1. Oshike she tu tomha kutya otu li “momafiku axuuninwa”?

MBELA owa dalwa omido odo da tetekela 1914? Ngeenge osho, otashi ulike kutya owa kala onghalamwenyo yoye aishe “momafiku axuuninwa” ounyuni ou. (2 Tim. 3:1) Atusheni otwa kundaneka kombinga yoiningwanima oyo ya xunganekwa kuJesus i na sha nefimbo eli. Oinima oyo oya kwatela mo oita, ondjala, omakakamo edu, omaudu olutapo, ehapupalo loukolokoshi nomahepeko oshiwana shaKalunga. (Mat. 24:3, 7-9, 12; Luk. 21:10-12) Ohatu mono yo nghee ovanhu tave lihumbata monghedi oyo ya xunganekwa komuyapostoli Paulus. (Tala oshimhungu “ Elihumbato lovanhu kunena.”) Tu li Eendombwedi daJehova, otwa tomhwa filufilu kutya otu li “pexulilo lomafiku” axuuninwa. — Mika 4:1.

2. Otwa pumbwa okumona omanyamukulo omapulo elipi?

² Otu na okukala tu li popepi elela nexulilo ‘lomafiku axuuninwa,’ molwaashi paife opa pita efimbo lile okudja mo 1914. Molwaashi exulilo oli li popepi, otwa pumbwa okumona omanyamukulo komapulo amwe a fimana ngaashi: Oiningwanima ilipi tai ka ningwa pexulilo ‘lomafiku axuuninwa’? Jehova okwa teelela tu ninge shike ofimbo twa teelela oiningwanima oyo?

3. Metwokumwe nexunganeko olo li li mo 1 Ovatessaloniki 5:1-3, oiwana otai ka ninga eingido lashike?

³ Lesha 1 Ovatessaloniki 5:1-3. Paulus okwa tumbula “efiku lOmwene.” Momushangwa oo, efiku olo otali ulike kefimbo olo tali ka hovela neponokelo ‘laBabilon Shinene,’ ouhamba womalongelokalunga oipupulu, notali ka xula noita yaHarmagedon.  (Eh. 16:14, 16; 17:5) Ofimbo “efiku” olo inali fika, oiwana otai ka kala nokwiingida ‘ombili neameno.’ Ovapangeli mounyuni omafimbo amwe ohava longifa omautumbulilo oo ngeenge tava popi kombinga yokukaleka po ekwatafano pokati koiwana. * Kakele kaasho, eingido ‘lombili neameno’ olo la popiwa mOmbiibeli otali ka kala la yooloka ko kwaasho. Omolwashike mbela? Ngeenge eingido olo la ningwa, ovanhu vahapu otava ka diladila kutya ovapangeli ova pondola mokuninga ounyuni u kale onhele ya amenwa. Ndele paulelalela “oudjuu unene” otau ka hovela notau shikulwa ‘kehanauno lombadilila.’ — Mat. 24:21.

4. (a) Oshike twa teelela oku ka shiiva shi na sha neingido ‘lombili neameno’? (b) Oshike tu shii nale shi na sha neingido olo?

⁴ Otu shii oinima imwe kombinga yeingido ‘lombili neameno.’ Ashike ope na vali oinima imwe oyo tuhe shii. Katu shi shii kutya oshike tashi ke linyengifa ovapangeli va ninge eingido olo ile kutya otali ka ningwa ngahelipi. Katu shi shii yo ngeenge otali ka ningwa lwoikando ile otali ningwa palumwe monghedi ididilikwedi. Kashi na nee mbudi kutya oshike tashi ka ningwa po, otu shii kutya: Itatu ka pukifwa tu diladile kutya ovapangeli vomounyuni otava dulu okweetifa ombili mounyuni. Mepingafano naasho, Ombiibeli oye tu lombwela tu tale ko eingido olo li li edidiliko. Otali ka ulika kutya ‘efiku laJehova’ oli li pokuhovela.

5. Ongahelipi 1 Ovatessaloniki 5:4-6 tave tu kwafele tu lilongekidile ‘efiku laJehova’?

⁵ Lesha 1 Ovatessaloniki 5:4-6. Paulus okwe tu londwela kutya oshike tu na okuninga po opo tu kale twe lilongekidila ‘efiku laJehova.’ Katu na ‘okukofa ngaashi venya vamwe.’ Otu na ‘okupashuka’ ile tu tye okukala oupafi notwa lungama. Pashihopaenenwa, otwa pumbwa okukala twa lungama opo tuha kufe nandenande ombinga moinima aishe yopolotika younyuni. Ngeenge otwa kufa ombinga muyo, kungaho otwa ninga ‘oshitukulwa shounyuni.’ (Joh. 15:19) Otu shi shii kutya Ouhamba waKalunga oo auke tau ka eta ombili yashili mounyuni.

6. Otwa hala okukwafela ovanhu va ninge shike, nomolwashike?

⁶ Kakele kokukala oupafi fye vene, otwa hala yo okukwafela vakwetu va kale oupafi nova shiive oiningwanima oyo ya xunganekwa mOmbiibeli oyo tai linyenge mounyuni. Natu dimbuluke kutya ngeenge oudjuu munene owa hovele, ita pa ka kala vali efimbo la wana ovanhu va hovele okulongela Jehova. Olo olimwe lomomatomheno kutya omolwashike oilonga yokuudifa ya endelela. *

7. Jehova okwa teelela tu ninge shike paife?

⁷ Jehova okwa teelela tu kale twe lipyakidila noilonga yokuudifa efimbo lixupi olo la xupa ko opo “efiku” laye li uye. Otwa pumbwa  okushilipaleka alushe kutya otu li “ovaladi moilonga yOmwene.” (1 Kor. 15:58) Jesus okwa xunganeka osho tu na okulonga. Eshi a popya kombinga yoiningwanima ididilikwedi oyo ya li tai ka ningwa momafiku axuuninwa, okwa weda ko a ti: “Ndele tete evaengeli oli na okuudifilwa oiwana aishe.” (Mark. 13:4, 8, 10; Mat. 24:14) Diladila ashike kwaashi: Efimbo keshe to i moukalele, oto kufa ombinga mewanifo lexunganeko olo lOmbiibeli.

8. Otu shi shii ngahelipi kutya oilonga yokuudifa otai twikile nomupondo?

⁸ Ongahelipi oilonga yokuudifa ya kala tai pondola? Omudo keshe, ovanhu otava udifilwa onghundana iwa yOuhamba. Pashihopaenenwa, diladila ashike kunghee omuvalu wovaudifi vOuhamba wa hapupala mounyuni aushe momafiku aa axuuninwa. Mo 1914, opa li ovaudifi 5 155 moilongo 43. Kunena ope na ovaudifi omamiliyona 8, 5 moilongo 240. Ashike nande ongaho oilonga yetu inai pwa natango. Otu na okutwikila okushiivifa kutya Ouhamba waKalunga oo auke u li ekandulepo lomaupyakadi aeshe ovanhu. — Eps. 145:11-13.

9. Omolwashike tu na okutwikila okuudifa etumwalaka lOuhamba?

⁹ Oilonga yetu yokuudifa otai twikile fiyo osheshi Jehova a tya osha wana. Okwa xupa efimbo li fike peni opo ovanhu va shiive Jehova Kalunga naJesus Kristus? (Joh. 17:3) Katu shi shii. Otu shi shii kutya ofimbo oudjuu munene inau hovela, ‘aveshe ava va halelela oku ka mona omwenyo waalushe’ otava dulu okutambula ko onghundana iwa. (Oil. 13:48) Ongahelipi hatu dulu okukwafela ovanhu ovo omanga pe na efimbo?

10. Jehova ohe tu kwafele ngahelipi opo tu honge ovanhu oshili?

¹⁰ Jehova ohe tu pe keshe osho twa pumbwa okupitila mehangano laye, opo tu honge ovanhu oshili. Pashihopaenenwa, ohatu deulwa oshivike keshe pokwoongala kwomokati koshivike. Okwoongala oko ohaku tu kwafele tu shiive kutya oshike tu na okupopya petalelepo lotete nopelishuneko. Ohaku tu kwafele yo shi na sha nanghee tu na okukwatela komesho ekonakonombiibeli. Ehangano laJehova ole tu longekidila yo oilongifo oyo i li mOshikefa shoilongifo yokuhonga. Oilongifo oyo ohai tu kwafele tu . . .

•   hovele eenghundafana,

• pendule ohokwe yovapwilikini,

• kwafele ovanhu va kale va hala okulihonga shihapu,

• honge oshili pekonakonombiibeli

• notu shiive ovo ve na ohokwe va talele po epandja letu lokointaneta nove uye kOlupale lOuhamba.

Inashi wana ashike okukala tu na oilongifo oyo ya wana. Ndele otu na oku i longifa. * Pashihopaenenwa, konima eshi wa kundafana nomunhu oo e na ohokwe, mu pa okafo ile oshifo opo a kale ta lesha ye mwene fiyo osheshi we mu alukila. Oshi li oshinakuwanifwa shakeshe umwe womufye omwedi keshe okukala e lipyakidila moilonga yokuudifa.

11. Omolwashike pa longekidilwa Eetundi dokointaneta dokukonakona Ombiibeli?

¹¹ Natango Jehova oha kwafele ovanhu ve lihonge oshili okupitila mEetundi dokointaneta dokukonakona Ombiibeli odo di li ko-jw.org^®. Eetundi odo oda longekidwa nelalakano lashike? Omwedi keshe, ovanhu omayovi omilongo mounyuni ohava kongo eetundi dOmbiibeli kointaneta. Eetundi odo di li kepandja letu otadi kwafele ovanhu va hovele okulihonga kombinga yOmbiibeli. Ovanhu vamwe ovo to popi navo otashi dulika va ongaonge okutambula ko ekonakonombiibeli. Ngeenge osho, va ulikila oshitukulwa kepandja letu lokointaneta ile u va tumine o-link oyo tai va twala keetundi odo. *

12. Oshike omunhu ta dulu okulihonga mEetundi dokointaneta dokukonakona Ombiibeli?

¹² Eetundi odo oda kwatela mo oikundafanwa ei: “Ombiibeli nomushangi wayo,” “Ovanhu ovo va dana onghandangala mOmbiibeli” nosho yo “Etumwalaka lOmbiibeli leteelelo.” Oipalanyole oyo otai hongo:

• Nghee Ombiibeli tai dulu okukwafela omunhu

• Kutya Jehova, Jesus novaengeli ovo oolyelye

• Kutya omolwashike Kalunga a shitila ovanhu

• Kutya omolwashike pe na owii nokumona oixuna

Noya kundafana yo nghee Jehova . . . 

• ta ka xulifa po okumona oixuna nefyo,

• ta ka alulila oonakufya momwenyo

• nanghee ta ka pingena po omapangelo opanhu nOuhamba waye.

13. Mbela Eetundi dokointaneta oda pingena po elongekido li na sha nekonakonombiibeli? Shi yelifa.

¹³ Eetundi dokointaneta inadi pingena po elongekido li na sha nekonakonombiibeli. Jesus okwe tu pa oufembanghenda wokuninga ovanhu ovahongwa. Oileshwa oyo oya longekidwa opo ovanamitima diwa ve i konakone, va kale ve na olupandu laasho ve lihonga nova kale va hala okulihonga shihapu. Kungaho otashi dulika va tambule ko noupu ekonakonombiibeli. Pexulilo lotundi keshe, omuleshi okwa ladipikwa a pule omunhu oo ta ka konakona naye Ombiibeli. Konyala mounyuni aushe, ohatu mono oupokati wovanhu ve dule 230 efiku keshe tava pula ekonakonombiibeli okupitila kepandja letu lokointaneta. Ekonakonombiibeli olo hali ningwa komudidi ola fimana neenghono.

14. Metwokumwe neendjovo daJesus odo di li muMateus 28:19, 20, oshike hatu kendabala okuninga, nomolwashike?

¹⁴ Lesha Mateus 28:19, 20. Eshi hatu konakona Ombiibeli novanhu, otu na okukendabala ngaashi hatu dulu tu ‘ninge ovanhu ovahongwa, noku va longa okudiinina aishe ei Jesus e tu lombwela.’ Otwa pumbwa okukwafela ovanhu va ude ko nghee sha fimana okuninga etokolo va longele Jehova nova yambidide Ouhamba waye. Kungaho ohatu kendabala okukwafela ovanhu va diinine oshili pauhandimwe mokutula moilonga osho ve lihonga, okuliyapulila Jehova nokuninginifwa. Osho osho ashike tashi ke va kwafela va xupe mefiku laJehova. — 1 Pet. 3:21.

15. Oshike osho itatu dulu okuninga, nomolwashike?

¹⁵ Ngaashi sha popiwa metetekelo, kaku na  vali efimbo lihapu exulilo longhalelo ei yoinima li uye. Omolwetomheno olo, katu na efimbo lokukala hatu konakona novanhu ovo itava ningi omalunduluko oo taa ulike kutya ova hala okuninga ovahongwa vaKristus. (1 Kor. 9:26) Oilonga yetu oya endelela neenghono. Ope na natango ovanhu vahapu ovo va pumbwa okuuda etumwalaka lOuhamba omanga ku na efimbo.

16. Metwokumwe nEhololo 18:2, 4, 5, 8, oshike osho atushe tu na okuninga? (Tala yo eshangelo lopedu.)

¹⁶ Lesha Ehololo 18:2, 4, 5, 8. Omushangwa oo owa tumbula vali oshinima shimwe osho Jehova a teelela ovapiya vaye va ninge. Ovakriste vashili aveshe ove na okushilipaleka kutya kave na nandenande ekwatafano naBabilon Shinene. Ofimbo omunhu ina konakona Ombiibeli, otashi dulika a li oshilyo shelongelokalunga loipupulu. Otashi dulika a li ha ongala melongelokalunga olo noha kufa ombinga moinyangadalwa yalo. Ile otashi dulika a li ha yandje omayambidido opashimaliwa komalongelokalunga oo. Ofimbo omukonakonimbiibeli ina pitikwa a ninge omuudifi ina ninginifwa, oku na okweefa po filufilu okukufa ombinga melongelokalunga loipupulu. Oku na okushangela ko onhumwafo yokufiya po elongelokalunga olo ile ehangano lonhumba olo li li oshitukulwa shelongelokalunga loipupulu e va shiivifile kutya ke fi vali oshilyo shavo. *

17. Oilonga yokulikongela omboloto yoludi lilipi Ovakriste ve na okuhenuka, nomolwashike?

¹⁷ Omukriste washili oku na okushilipaleka kutya oilonga yaye kai na ekwatafano naBabilon Shinene. (2 Kor. 6:14-17) Pashihopaenenwa, ke na okulongela ongeleka. Kakele kaasho, Omukriste oo a kutwa mongeshefa yonhumba ke na okukala ha longo oilonga momatungo oo taa xumifa komesho omalongelokalunga oipupulu. Ngeenge oku na ongeshefa yaye mwene, ke na okutambula ko oilonga ile a longe oilonga oyo tai yambidida Babilon Shinene. Omolwashike tu na okuninga etokolo la tya ngaho? Omolwaashi inatu hala okukufa ombinga moilonga nomomanyono omalongelokalunga oo inaa koshoka koshipala shaKalunga. — Jes. 52:11. *

18. Omumwatate umwe okwa ulika ngahelipi koilonga kutya oha diinine omafinamhango Ombiibeli?

¹⁸ Omido opo da di ko, omukulunhuongalo umwe oo a li ha longo mongeshefa yopaumwene okwa li a pulwa a ka longe oilonga yopakafimbo mongeleka modoolopa yavo. Ou e mu pa  oilonga oha udu luhapu omumwatate ta ti ita longo mongeleka. Ndele pomhito opo okwa li a tokola okukonga omunhu umwe oo ta ka longa mo. Ashike nande ongaho, omumwatate okwa li a diinina omifikamhango dOmbiibeli nokwe i anya. Oshivike sha ka landula ko, omunhu oo a ka longa mongeleka okwa li a fanekwa moshifokundaneki shomoshitukulwa ta valele omushiyakano kongeleka. Ngeno omumwatate ka li a diinina etokolo laye, ngeno efano laye olo la pita moshifokundaneki osho. Diladila nee ngeno kutya osho osha kuma ngahelipi Ovakriste vakwao nosho yo onghedi yaye yokukalamwenyo. Mbela ngeno Jehova okwe mu udila ngahelipi?

19-20. (a) Oshike twe lihonga fiyo opapa? (b) Oshike natango twa pumbwa okulihonga?

¹⁹ Metwokumwe nexunganeko lOmbiibeli, oshiningwanima sha tongomana osho shi li pokuningwa, eingido ‘lombili neameno.’ Ohatu pandula eshi Jehova e tu honga tu shiive kutya oiwana kai na fiku i ete ombili yashili notai kalelele. Oshike tu na okuninga ofimbo osho inashi ningwa nehanauno lombadilila inali fika? Jehova okwa teelela tu kale twe lipyakidila noilonga yokuudifa etumwalaka lOuhamba waKalunga nokukendabala okuninga ovanhu vahapu ovahongwa. Pefimbo opo tuu opo, otwa pumbwa okukala twa yooloka ko filufilu komalongelokalunga aeshe oipupulu. Osho osha kwatela mo okweekelashi oukwashilyo keshe nokuhenuka oilonga oyo i na ekwatafano naBabilon Shinene.

²⁰ Ope na vali oiningwanima oyo tai ka ningwa lwopexulilo ‘lomafiku axuuninwa.’ Ope na vali oinima imwe oyo Jehova a teelela tu ninge. Oinima oyo oilipi, nongahelipi hatu dulu okulilongekidila ashishe osho tashi ka ningwa monakwiiwa i li popepi? Osho ohatu ke shi kundafana moshitukulwa tashi landula.