1-2. (a) Oiwana mafiku otai ka ingida eingido lilipi? (b) Omapulo elipi a pumbwa okunyamukulwa?

KALA nee ngeno wa fa u wete oiwana tai ingida eingido olo la xunganekwa nale li na sha ‘nombili neameno.’ Otashi dulika tai ka popya nounhwa kutya mounyuni omu yadi ombili. Oiwana otai ka kala ya hala tu diladile kutya otai dulu okukandula po omaupyakadi aeshe mounyuni. Ashike itai ka dula nandenande okukandula po osho tashi ka landula ko. Omolwashike mbela? Metwokumwe nexunganeko lOmbiibeli, ‘ehanauno otali va vakele, ndele kave na apa tava i onhapo.’ — 1 Tes. 5:3.

² Ope na omapulo a fimana oo a pumbwa okunyamukulwa, ngaashi: Oshike tashi ka ningwa po ‘poudjuu munene’? Jehova ota ka teelela tu ninge shike pefimbo olo? Ongahelipi hatu dulu okulilongekida paife opo tu kale ovadiinini fiyo twa pita moudjuu munene? — Mat. 24:21.

3. Metwokumwe nEhololo 17:5, 15-18, ongahelipi Kalunga ta ka hanauna po “Babilon shinene”?

³ Lesha Ehololo 17:5, 15-18. “Babilon shinene” otashi ka hanaunwa po. Ngaashi sha popiwa metetekelo, oiwana itai ka dula nandenande okukelela osho tashi ka ningwa pefimbo olo. Omolwashike mbela? Omolwaashi “Kalunga [ote ke] shi tula momitima davo, va wanife omhangela yaye.” Omhangela yaye oyo oilipi?  Oya kwatela mo okuhanauna po omalongelokalunga oipupulu aeshe omounyuni, mwa kwatelwa oo hae liti kutya oopaKriste. * Kalunga ota ka tula omhangela yaye momitima ‘deembinga omulongo doshilyani shitilyana.’ Eembinga omulongo otadi faneke omapangelo aeshe opapolotika oo haa yambidida ‘oshilyani,’ sha hala okutya Oiwana ya Hangana. (Eh. 17:3, 11-13; 18:8) Ngeenge omapangelo oo okwa pilukile po omalongelokalunga oipupulu, osho otashi ka ulika kutya oudjuu munene owa hovela. Oshiningwanima osho otashi ka ningwa ombadilila, tashi ka kala shitilifa notashi ka kuma keshe umwe kombada yedu.

4. (a) Oiwana otashi dulika i ka yandje omatomheno okuliyukipalifa elipi eshi tai ka ponokela omalongelokalunga oipupulu? (b) Oilyo ikulu yomalongelokalunga oo otai ka kala ya hala okuninga shike?

⁴ Katu shi shii kutya oiwana otai ka yandja omatomheno elipi kutya omolwashike tai ka ponokela Babilon Shinene. Otashi dulika i ka popye kutya omalongelokalunga omounyuni oo taa imbi oiwana i kale i na ombili nohaa nwefa mo alushe omapangelo. Ile otashi dulika oiwana i ka tye omalongelokalunga oo okwe lindubila oupuna nomaliko mahapu. (Eh. 18:3, 7) Osha fa shi li ngaha kutya eshi oiwana tai ka ponokela omalongelokalunga oo, itai ka hanauna po oilyo aishe yao. Ponhele yaasho, oiwana otashi dulika i ka hanaune po omahangano omalongelokalunga. Ngeenge omahangano oo okwa hanaunwa po, ovo va li oilyo yao otava ka mona kutya ovawiliki vavo vomalongelokalunga ova dopa okuwanifa po osho va udaneka. Onghee oilyo oyo otai ke va fiya po.

5. Jehova okwa udaneka shike shi na sha noudjuu munene, nomolwashike?

⁵ Ombiibeli inai tumbula kutya ehanauno laBabilon Shinene otali ka kwata efimbo li fike peni, ndele osho tu shii oshosho kutya otali ka kwata efimbo lixupi. (Eh. 18:10, 21) Jehova okwa udaneka kutya ota ka “xupipika omafiku” oudjuu munene opo ‘ovahoololwa’ vaye nosho yo elongelokalunga lashili liha hanaunwe po. (Mark. 13:19, 20) Ndele mbela Jehova ota ka teelela tu ninge shike okudja pehovelo loudjuu munene fiyo opoita yaHarmagedon?

6. Kakele kokuhakala oshitukulwa shomalongelokalunga oipupulu, oshike vali tu na okuninga?

⁶ Ngaashi sha popiwa mokatendo ka tetekela, Jehova okwa teelela ovashikuli vaye vaha kale oshitukulwa shaBabilon Shinene. Ndele otu na okuninga shihapu shihe fi ashike okudja mo momalongelokalunga oipupulu. Otu na okukala twa tokola toko okuyambidida elongelokalunga lashili, sha hala okutya okulongela Jehova. Natu ka taleni keenghedi mbali nghee hatu dulu okuninga ngaho.

7. (a) Ongahelipi hatu dulu okukala ovadiinini komifikamhango daJehova douyuki? (b) Ongahelipi Ovaheberi 10:24, 25 va divilika efimano lokukala hatu ongala pamwe, unene tuu paife?

⁷ Onghedi yotete, otu na okudiinina omifikamhango daJehova douyuki. Katu na okutambula ko elihumbato lopaenghedi la xutuka lounyuni. Pashihopaenenwa, otu na okutonda oluhaelo loludi keshe, mwa kwatelwa ohombo yovanhu voukashike kookanhu wa faafana nelihumbato keshe li na sha noushenge. (Mat. 19:4, 5; Rom. 1:26, 27) Onghedi onhivali, otu na okutwikila okulongela Kalunga pamwe nOvakriste vakwetu. Ohatu dulu okuninga ngaho, kutya nee ohatu ongalele mOmalupale Ouhamba, ile omomaumbo etu vene ile nokuli hatu shi ningi meholeko. Kashi na nee mbudi kutya oshike tashi ningwa po, itatu ka efa po okwoongala pamwe. Onghee hano, otwa pumbwa okukala hatu ongala pamwe “unene eshi [hatu] mono efiku olo tali ehene popepi.” — Lesha Ovaheberi 10:24, 25.

8. Ongahelipi etumwalaka letu tashi dulika li ka lunduluke monakwiiwa?

⁸ Pefimbo loudjuu munene, etumwalaka olo hatu udifa otashi dulika li ka lunduluke. Kunena ohatu udifa onghundana iwa yOuhamba, nohatu ningi ngaashi hatu dulu tu ninge ovanhu ovahongwa. Ndele poudjuu munene, otashi dulika tu ka udife etumwalaka la kwata moiti, olo tali faafanifwa neemhawe dinene. (Eh. 16:21) Otashi dulika tu ka udife kutya ounyuni waSatana ou li pokuxulifwa po aushe. Mokweendela ko kwefimbo, ohatu ka shiiva nawa kutya etumwalaka letu otali ka kala la tya ngahelipi, nonghee tu na okuudifa. Mbela ohatu ka longifa eenghedi da faafana naado twa kala hatu longifa momukokomoko womido di dule efele, opo tu ka pondole moukalele wetu? Ile ohatu ka longifa eenghedi dimwe di lili? Katu shi shii. Kashi na nee mbudi kutya ohatu ka udifa ngahelipi, osha fa shi li ngaha kutya ohatu ka kala tu na oufembanghenda wokuudifa nouladi etumwalaka letokolo laJehova. — Hes. 2:3-5.

9. Oiwana otashi dulika i ke linyenge ngahelipi ketumwalaka letu, notu na oushili ulipi?

⁹ Etumwalaka letu otali ka udifa nai oiwana notai ka kendabala i tu mweneke tuha udife vali nandenande. Ngaashi ashike kunena hatu kala twe lineekela Jehova e tu kwafele eshi hatu wanifa po oukalele wetu, ohatu ka ninga yo sha faafana. Otu na oushili kutya Kalunga ketu ote ke tu nghonopaleka opo tu wanife po ehalo laye. — Mika 3:8.

10. Ngaashi sha xunganekwa muLukas 21:25-28, ovanhu vahapu otave ke linyenga ngahelipi kwaasho tashi ka ningwa poudjuu munene?

¹⁰ Lesha Lukas 21:25-28. Pefimbo loudjuu munene, ovanhu otava ka kala va kumwa eshi tava ka mona oinima oyo va li hava diladila kutya otai kalelele tai hovele okuhanauka po. Otava ka kala ve udite ‘oudjuu,’ va tila tava diladila kutya pamwe otava ka kanifa eemwenyo davo pefimbo olo lidjuu neenghono mondjokonona aishe yovanhu. (Sef. 1:14, 15) Pefimbo olo, onghalamwenyo otai ka kala idjuu neenghono nokuli nokoshiwana shaJehova. Otashi dulika tu ka shakeneke omaudjuu onhumba, molwaashi ohatu twikile okuhakala oshitukulwa shounyuni.  Otashi dulika tuha ka kale tu na oipumbiwa imwe.

11. (a) Konima yehanauno lomalongelokalunga oipupulu, omolwashike ovanhu tava ka yandja elitulemo kEendombwedi daJehova? (b) Omolwashike tuhe na okukala twa tila oudjuu munene?

¹¹ Ovo ve li oilyo yomalongelokalunga oo a hanaunwa po otava ka kala va handuka neenghono eshi tava ka mona natango elongelokalunga lEendombwedi daJehova tali twikile. Diladila ashike nghee tava ka shiivifila vakwao va ulike nghee ve udite, tashi dulika okupitila moikundaneki. Oiwana nosho yo omupangeli wayo Satana otave ke tu tonda eshi elongelokalunga letu olo alike la xupa po. Kave na fiku va ka wanife po elalakano lavo lokuxulifa po omalongelokalunga aeshe kombada yedu. Onghee otava ka yandja elitulemo kufye. Pefimbo olo, oiwana otai ka dana onghandangala yaGog yaMagog. * Otai ke limanga oukuni kumwe opo i ponokele nonyanya oshiwana shaJehova. (Hes. 38:2, 14-16) Otashi dulika tu hovele okulipula kutya oshike tashi ka ningwa po poudjuu munene, unene tuu eshi tuhe shii ashishe osho sha kwatelwa mo. Ndele oshinima shimwe osho tu na okushiiva oshosho kutya: Inatu pumbwa okukala twa tila oudjuu munene. Jehova ote ke tu pa omalombwelo oo taa ka xupifa eemwenyo detu. (Eps. 34:19) Ohatu ka dula ‘okutala pombada nokuyelula omitwe detu’ molwaashi otu shi shii kutya “exupifo [letu] ola ehena popepi.” *

12. Ongahelipi “omupiya omudiinini nomunaendunge” a kala te tu longekidile osho tashi ka ningwa monakwiiwa?

¹² “Omupiya omudiinini nomunaendunge” okwa kala te tu longekida tu kale ovadiinini fiyo osheshi hatu ka pita moudjuu munene. (Mat. 24:45) Osho okwa kala te shi ningi meenghedi dihapu, ngaashi okupitila moyoongalele i li pefimbo yomo 2016-2018. Otwa kwafelwa okupitila moyoongalele oyo tu kulike omaukwatya oo twa pumbwa eshi efiku laJehova tali ehene popepi. Natu ka kundafaneni pauxupi amwe omomaukwatya oo.

13. Ongahelipi hatu dulu okutwikila okukala ovadiinini kuJehova, nomolwashike tu na oku shi ninga paife?

¹³ Oudiinini: Oshipalanyole shoshoongalele shomo 2016 osha li tashi ti, “Kala omudiinini kuJehova!” Oshoongalele osho oshe tu honga kutya ngeenge otu na ekwatafano lopofingo naJehova, ohatu ka kala ovadiinini kuye. Otwa li twa dimbulukifwa kutya ohatu dulu okweehena popepi naJehova okupitila meilikano tali di komutima nomokukonakona noukeka Eendjovo daye. Osho otashi ke tu pameka tu dule okufinda nokuli nomayeleko oo a kwata moiti. Eshi ounyuni waSatana tau ende wa finda pexulilo, otwa teelela tu ka shakeneke omayeleko a kwata moiti neenghono oo taa yeleke oudiinini wetu kuKalunga nokOuhamba waye. Ovanhu otashi dulika va ka kale noku tu sheka. (2 Pet. 3:3, 4) Osho otashi dulika shi ka ningwe unene tuu eshi ihatu yambidida ounyuni waSatana. Otu na okupameka oudiinini wetu paife opo tu ka kale ovadiinini poudjuu munene.

14. (a) Oshike tashi ka ningwa po shi na sha novamwatate ovo tava kwatele komesho kombada yedu? (b) Omolwashike hatu ka pumbwa okukala ovadiinini pefimbo olo?

¹⁴ Poudjuu munene, otapa ka ningwa elunduluko li na sha novamwatate ovo tava kwatele komesho kombada yedu. Ovavaekwa aveshe ovo tava hangwa kombada yedu otava ka ongelwa va ye meulu opo va ka kufe ombinga moita yaHarmagedon. (Mat. 24:31; Eh. 2:26, 27) Osho osha hala okutya Olutuwiliki itali ka kala  vali nafye oku kombada yedu. Ashike nande ongaho, ongudu inene otai ka kala ya unganekwa. Ovamwatate ovo va pyokoka vomeedi dimwe otava ka kwatela komesho. Ohatu ka pumbwa okuulika oudiinini wetu mokuyambidida ovamwatate ovo nomokushikula ewiliko lavo olo tava pewa kuJehova. Osho osho tu na okuninga opo tu ka xupifwe.

15. Ongahelipi hatu dulu okupameka elididimiko letu, nomolwashike sha fimana okuninga ngaho paife?

¹⁵ Elididimiko: Oshoongalele shomo 2017 osha li shi na oshipalanyole tashi ti, “Ino sholola!” Oshoongalele osho oshe tu kwafela tu pameke elididimiko letu nonande otwa taalela eenghalo didjuu. Otwe lihonga kutya elididimiko letu inali kanghamena keenghalo diwa. Ohatu dulu okupameka elididimiko letu mokukala twe lineekela muJehova. (Rom. 12:12) Onghee inatu dimbwa osho Jesus a udaneka a ti: “Ou te lididimike fiyo exulilo, oye ta xupifwa.” (Mat. 24:13) Eudaneko olo ola hala okutya otu na okukala ovadiinini kashi na nee mbudi kutya otwa taalela omayeleko a tya ngahelipi. Ngeenge otwe lididimikile omayeleko aeshe paife, otashi ka pameka eitavelo letu ofimbo oudjuu munene inau hovela.

16. Oshike tashi ulike kutya otu na ouladi, nongahelipi hatu dulu okupameka ouladi wetu paife?

¹⁶ Ouladi: Oshoongalele shomo 2018 osha li shi na oshipalanyole tashi ti, “Kala omuladi”! Oshoongalele osho osha li she tu dimbulukifa kutya okudula kwetu hako taku ulike kutya fye ovaladi. Ndele elididimiko lashili ole likolelela mokulineekela Jehova. Ongahelipi hatu dulu okupameka elineekelo letu muye? Omokulesha Eendjovo daye efiku keshe nomokudilonga kunghee a li a xupifa oshiwana shaye monakudiwa. (Eps. 68:20; 2 Pet. 2:9) Eshi oiwana tai ke tu ponokela poudjuu munene, ohatu ka pumbwa okukala ovaladi nokulineekela muJehova shi dulife nale. (Eps. 112:7, 8; Heb. 13:6) Ngeenge otwe lineekele muJehova paife, ohatu ka kala tu na ouladi oo tau ke tu kwafela tu taalele eponokelo laGog. *

17. Omolwashike tuhe na okukala twa tila Harmagedon? (Tala efano kombada yoshifo.)

¹⁷ Ngaashi sha popiwa moshitukulwa sha tetekela, vahapu vomufye otwa kala onghalamwenyo  yetu aishe momafiku axuuninwa. Ndele natango otu na eteelelo loku ka xupa poudjuu munene. Oita yaHarmagedon oyo tai ka xulifa po filufilu ounyuni ou woukolokoshi. Ashike katu na okukala twa tila. Omolwashike mbela? Omolwaashi oita oyo otai ka kala yaKalunga. (Omayel. 1:33; Hes. 38:18-20; Sak. 14:3) Ngeenge Jehova okwa yandje elombwelo, Jesus Kristus ota ka kwatela komesho etangakwaita laJehova. Ota ka lwa pamwe novavaekwa ovanyumunwa nosho yo ovaengeli omayovi. Otava ka lwifa Satana, eendemoni daye nosho yo omatangakwaita aSatana okombada yedu. — Dan. 12:1; Eh. 6:2; 17:14.

18. (a) Jehova okwe tu udanekela shike? (b) Ehololo 7:9, 13-17 ole ku kwafela ngahelipi u kale u na elineekelo li na sha nonakwiiwa?

¹⁸ Jehova okwa udaneka kutya: “Oshilwifo keshe tashi hambulwa shi ku lwife, otashi nyengwa.” (Jes. 54:17) “Ongudu inene” yovapiya vaJehova ovadiinini otai ka xupa ‘momahepeko manene.’ Otai ka twikila okulongela Kalunga oilonga iyapuki. (Lesha Ehololo 7:9, 13-17.) Ombiibeli inai tu pa tuu elineekelo li na sha nonakwiiwa! Otu shi shii kutya “ava tava diinine, Omwene ote va amene.” (Eps. 31:23) Aveshe ovo ve hole Jehova nohave mu tange otava ka kala va hafa eshi tava ka mona nghee ta tumbalekifa edina laye liyapuki. — Hes. 38:23.

19. Oshike twa teelela tu ka hafele monakwiiwa i li popepi?

¹⁹ Diladila nee 2 Timoteus 3:2-5 kutya ngeno ota longifa omautumbulilo elipi shi na sha novanhu vomounyuni mupe, omo itamu ka kala enwefemo laSatana. (Tala oshimhungu “ Elihumbato lovanhu monakwiiwa.”) Omumwatate George Gangas, * oo a li oshilyo shOlutuwiliki, okwe shi yelifa a ti: “Ounyuni itau ka kala tuu muwa ngeenge keshe umwe okwa ka kala omupiya waJehova! Mafiku oto ka kala u na oufembanghenda wokukala mounyuni mupe. Oto ka kala fiyo alushe ngaashi Jehova. Ohatu ka kala fiyo alushe.” Olo kali fi tuu eteelelo litunhula!