1. Oshike tu na okukala twa teelela, nohatu dulu okukala noushili ulipi?

 OHATU dulu okukala twa teelela omapataneko, eshi hatu wanifa po oilonga yetu yokuudifa. Otashi dulika omapataneko oo a ka hapupale monakwiiwa. (Dan. 11:44; 2 Tim. 3:12; Eh. 16:21) Ohatu dulu okukala tu na oushili kutya Jehova ote ke tu pa ekwafo olo twa pumbwa. Omolwashike mbela? Omolwaashi Jehova oha kwafele alushe ovapiya vaye va wanife po oinakuwanifwa yavo, kashi na nee mbudi kutya oidjuu shi fike peni. Pashihopaenenwa, natu ka kundafaneni oinima imwe oyo ya li ya ningilwa omuprofeti Hesekiel, oo a li ta udifile Ovajuda, ovo va li moukwatwa waBabilon.

2. Jehova okwa popya shike shi na sha novanhu ovo va li tava udifilwa kuHesekiel, noshike hatu ka kundafana moshitukulwa eshi? (Hesekiel 2:3-6)

² Hesekiel okwa li e na okuudifila ovanhu va tya ngahelipi? Jehova okwe va popya kutya ove ‘noipala idjuu, omitima dikukutu noihava dulika.’ Ova li va nyika oshiponga ngaashi eendje nosho yo omakiya. Nomolwaasho Jehova a li a lombwela Hesekiel lwoikando, a ti: “Ino tila.” (Lesha Hesekiel 2:3-6.) Hesekiel okwa li a dula okuwanifa po oshilonga shaye shokuudifa, molwaashi okwa li (1) a tumwa kuJehova, (2) a pewa eenghono komhepo yaKalunga (3) eitavelo laye ola li la pamekwa keendjovo daKalunga. Ongahelipi oinima oyo itatu ya li ya kwafela Hesekiel? Nongahelipi tai dulu oku tu kwafela kunena?

3. Eendjovo dilipi tashi dulika da li da pameka Hesekiel, nongahelipi Jehova a li e mu shilipaleka kutya ote mu yambidida?

³ Jehova okwa lombwela Hesekiel, a ti: “Ame ohandi ku tumu.” (Hes. 2:3, 4) Eendjovo odo odi na okukala da li da pameka Hesekiel.  Omolwashike mbela? Nopehe na omalimbililo, Hesekiel oku na okukala a li a dimbuluka eendjovo da faafana, odo Jehova a li a lombwela ovaprofeti vaye, Moses naJesaja, eshi a li e va tuma. (Ex. 3:10; Jes. 6:8) Hesekiel oku na yo okukala a li e shii nghee Jehova a li a kwafela ovaprofeti ovo vavali va finde omashongo. Onghee hano, eshi Jehova a li a lombwela Hesekiel lwoikando ivali, a ti: “Ame ohandi ku tumu,” omuprofeti oo okwa li e na etomheno la femba lokulineekela kutya Jehova ota dulu oku mu yambidida. Shikwao vali, Hesekiel okwa shanga membo laye lwoikando, a ti: “Ondjovo yOmwene ye uya kwaame.” (Hes. 3:16) Natango, outumbulilo “ondjovo yOmwene ye uya kwaame,” owa holoka mo lwoikando ihapu. (Hes. 6:1) Osha yela kutya Hesekiel okwa li a tomhwa kutya okwa tumwa kuJehova. E li omona womupristeri, Hesekiel otashi dulika a li a hongwa kuxe nghee Jehova a li a shilipaleka ovaprofeti vaye mondjokonona kutya ote va yambidida. Pashihopaenenwa, Jehova okwa li a lombwela Isak, Jakob naJeremia kutya: “Ame ondi li pamwe naave.” — Gen. 26:24; 28:15; Jer. 1:8.

4. Eendjovo dehekeleko dilipi da li da pameka Hesekiel?

⁴ Ovaisrael vahapu ova li tave ke linyenga ngahelipi keudifo laHesekiel? Jehova okwa ti: “Eumbo laIsrael itali ka hala oku ku uda, osheshi vo inava hala okuuda nge.” (Hes. 3:7) Eshi ovanhu va li inava hala okupwilikina kuHesekiel, kungaho ova li inava hala okupwilikina kuJehova. Eendjovo odo oda li da shilipaleka Hesekiel kutya eshi ovanhu itava ka pwilikina kuye, inashi hala kutya okwa dopa e li omuprofeti. Jehova okwa li yo a shilipaleka Hesekiel kutya ngeenge etumwalaka letokolo olo ta ka udifa ola wanifwa, ovanhu otava ka “shiiva nokutya omuxunganeki a li mokati kavo.” (Hes. 2:5; 33:33) Nopehe na omalimbililo, eendjovo odo dehekeleko oda li da pa Hesekiel eenghono, odo a li a pumbwa, opo a wanife po oukalele waye.

5. Metwokumwe naJesaja 44:8, openi hatu hange eenghono?

⁵ Ohatu mono eenghono mokushiiva kutya otwa tumwa kuJehova. Okwe tu lenga, eshi e tu ifana “eendombwedi” daye. (Jes. 43:10) Oo kau fi tuu oufembanghenda munene! Ngaashi ashike Jehova a li a lombwela Hesekiel kutya: ‘Ina tila,’ Jehova okwe tu lombwela yo kutya: ‘Inatu haluka.’ Omolwashike tuhe na okutila ovapataneki vetu? Ngaashi Hesekiel, nafye otwa tumwa kuJehova note tu yambidida. — Lesha Jesaja 44:8.

6. (a) Jehova ohe tu shilipaleke ngahelipi kutya ote tu yambidida? (b) Openi hatu hange ehekeleko nosho yo eenghono?

⁶ Jehova ohe tu shilipaleke kutya ote tu yambidida. Pashihopaenenwa, ofimbo Jehova ina popya kutya: “Onye eendombwedi dange,” okwa ti: “Ngeenge to pitile momeva, Ame ondi li pwoove; ngeenge pe nomilonga domeva itadi ku yelula; ngeenge to pitile momundilo, itau ku lungwinifa, nelaka lomundilo itali ku xwike.” (Jes. 43:2) Eshi hatu wanifa po oukalele wetu, omafimbo amwe ohatu shakeneke omandangalati, oo e li ngaashi efundja nosho yo omayeleko, oo e li ngaashi omundilo. Ashike nande ongaho, kekwafo laJehova ohatu twikile okuudifa. (Jes. 41:13) Ngaashi pefimbo laHesekiel, ovanhu vahapu kunena ihava tambula ko etumwalaka letu. Ohatu kaleke momadiladilo kutya eshi itava tambula ko etumwalaka, inashi hala kutya otwa dopa tu li Eendombwedi daKalunga. Ohatu mono ehekeleko nosho yo eenghono, eshi tu shii kutya Jehova oha kala a hafa, ngeenge hatu twikile okuudifa etumwalaka laye noudiinini. Omuyapostoli Paulus okwa popya, a ti: “Keshe umwe ota ka pewa ondjabi yaye she likolelela koilonga yaye.” (1 Kor. 3:8; 4:1, 2) Omumwameme umwe, oo a kala omukokolindjila oule wefimbo lile, okwa ti: “Ohashi hafifa nge okushiiva kutya Jehova ote tu pe ondjabi omolweenghendabala detu.”

7. Ngeenge Hesekiel a li ta dilonga kemoniko olo a mona, osha li hashi mu kumu ngahelipi? (Tala efano kombada yoshifo.)

⁷ Hesekiel okwa li a mona nghee omhepo yaKalunga i na eenghono dinene. Okwa mona memoniko omhepo iyapuki tai longo moishitwa inene yopamhepo nosho yo momaulu manene etemba lomeulu. (Hes. 1:20, 21) Hesekiel okwa li e linyenga ngahelipi? Okwa shanga osho sha li sha ningwa po, a ti: “Eshi nde shi mona, onda wila po eombe.” Okwa li e lidenga pedu, molwaashi osha li she mu kumwifa. (Hes. 1:28) Lwanima, efimbo keshe Hesekiel ta diladila kemoniko olo likumwifi, ohashi mu tomho filufilu kutya kekwafo lomhepo yaKalunga, ota dulu okuwanifa po oukalele waye.

8-9. (a) Oshike sha li sha ningilwa Hesekiel, eshi Jehova e mu lombwela kutya na fikame? (b) Jehova okwa li a pameka ngahelipi Hesekiel omolwoshilonga shaye shidjuu?

⁸ Jehova okwa li a lombwela Hesekiel, a ti: “Kaana komunhu, fikama neemhadi doye, opo handi ku popifa.” Elombwelo olo nosho yo omhepo iyapuki oya li ya pa Hesekiel eenghono odo a pumbwa, opo a fikame po pedu. Hesekiel okwa ti: ‘Omhepo ye uya mwaame, ndele tai kaleke nge ofika neemhadi dange.’ (Hes. 2:1, 2) Lwanima, moukalele waye aushe, Hesekiel okwa li a wilikwa ‘keke’ laKalunga, sha hala kutya, komhepo iyapuki yaKalunga. (Hes. 3:22; 8:1; 33:22; 37:1; 40:1) Omhepo yaKalunga oya li ya pameka Hesekiel a dule okuwanifa po oshinakuwanifwa shaye osho a li a pewa, shokuudifila ovanhu ve “noshipala shi nombaba ikukutu nomutima wa kukuta.” (Hes. 3:7) Jehova okwa lombwela Hesekiel, a ti: “Ame ohandi kukutike oshipala shoye shi kale ngaashi oipala yavo, nombaba yoshipala shoye ngaashi eembaba doipala yavo. Ame ohandi ningi ombaba yoshipala  shoye i kale ngaashi okawe, ikukutu i dule emanya. Ove ino va tila, ile ino va haluka.” (Hes. 3:8, 9) Jehova okwa fa a li ta lombwele Hesekiel kutya: ‘Ino efa oukukutu womitima dovanhu u ku teye omukumo. Ohandi ke ku pameka.’

⁹ Konima yaasho, omhepo yaKalunga oya li ya twala Hesekiel koshitukulwa oko a li ta ka udifila. Hesekiel okwa shanga a ti: “Eke lOmwene la li li neenghono kombada yange.” Osha pula omuprofeti oule woshivike e lihonge nokuuda ko filufilu etumwalaka, olo a li ta ka udifa, opo a dule okuudifa nexwamo. (Hes. 3:14, 15) Opo nee Jehova okwa li e mu lombwela a ye mefilu la lalakana, omo ‘omhepo ye uya muye.’ (Hes. 3:23, 24) Hesekiel okwa li e lilongekida okuhovela oukalele waye.

10. Ekwafo lilipi twa pumbwa, opo tu wanife po oilonga yetu yokuudifa, nomolwashike?

¹⁰ Ekwafo lilipi twa pumbwa, opo tu wanife po oshilonga shetu shokuudifa? Opo tu mone enyamukulo, natu diladile kwaasho sha li sha ningilwa Hesekiel. Ofimbo ina hovela oilonga yaye yokuudifa, omhepo yaKalunga oya li ye mu pa eenghono odo a li a pumbwa. Ngaashi sha ningilwa Hesekiel, kunena nafye ohatu dulu ashike okuwanifa po oshilonga shokuudifa kekwafo lomhepo yaKalunga. Omolwashike mbela? Omolwaashi Satana ote tu lwifa nelalakano, opo tu efe po oilonga yetu yokuudifa. (Eh. 12:17) Pataleko lopanhu, ohatu monika twa fa itatu dulu okufinda Satana. Ashike ohatu mu findi okupitila moilonga yetu yokuudifa. (Eh. 12:9-11) Omonghedi ilipi? Ngeenge hatu udifa moukalele, ohatu ulike kutya inatu mbadapalekwa komatilifo aSatana. Efimbo keshe hatu udifa, ohatu findi Satana. Onghee ohatu dulu okufika pexulifodiladilo lilipi, eshi hatu dulu okuwanifa po oilonga yetu yokuudifa, nonande otwa taalela omapataneko? Ohatu dulu okufika pexulifodiladilo kutya ohatu pewa eenghono komhepo iyapuki nonokutya Jehova okwe tu hokwa. — Mat. 5:10-12; 1 Pet. 4:14.

11. Omhepo yaKalunga otai ke tu ningila shike, nongahelipi hatu dulu okutwikila oku i mona?

¹¹ Eshilipaleko limwe la wedwa po lilipi hatu  dulu okukala tu na, eshi tu shii kutya Jehova okwa li a kukutika oshipala nosho yo ombaba yoshipala shaHesekiel? Omhepo iyapuki otai dulu oku tu pa eenghono odo twa pumbwa, opo tu dule okufinda eshongo keshe, olo hatu shakeneke moukalele wetu. (2 Kor. 4:7-9) Oshike tu na okuninga, opo tu shilipaleke kutya ohatu twikile okumona omhepo yaKalunga? Otwa pumbwa okukala hatu ilikana nopehe na olufuwo, tu na elineekelo kutya Jehova ota ka uda omailikano etu. Jesus okwa honga ovahongwa vaye, a ti: “Kaleni hamu indile, . . . kaleni hamu kongo, . . . kaleni hamu konghola.” Opo nee Jehova ota ka ‘yandja omhepo iyapuki kwaavo tave mu indile.’ — Luk. 11:9, 13; Oil. 1:14; 2:4.

12. Metwokumwe naHesekiel 2:9–3:3, omushangwatonywa owa dja peni, nowa li u na shike?

¹² Hesekiel ka li ashike a nghonopalekwa komhepo yaKalunga, ndele okwa li yo a pamekwa keendjovo daKalunga. Hesekiel okwa li a mona memoniko eke li kwete omushangwatonywa. (Lesha Hesekiel 2:9–3:3.) Omushangwatonywa owa dja peni? Owa li u na shike? Ongahelipi wa li wa pameka Hesekiel? Natu ke shi taleni. Omushangwatonywa owa dja kolukalwapangelo laKalunga. Otashi dulika Jehova a li a longifa umwe womovaengeli vane, ovo Hesekiel a li a mona metetekelo, opo e mu pe omushangwatonywa. (Hes. 1:8; 10:7, 20) Omushangwatonywa owa li u na eendjovo daKalunga, etumwalaka letokolo olo Hesekiel a li e na okulombwela ovanashibofa ovo va li moukwatwa. (Hes. 2:7) Etumwalaka olo ola li la shangwa konima nokomesho yomushangwatonywa.

13. Jehova okwa li a lombwela Hesekiel a ningile shike omushangwatonywa, nomolwashike wa li munyenye?

¹³ Jehova okwa li a lombwela omuprofeti waye a lye ‘nokukutife edimo laye nomushangwatonywa.’ Hesekiel okwa li a dulika, ndele ta li po omushangwatonywa filufilu. Oshitukulwa osho shemoniko osha hala kutya ngahelipi? Hesekiel okwa li a pumbwa okuuda ko filufilu etumwalaka olo a li ta ka udifa. Okwa li e na okwiitavela etumwalaka olo, opo shi mu linyengife e li udife. Opo nee opa li pa ningwa oshinima shikumwifi. Hesekiel okwa li a mona kutya omushangwatonywa ‘omunyenye ngaashi omaadi eenyiki.’ (Hes. 3:3) Omolwashike? Omolwaashi Hesekiel okwa li a tala ko oufembanghenda wokukalela po Jehova munyenye, ile u hafifa. (Eps. 19:8-11) Okwa li a pandula neenghono, eshi Jehova e mu tambula ko e mu longele e li omuprofeti waye.

14. Oshike sha kwafela Hesekiel a kale e lilongekida okutambula ko oshinakuwanifwa shaye?

¹⁴ Lwanima, Jehova okwa ka lombwela Hesekiel, a ti: “Eendjovo adishe edi handi ku lombwele, di tambula momutima woye, di uda nomatwi oye.” (Hes. 3:10) Shi na sha nomalombwelo oo, Jehova okwa li a lombwela Hesekiel a koneke momutwe eendjovo odo da shangwa momushangwatonywa nokudilonga kudo. Eshi Hesekiel a ninga ngaho, okwa li e lipameka. Osha li yo she mu kwafela a kale e na etumwalaka la kwata moiti, olo a li ta ka lombwela ovanhu. (Hes. 3:11) Eshi Hesekiel a uda ko filufilu etumwalaka laKalunga noku li itavela, okwa li e lilongekida okuhovela okuudifa nokutwikila fiyo osheshi a wanifa po oshinakuwanifwa shaye. — Yelekanifa nEpsalme 19:14.

15. Oshike twa pumbwa ‘okutambula momutima,’ opo tu lididimike?

¹⁵ Otwa pumbwa okutwikila okupamekwa keendjovo daKalunga, opo nafye tu lididimike moukalele. Otwa pumbwa ‘okutambula momutima’ ashishe osho Jehova te tu lombwele. Kunena, Jehova oha popi nafye okupitila mEendjovo daye, Ombiibeli. Ongahelipi hatu dulu okushilipaleka kutya Eendjovo daKalunga otadi  twikile okunwefa mo omadiladilo etu, omaliudo nosho yo exwamo letu?

16. Ongahelipi hatu dulu okutuvikila Eendjovo daKalunga momitima detu?

¹⁶ Ngaashi ashike hatu lipameke, ngeenge hatu li oikulya yopalutu nokumona oitungifi muyo, ohatu pamekwa pamhepo, ngeenge hatu lesha Eendjovo daKalunga nokudilonga kudo. Ohatu kaleke momadiladilo oshilihongomwa shi na sha nomushangwatonywa. Ngeenge tashi uya pEendjovo daKalunga, Jehova okwa hala tu ‘kutife omadimo etu’ nEendjovo daye, sha hala kutya, tu di ude ko filufilu. Ohatu dulu okuninga ngaho mokukala hatu ilikana, hatu lesha nokudilonga. Tete, ohatu ilikana, opo tu longekide omitima detu di tambule ko omadiladilo aKalunga. Opo nee ohatu lesha oshitukulwa shOmbiibeli. Ngeenge hatu lesha, ohatu kanghama po, opo tu dilonge nokudiladila moule shi na sha naasho hatu lesha. Osho ohashi eta oidjemo ilipi? Ngeenge otwa kala hatu dilonga, ohatu ka uda ko nawa Eendjovo daKalunga, neitavelo letu otali ka kala la pama.

17. Omolwashike sha fimana okudilonga kwaasho hatu lesha mOmbiibeli?

¹⁷ Omolwashike sha fimana okulesha Ombiibeli nokudilonga kuyo? Ngeenge hatu ningi ngaho, ohashi tu pe eenghono odo twa pumbwa, opo tu dule okuudifa etumwalaka lOuhamba paife. Otashi ke tu kwafela yo tu ka udife etumwalaka la kwata moiti letokolo, olo tashi dulika tu ka udife monakwiiwa i li popepi. Natango, okudilonga komaukwatya aJehova mahokwifa, ohashi pameke ekwatafano letu naye. Oshidjemo? Ohatu ka hafela oshinima shinyenye, ile shihafifa, ombili yopamadiladilo nokukala twa wanenwa. — Eps. 119:103.

18. Ovanhu vomoshitukulwa shetu ova pumbwa okushiiva shike, nomolwashike?

¹⁸ Hesekiel okwa li omuprofeti, ashike fye katu fi ovaprofeti. Ndele otwa tokola okuudifa etumwalaka la nwefwa mo, olo Jehova a popya mEendjovo daye, fiyo osheshi oshilonga shokuudifa sha pwa filufilu. Ngeenge efimbo letokolo ola fiki, ovanhu vomoshitukulwa shetu itava ka kala ve na etomheno lokulipopila kutya inava londwelwa, ile kutya Kalunga okwe ve lidimbika. (Hes. 3:19; 18:23) Ponhele yaasho, otava ka didilika kutya etumwalaka olo twa li hatu udifa ola dja kuKalunga.

19. Oshike tashi ke tu pameka, opo tu wanife po oukalele wetu?

¹⁹ Oshike tashi ke tu pameka, opo tu wanife po oukalele wetu? Oinima itatu oyo ya li ya pameka Hesekiel. Ohatu twikile okuudifa, molwaashi otu shii kutya otwa tumwa kuJehova, twa pewa eenghono komhepo yaye iyapuki notwa pamekwa kEendjovo daye. Kekwafo laJehova ohatu linyengifwa tu wanife po oukalele wetu notu lididimike “fiyo okexulilo.” — Mat. 24:13.