa, nomafimbo amwe ova li hava xupu shokadila. Omupambele waye umwe okwa li a kendabala okunghundipaleka elineekelo laye muJehova. Okwa ti: “Owa ti kutya omhepo iyapuki yaKalunga otai ku kwafele, ndele oye ku kwafela peni? Oukwaneumbo weni onghee ngoo wa hepa. Oto mane po efimbo loye nokuudifa.” Shirley okwa ti: “Onde lipula nda ti: ‘Mbela Kalunga oku na ko ngoo nasha nafye, ile hasho?’ Onghee hano, onda ilikana diva kuJehova nonde mu lombwela ashishe osho nda li handi lipula nasho. Onda twikila okulesha Ombiibeli nosho yo oishangomwa yetu, nonda twikila okuudifa nokukala  pokwoongala.” Shirley okwa li a didilika diva kutya Jehova ota file oshisho oukwaneumbo wavo. Oukwaneumbo wavo inau kala hau nangele ondjala, nowa kala wa hafa. Shirley okwa ti: “Onda li ndi udite kutya Jehova okwa nyamukula omailikano ange.” (1 Tim. 6:6-8) Ngeenge owa kala we lipyakidila noinima yopamhepo, naave ito ka efa omaupyakadi, ile omalimbililo e ku amune ko kuJehova.

8. Oshike tashi dulika shi ningilwe ovamwatate, ovo tava kwatele komesho mehangano laJehova?

⁸ Ovatondi vetu ohava tandavelifa oipupulu, ile ouyelele wa puka u na sha novamwatate, ovo tava kwatele komesho mehangano laJehova, okupitila moikundaneki nosho yo pamakwatafano opaintaneta. (Eps. 31:13) Ovamwatate vamwe ova kwatwa po nokutamanekelwa oilonga yominyonena. Ovakriste vopefimbo lovayapostoli navo ova li va taalela onghalo ya faafana, eshi omuyapostoli Paulus a li a lundilwa nokukwatwa po. Ova li ve linyenga ngahelipi?

9. Ovakriste vamwe vopefimbo lovayapostoli ova li ve linyenga ngahelipi, eshi omuyapostoli Paulus a li a tulwa modolongo?

⁹ Ovakriste vamwe vopefimbo lovayapostoli ova li va efa po okuyambidida omuyapostoli Paulus, eshi a li a tulwa modolongo muRoma. (2 Tim. 1:8, 15) Omolwashike? Mbela ova li va fya ohoni Paulus, molwaashi ovanhu va li ve mu tala ko e li omukolokoshi? (2 Tim. 2:8, 9) Ile ova li va kwatwa koumbada, va tila kutya navo otava ka hepekwa? Kashi na nee mbudi kutya ova li ve shi ninga omolwetomheno lilipi, diladila kunghee Paulus a li e udite. Okwa li e na okulididimikila omaupyakadi mahapu nokwa li nokuli a tula omwenyo waye moshiponga omolwavo. (Oil. 20:18-21; 2 Kor. 1:8) Onghee hano, inatu kala twa fa ovanhu ovo va li inava kwafela Paulus pefimbo opo a li a pumbwa ekwafo. Oshike tu na okukaleka momadiladilo, ngeenge ovamwatate, ovo tava kwatele komesho tava hepekwa?

10. Oshike tu na okudimbuluka, ngeenge ovamwatate, ovo tava kwatele komesho, tava hepekwa, nomolwashike?

¹⁰ Dimbuluka kutya omolwashike hatu hepekwa,  nonokutya olyelye omweetifi womahepeko. Timoteus omutivali, etukulwa 3:12 okwa ti: “Aveshe ovo va hala okulongela Kalunga ve li ovahongwa vaKristus Jesus navo otava ka hepekwa.” Onghee ino kala wa limbililwa, ngeenge Satana ta ponokele ovamwatate, ovo tava kwatele komesho. Elalakano laye okwa hala okunyona po oudiinini wavo nosho yo oku tu mbadapaleka. — 1 Pet. 5:8.

11. Oshike hatu lihongo moshihopaenenwa shaOnesiforus? (2 Timoteus 1:16-18)

¹¹ Twikila okuyambidida ovamwaxo nokukala omudiinini kuvo. (Lesha 2 Timoteus 1:16-18.) Omukriste umwe wopefimbo lovayapostoli wedina Onesiforus okwa li e linyenga monghedi i lili, eshi omuyapostoli Paulus a li a tulwa modolongo. Ombiibeli oya ti: ‘Ina fya Paulus ohoni, eshi a li modolongo.’ Ponhele yaasho, Onesiforus okwa li a konga Paulus, naashi e mu mona, okwa li a konga eenghedi tadi longo e mu yambidide. Kungaho, Onesiforus okwa li a tula omwenyo waye moshiponga. Oshilihongomwa oshilipi po? Inatu efa oumbada wokutila ovanhu u tu mbadapaleke, ile u tu imbe okuyambidida ovamwatate, ovo tava hepekwa. Ponhele yaasho, natu va popile noku va kwafela. (Omayel. 17:17) Ova pumbwa ohole nosho yo ekwafo letu.

12. Oshike hatu lihongo kovamwatate novamwameme ovo ve li moRussia?

¹² Natu ka kundafaneni nghee ovamwatate novamwameme, ovo ve li moRussia hava kwafele ovaitaveli vakwao, ovo va tulwa modolongo. Ngeenge vamwe tava pangulwa, ovamwatate novamwameme vahapu ohave uya komhangu ve va yambidide. Oshilihongomwa oshilipi po kufye? Ngeenge ovamwatate, ovo tava kwatele komesho, otava shekwa, va kwatwa po, ile tava hepekwa, ino kala wa tila. Va ilikanena, fila oshisho oilyo yomaukwaneumbo avo, nokutala vali eenghedi dimwe omo to dulu oku va yambidida. — Oil. 12:5; 2 Kor. 1:10, 11.

13. Ongahelipi omasheko taa dulu okunghundipaleka elineekelo letu muJehova nosho yo mehangano laye?

¹³ Ovapambele vetu ovo vehe fi Eendombwedi, ovanailonga, ile ovanafikola pamwe nafye otashi dulika ve tu sheke omolwoilonga yetu yokuudifa, ile molwaashi hatu kala metwokumwe nomifikamhango daJehova dopaenghedi da denga mbada. (1 Pet. 4:4) Otashi dulika va tye: “Ondi ku hole, ashike elongelokalunga leni oli na eemhango da kwata moiti nodonghuluyonale.” Vamwe otashi dulika ve tu sheke shi na sha nanghee hatu ungaunga naavo va kondwa, tava ti: “Ongahelipi to liti ove omunahole, ngeenge oho ungaunga noilyo yeongalo leni imwe ngaho?” Eendjovo da tya ngaho, otadi dulu okukuna omalimbililo momadiladilo oye. Otashi dulika tu hovele okulipula kutya: ‘Mbela Jehova okwa teelela ndi ninge shihapu? Mbela ehangano laye oli na eemhango da kwata unene moiti?’ Ngeenge owa taalela onghalo ya tya ngaho, ongahelipi to dulu okweehena popepi elela naJehova nosho yo nehangano laye?   

14. Otu na okulinyenga ngahelipi, ngeenge vamwe tave tu sheke, molwaashi hatu kala metwokumwe nomifikamhango daJehova? (Epsalme 119:50-52)

¹⁴ Kala wa tokola toko okuyambidida omifikamhango daJehova. Job okwa li omulumenhu oo ha yambidida omifikamhango daJehova, nonande okwa li a shekwa omolwokuninga ngaho. Kaume umwe waJob okwa li nokuli a kendabala oku mu tomha kutya Kalunga ke na ko nasha naye, kashi na nee mbudi kutya oha diinine omifikamhango daye, ile hasho. (Job 4:17, 18; 22:3) Ashike Job okwa li a anya okwiitavela oipupulu ya tya ngaho. Okwa li e shii kutya omifikamhango daJehova di na sha naasho shi li mondjila nosho yo osho sha puka, oda yuka, nokwa li a tokola oku di diinina. Ka li a efa vamwe ve mu efife po oudiinini waye. (Job 27:5, 6) Oshilihongomwa oshilipi kufye?  Ino efa omasheko e ku etele omalimbililo e na sha nomifikamhango daJehova. Diladila nghee de ku kwafela monghalamwenyo yoye. Otashi dulika omafimbo amwe wa mona kutya omifikamhango daJehova oda yuka node ku etela ouwa. Kala wa tokola toko okuyambidida ehangano, olo hali yambidida omifikamhango odo. Opo nee nonande ovanhu ove ku sheke shi fike peni, ito ka efa po okulongela Jehova. — Lesha Epsalme 119:50-52.

15. Omolwashike Brizit a li a shekwa?

¹⁵ Natu ka kundafaneni oshimoniwa shaBrizit, omumwameme wokoIndia. Okwa li ha shekwa kovapambele vaye omolweitavelo laye. Diva konima eshi a ninginifwa mo 1997, omushamane waye, oo ehe fi Ondombwedi, okwa li a kanifa oilonga. Onghee omushamane okwa li a tokola opo ye nosho yo Brizit, pamwe novanakadona vavo va tembukile keumbo lovadali vaye, ovo ve li koshilando shimwe shi lili. Ashike Brizit okwa li ta ka taalela omayeleko a kwata moiti. Molwaashi omushamane waye ka li e na oilonga, Brizit okwa li e na okulonga oilonga yomboloto yefimbo li yadi, opo a yambidide oukwaneumbo wavo. Shikwao vali, eongalo olo la li popepi navo opa li pe na oshinano sheekilometa 350 lwaapo. Shinyikifa oluhodi, ovapambele vomushamane waye ova li ve mu pataneka omolweitavelo laye. Onghalo oya li ya naipala, na Brizit noukwaneumbo wavo ova li va tembuka natango. Opo nee ombadilila omushamane waye okwa ka fya. Lwanima, okamonakadona kavo kamwe oka li ka fya kokankela, eshi ka li ashike ke na omido 12. Ovapambele vaBrizit ova li va naipika onghalo, eshi ve mu pa oushima omolwoiningwanima oyo. Ova li va popya kutya ngeno ka ningile Ondombwedi yaJehova, ngeno oinima aishe oyo inai ningwa. Ashike nande ongaho, Brizit okwa kala e lineekela muJehova nokwa kala popepi nehangano laye.

16. Brizit okwa li a nangekwa noupuna ngahelipi, eshi a kala popepi naJehova nosho yo nehangano laye?

¹⁶ Molwaashi Brizit okwa li e li kokule neenghono neongalo, omupashukilishikandjo umwe okwa li e mu ladipika a kale ha udifile moshitukulwa shavo noku kale ha ongalele meumbo laye. Potete, Brizit okwa li e udite a wililwa  po. Ashike okwa li a dulika kelombwelo olo. Okwa li ha udifile vamwe onghundana iwa, ha ningile okwoongala meumbo laye nokwa li a tula po efimbo, opo va kale hava ningi elongelokalunga loukwaneumbo pamwe novanakadona vaye. Osho osha li sha eta oidjemo ilipi? Brizit okwa li a dula okuhovela omakonakonombiibeli mahapu, novakonakonimbiibeli vaye vahapu ova li va ninginifwa. Mo 2005, okwa li a hovela okulonga e li omukokolindjila wondjikilile. Molwaashi okwa li e lineekela muJehova nomudiinini kehangano laye, okwa li a pewa ondjabi. Ovanakadona vaye otava longele Jehova noudiinini, nomoshitukulwa shavo paife omu na omaongalo avali. Brizit okwa tomhwa kutya Jehova okwe mu pa eenghono a dule okuungaunga nomaupyakadi noku dule okulididimikila omasheko okudilila kovapambele vaye.

17. Otu na okukala twa tokola toko okuninga shike?

¹⁷ Satana okwa hala oku tu itavelifa kutya Jehova ohe tu efa pefimbo lomaupyakadi nonokutya okuyambidida ehangano laJehova ohaku djuupaleke ashike onghalamwenyo yetu. Satana okwa hala tu kale twa tila, ngeenge ovamwatate ovo tava kwatele komesho tava shekwa, tava hepekwa, ile va tulwa modolongo. Oha longifa omasheko, opo a nghundipaleke elineekelo letu momifikamhango daJehova nomehangano laYe. Ashike nande ongaho, otu shii omakoto aye noite tu pukifa. (2 Kor. 2:11) Kala wa tokola toko okuhaitavela oipupulu yaSatana nokukala omudiinini kuJehova nokehangano laYe. Dimbuluka kutya Jehova ke na efiku e ku efe. (Eps. 28:7) Onghee hano, inatu efa nande osha shi tu efife po okulongela Jehova. — Rom. 8:35-39.

18. Oshike hatu ka kundafana moshitukulwa tashi shikula ko?

¹⁸ Moshitukulwa eshi, otwa kundafana omashongo, oo tashi dulika tu taalele okudja kondje yeongalo. Ndele elineekelo letu muJehova nomehangano laye, otali dulu yo okuyelekwa komashongo, oo taa dilile meongalo. Ongahelipi hatu dulu okutaalela omayeleko a tya ngaho nomupondo? Ohatu ka kundafana kombinga yaasho moshitukulwa tashi shikula ko.