Ovelishe oyo otai lesha tai ti: “Ngeenge to mono ohepele tai fininikwa neyukifo nouyuki tau lyatwa moshilongo, oshinima osho ino shi kuminwa; osheshi ou omunenenhu ota nangelwa komunenenhu mukwao, e mu dule, ndele aveshe vavali tava nangelwa kuvakwao ve va dule.” — Omuud. 5:8.

Pataleko lopanhu, omushangwa ou owa yukifwa kwaavo ve na eenghonopangelo mepangelo. Ashike ngeenge otwe u diladila moule, owa kwatela mo oshili kombinga yaJehova, oyo tai tu hekeleke noku tu shilipaleka.

Omuudifi 5:8, okwa yukifwa komupangeli oo ha fininike eehepele nokupengifa ouyuki. Omupangeli oo oku na okudimbuluka kutya ope na oo te mu tale, e mu dule noku na ondodo i dule yaye meenghonopangelo. Ashike nande ongaho, otashi dulika pe na vamwe ve na eendodo dinene di dule davo. Shi nyikifa oluhodi, omapangelo aeshe opanhu okwa nyonauka, novanhu ovo vehe na eendodo ohava mono oixuna, molwaashi ohava ungaungiwa navo shihe li pauyuki.

Nonande onghalo otai monika ya fa ihe na ekwafo lasha, otashi tu hekeleke okukala tu shii kutya Jehova ‘oku wete ovanenenhu’ vomapangelo opanhu. Ohatu dulu okupula Kalunga e tu kwafele noku mu shiivifila oisho yetu. (Eps. 55:22; Fil. 4:6, 7) Otu shii kutya “omesho Omwene taa tale edu alishe, opo a kwafe neenghono ovo have liameke kuye nomutima aushe.” — 2 Omaf. 16:9.

Onghee hano, Omuudifi 5:8 ote tu dimbulukifa kutya alushe ope na oo e na eenghono dinenenene e dule ovo ve na eendodo mepangelo. Naasho sha fimanenena oshosho kutya ovelishe oyo otai tu kwafele tu mone kutya Jehova oye e na eenghono dinenenene e dule aveshe ovo ve na eenghonopangelo. Paife ota pangele pamwe nOmona waye, Jesus Kristus, oo e li Ohamba yOuhamba waye. Omunaenghono adishe, oo e wete oinima aishe nosho yo Omona waye, ovayuki filufilu.