1. Onaini hashi kala shidjuu okulongela Jehova?

ONAINI hashi kala unene shidjuu okulongela Jehova, ongeenge pe na omaupyakadi mahapu ile ongeenge pe na ombili? Ngeenge twa taalela omashongo ohatu kala twe lineekela filufilu muJehova. Mbela fye ohatu longifa ngahelipi efimbo olo lombili? Mbela omafimbo amwe ohatu efa po okulongela Kalunga? Jehova okwa li a londwela Ovaisrael kutya osho otashi dulu oku va ningilwa. — Deut. 6:10-12.

2. Oshihopaenenwa shilipi twa tulilwa po kohamba Asa?

² Ohamba Asa oi li oshihopaenenwa sha denga mbada shi na sha nokukatuka pandunge ngeenge tashi uya mokulineekela muJehova nomutima aushe. Oya li ya longela Jehova pefimbo loudjuu nopefimbo lombili. Okudja pehovelo, “omutima waAsa wa li shili we liyandja kOmwene.” (1 Eeh. 15:14) Onghedi imwe omo Asa a ulika kutya oku na etilokalunga, osheshi a hanauna po elongelokalunga loipupulu muJuda. Ombiibeli oya ti kutya “okwa hanauna po eealtari dokoilongo noikulundu yokuyambela, ndele ta tataula eengudi domamanya nokwa ka po omiti domalupwelele daAsera.” (2 Omaf. 14:3, 5) Okwa kufa yo inakulu Maaka ondodo oyo a li e na mouhamba e li omukulukadi wohamba. Omolwashike mbela? Omolwaashi okwa li ha ladipike ovanhu va longele oshihongwafano. — 1 Eeh. 15:11-13.

3. Oshike hatu ka kundafana moshitukulwa eshi?

³ Asa okwa ninga shihapu shihe fi ashike okuhanauna po oihongwafano. Okwa xumifa komesho elongelokalunga la koshoka, nokwa ladipika Ovajuda va hovele vali okulongela Jehova. Jehova okwa li a nangeka noupuna Asa nosho yo Ovaisrael  nefimbo lombili. * Omido omulongo dokupangela kwaAsa, ‘oshilongo osha kala nombili.’ (2 Omaf. 14:1, 4, 6) Moshitukulwa eshi, ohatu ka kundafana nghee Asa a longifa efimbo olo lombili. Opo nee, ohatu ka kundafana oshihopaenenwa shOvakriste vomefelemudo lotete ovo va li va longifa nawa efimbo lombili ngaashi Asa. Nohauxuuninwa, ohatu ka kundafana epulo eli kutya: Ngeenge ou li moshilongo omo epangelo la pitika Eendombwedi daJehova di longele Kalunga da manguluka, oto ka longifa ngahelipi efimbo olo lombili?

4. Metwokumwe no 2 Omafimbo 14:2, 6, 7, Asa okwa li a longifa ngahelipi efimbo olo lombili?

⁴ Lesha 2 Omafimbo 14:2, 6, 7. Asa okwa li a lombwela ovanhu kutya Jehova oye e va “pa etulumuko keembinga adishe.” Asa ka li e udite kutya efimbo olo lombili ola li efimbo lokutulumukwa. Mepingafano naasho, okwa li a hovela okutunga oilando, eehotekuma, eeshungongulu nomivelo. Mbela Asa okwa li a hala okutya ngahelipi eshi a lombwela Ovajuda a ti: “Fimbo oshilongo shi nombili”? Okwa li a hala okutya ovanhu ova li tava dulu okweenda va manguluka moshilongo osho va pewa kuKalunga noku shi tunga nopehe na okwiiwa moshipala kovatondi. Okwa li a ladipika ovanhu va mone ouwa mefimbo olo lombili.

5. Omolwashike Asa a li a pameka etangakwaita laye?

⁵ Asa okwa li yo a longifa efimbo olo lombili opo a pameke etangakwaita laye. (2 Omaf. 14:8) Mbela osho osha hala okutya ka li e lineekela muJehova? Hasho nandenande. Ponhele yaasho, Asa okwa li e shii kutya oshi li oshinakuwanifwa shaye e li ohamba opo a kwafele ovanhu ve lilongekidile omaupyakadi oo tashi dulika va ka shakeneke monakwiiwa. Asa  okwa li e shii kutya efimbo lombili olo la li tali hafelwa kOvajuda otashi dulika lopakafimbo, naasho osho sha ka ningwa shili.

6. Ongahelipi Ovakriste vomefelemudo lotete va longifa efimbo olo lombili?

⁶ Nonande Ovakriste vomefelemudo lotete ova li hava kala tava hepekwa, ova li yo va hafela efimbo lombili. Mbela ovahongwa ova li va longifa ngahelipi efimbo olo? Ovalumenhu novakainhu ovo ovadiinini ova li va udifa onghundana iwa nouladi. Ehokololo olo tali hangwa mOilonga ola popya kutya ova “kala hava tila Jehova.” Ova kala nokuudifa onghundana iwa, noshidjemo “ova li va hapupala.” Jehova okwa li a nangeka noupuna eenghendabala davo dokuudifa nouladi pefimbo olo lombili. — Oil. 9:26-31.

7-8. Paulus nosho yo Ovakriste vakwao ova li va ninga po shike eshi va li va mona omhito? Shi yelifa.

⁷ Ovahongwa vomefelemudo lotete, ova li va longifa omhito keshe, opo va tandaveleke onghundana iwa. Pashihopaenenwa, eshi omuyapostoli Paulus a didilika kutya ope na omhito inene ye mu yeulukila ofimbo a li muEfeso, okwa li a longifa omhito oyo opo a udife noku ninge ovanhu ovahongwa moshilando osho. — 1 Kor. 16:8, 9.

⁸ Paulus nosho yo Ovakriste vakwao ova li va mona omhito imwe eshi omhata i na sha nepitotanda ya li ya kandulwa po mo 49 O.P. (Oil. 15:23-29) Konima eshi etokolo la kundafanwa momaongalo, ovahongwa ova li va ninga eenghendabala da mana mo dokuudifa “onghundana iwa i na sha neendjovo daJehova.” (Oil. 15:30-35) Osha li sha eta oidjemo ilipi? Ombiibeli oya ti kutya “eitavelo lovamwatate momaongalo oo ola li la pamekwa, nomuvalu wavo owa enda tau hapupala efiku keshe.” — Oil 16:4, 5.

9. Onghalo oya tya ngahelipi moilongo ihapu kunena, nohatu dulu okulipula epulo lilipi?

⁹ Moilongo ihapu kunena, ohatu udifa nopehe na omapiyaaneko. Mbela ou li moshilongo omo wa pewa emanguluko lokulongela Kalunga? Ngeenge osho, lipula kutya, ‘Ohandi longifa ngahelipi emanguluko olo?’ Pefimbo eli lomafiku axuuninwa a didilikwedi, ehangano laJehova ohali ningi oikonga yokuudifa nokuhonga mounyuni aushe. (Mark. 13:10) Ope na oinima ihapu oyo hatu dulu okulonga moilonga oyo.

10. Ohatu ladipikwa tu ninge shike pa 2 Timoteus 4:2?

¹⁰ Ongahelipi to dulu okulongifa efimbo olo lombili? (Lesha 2 Timoteus 4:2.) Omolwashike ito konakona eenghalo doye u tale ngeenge ove ile oshilyo shimwe shomoukwaneumbo weni otashi dulu okukufa ombinga moilonga yokuudifa pauyadi, tashi dulika nande okuninga omukokolindjila? Paife halo efimbo lokulalakanena oupuna nosho yo omaliko, oinima oyo itatu ka pita nayo poudjuu munene. — Omayel. 11:4; Mat. 6:31-33; 1 Joh. 2:15-17.

11. Ovaudifi vamwe ova ninga po shike opo va dule okuudifila ovanhu vahapu ngaashi tashi dulika?

¹¹ Ovaudifi vahapu ove lihonga elaka lipe opo va dule oku li longifa mokuudifa nokuhonga. Ehangano laJehova ohali tu yambidida eshi hali nyanyangida oishangomwa ya kanghamena kOmbiibeli momalaka oo taa ende taa hapupala. Pashihopaenenwa, oishangomwa yetu oya li momalaka 500 lwaapo mo 2010. Paife, oishangomwa yetu ohai piti momalaka e dulife pe 1 000.

12. Ovanhu ohava mono ngahelipi ouwa ngeenge tava udu etumwalaka lOuhamba melaka olo va nyama? Yandja oshihopaenenwa.

¹² Ovanhu ohava kala ve udite ngahelipi  ngeenge tava udu kombinga yaJehova melaka olo va nyama? Diladila koshimoniwa shomumwameme oo a mona ouwa poshoongalele shoshitukulwa moMemphis, Tennessee, moU.S.A. Oshoongalele osho osha li melaka lOshikinyarwanda, olo hali popiwa unene moRwanda, moCongo (Kinshasa) nomoUganda. Konima yoshoongalele, omumwameme umwe ha popi elaka lOshikinyarwanda okwa ti: “Eshi osho oshikando shotete nda mona ouwa pauyadi poshoongalele konima yomido 17 eshi nda tembukila moUnited States.” Osho osha yela kutya oshoongalele osho osha li sha kuma omumwameme oo eshi e shi uda melaka laye. Ngeenge eenghalo doye otadi ku pitike, mbela ito dulu okulihonga elaka limwe opo u dule okukwafela vamwe moshitukulwa sheni? Mbela osho itashi ka kala shiwa ngeenge moshitukulwa sheongalo leni omu na vamwe ovo hava popi nawa elaka lonhumba? Oilonga yoye youdiinini otai ke ku etela ehafo linene.

13. Ongahelipi ovamwatate moRussia va longifa efimbo olo lombili?

¹³ Havamwatate aveshe hava hafele emanguluko lokuudifa moipafi. Moilongo imwe, ovamwatate ihava dulu okuudifa va manguluka molwaashi oilonga yetu yokuudifa oya ngabekwa komapangelo. Pashihopaenenwa, diladila kovamwatate moRussia. Ova kala tava hepekwa omido dihapu, ndele muMarsa 1991, epangelo ola li le va pitika va longele Kalunga. Pefimbo opo, moRussia omwa li ovaudifi vOuhamba 16 000 lwaapo. Konima yomido omilongo mbali, omuvalu wovaudifi owa ka hapupala fiyo wa konda po 160 000. Osho otashi ulike kutya ovamwatate ova li va katuka pandunge eshi va li va longifa omhito oyo va udife. Efimbo olo lombili kala li la kalelela. Nonande eenghalo oda kala nokulunduluka moshilongo osho, ova kala tava longele Jehova nouladi. Ova twikila okulongela Jehova ngaashi tava dulu.

14-15. Ongahelipi Jehova a li a longifa eenghono daye opo a kwafele Asa?

¹⁴ Pefimbo laAsa, efimbo lombili ola li la xula po mokweendela ko kwefimbo. Etangakwaita linene, li na ovakwaita emiliyona, la dja kuEtiopia, ola li le uya oku va homona. Omuwiliki wavo, Sera, okwa li e lineekela kutya ye netangakwaita laye otava ka finda Juda. Ashike ohamba Asa, kaya li ye lineekela momuvalu wovakwaita, ndele omuKalunga kayo, Jehova. Asa okwa ilikana ta ti: “Omwene Kalunga ketu, tu kwafa, shaashi hatu liameke kwoove, ndele medina loye twe uya okulwa nongudu oyo.” — 2 Omaf. 14:11.

¹⁵ Nonande etangakwaita laEtiopia ola li li na ovakwaita va hapupalifwa luvali, Asa okwa li e shii kutya Jehova omunaenghono nota dulu okukwafela oshiwana shaYe. Jehova okwa li a yambidida oshiwana shaye, netangakwaita laEtiopia ola li la findwa. — 2 Omaf. 14:8-13.

16. Otu shi shii ngahelipi kutya efimbo eli lombili itali kalelele?

¹⁶ Nonande katu shii osho tashi ke tu ningilwa pauhandimwe monakwiiwa, otu shii kutya ombili oyo oshiwana shaKalunga shi na itai kalelele. Dimbuluka kutya Jesus okwa xunganeka kutya momafiku axuuninwa, ovahongwa vaye otava “ka tondwa koiwana aishe.” (Mat. 24:9) Sha faafana, omuyapostoli Paulus okwa popya kutya “aveshe ovo va hala okulongela Kalunga ve li ovahongwa vaKristus Jesus navo otava ka hepekwa.” (2 Tim. 3:12) Satana okwa “handuka neenghono,” nohatu lifufya ngeenge ohatu diladila kutya itatu hangika kehandu laye. — Eh. 12:12.

17. Omeenghedi dilipi eitavelo letu tashi dulika li yelekwe?

¹⁷ Monakwiiwa i li popepi, atusheni ohatu ka yelekwa omolwoudiinini wetu. Mafiku, ounyuni otau ka hangwa ‘koudjuu munene oo inau kala ko nale okudja pehovelo lounyuni.’ (Mat. 24:21) Pefimbo opo, otashi dulika oilyo yomaukwaneumbo etu i ka kale i li omhinge nafye, notashi dulika oilonga yetu i ka shilikwe. (Mat. 10:35, 36) Ngaashi Asa, mbela nafye pauhandimwe ohatu ke lineekela ekwafo laJehova nosho yo eameno laye?

18. Metwokumwe nOvaheberi 10:38, 39, oshike tashi ke tu kwafela tu lilongekidile oudjuu?

¹⁸ Jehova ote tu longekida paife opo eitavelo letu li kale la kola. Ota wilike “omupiya omudiinini  nomunaendunge” opo e tu pe “eendja pefimbo la wapala,” odo tadi tu kwafele tu kale twa pama. (Mat. 24:45) Ashike keshe umwe womufye oku na okuninga ngaashi ta dulu opo eitavelo laye muJehova liha tengauke. — Lesha Ovaheberi 10:38, 39.

19-20. Metwokumwe no 1 Omafimbo 28:9, omapulo elipi tu na okulipula, nomolwashike tu na oku e lipula?

¹⁹ Ngaashi ohamba Asa, nafye otwa pumbwa ‘okukonga Omwene.’ (2 Omaf. 14:4; 15:1, 2) Ohatu hovele okukonga Jehova ngeenge twe lihongo kombinga yaye nokuninginifwa. Ohatu ningi ngaashi hatu dulu opo tu kulike ohole yetu yokuhola Jehova. Opo tu mone kutya ohatu shi endifa ngahelipi moshinima osho, otwa pumbwa okulipula kutya: ‘Mbela ohandi kala ngoo pokwoongala pandjikilile?’ Pokwoongala kwa tya ngaho, ohatu pamekwa opo tu twikile okulongela Jehova nohatu tuwa omukumo kovamwatate novamwameme. (Mat. 11:28) Ohatu dulu yo okulipula kutya: ‘Mbela ohandi ningi ekonakonombiibeli lopaumwene pandjikilile? Ngeenge ohandi di pamwe noukwaneumbo, mbela otwa tula po efiku lokondadalunde oshivike keshe opo tu ninge elongelokalunga loukwaneumbo? Ile ngeenge ondi li aame andike, mbela natango onde litulila po ngoo efiku lokuninga elongelokalunga loukwaneumbo? Mbela ohandi kufa ngoo ombinga pauyadi moilonga yokuudifa nokuninga ovanhu ovahongwa?’

²⁰ Mbela omolwashike tu na okulipula omapulo oo? Ombiibeli oye tu lombwela kutya Jehova oha konakona omadiladilo etu nomitima detu, onghee nafye otwa pumbwa okuninga sha faafana. (Lesha 1 Omafimbo 28:9.) Ngeenge otwa mono kutya otwa pumbwa okuninga omalunduluko amwe e na sha nomalalakano, noikala ile nokudiladila kwetu, otwa pumbwa okupula Jehova e tu kwafele tu dule okuninga omalunduluko a tya ngaho. Paife olo efimbo lokulilongekidila omayeleko oo hatu ka shakeneka monakwiiwa. Ino efa nande osha shi ku ningife uha longife pandunge efimbo olo lombili.