1. Omapulo elipi tashi dulika tu lipule, ngeenge hatu dilonga kwaashishe osho Jehova a shita?

NGEENGE hatu dilonga koinima aishe oyo Jehova a shita, otashi dulika tu kale tu udite ngaashi omupsalme David, oo a li a pula Jehova meilikano, ta ti: “Ngeenge handi tale keulu, koshilongwa shominwe doye, kohani nokeenyofi, edi wa shita, omunhu omushike, eshi ho mu dimbulukwa, nomona womunhu, eshi ho mu file oshisho?” (Eps. 8:3, 4) Ngaashi David, nafye otashi dulika tu mone tu vanininini, ngeenge hatu liyelekanifa neenyofi. Ohashi tu kumwifa eshi Jehova ha yandje elitulemo kufye. Ngaashi hatu ke shi mona, Jehova ka li ashike a fila oshisho ovanhu votete, Adam naEva, ndele ova li yo oshitukulwa shoukwaneumbo waye.

2. Jehova okwa li a hala Adam naEva va ninge shike?

² Adam naEva ovo ovana votete vaJehova vokombada yedu, na Jehova okwa li Xe yavo womeulu omunahole. Okwa li a teelela ovalihomboli ovo va kale ve na oukwaneumbo tau pondola. Kalunga okwe va lombwela ta ti: “Dalafaneni nokuhapupala ndele yadifeni edu, lo nali kale mepangelo leni.” (Gen. 1:28) Okwa li a hala va mone ounona nokufila oshisho eduumbo lavo. Ngeno ova dulikile kwaasho Jehova a li e va lombwela, ngeno Adam naEva nosho yo oludalo lavo ova kala oilyo youkwaneumbo waKalunga fiyo alushe.

3. Omolwashike hatu tile kutya Adam naEva ova li tava dana onghandangala ya fimana moukwaneumbo waJehova?

³ Adam naEva ova li tava dana onghandangala ya fimana moukwaneumbo waJehova. Ngaashi tashi hangwa mEpsalme 8:5, David okwa popya shi na sha naJehova eshi a shita omunhu, a ti: “Eshi we mu shita, oshitwe yaye kashekamukona e fike [povaengeli, NW], nowe mu dika oshinge nefimano.” Oshoshili kutya Jehova  ina pa ovanhu eenghono, eendunge nosho yo okudula kwa fa kwovaengeli. (Eps. 103:20) Ndele okwa shita omunhu “kashekamukona e fike povaengeli,” sha hala kutya e dulike kanini kovaengeli. Osho kashi kumwifi tuu! Eshi Jehova a shita ovadali vetu votete, okwa li e va pa onghalamwenyo ya denga mbada.

4. Oshike sha ningwa po shi na sha nonghandangala oyo Adam naEva va li tava dana moukwaneumbo waJehova, noshike hatu ka kundafana moshitukulwa eshi?

 ⁴ Shinyikifa oluhodi, Adam naEva ova kanifa onghandangala oyo va li tava dana moukwaneumbo waJehova. Ngaashi hatu ke shi mona lwanima moshitukulwa eshi, ova etela oludalo lavo oilanduliko inyikifa oluhodi. Ashike elalakano laJehova inali lunduluka. Okwa hala ovanhu, ovo hava dulika, va kale ovana vaye fiyo alushe. Tete, natu ka kundafaneni eenghedi omo Jehova a ulika kutya okwe tu lenga. Opo nee ohatu ka kundafana osho hatu dulu okuninga paife, opo tu ulike kutya otwa hala okukala oshitukulwa shoukwaneumbo waKalunga. Xuuninwa, ohatu ka kundafana omanangeko noupuna, oo taa ka hafelwa kovana vaye vokombada yedu fiyo alushe.

5. Ongahelipi hatu dulu okuulika kutya otwa pandula, eshi Kalunga e tu shita oshifefa shaye?

⁵ Jehova okwa ulika kutya okwe tu lenga, eshi e tu shita oshifefa shaye. (Gen. 1:26, 27) Molwaashi otwa shitwa oshifefa shaKalunga, ohatu dulu okukulika nokuulika omaukwatya mahapu aye makumwifi, ngaashi ohole, olukeno, oudiinini nosho yo ouyuki. (Eps. 86:15; 145:17) Eshi hatu kulike omaukwatya oo, ohatu ulike kutya otwa fimaneka Jehova notwe mu pandula. (1 Pet. 1:14-16) Ohatu kala twa hafa notwa wanenwa, ngeenge hatu lihumbata monghedi oyo tai hafifa Tate yetu womeulu. Molwaashi otu na omaukwatya a fa aJehova, ohatu dulu okuninga omalunduluko, ndele hatu kala twa fa ovanhu ovo Jehova a hala va kale moukwaneumbo waye.

6. Jehova okwa ulika ngahelipi kutya okwa lenga ovanhu eshi a shita edu?

⁶ Jehova okwe tu longekidila onhele ye likalekelwa yokukala. Ofimbo ina shita omunhu wotete, Jehova okwa longekida edu, oko taku kala ovanhu. (Job 38:4-6; Jer. 10:12) Molwaashi Jehova omunahole noha yandje, okwa shitila ko oinima ihapu iwa oyo hatu dulu okuhafela. (Eps. 104:14, 15, 24) Omafimbo amwe, oha kongo efimbo, opo a dilonge koinima oyo a shita, nopomhito imwe okwa li a ‘mona kutya oya wapala.’ (Gen. 1:10, 12, 31) Okwa ulika kutya okwa lenga ovanhu, eshi e va pa eenghono va ‘pangele’ oinima aishe oyo a shitila kombada yedu. (Eps. 8:6) Kalunga okwa li a hala ovanhu va wanenena va file oshisho eshito laye likumwifi fiyo alushe. Mbela oho pandula ngoo Jehova pandjikilile omolweudaneko laye olo litunhula?

7. Josua 24:15 okwa ulika ngahelipi kutya ovanhu ove na emanguluko?

⁷ Jehova okwe tu pa oshali yemanguluko. Ohatu dulu okuhoolola osho twa hala okuninga monghalamwenyo. (Lesha Josua 24:15.) Kalunga ketu omunahole oha kala a hafa, ngeenge otwa hoolola oku mu longela. (Eps. 84:11; Omayel. 27:11) Ohatu dulu okulongifa emanguluko letu, opo tu ninge omatokolo opandunge moinima ihapu. Natu ka taleni koshihopaenenwa osho sha tulwa po kuJesus.

8. Yandja oshihopaenenwa shimwe osho sha tulwa po kuJesus shi na sha nanghee a longifa emanguluko laye.

⁸ Ngeenge otwa shikula oshihopaenenwa shaJesus, ohatu ka hoolola okupitifa komesho ouwa wavamwe, ponhele yokupitifa komesho ouwa wetu vene. Pomhito imwe, Jesus novayapostoli vaye ova li va loloka neenghono nova li va ya konhele yelimwenenena, opo ngeno va ka fude po. Ashike nande ongaho, inava ka dula vali okufuda po. Ongudu yovanhu oya li ye uya kuvo noya li ya halelela okuhongwa kuJesus. Ndele osho kasha li sha udifa nai Jesus. Ponhele yaasho, okwa li a etela ovanhu onghenda. Mbela Jesus okwa li a ninga po shike? “Okwa hovela  oku va honga oinima ihapu.” (Mark. 6:30-34) Ohatu fimanekifa Tate yetu womeulu, ngeenge ohatu hopaenene Jesus nokuyamba po efimbo neenghono detu, opo tu kwafele vamwe. (Mat. 5:14-16) Kungaho, ohatu ulikile yo Jehova kutya otwa hala okukala oshitukulwa shoukwaneumbo waye.

9. Oshike ovadali va pumbwa okukaleka momadiladilo?

⁹ Jehova okwa shita ovanhu hava mono ounona nokwe va pa oshinakuwanifwa shoku va honga va kale ve mu hole noku mu longela. Ngeenge ou li omudali, mbela owa pandula ngoo oshali ye likalekelwa oyo wa pewa kuJehova? Nonande ovaengeli ova nangekwa noupuna noinima ihapu kuJehova, inava pewa oshinakuwanifwa osho. Onghee hano, ngeenge ou li omudali, kala wa lenga oufembanghenda, oo wa pewa wokutekula ounona. Ovadali ova pewa oshinakuwanifwa sha fimana ‘shokutekula nokudeula ounona metwokumwe newiliko laJehova.’ (Ef. 6:4; Deut. 6:5-7; Eps. 127:3) Opo ehangano laJehova li dule okukwafela ovadali va dule okuninga ngaho, ola nyanyangida oilongifo ihapu ya kanghamena kOmbiibeli, ngaashi oishangomwa, ouvidio, omusika nosho yo oitukulwa yokointaneta. Osha yela kutya Tate yetu womeulu nosho yo Omona waye ove hole ounona. (Luk. 18:15-17) Jehova oha kala a hafa, ngeenge ovadali ove lineekela muye nokuninga ngaashi tava dulu, opo va file oshisho ovana vavo ve na ondilo. Ovadali va tya ngaho, ohava kwafele ovana va ka kale oshitukulwa shoukwaneumbo waJehova fiyo alushe.

10-11. Ekuliloyambo, olo Jehova e tu pa, ola ningifa shike tashi shiiva?

¹⁰ Jehova okwa yandja Omona waye e na ondilo neenghono, opo tu dule vali okukala oshitukulwa shoukwaneumbo waYe. Ngaashi twa kundafana  mokatendo 4, konima eshi Adam naEva va nyona, ova kanifa oufembanghenda wokukala oshitukulwa shoukwaneumbo waJehova nosho yo oludalo lavo. (Rom. 5:12) Adam naEva ova hoolola okuhadulika kuKalunga nove lilongela okutewa mo moukwaneumbo waye. Ndele ongahelipi shi na sha noludalo lavo? Jehova oku hole ovanhu nokwe shi ninga tashi shiiva, opo ovo hava dulika va kale oshitukulwa shoukwaneumbo waye. Osho okwe shi ninga tashi shiiva, omolweyambo lOmona waye ewifa, Jesus Kristus. (Joh. 3:16; Rom. 5:19) Omolwekuliloyambo laJesus, Jehova okwa hoolola ovanhu ovadiinini 144 000 ve li ovana vaye. — Rom. 8:15-17; Eh. 14:1.

¹¹ Natango, ope na ovanhu omamiliyona ovadiinini, ovo hava dulika kuKalunga nehalo liwa. Ova teelela oku ka kala oshitukulwa shoukwaneumbo waKalunga konima eshi va pita meyeleko laxuuninwa pexulilo lomido 1 000. (Eps. 25:14; Rom. 8:20, 21) Molwaashi ove na eteelelo olo, ohava ifana nokuli nale Jehova, oo e li Omushiti wavo, “Tate.” (Mat. 6:9) Ovo tava ka nyumunwa, navo otava ka kala ve na omhito yokulihonga oiteelelwa yaJehova. Ovo tava ka dulika koiteelelwa yaJehova, otava ka kala oilyo youkwaneumbo waye mokweendela ko kwefimbo.

12. Epulo lilipi hatu ka kundafana paife?

¹² Ngaashi twe shi mona nale, Jehova okwa ninga oinima ihapu oyo tai ulike kutya okwa lenga ovanhu. Jehova okwa tambula ko Ovakriste ovavaekwa ve li ovana vaye nokwa pa “ongudu inene” eteelelo loku ka kala mounyuni mupe, ve li ovana vaye. (Eh. 7:9) Oshike tu na okuninga paife, opo tu ulikile Jehova kutya otwa hala okukala oshitukulwa shoukwaneumbo waye fiyo alushe?

13. Oshike twa pumbwa okuninga, opo tu kale oshitukulwa shoukwaneumbo waKalunga? (Markus 12:30)

¹³ Ulikila Jehova kutya ou mu hole moku mu longela nomutima woye aushe. (Lesha Markus 12:30.) Kalunga okwe tu pa eeshali dihapu. Ashike oshali imwe yomeeshali da denga mbada odo e tu pa, osheshi hatu dulu oku mu longela.  Ohatu ulike kutya otu hole Jehova ‘mokudiinina oipango yaye.’ (1 Joh. 5:3) Oshipango shimwe osho Jehova a hala tu dulike kusho, oshosho twa lombwelwa kuJesus shokuninga ovanhu ovahongwa noku va ninginifa. (Mat. 28:19) Okwe tu lombwela yo tu kale tu holafane. (Joh. 13:35) Jehova ota ka tambula ko nohamu ovo hava dulika koipango yaye moshitukulwa shoukwaneumbo waye womounyuni aushe. — Eps. 15:1, 2.

14. Ongahelipi hatu dulu okuulikila ovanhu vakwetu ohole? (Mateus 9:36-38; Ovaroma 12:10)

¹⁴ Kala ho ulikile ovanhu vakweni ohole. Ohole oi li oukwatya waJehova wa tongomana. (1 Joh. 4:8) Jehova okwe tu ulikila ohole, ofimbo nokuli inatu mu shiiva. (1 Joh. 4:9, 10) Ohatu mu hopaenene, ngeenge hatu ulikile ovanhu vakwetu ohole. (Ef. 5:1) Onghedi imwe ya denga mbada omo hatu dulu okuulikila ovanhu vakwetu ohole omoku va kwafela ve lihonge kombinga yaJehova, ofimbo pe na omhito. (Lesha Mateus 9:36-38.) Ngeenge hatu ningi ngaho, ohatu va kwafele va mone osho ve na okuninga po, opo va kale oilyo youkwaneumbo waKalunga. Konima eshi omunhu a ninginifwa, natango otu na okutwikila oku mu ulikila ohole nokukala twe mu fimaneka. (1 Joh. 4:20, 21) Osho osha kwatela mo shike? Oshinima shimwe oshosho kutya otwe mu lineekela. Pashihopaenenwa, ngeenge okwa ningi oshinima shonhumba osho tuhe udite ko, inatu diladila kutya okwe shi ninga nomalinyengotomheno okulihola mwene. Ponhele yaasho, ohatu ka ungaunga nomumwatate nefimaneko, tu shii kutya oku tu dule monghedi yonhumba, ile yongadi. — Lesha Ovaroma 12:10; Fil. 2:3.

15. Oolyelye twa pumbwa okuulikila olukeno nonghenda?

¹⁵ Kala ho ulikile ovanhu aveshe olukeno nonghenda. Ngeenge otwa hala okukala oshitukulwa shoukwaneumbo waJehova fiyo alushe, otwa pumbwa okukala hatu tula moilonga osho twe lihonga mEendjovo daKalunga. Pashihopaenenwa, Jesus okwe tu lombwela tu kale hatu ulikile ovanhu aveshe olukeno nonghenda, mwa kwatelwa nokuli novatondi vetu. (Luk. 6:32-36) Otashi dulika omafimbo amwe tu mone shidjuu okuninga ngaho. Ngeenge otu na ounghundi moshinima osho, natu lihonge okukala hatu diladila ngaashi Jesus nokuhopaenena eenghatu daye. Ohatu ka ulikila Tate yetu womeulu kutya otwa hala okukala oshitukulwa shoukwaneumbo waye fiyo alushe, ngeenge ohatu ningi ngaashi hatu dulu, opo tu dulike kuye nokushikula oshihopaenenwa shaJesus.

16. Ongahelipi hatu dulu okukaleka po edina liwa loukwaneumbo waJehova?

¹⁶ Kaleka po edina liwa loukwaneumbo waJehova. Luhapu moukwaneumbo wo venevene, okaana kokamati kanini oha ka kendabala okuhopaenena omumwaina womumati oo a kula. Ngeenge mumwaina oha tula moilonga omafinamhango Ombiibeli mokukalamwenyo kwaye, oha kala oshihopaenenwa shiwa kokandenge. Ndele ngeenge mumwaina okwa hovele okuninga oinima ii, oha nwefa mo okandenge ka shikule oshihopaenenwa shaye shii. Osho osha faafana noukwaneumbo waJehova. Ngeenge Omukriste, oo a kala omudiinini, okwa ningi omushunimonima, e na onghedi inai koshoka, ile ha ningi oinima yonhumba ii, otashi dulika a ka nwefe mo vakwao. Ovanhu ovo hava ningi ngaho, ohava kakeke edina loukwaneumbo waJehova. (1 Tes. 4:3-8) Natu henuke okushikula oihopaenenwa ii yavamwe noinatu pitika nandenande osha shi tu ehenife kokule naTate yetu womeulu omunahole.

17. Okudiladila kulipi twa pumbwa okuhenuka, nomolwashike?

¹⁷ Kala we lineekela muJehova, ponhele yokulineekela momaliko. Jehova okwa udaneke kutya ote ke tu pa oikulya, oikutu nosho yo onhele yokukala. Osho ote ke shi ninga ngeenge otwa pitifa komesho Ouhamba waye nokukala metwokumwe nomifikamhango daye douyuki. (Eps. 55:22; Mat. 6:33) Ngeenge otwa kaleke eudaneko  laJehova momadiladilo, itatu ka diladila kutya oinima yopamaliko otai ke tu amena noku tu etela ehafo tali kalelele. Otu shii kutya ohatu ka kala ashike tu na ombili tai kalelele, ngeenge otwa kala hatu longo ehalo laJehova. (Fil. 4:6, 7) Nonande ohatu dulu okulanda oinima ihapu, otwa pumbwa okulipula ngeenge otu na ngoo shili efimbo nosho yo eenghono dokufila oshisho oinima oyo. Ile pamwe otu hole ashike neenghono oinima yopamaliko? Otwa pumbwa okukala tu shii kutya Kalunga okwa hala tu kale oilyo youkwaneumbo waye hai pondola. Osho osha hala kutya inatu efa tu piyaanekwe. Inatu hala nandenande okukala twa fa omulumenhu omunyasha, oo a li a xutwifa omhito yokulongela Jehova nosho yo yokukala oshitukulwa shovana vaye, molwaashi ashike ta yandje elitulemo komaliko okombada yedu. — Mark. 10:17-22.

18. Ovanhu ovaduliki otava ka kala ve na oufembanghenda ulipi, nomanangeko noupuna elipi tava ka hafela fiyo alushe?

¹⁸ Ovanhu ovaduliki otava ka kala ve na oufembanghenda munenenene wokukala ve hole Jehova noku mu longela fiyo alushe. Ovo ve na eteelelo loku ka kala kombada yedu otava ka kala va hafa, eshi tava ka kala ve na omhito yokufila oshisho eduumbo lavo. Mafiku, Ouhamba waKalunga otau ka wapekulula edu nosho yo oinima aishe oyo i li ko. Jesus ota ka xulifa po oilanduliko aishe oyo ya etifwa kuAdam naEva, eshi va fiya po oukwaneumbo waKalunga. Jehova ota ka nyumuna ovanhu omamiliyona notava ka kala nomwenyo fiyo alushe ve na oukolele we lixwa po medu, olo tali ka ninga oparadisa. (Luk. 23:42, 43) Eshi oshitukulwa shoukwaneumbo waJehova shokombada yedu tashi ende tashi fiki mewaneneno, keshe umwe ota ka kala e na “oshinge nefimano,” ngaashi David a popya. — Eps. 8:5.

19. Oshike twa pumbwa okukaleka momadiladilo?

¹⁹ Ngeenge ou li umwe ‘womongudu inene,’ ou na eteelelo litunhula. Kalunga oku ku hole nokwa hala u kale oshilyo shoukwaneumbo waye. Onghee hano, ninga ngaashi to dulu, opo u mu hafife. Kala ho dilonga komaudaneko aKalunga efiku keshe. Kala wa lenga oufembanghenda wokulongela Tate yetu womeulu noku mu fimanekifa fiyo alushe.