1-2. Metwokumwe na 1 Timoteus 6:20, Timoteus okwa li a pewa shike?

LUHAPU ohatu lineekelele vamwe oinima yetu i na ondilo opo ve i file oshisho. Pashihopaenenwa, ohatu tuvikile oimaliwa yetu kombaanga. Ngeenge twe i tula ko, ohatu kala tu na elineekelo kutya oimaliwa yetu oi li meameno, nokai na fiku i kane ile i vakwe po. Onghee hano, otu udite ko kutya osha hala okutya ngahelipi okulineekelela omunhu oshinima osho twa tala ko shi na ongushu.

² Lesha 1 Timoteus 6:20. Omuyapostoli Paulus okwa li a dimbulukifa Timoteus oshinima shi na ondilo osho a pewa, eshiivo lashili lelalakano laKalunga li na sha novanhu. Okwa li yo e lineekelela Timoteus oufembanghenda ‘wokuudifa eendjovo daKalunga’ nosho yo ‘okulonga oilonga yomuudifi.’ (2 Tim. 4:2, 5, esh.) Paulus okwa li yo a ladipika Timoteus a diinine osho e lineekelelwa. Ngaashi Timoteus, nafye otwe lineekelelwa oinima i na ondilo. Oinima oyo oikwashike? Nomolwashike tu na okufila oshisho omamona oo twa pewa kuJehova?

3-4. Omatomheno amwe elipi a ningifa oshili yOmbiibeli i kale i na ondilo?

³ Jehova okwe tu lineekelela eshiivo loshili li na ondilo olo tali hangwa mEendjovo daye, Ombiibeli. Oshili oyo oi na ondilo, molwaashi otai tu hongo nghee tu na okukala nekwatafano liwa naJehova noya yelifa nghee hatu dulu okumona ehafo lashili monghalamwenyo. Ngeenge otwa tambula ko oshili oyo nokukala metwokumwe nayo, ohatu ka manguluka ko komahongo oipupulu nokukala nonghalamwenyo ya koshoka. — 1 Kor. 6:9-11.

⁴ Etomheno limwe olo la ningifa oshili oyo tai hangwa mEendjovo daKalunga i kale i na ondilo, ololo kutya Jehova okwe i hololela ovalininipiki ovo ve i “halelela shili.” (Oil. 13:48)  Ovanhu va tya ngaho ova dimina kutya Jehova ota longifa kunena omupiya omudiinini nomunaendunge opo e tu hololele oshili yOmbiibeli. (Mat. 11:25; 24:45) Itatu dulu okuuda ko Ombiibeli nopehe na ekwafo, nokape na oshinima shi na ondilo shi dule oku i uda ko. — Omayel. 3:13, 15.

5. Oshike vali Jehova e tu lineekelela?

⁵ Jehova okwe tu lineekelela oufembanghenda wokuhonga vamwe oshili kombinga yaye nosho yo omalalakano aye. (Mat. 24:14) Etumwalaka olo hatu udifa ola fimanenena, molwaashi otali kwafele ovanhu va ninge oshitukulwa shoukwaneumbo waJehova noku va pa omhito yoku ka mona omwenyo waalushe. (1 Tim. 4:16) Kashi na nee mbudi kutya ohatu i moukalele tu li ongudu inene ile oinini, ohatu yambidida oilonga ya fimanenena oyo tai longwa pefimbo letu. (1 Tim. 2:3, 4) Kau fi tuu oufembanghenda okulonga pamwe naKalunga! — 1 Kor. 3:9.

6. Oshike sha ningilwa vamwe ovo va dopa okukala oupafi?

⁶ Pefimbo laTimoteus, Ovakriste vamwe kava li va lenga oufembanghenda u na sha nokulonga pamwe naKalunga. Demas okwa li a efa po oufembanghenda wokulonga pamwe naPaulus, molwaashi okwa li e hole oinima oyo i li mounyuni. (2 Tim. 4:10) Figelus naHermogenes ova li va efa po okuudifa, molwaashi ova li va tila okuhepekwa ngaashi Paulus. (2 Tim. 1:15) Himeneus, Alexander naFiletus ova ninga ovashunimonima, ndele tava fiye po oshili. (1 Tim. 1:19, 20; 2 Tim. 2:16-18) Ovanhu aveshe ovo ova li va pama pamhepo, ashike ova li va ekelashi oinima i na ondilo.

7. Eemwiyo dimwe dilipi Satana ha longifa opo e tu yule?

⁷ Satana ohe tu ningifa ngahelipi tu efe po omamona e na ondilo oo twe lineekelelwa kuJehova? Natu ka taleni keemwiyo dimwe odo ha longifa. Oha longifa omalihafifo nosho yo omakwatafano opaintaneta opo e tu ningife tu diladile nokukatuka monghedi oyo tai tu ningifa tuha diinine eemhango daJehova. Satana ohe tu tilifa okupitila momafininiko oomakula nosho yo oku tu hepeka opo tu efe po oilonga yokuudifa. Opo tu efe po oshili, oha kendabala yo oku tu pwilikinifa kovashunimonima ovo ‘eshiivo lavo tali kondjifa oshili.’ — 1 Tim. 6:20, 21.

8. Oshike we lihonga koshimoniwa shomumwatate Daniel?

⁸ Ngeenge inatu lungama, ohatu ka efa po oshili kanini nakanini. Diladila koshimoniwa shaDaniel, * oo a li e hole omaudano ouvidio. Okwa ti: “Onda hovela okudanauka omaudano ouvidio eshi nda li ndi na omido omulongo  lwaapo. Potete, onda li handi danauka omaudano ouvidio oo inaa nyika oshiponga. Ndele mokweendela ko kwefimbo, onda li nda hovela okudanauka omaudano ouvidio oo a kwatela mo elongifo leenghono nosho yo oumhulile.” Lwanima, okwa li ha danauka omaudano oo eevili 15 lwaapo efiku keshe. Daniel okwa ti: “Onda li ndi shii kutya omaudano oo handi dana nosho yo efimbo olo handi longifa muo, otai ehenifa nge kokule naJehova. Onda li handi lifufya kutya omafinamhango Ombiibeli itaa longo kwaame.” Ngeenge inatu lungamena omalihafifo, otaa dulu oku tu efifa po oshili noupu. Nokungaho, ohatu ka efa po oinima i na ondilo oyo Jehova e tu pa.

9. Metwokumwe na 1 Timoteus 1:18, 19, Paulus okwa faafanifa Timoteus nalyelye?

⁹ Lesha 1 Timoteus 1:18, 19. Paulus okwa faafanifa Timoteus nomukwaita, nokwe mu ladipika a “twikile okukondja ekondjo liwa.” Ekondjo la tya ngaho kali fi ekondjo lopambelela, ndele olopamhepo. Omeenghedi dilipi Ovakriste va fa ovakwaita tava kufa ombinga molwoodi? Omaukwatya elipi twa pumbwa okukulika tu li ovakwaita vaKristus? Natu ka kundafaneni oilihongomwa yopatano oyo hatu lihongo mefaneko laPaulus. Oilihongomwa ya tya ngaho otai ke tu kwafela tu diinine oshili.

10. Etilokalunga oshike, nomolwashike twe li pumbwa?

¹⁰ Kulika etilokalunga. Omukwaita muwa oha kala omudiinini. Oha lu a tula ombuda moshixwa omolwomunhu oo e hole ile omolwoshinima osho a lenga. Paulus okwa li a ladipika Timoteus a kulike etilokalunga, sha hala kutya a kale omudiinini kuKalunga. (1 Tim. 4:7) Eshi ngoo hatu ende hatu kulike ohole yetu yokuhola Kalunga nosho yo etilokalunga, opo ngoo tapa ka kala pe fike ehalo letu lokudiinina oshili. — 1 Tim. 4:8-10; 6:6.

11. Omolwashike twa pumbwa elipangelo?

¹¹ Kulika elipangelo. Omukwaita oku na okukala e na elipangelo opo a kale e lilongekidila okulwa. Timoteus okwa kala e na oupamhepo muwa, molwaashi okwa kala ha shikula omayele a nwefwa mo aPaulus e na sha nokuhenuka omahalo a puka, okulalakanena omaukwatya opakalunga nokweendafana novaitaveli vakwao. (2 Tim. 2:22) Osho otashi pula elipangelo. Otwa pumbwa elipangelo opo tu kondjife nokufinda omahalo opambelela. (Rom. 7:21-25) Shimwe vali, otwa pumbwa elipangelo opo tu twikile okulidula omunhu mukulu nokudjala omunhu mupe. (Ef. 4:22, 24) Ngeenge twa loloka pexulilo lefiku, otashi dulika twa pumbwa okuninga eenghendabala tu ye kokwoongala. — Heb. 10:24, 25.

12. Omeenghedi dilipi hatu dulu okuxwepopaleka onghedi yetu yokulongifa Ombiibeli?

¹² Omukwaita okwa pumbwa okulideula opo a kale kapyoko mokulongifa oilwifo yaye. Opo a kale e na owino, okwa pumbwa okukala he lideula pandjikilile. Sha faafana, nafye otwa pumbwa okukala tu na owino ngeenge hatu longifa Eendjovo daKalunga. (2 Tim. 2:15) Ohatu dulu okulihonga eenghedi dimwe domwaado pokwoongala. Ndele ngeenge otwa hala okukala hatu tomho vamwe kutya oshili yOmbiibeli oi na ondilo, otwa pumbwa okukala hatu konakona paumwene Ombiibeli pandjikilile. Otwa pumbwa okukala hatu longifa Eendjovo daKalunga opo tu pameke eitavelo letu. Naasho osha kwatela mo shihapu shihe fi ashike okulesha Ombiibeli. Osho otashi pula okudilonga kwaasho twa lesha nokuninga omapekapeko moishangomwa yetu, opo tu kale tu na eudeko li li mondjila nokutula moilonga Omishangwa. (1 Tim. 4:13-15) Nokungaho, ohatu ka dula okulongifa Eendjovo daKalunga tu honge vamwe. Shikwao vali, osha kwatela mo yo shihapu shihe fi ashike oku va leshela omushangwa.  Otwa hala okukwafela ovapwilikini vetu va ude ko eevelishe, nanghee ve na oku di tula moilonga. Ngeenge otwa kala twa diinina elandulafano lekonakonombiibeli lopaumwene, ohatu ka xwepopaleka okudula kwetu eshi hatu hongo vamwe Eendjovo daKalunga. — 2 Tim. 3:16, 17.

13. Metwokumwe nOvaheberi 5:14, omolwashike twa pumbwa eendunge dokuyoolola?

¹³ Kala ho longifa eendunge dokuyoolola. Omukwaita oku na okukala ha nongele oiponga noku i henuka. Nafye otwa pumbwa okukala hatu didilike mo eenghalo odo tadi dulu oku tu ehameka noku di henuka. (Omayel. 22:3; lesha Ovaheberi 5:14.) Pashihopaenenwa, otwa pumbwa okuhoolola pandunge eenhele domalihafifo nosho yo omalihafifo. O-TV nosho yo eemuvi luhapu ohadi ulike elihumbato inali koshoka. Elihumbato la tya ngaho otali nyemateke Kalunga notali dulu oku tu ehameka. Ohatu henuka omalihafifo a tya ngaho, molwaashi otaa dulu oku tu efifa po filufilu ohole yetu yokuhola Kalunga. — Ef. 5:5, 6.

14. Ongahelipi eendunge dokuyoolola da kwafela Daniel?

¹⁴ Daniel, oo a popiwa metetekelo, okwa li a mona kutya okudana ouvidio ovo va kwatela mo elongifo leenghono nosho yo oumhulile osha nyika oshiponga. Okwa li a konga ouyelele ko-Watchtower Library oo we mu kwafela a dule okuungaunga noupyakadi oo. Mbela ouyelele oo owe mu kwafela ngahelipi? Okwa li a efa po okudana omaudano ouvidio ovo inava koshoka nosho yo okweendafana novadanauki vakwao okupitila kointaneta. Daniel okwa ti: “Ponhele yokudana omaudano ouvidio, onda li nda hovela okulongifa efimbo lange moinima i na oshilonga nokweendafana nookaume meongalo.” Paife Daniel oku li omukokolindjila wondjikilile nomukulunhuongalo.

15. Omolwashike omahokololo oipupulu a nyika oshiponga?

¹⁵ Ngaashi Timoteus, nafye otu na okulungamena oshiponga osho hashi etifwa kouyelele woipupulu oo hau tandavelekwa kovashunimonima. (1 Tim. 4:1, 7; 2 Tim. 2:16) Pashihopaenenwa, otava dulu okutandaveleka omahokololo oipupulu, tashi dulika e na sha novamwatate, ile ve tu kune omalimbililo e na sha nehangano laJehova. Ouyelele wa puka wa tya ngaho otau dulu okunghundipaleka eitavelo letu. Otu na okuhenuka okupukifwa komitotolombo da tya ngaho. Omolwashike mbela? Omolwaashi ouyelele oo otau tandavelekwa  kwaavo “ve na omadiladilo mai nova efa po oshili.” Elalakano lavo okutwa ‘eemhata nove hole eenhamanana.’ (1 Tim. 6:4, 5) Ova hala tu itavele oipupulu yavo notu kale inatu lineekela vali ovamwatate.

16. Oinima ilipi twa pumbwa okuhenuka?

¹⁶ Henuka okutwalwaatwalwa. Timoteus e li “omukwaita muwa waKristus Jesus,” okwa li e na okuyandja elitulemo koukalele ponhele yokuyandja elitulemo koinima yopamaliko nosho yo komalalakano amwe monghalamwenyo. (2 Tim. 2:3, 4) Ngaashi Timoteus, katu na okweefa tu piyaanekwe koinima yopamaliko. ‘Eheka loupuna’ otali dulu okunyona po ohole yetu yokuhola Jehova, olupandu letu li na sha nEendjovo daye nosho yo ehalo lokuhonga vamwe. (Mat. 13:22) Natu kalekeni eenghalamwenyo detu paunafangwa nokulongifa efimbo nosho yo eenghono detu opo tu ‘konge tete Ouhamba.’ — Mat. 6:22-25, 33.

17-18. Oshike twa pumbwa okuninga po, opo tu amene ekwatafano letu naJehova?

¹⁷ Kala we lilongekida okukatuka meendelelo. Omukwaita okwa pumbwa okudiladila komesho yefimbo opo e liamene ye mwene. Opo tu dule okwaamena oinima i na ongushu oyo Jehova e tu lineekelela, otwa pumbwa okukatuka meendelelo ngeenge otwa didilike oshiponga shonhumba. Oshike tashi dulu oku tu kwafela tu ninge ngaho? Otwa pumbwa okulilongekida komesho yefimbo nghee hatu ke linyenga monghalo yonhumba ya nyika oshiponga.

¹⁸ Pashihopaenenwa, ngeenge tu li poshiningwanima shonhumba, ofimbo omutumba inau hovela, ohatu ulikilwa omivelo odo di li popepi omo hatu dulu okupitila. Omolwashike mbela? Opo tu dule okudja mo meendelelo ngeenge opa holoka onghalo yopaulumomhumbwe. Sha faafana, otwa pumbwa okulilongekida komesho yefimbo kutya eenghatu dilipi tu na okukatuka ngeenge otwa mono oshinima inashi koshoka ombaadilila, omafano e na sha nelongifo leenghono, ouyelele wovashunimonima eshi hatu longifa ointaneta, hatu tale omuvi ile o-TV. Ngeenge otwe lilongekidile osho tashi dulu okuholoka po, ohatu ka katuka meendelelo okwaamena ekwatafano letu naJehova nokukala twa koshoka momesho aye. — Eps. 101:3; 1 Tim. 4:12.

19. Omanangeko noupuna elipi hatu ka mona ngeenge otwa amene oinima i na ongushu oyo Jehova e tu pa?

¹⁹ Otu na okwaamena oinima i na ongushu oyo Jehova e tu pa, oshili yOmbiibeli i na ondilo nosho yo oufembanghenda woku i honga vamwe. Ngeenge otwa ningi ngaho, ohatu ka kala neliudo la koshoka, onghalamwenyo yetu otai ka kala i na eityo nohatu ka mona ehafo olo hali di mokukwafela vamwe va shiive Jehova. Kekwafo laye, ohatu dulu okudiinina osho e tu lineekelela. — 1 Tim. 6:12, 19.