1. Omolwashike Jehova oye aeke tu na okulongela?

OTU na okulongela Jehova oye aeke molwaashi oye Omushiti wetu nOmuyandji womwenyo. (Eh. 4:11) Ashike ohatu shakeneke omashongo. Nonande otu hole Jehova notwe mu fimaneka, otashi dulika tu kale twa fimaneka oinima imwe monghalamwenyo yetu oyo tai tu imbi tu mu longele oye aeke. Otwa pumbwa okushiiva nghee osho tashi dulu okuningwa. Tete natu ka kundafaneni oinima imwe oyo tai tu kwafele tu mone kutya okulongela Jehova oye aeke osha kwatela mo shike.

2. Metwokumwe naExodus 34:14, oshike tu na okuninga ngeenge ohatu longele Jehova oye aeke?

² PaMbiibeli, okulongela Kalunga oye aeke osha hala okutya okukala u mu hole nohole yomoule. Ngeenge otwe liyapulila Jehova, ohatu ke mu longela oye aeke. Itatu ka pitika nande omunhu ile oshinima shonhumba shi kale pondodo yotete monghalamwenyo yetu. — Lesha Exodus 34:14.

3. Omolwashike tu na omatomheno a kola okukala tu hole Jehova?

³ Otu na omatomheno a kola kutya omolwashike tu hole Jehova. Omolwashike mbela? Ohole yetu oya kanghamena koinima oyo twe lihonga kombinga yaye. Otu hole yo omaukwatya aye a denga mbada. Otu shii osho Jehova e hole naasho e tonde, notu na etaleko la fa laye. Otu shii nohatu yambidida elalakano laye li na sha novanhu. Otu udite yo etumba eshi e tu pitika tu kale ookaume kaye. (Eps. 25:14) Keshe osho hatu lihongo shi na sha nOmushiti  wetu ohashi tu ehenifa popepi elela naye. — Jak. 4:8.

4. (a) Ondiaboli ohai longifa shike opo i nghundipaleke ohole yetu yokuhola Jehova? (b) Oshike hatu ka kundafana moshitukulwa eshi?

⁴ Ondiaboli oyo tai pangele ounyuni ou, ohai longifa oinima oyo i holike unene kovanhu i kale ya fimanenena kufye nohai shi ningifa shidjuu kufye okukondjifa omahalo a puka. (Ef. 2:1-3; 1 Joh. 5:19) Elalakano layo oya hala tu kale tu hole oinima imwe ponhele yokukala tu hole Jehova oye aeke. Natu ka kundafaneni eenghedi mbali nghee Ondiaboli tai dulu okuninga ngaho. Onghedi yotete, Ondiaboli ohai tu yeleke tu lalakanene oupuna, nonhivali ohai kendabala oku tu nwefa mo tu hoolole omalihafifo inaa koshoka.

5. Omolwashike tu na okulungamena okukulika ohole yoimaliwa?

⁵ Oshi li paushitwe okukala twa hala oikulya ya wana, oikutu tai wapalele nonhele yokukala i li nawa. Ashike otu na okuhenuka okukulika ohole yoimaliwa. Ovanhu vahapu mounyuni kunena “ovanalwisho voimaliwa” nove hole oinima oyo hai landwa noimaliwa. (2 Tim. 3:2) Jesus okwa li e shi shii kutya ovashikuli vaye otava dulu okuyelekwa va kulike ohole oyo. Jesus okwa ti: “Kaku na ou ta dulu okukalela oovene vavali; osheshi ota tondo umwe, ye e hole omukwao, ile a hokwa ou ndele ta dini winya. Kamu dulu okukalela Kalunga nemona.” (Mat. 6:24) Omunhu oo ta longele Jehova nopefimbo opo tuu opo ota longifa efimbo lihapu nokuninga eenghendabala okulikongela oupuna wounyuni ou, kungaho okwa fa ta longele oovene vavali. Ita longele Jehova oye aeke.

6. Oshike hatu lihongo keendjovo daJesus odo a li a lombwela eongalo lokuLaodikea?

⁶ Lwopexulilo lefelemudo lotete O.P., oilyo yeongalo lomoshilando Laodikea oya li tai litange tai ti: “Aame oshipuna, heeno, nda punapala, ndihe na eshi nda pumbwa.” Ashike pataleko  laJehova nolaJesus, ova li ‘omapongo, ovakwanaluhepo, ovapofi nova li hamunghele.’ Jesus ka li e va pa omayele molwaashi va li oipuna, ndele omolwaashi va li ve hole oimaliwa neenghono osho sha li sha nyona po ekwatafano lavo naJehova. (Eh. 3:14-17) Ngeenge otwa didilike kutya ohatu kulike momitima detu ohole yokuhola oimaliwa, natu katuke diva onghatu opo tu yukife okudiladila kwetu. (1 Tim. 6:7, 8) Ngeenge otwa dopa oku shi ninga, ohatu ka kala nomadiladilo a tukauka, na Jehova ita ka tambula ko onghedi yetu yoku mu longela. Kalunga oye ‘aeke e na okulongelwa.’ (Deut. 4:24, NW.) Oshike tashi dulika shi tu ningife tu kale tuhe na ondjele ngeenge tashi uya poimaliwa?

7-9. Oshike we lihonga koshimoniwa shomukulunhuongalo wedina David?

⁷ Diladila koshihopaenenwa shaDavid, omukulunhuongalo ha longo noudiinini woko-United States. Okwe lipopya mwene kutya okwa kala omunailonga ha longo noudiinini. Okwa li a yelwaayelwa moilonga yavo, nokwa li nokuli a pewa oilonga iwa noimaliwa ihapu nokwa li a talika ko e li umwe womovanhu ovo hava longo noudiinini moshilongo. Okwa ti: “Pefimbo opo, onda li handi diladila kutya oo omanangeko noupuna a dja kuJehova.” Ndele mbela oshoshili tuu?

⁸ David okwa li a didilika kutya oilonga yaye otai tula ekwatafano laye naJehova moshiponga. Okwa ti: “Onde ke lihaluka ashike eshi handi diladila kombinga yomaupyakadi okoilonga ngeenge ndi li mokwoongala ile moukalele. Nonande onda li handi mono oimaliwa ihapu, onda li nda wililwa po neenghono kostresa, nohombo yetu oya li monghuwo i na onghambe.”

⁹ David okwa li a mona kutya okwa pumbwa okutalulula osho a pitifa komesho. Okwa ti: “Onda li nda ninga etokolo la kwata moiti, opo  ndi yukife onghalo.” David okwa li a halelela okuunganekulula elandulafano laye li na sha noilonga naasho okwa li e shi shiivifila omuyandji woilonga. Osha li sha eta oidjemo ilipi? David okwa li a tewa moilonga. Okwa li e linyenga ngahelipi? Okwa ti: “Efiku la landula ko, onda li nda ninga eindilo lokukufa oukwafelikokolindjila tau twikile.” Opo David nomukulukadi waye ve liyambidide pashimaliwa, ova li va konga oilonga yokuwapaleka. Konima yefimbo, okwa ka ninga omukokolindjila wondjikilile, nomokweendela ko kwefimbo, omukulukadi waye naye okwe ke mu waimina. Ovalihomboli ovo ova li va konga oilonga oyo ya li ya dinika kuvahapu, ashike oilonga oyo hayo ya li oshinima sha fimanenena kuvo. Nonande oyuuyemo yavo oya li ya ninipala okuyelekanifa naayo va li ve na nale, omwedi keshe ova li hava mono osho va pumbwa opo va fute oipumbiwa yavo. Ova li va hala okupitifa Jehova komesho, nova li va mona kutya Jehova oha file oshisho ovo va pitifa komesho oinima yOuhamba. — Mat. 6:31-33.

10. Ongahelipi hatu dulu okwaamena omitima detu?

¹⁰ Kashi na nee mbudi kutya otu na oiniwe ihapu ile oinini, atusheni otwa pumbwa okupashukila omitima detu. Ngahelipi mbela? Katu na okukala tu hole unene omaliko. Katu na yo okweefa oilonga yomboloto i kale ya fimanenena kufye ponhele yoilonga yaJehova. Ongahelipi to dulu okumona ngeenge naave osho u li ngaho? Oto dulu okulipula omapulo ngaashi: ‘Mbela ohandi kala handi diladila kombinga yoilonga ngeenge ndi li mokwoongala ile moukalele? Mbela ohandi kala handi lipula ngeenge ohandi ka kala ndi na oimaliwa ya wana monakwiiwa? Mbela oimaliwa noinima yopamaliko ohai etifa omaupyakadi mohombo yetu? Mbela ondi na ngoo ehalo lokulonga oilonga yomboloto oyo ya dinika kuvamwe ngeenge ohai pitike nge ndi longele Jehova efimbo lihapu?’ (1 Tim. 6:9-12) Eshi hatu lipula omapulo oo, natu dimbuluke kutya Jehova oku tu hole nokwa udanekela ovo ve li ovadiinini kuye eudaneko eli tali ti: “Ame ihandi ku efa noitandi ku fii po nande.” Osho osho she linyengifa omuyapostoli Paulus a shange ta ti: “Mokukala kweni kaleni muhe nolwisho.” — Heb. 13:5, 6.

11. Omalihafifo otaa dulu okukuma ngahelipi omunhu?

¹¹ Jehova okwa hala tu hafele onghalamwenyo, nohatu dulu oku shi ninga okupitila momalihafifo. Eendjovo daKalunga oda ti kutya “omunhu ke na nande ouwa umwe, okulya nokunwa nokushambukifa omwenyo waye nouwa mokulonga kwaye kudjuu.” (Omuud. 2:24) Ashike omalihafifo mahapu mounyuni otaa dulu oku tu nwefa mo nai. Ohaa nyono po  omifikamhango dopaenghedi dovanhu nohae va ningifa va tambule ko ile va kale ve hole oinima oyo ya tokolwa kEendjovo daKalunga.

12. Metwokumwe 1 Ovakorinto 10:21, 22, omolwashike tu na okuhoolola pandunge omalihafifo etu?

¹² Otwa hala okulongela Jehova oye aeke, onghee itatu dulu okulya “koshililo shOmwene nokoshililo sheendemoni.” (Lesha 1 Ovakorinto 10:21, 22.) Luhapu okulya pamwe naumwe ohashi ulike kutya omu na ekwatafano naye. Ngeenge otwa hoolola omalihafifo oo taa xumifa komesho elongifo leenghono, oumhulile, oluhaelo, oikala nomahalo opambelela, kungaho otwa fa hatu li oikulya oyo ya longekidwa kovatondi vaKalunga. Osho itashi ke tu kuma ashike, ndele otashi ka nyona po yo ekwatafano letu naJehova.

13-14. Metwokumwe naJakob 1:14, 15, omolwashike tu na okulipula shi na sha nomalihafifo oo hatu hoolola? Shi yelifa.

¹³ Diladila keenghedi dimwe dokondadalunde omo omalihafifo taa dulu okufaafanifwa noikulya. Ngeenge hatu li, ohatu hoolola osho hatu tula mokanya. Ndele shimha twa pona oikulya, ihatu dulu okuhoolola nghee i na okukuma omalutu etu. Oikulya iwa ohai tu etele oukolele, ndele oikulya ii otai dulu okunyona po oukolele wetu. Otashi dulika tuha didilike oidjemo pefimbo opo, ndele otai ka holoka mokweendela ko kwefimbo.

¹⁴ Sha faafana, ngeenge hatu hoolola omalihafifo, kungaho ohatu dulu okuhoolola osho hatu tula momadiladilo etu. Ndele konima yaasho, omalihafifo oo twa hoolola ohaa ka kuma omadiladilo nomitima detu. Omalihafifo mawa otaa dulu oku tu etela ouwa, ndele omalihafifo oo inaa koshoka otaa dulu oku tu yahameka. (Lesha Jakob 1:14, 15.) Oidjemo yomalihafifo inaa koshoka otashi dulika iha didilikwe mo diva, ndele otashi dulika i ka didilikwe mo mokweendela ko kwefimbo. Nomolwaasho Ombiibeli ye tu londwela ya ti: “Inamu lifufya, Kalunga iha shekwa; osheshi eshi omunhu te shi kunu, osho tuu te shi teya yo. Ou ta kunu mombelela yaye, ota ka teya enyonauko kombelela; ndele ou ta kunu mOmhepo, oye ta ka teya omwenyo waalushe okOmhepo.” (Gal. 6:7, 8) Inashi fimana tuu okuhenuka omalihafifo aeshe oo taa xumifa komesho oinima oyo Jehova e tonde! — Eps. 97:10.

15. Oshali ilipi oyo Jehova e tu longekidila opo tu i hafele?

¹⁵ Ovapiya vaJehova vahapu ohava hafele okutala o-JW Broadcasting, oTV yetu oyo hai talwa mounyuni aushe. Omumwameme wedina Marilyn okwa ti: “O-JW Broadcasting oya kwafela nge ndi kale nda hafa, nohandi tale oinima aishe oyo i li ko molwaashi ohai etele nge ouwa. Ngeenge ndi udite owike ile nda wililwa po, ohandi tuwa omukumo koshipopiwa ile kElongelokalunga longula olo hali kala ko. Osho ohashi ehenifa nge popepi elela naJehova nehangano laye. O-JW Broadcasting oya lundulula lela onghalamwenyo yange.” Oho mono ngoo ouwa moshali oyo ya dja kuJehova? Kakele ko-JW Broadcasting oyo hai piti omwedi keshe, ohaku kala vali oinima ihapu yokupwilikina, ouvidio nomaimbilo taa tungu oo to dulu okupwilikina efimbo keshe.

16-17. Omolwashike tu na okulungamena efimbo olo hatu longifa momalihafifo, nongahelipi hatu dulu oku shi ninga?

¹⁶ Katu na ashike okulungamena oludi lomalihafifo oo hatu kufa ombinga muo, ndele otu na yo okulungamena efimbo olo hatu longifa. Ngeenge hasho, ohatu ka longifa efimbo lihapu momalihafifo li dulife olo hatu longifa mokulongela Jehova. Vahapu ohava mono shidjuu okungabeka efimbo olo hava longifa momalihafifo. Omumwameme womido 18 wedina Abigail okwa ti: “Okutala oTV ohashi kwafele nge ndi kale nda tulumukwa pexulilo lefiku lomalipyakidilo. Ndele ngeenge inandi lungama, ohandi i tale efimbo lihapu neenghono.” Omumwatate  omunyasha wedina Samuel okwa ti: “Omafimbo amwe ohandi lihange handi tale ouvidio vahapu neenghono kointaneta. Ohandi hovele ashike nokutala kamwe, ndele ohandi ke lihanga nda kala po oule weevili nhatu ile nhee inandi shi didilika.”

¹⁷ Ongahelipi to dulu okupashukila efimbo olo ho longifa momalihafifo? Tete, ou na okushiiva kutya oho longifa efimbo li fike peni momalihafifo. Omolwashike ito kendabala okudidilika kutya owa longifa efimbo li fike peni oule woshivike shimwe? Shanga mokalindeli kutya owa longifa efimbo li fike peni okutala oTV, okulongifa ointaneta nokudana ou-game kongodi yoye yopeke. Ngeenge owa didilike kutya oho longifa efimbo lihapu unene, kendabala okulitulila po elandulafano. Hoolola tete efimbo lokuninga oinima oyo ya fimana, opo nee eli la xupa po to li longifa momalihafifo. Oshitivali, pula Jehova e ku kwafele u kale metwokumwe nelandulafano loye. Osho otashi ke ku kwafela u kale u na efimbo neenghono odo wa pumbwa opo u ninge ekonakonombiibeli lopaumwene, elongelokalunga loukwaneumbo, u lilongekidile nokukala pokwoongala nokulongela Jehova moilonga yokuudifa nokuhonga. Kungaho ito ke lipa vali oushima omolwefimbo olo wa longifa momalihafifo.

18-19. Ongahelipi hatu dulu okuulika kutya ohatu longele Jehova oye aeke?

¹⁸ Eshi omuyapostoli Petrus a shanga kombinga yexulilo lounyuni waSatana nosho yo ounyuni mupe oo tau uya, okwa ti: “Ovaholike, mokuteelela oinima ei kendabaleni shili, mu monike puye muhe nonyata nomuhe noshipo mombili.” (2 Pet. 3:14) Ngeenge otwa diinine eendjovo odo nokuninga ngaashi hatu dulu opo tu kale twa koshoka pamhepo nopaenghedi, kungaho ohatu ka ulika kutya ohatu longele Jehova oye aeke.

¹⁹ Satana nounyuni waye otava twikile oku tu yeleka opo tu pitife oinima imwe komesho ponhele yokupitifa Jehova komesho. (Luk. 4:13) Kashi na nee mbudi kutya otwa taalela omashongo e fike peni, itatu ka pitifa nande omunhu ile oshinima shonhumba komesho ponhele yaJehova. Otwa tokola toko okuyandja kuJehova osho e na okupewa, sha hala okutya oku mu longela oye aeke.