Omolwashike pe na outondwe muhapu?
Omolwashike mounyuni mu yadi outondwe u nyanyalifi? Opo tu shiive kutya omolwashike, otwa pumbwa okuuda ko kutya outondwe oshike, omolwashike ovanhu ve na outondwe nomolwashike u li keshe pamwe.
Outondwe oshike?
Outondwe oo okukala u yele neenghono omunhu wonhumba, ile ongudu yovanhu. Ou dulife okukala wa handukila omunhu oule wefimbo.
OMOLWASHIKE OVANHU VE NA OUTONDWE
Ovanhu ove na outondwe omolwomatomheno mahapu. Peemhito dimwe, ovanhu otava dulu okukala ve tonde ongudu yovanhu vonhumba, nonande ovanhu ovo inava ninga sha shapuka. Ovanhu ovo ve tondike otashi dulika va talika ko ve li ovakolokoshi, va nyika oshiponga, ile itava dulu okweetifa po omalunduluko mawa. Otashi dulika va talike ko vehe na oshilonga, va nyika oshiponga, ile hava etifa po omaupyakadi. Ovo ve tondike otashi dulika va longelwa ominyonena, va ungaungiwa navo shihe li pauyuki, ile va shakeneka oinima oyo ye va ningifa navo va kale ve na outondwe.
NGHEE HAU TANDAVELE
Omunhu ota dulu okukala e tonde vamwe, nonande ina shakena nale navo. Pashihopaenenwa, ovanhu otava dulu okukala ve na etaleko lafa lovapambele, ile lookaume li na sha nanghee va tala ko ongudu yovanhu vonhumba. Onghee ngeenge umwe womovapambele okwa kala e tonde ongudu yovanhu vonhumba, ovapambele aveshe ohava hovele diva okukala ve va tonde.
Ngeenge otwa kala tu udite ko kutya omolwashike outondwe u li keshe pamwe, ohatu ka uda ko kutya omolwashike ovanhu vahapu ve tonde vakwao. Ashike opo tu finde outondwe, otu na okulihonga kutya owa hovela ngahelipi. Ohatu dulu okulihonga kombinga yaasho mOmbiibeli.
OMBIIBELI OYA HOLOLA NGHEE OUTONDWE WA HOVELA
OUTONDWE INAU HOVELA MOVANHU. Owa hovela meulu, eshi omweengeli, oo ha ifanwa Satana Ondiaboli, a tukululila Kalunga oshibofa. Ondiaboli oya kala ‘omudipai nghee ya dja pehovelo.’ E li ‘omunaipupulu naxe ya yo,’ ota twikile okuxumifa komesho outondwe nosho yo oukolokoshi. (Johannes 8:44; 1 Johannes 3:11, 12) Ombiibeli oye mu popya e li omukwanyanya, omuhandunhu nomukolokoshi. — Job 2:7; Ehololo 12:9, 12, 17.
OSHIPU KOVANHU OVO INAVA WANENENA VA KALE VE NA OUTONDWE. Omunhu wotete, Adam, okwa li a shikula oulunde waSatana. Oshidjemo, ovanhu aveshe ova fyuulula oulunde nokuhawanenena. (Ovaroma 5:12) Oshiveli shaAdam, Kain, osha li sha dipaa omumwaina, Abel, omolwoutondwe. (1 Johannes 3:12) Oshoshili kutya ovanhu vahapu ohava ulike ohole nosho yo onghenda. Ndele omolwoulunde ou wa fyuululwa, ovanhu vahapu ove lihole vovene, ve na ondubo nosho yo ounhwa, omaukwatya oo haa etifa outondwe. — 2 Timoteus 3:1-5.
OMUNHU OO EYELE OVO VA YOOLOKA KO KUYE, OYE NAANAA HA KALA E NA OUTONDWE. Ounyuni ou tu li muo, kunena ohau xwaxwameke outondwe mokuxumifa komesho onyanya, eenghedi dii nosho yo elihumbato la nyika oshiponga. Outondwe, onhondo, omalaka a honga, olushindo noiponga otai hapupula, molwaashi “ounyuni aushe ou li mepangelo lomunawii,” Satana Ondiaboli. — 1 Johannes 5:19.
Ombiibeli inai holola ashike kombinga yanghee outondwe wa hovela, ndele oya popya yoo kombinga yanghee tau dulu okuxulifwa po.
Otashi dulika yo u hafele oikundafanwa ei
OMAPULO OPAMBIIBELI A NYAMUKULWA
Enyono lotete ola li shike?
Molwaashi Adam naEva kava li va dulika kuKalunga, ova tambekida oulunde koludalo lavo alishe ngaashi ashike ovadali hava tambekida omaufyuululwakwatya avo kounona.
