1-2. Omuudifi 11:6 okwa pambafana ngahelipi noilonga yokuudifa onghundana iwa yOuhamba?

MOILONGO imwe, ovanhu ohava kala va hala okuuda shihapu ngeenge ova udifilwa onghundana iwa, nohava kala ve shi hafela neenghono. Ofimbo moilongo imwe, ovanhu kave na ohokwe muKalunga ile mOmbiibeli. Mbela ovanhu moshitukulwa sheni ohave linyenge ngahelipi ngeenge tava udifilwa onghundana iwa? Kashi na nee mbudi kutya ovanhu ohave linyenge ngahelipi, Jehova okwa hala tu twikile okuudifa fiyo osheshi oilonga yokuudifa ya pwa.

² Jehova okwa tula po efimbo lokondadalunde kutya onaini oilonga yokuudifa tai ka pwa, opo nee “exulilo tali uya.” (Mat. 24:14, 36) Ofimbo twa teelela, ongahelipi hatu dulu okudulika keendjovo odo tadi ti “ino tulumukifa eke loye”? * — Lesha Omuudifi 11:6.

3. Oshike hatu ka kundafana moshitukulwa eshi?

³ Moshitukulwa sha dja ko, otwa kundafana oinima ine oyo twa pumbwa okuninga opo tu pondole moilonga ‘yokuyula ovanhu.’ (Mat. 4:19) Moshitukulwa eshi, ohatu ka kundafana eenghedi nhatu odo tadi ke tu kwafela tu kale twa tokola toko okuudifa, kashi na nee mbudi kutya otwa taalela eenghalo da tya ngahelipi. Ohatu ke lihonga kutya omolwashike sha fimana (1) okukala hatu yandje elitulemo, (2) ovalididimiki nosho yo (3) okukala tu na eitavelo la kola.

4. Omolwashike tu na okukala hatu yandje elitulemo koilonga oyo twa pewa kuJehova?

⁴ Jesus okwa xunganeka oiningwanima nosho yo eenghalo odo tadi ka holoka po momafiku axuuninwa nonokutya oinima oyo otai ka ningifa ovashikuli vaye vaha yandje elitulemo koilonga yokuudifa. Okwe va lombwela va ‘kale oupafi.’ (Mat. 24:42) Nokunena, nafye otwa taalela onghalo ya faafana oyo ya li ya imba ovanhu vopefimbo laNoa va yandje elitulemo kwaasho a li ta udifa. (Mat. 24:37-39; 2 Pet. 2:5) Onghee hano, otwa hala okukala hatu yandje elitulemo koilonga oyo twa pewa kuJehova.

5. Onghundana iwa otai ka udifwa shi fike peni metwokumwe nOilonga 1:6-8?

⁵ Kunena, otwa pumbwa okukala hatu yandje elitulemo koilonga yokuudifa. Jesus okwa xunganeka kutya oilonga yokuudifa otai ka tamunuka mo nosho yo kutya otai ka udifwa oule wefimbo konima yefyo laye. (Joh. 14:12) Konima yefyo laye, ovahongwa vaye vamwe ova li va shuna koilonga yavo yokuyula eeshi. Konima eshi a nyumuka, okwa li a ningifa ovahongwa vaye vamwe va kwate eeshi dihapu pashikumwifilonga. Jesus okwa divilika pomhito opo kutya oilonga yokuyula ovanhu oyo ya fimanenena i dulife oshilonga keshe. (Joh. 21:15-17) Ofimbo Jesus ina londa a ya meulu, okwa li a lombwela ovahongwa vaye kutya oilonga yokuudifa oyo a hovela otai ka tamunuka mo neenghono, ndele itai ka udifilwa ashike muIsrael. (Lesha Oilonga 1:6-8.) Konima yomido, Jesus okwa li a ulikila omuyapostoli Johannes emoniko li na sha naasho tashi ka ningwa po “mefiku lOmwene.” * Oshinima shimwe osho Johannes a mona memoniko olo likumwifi, osheshi a mona omweengeli e na “onghundana iwa yaalushe” oyo i na okuudifilwa “oiwana, omihoko, omalaka nomaludi aeshe.” (Eh. 1:10; 14:6) Osho otashi ulike kutya  Jehova okwa hala tu kufe ombinga moilonga oyo yokuudifa fiyo osheshi ya pwa.

6. Ongahelipi hatu dulu okukala hatu yandje elitulemo koilonga yokuudifa?

⁶ Ngeenge otwa kala hatu diladila kwaashishe osho Jehova ta ningi opo e tu kwafele, ohatu ka kala hatu yandje elitulemo koilonga yokuudifa. Pashihopaenenwa, ohe tu pe eendja dopamhepo da henena, kutya nee okupitila moishangomwa ya pilindwa ile omoikwaelektronika, oinima oyo ya kwatwa momawi, ouvidio nosho yo oinima aishe oyo i li kointaneta. Diladila yo shi na sha no-website yetu yopambelewa, oyo i na omauyelele e li momalaka e dulife 1 000. (Mat. 24:45-47) Mepingafano novanhu mounyuni ovo va tukulwa keepolotika, komalongelokalunga nosho yo koiniwe, fye otu li oshitukulwa shoumwainafana wopaKriste wa hangana womounyuni aushe tu dulife peemiliyona hetatu. Pashihopaenenwa, mEtitano, mo 19 Aprili 2019, Eendombwedi mounyuni aushe oda li da dula okutala okavidio oko ka li ka kundafana omushangwa wefiku olo. Onguloshi yefiku olo, ovanhu 20 919 041 ova li va ongala opo va dane Edimbuluko lefyo laJesus. Ohatu ka kala hatu yandje elitulemo koilonga yokuudifa yOuhamba ngeenge otwa kala hatu dilonga koufembanghenda oo tu na wokukala poiningwanima oyo nokukufa ombinga muyo.

7. Oshihopaenenwa shaJesus otashi tu kwafele ngahelipi tu kale hatu yandje elitulemo?

⁷ Onghedi imwe omo hatu dulu okuyandja elitulemo koilonga yokuudifa omokushikula oshihopaenenwa shaJesus. Ka li a efa nande osha shi mu ye moshipala aha udife oshili. (Joh. 18:37) Ka li a yulwa kuSatana eshi a li te mu ulikile “omauhamba aeshe omounyuni newapalo lao”; noine liyandja kwaavo va li va hala oku mu ninga ohamba. (Mat. 4:8, 9; Joh. 6:15) Ka li e lihalela oinima yopamaliko; noina efe a mbadapalekwe komafininiko a kwata moiti. (Luk. 9:58; Joh. 8:59) Ngeenge otwa dilonga komayele omuyapostoli Paulus, ohatu ka kala hatu yandje elitulemo eshi eitavelo letu tali ka yelekwa. Paulus okwa ladipika Ovakriste vakwao va shikule oshihopaenenwa shaJesus opo ‘vaha loloke nokusholola’! — Heb. 12:3.

8. Elididimiko oshike, nomolwashike la pumbiwa unene tuu paife?

⁸ Elididimiko olo oukwatya wokukala wa ngungumana fiyo osheshi onghalo ya lunduluka. Otwa pumbwa elididimiko molwaashi omafimbo amwe otashi dulika tu kale twa hala onghalo oyo idjuu i dje po meendelelo, ile tashi dulika tu kale twa teelela oule wefimbo pa ningwe omalunduluko. Omuprofeti Habakuk okwa li a teelela oukolokoshi wOvajuda u xulifwe po. (Hab. 1:2) Ovahongwa vaJesus ova li va teelela Ouhamba u uye “pefimbo opo” noku va xupifa komafininiko Ovaroma. (Luk. 19:11) Fye otwa teelela nodjuulufi eshi Ouhamba waKalunga tau ka hanauna po oukolokoshi nokweeta ounyuni mupe wouyuki. (2 Pet. 3:13) Onghee hano, otwa pumbwa okukala ovalididimiki nokuteelela eufwafimbo laJehova li fike. Natu ka taleni keenghedi dimwe omo Jehova te tu hongo elididimiko.

9. Oihopaenenwa ilipi tai ulike kutya Jehova omulididimiki?

⁹ Jehova oku li oshihopaenenwa sha denga mbada shelididimiko. Okwa li a pa Noa efimbo la wana lokutunga onguluwato nosho yo okukala e li “omuudifi wouyuki.” (2 Pet. 2:5; 1 Pet. 3:20) Jehova okwa li a pwilikina lwoikando kuAbraham eshi a li te mu pula shi na sha netokolo laye lokuhanauna po ovanhu ovo hava kala muSodom naGomorra. (Gen. 18:20-33) Oule womido omafele, Jehova okwa kala nokulididimikila oshiwana shaIsrael osho sha li shihe fi oshidiinini. (Neh. 9:30, 31) Kunena, otu wete elididimiko laJehova eshi a pa ovanhu omhito ve “lidilulule.” (2 Pet. 3:9; Joh. 6:44; 1 Tim.  2:3, 4) Oshihopaenenwa shaJehova otashi tu kwafele tu kale ovalididimiki eshi hatu twikile okuudifila ovanhu noku va honga. Natango, Jehova ote tu hongo elididimiko okupitila mefaneko olo tali hangwa mEendjovo daye.

10. Metwokumwe naJakob 5:7, 8, oshike hatu lihongo koshihopaenenwa shomunamapya?

¹⁰ Lesha Jakob 5:7, 8. Oshihopaenenwa shomunamapya otashi tu hongo elididimiko. Oshoshili kutya oimeno imwe ohai kulu meendelelo. Ashike oimeno ikwao, unene tuu omiti odo hadi imi oiimati, ohai pula oule wefimbo opo i kule. Oikunomwa yomuIsrael oya li hai pula eemwedi hamano lwaapo opo i kule. Ovanamapya ova li hava kunu diva eembuto davo shimha odula ya hovele okuloka, nova li hava teya pokufu konima eshi odula ya sheka. (Mark. 4:28) Onghee hano, natu hopaeneneni elididimiko lovanamapya. Ashike kashipu okuninga ngaho.

11. Elididimiko ohali tu kwafele ngahelipi moukalele?

¹¹ Ovanhu inava wanenene ohava kala va hala diva okumona oidjemo yeenghendabala davo. Ashike ngeenge otwa hala oimeno yetu i ime nawa, otwa pumbwa okufa, okukuna, okuhelela noku i tekela. Oilonga yokuninga ovanhu ovahongwa nayo oya pumbwa eenghendabala tadi twikile. Otashi pula efimbo opo tu kwafele ovakonakoni vetu va efe po onhondo nova kale ovanahole. Elididimiko otali ke tu kwafela tuha teke omukumo ngeenge hatu shakeneke omaudjuu. Otwa pumbwa elididimiko ngeenge hatu kwafele ovanhu ovo va halelela okupwilikina nokulihonga oshili. Katu na okufininika omukonakonimbiibeli a pameke eitavelo laye. Omafimbo amwe, nokuli novahongwa vaJesus kava li hava udu ko diva eityo laasho e va honga. (Joh. 14:9) Natu dimbuke alushe kutya fye ohatu kunu nokutekela, ashike Kalunga oye ta kulike. — 1 Kor. 3:6.

12. Ongahelipi hatu dulu okuulika elididimiko ngeenge hatu udifile ovapambele ovo vehe fi Eendombwedi?

¹² Onghedi imwe omo hatu dulu okumona shidjuu okukala ovalididimiki, ongeenge  hatu udifile ovapambele vetu ovo vehe fi Eendombwedi. Efinamhango olo tali hangwa mOmuudifi 3:1, 7 otali dulu oku tu kwafela. Ola ti: ‘Ope na efimbo lokumwena nefimbo lokupopya.’ Elihumbato letu liwa otali dulu okukwafela ovapambele vetu va pwilikine ketumwalaka olo hatu udifa. Natu kaleni alushe twe lilongekida oku va lombwela kombinga yaJehova. (1 Pet. 3:1, 2) Otwa pumbwa okulididimikila ovanhu aveshe, mwa kwatelwa ovapambele vetu, eshi hatu va udifile noku va honga nouladi.

13-14. Oihopaenenwa imwe yelididimiko ilipi hatu dulu okushikula?

¹³ Ohatu dulu okulihonga elididimiko kovapiya vaJehova ovadiinini ovo va tumbulwa mOmbiibeli nosho yo ovo vopefimbo letu. Habakuk okwa li a teelela oukolokoshi u hanaunwe po, ashike okwa li a ulika elididimiko eshi a ti: “Ame onda hala okuya konhele yange yenangelo.” (Hab. 2:1) Omuyapostoli Paulus okwa popya kutya okwa li a hala “okumanifa” oukalele waye. Ndele okwa li a twikila nelididimiko ‘okuudifa onghundana iwa.’ — Oil. 20:24.

¹⁴ Diladila koshihopaenenwa shovalihomboli ovo va li va ya kOfikola yaGilead, ndele tava tuminwa koshilongo oko ku na Eendombwedi dinini, novanhu vahapu kava li Ovakriste. Ovanhu ashike vanini va li va hala okukonakona Ombiibeli. Mepingafano naasho, ovanafikola vakwao, ovo va li navo koGilead tava longele koilongo imwe, ova li have va tumine eelaporta dovakonakonimbiibeli vavo vahapu ovo tava ningi exumokomesho. Ovalihomboli ovo ova twikila okuudifa nelididimiko nonande ovanhu womoshitukulwa shavo ihava pwilikine. Konima yomido hetatu odo va kala nokuudifila moshitukulwa osho ova ka kala va hafa eshi va mona omukonakonimbiibeli wavo umwe ta ninginifwa. Oshike hatu lihongo koihopaenenwa yovapiya vaJehova vonale novokunena? Ovapiya ovo ovadiinini kava li va sholola ile va tulumukife omake avo, na Jehova okwa li e va nangeka noupuna omolwelididimiko lavo. Onghee hano, ‘natu hopaeneneni ovo va wanifilwa osho sha li sha udanekwa omolweitavelo nelididimiko lavo.’ — Heb. 6:10-12.

15. Omonghedi imwe ilipi eitavelo tali tu linyengifa tu kale twa tokola toko okuudifa?

¹⁵ Otu na eitavelo metumwalaka olo hatu udifa. Onghee hano, nashi tu linyengifa tu kale twa halelela okuudifila ovanhu vahapu ngaashi tashi dulika. Otwe lineekela momaudaneko oo taa hangwa mEendjovo daKalunga. (Eps. 119:42; Jes. 40:8) Otwa mona omaxunganeko amwe Ombiibeli a wanifwa pefimbo letu. Otwa mona nghee ovanhu va lundulula nova xwepopaleka onghalamwenyo yavo eshi va tula moilonga omayele Ombiibeli. Osho oshe tu pa elineekelo kutya onghundana iwa yOuhamba oi li etumwalaka olo ovanhu aveshe va pumbwa okuuda.

16. Metwokumwe nEpsalme 46:1-3, ongahelipi eitavelo letu muJehova naJesus tali tu kwafele tu kale twa tokola toko okuudifa?

¹⁶ Otu na yo eitavelo muJehova, oo e li Odjo yetumwalaka olo hatu udifa noye a nangeka po Jesus, oo e li Ohamba yOuhamba waYe. (Joh. 14:1) Kashi na nee mbudi kutya ohatu shakeneke eenghalo da fa peni, Jehova oku li alushe ehondameno letu neenghono detu. (Lesha Epsalme 46:1-3.) Kakele kaasho, otu na elineekelo kutya Jesus oye ta wilike oilonga yokuudifa, ta longifa eenghono odo a pewa kuJehova. — Mat. 28:18-20.

17. Yandja oshihopaenenwa osho tashi ulike kutya omolwashike tu na okutwikila okuudifa.

¹⁷ Eitavelo ohali tu kwafele tu kale tu na eitavelo muJehova, tu na elineekelo kutya ota ka nangeka noupuna eenghendabala detu, nokuli nomafimbo amwe omeenghedi omo inatu shi  teelela. (Omuud. 11:6) Pashihopaenenwa, efiku keshe ovanhu omayovi ohava ende poitaafula yetu yoishangomwa nopoutemba. Mbela onghedi oyo ohai pondola? Osho naanaa! Okafo Oukalele wetu wOuhamba kaNovemba 2014 oka popya shi na sha nomunyasha umwe wokoshiputudilo shopombada, oo a li a shangela onhumwafo Eendombwedi daJehova. Ka li a mona Olupale lOuhamba, ashike okwa li a mona oshitaafula shoileshomwa, nokwa li a mona ouyelele oo a li a shanga monhumwafo yaye. Lwanima, okwa ka ninginifwa e li Ondombwedi yaJehova, nopaife oku li omukokolindjila wondjikilile. Oimoniwa oyo otai tu linyengifa tu twikile okuudifa molwaashi otai ulike kutya natango ope na ovanhu ovo va hala okupwilikina ketumwalaka lOuhamba.

18. Otu shi shii ngahelipi kutya oilonga yokuudifa kombinga yOuhamba otai ka pwa peufwafimbo laJehova?

¹⁸ Ohatu dulu okukala noushili kutya oilonga yokuudifa kombinga yOuhamba otai ka pwa pefimbo la wapala. Diladila kwaasho sha ningwa po pefimbo laNoa. Jehova okwa ulika kutya oku li omudiinini wefimbo a denga mbada. Okwa kala a tokola komesho yefimbo omido 120 lwaapo kutya eyelu otali ke uya naini. Opo nee, konima yomido dihapu, Jehova okwa li a lombwela Noa a tunge onguluwato. Oule womido 40 ile 50 lwaapo ofimbo Eyelu inali uya, Noa okwa twikila okulonga noudiinini. Nonande ovanhu kava li tava pwilikine, okwa li a twikila okuudifa etumwalaka lelondwelo fiyo osheshi Jehova e mu lombwela a twale oinamwenyo monguluwato. Naashi efimbo la fika, “Omwene okwa idila po.” — Gen. 6:3; 7:1, 2, 16.

19. Oshike twa teelela nodjuulufi ngeenge inatu tulumukifa omake etu?

¹⁹ Mafiku, Jehova ote ke tu shiivifila kutya oilonga yokuudifa onghundana iwa yOuhamba oya pwa; opo nee ota ka “indila po omuvelo” eshi ta ka hanauna po ounyuni waSatana nokweeta ounyuni mupe wouyuki. Onghee hano, natu hopaeneneni Noa, Habakuk nosho yo vamwe ovo va li inava tulumukifa omake avo. Natu yandjeni elitulemo koilonga yokuudifa tu na elididimiko nokukala neitavelo la kola muJehova nomomaudaneko aye.