1-2. Omolwashike Ovakriste ve na okukala ve na ohokwe yokukonakona embo laLeviticus?

OMUYAPOSTOLI Paulus okwa li a lombwela kaume kaye omunyasha, Timoteus, kutya ‘Omishangwa adishe da yandjwa keenghono domhepo yaKalunga odi shii okuhonga.’ (2 Tim. 3:16) Omishangwa odo oda kwatela mo yo embo laLeviticus. Owa tala ko ngahelipi embo olo laLeviticus? Ovanhu vamwe ova tala ko embo olo li na eemhango dihapu odo itadi longo kunena, ashike Ovakriste hasho va tala ko embo olo ngaho.

² Embo laLeviticus ola shangwa paife pwa pita omido 3 500, na Jehova okwe li kaleka po ‘omolwehongo letu.’ (Rom. 15:4) Embo olo otali tu kwafele tu mone nghee Jehova ha diladila nanghee ha kala e uditile oinima yonhumba, nomolwaasho twa halelela oku li konakona. Membo olo la nwefwa mo omu na oilihongomwa ihapu. Natu ka konakoneni ine yomuyo.

3. Omolwashike kwa li haku yambwa omayambo mEfiku lEkwatakanifo omudo keshe?

³ Oshilihongomwa shotete: Otwa pumbwa okukala twa hokiwa kuJehova opo a tambule ko omayambo etu. Omudo keshe, Ovaisrael ova li have uya pamwe mEfiku lEkwatakanifo opo va yambe omayambo oinamwenyo. Omayambo a tya ngaho okwa li haa dimbulukifa Ovaisrael kutya ova pumbwa okukosholwa komatimba avo. Ofimbo omupristeri omukulunhu inaa twala ohonde yomayambo mOuyapukielela, okwa li e na tete okulonga  oshilonga shimwe sha fimana shi dulife okukoshola oshiwana komatimba asho.

4. Metwokumwe naLeviticus 16:12, 13, omupristeri omukulunhu okwa li e na okuninga shike tete shimha a i mOuyapukielela mEfiku lEkwatakanifo? (Tala efano kombada yoshifo.)

⁴ Lesha Leviticus 16:12, 13. Faneka nee momadiladilo osho hashi ningwa mEfiku lEkwatakanifo: Omupristeri omukulunhu okwa li ha i metwali. Osho osha li oshikando shotete shomoikando itatu oyo a li e na okuya mOuyapukielela efiku olo. Konyala imwe oku kwete etwimino ledimba liwa, ofimbo kukwao oku kwete oshikwatelwa shoshingoli shi na omakala e na omundilo. Shimha a fiki poshiyatatukulifo okwa li ha kanghama ofimbo ina ya mOuyapukielela. Okwa li ha i mOuyapukielela te shi ningi nefimaneko linene nokukala ofika a taalela koshikefa shehangano. Oku shi popya pafaneko, okwa li a fa e li ofika koshipala shaJehova Kalunga. Omupristeri okwa li ha tile etwimino liyapuki komakala, mo monduda tamu kala omwifi wedimba liwa. * Opo nee, okwa li ha shuna mOuyapukielela nohonde yokukoshola oshiwana komatimba. Didilika kutya omupristeri okwa li e na tete okutwimina ofimbo ina yandja ohonde yokukoshola oshiwana komatimba.

5. Oshike hatu lihongo kombinga yokuyandja etwimino mEfiku lEkwatakanifo?

⁵ Oshike hatu lihongo kombinga yokuyandja etwimino mEfiku lEkwatakanifo? Ombiibeli oya ulika kutya omailikano ovapiya vaJehova ovadiinini okwa fa etwimino. (Eps. 141:2; Eh. 5:8) Dimbuluka kutya omupristeri omukulunhu okwa li ha yandje etwimino kuJehova te shi ningi nefimaneko linene. Sha faafana, ngeenge hatu ilikana kuJehova otwa pumbwa okukala hatu shi ningi nefimaneko linene. Otwa pandula neenghono Omushiti weshito alishe eshi e tu pa oufembanghenda wokupopya naye nokweehena popepi naye, ngaashi okaana ke li naxe. (Jak. 4:8) Okwe tu tambula ko tu li ookaume kaye. (Eps. 25:14) Inatu hala nande okukwata okahetengi oufembanghenda oo mokuninga sha osho tashi mu nyemateke.

6. Omolwashike omupristeri omukulunhu a li e na okutwimina ofimbo ina yandja omayambo, noshike hatu lihongo mo?

⁶ Dimbuluka kutya omupristeri omukulunhu okwa li e na okutwimina ofimbo ina yandja omayambo. Monghedi ya tya ngaho, okwa li ha shilipaleke kutya Kalunga okwa hokwa omayambo oo a li ta ka yandja. Osho otashi tu hongo shike? Eshi Jesus a li kombada yedu, okwa li e na okuninga oshinima shimwe sha fimana ofimbo ina yamba po omwenyo waye opo a dule okuxupifa ovanhu. Oshike osho a li e na okuninga? Okwa li e na okuulika kutya omudiinini kuJehova onghalamwenyo yaye aishe opo a tambule ko eyambo laye. Kungaho, Jesus okwa li a ulika kutya okuninga oinima monghedi omo Jehova a hokwa, oku li onghedi ya denga mbada yokukalamwenyo, . Jesus okwa ulika kutya okupangela kwaXe okwa yuka.

7. Omolwashike Jesus a hafifa Xe monghalamwenyo yaye aishe?

⁷ Eshi Jesus a li kombada yedu okwa li a dulika komifikamhango daJehova douyuki. Okwa li a ulika kutya onghedi yaXe yokupangela oya denga mbada nonande okwa li a taalela omayeleko, omashongo nosho yo efyo liudifa omwenyo munyenye. (Fil. 2:8) Ngeenge a taalela eenghalo didjuu, okwa li ha ilikana “nokukuwa pombada nomahodi.” (Heb. 5:7) Omailikano aye taa di komutima okwa ulika kutya okwa li omudiinini kuJehova nokwa li a tokola toko okudulika kuye. Jehova okwa li a tala ko  omailikano aJesus e li onga etwimino ledimba liwa. Jesus okwa hafifa Xe monghalamwenyo yaye aishe nokwa yukipalifa ounamapangelo waYe.

8. Ongahelipi hatu dulu okuhopaenena onghalamwenyo yaJesus?

⁸ Ohatu dulu okuhopaenena Jesus mokulonga ngaashi hatu dulu opo tu kale hatu dulika kuJehova nokukala ovadiinini kuye. Ngeenge twa taalela omashongo, ohatu ilikana kuJehova nomutima aushe e tu kwafele shaashi otwa hala tu mu hafife. Kungaho, ohatu ulike kutya ohatu yambidida onghedi yaJehova yokupangela. Ita ka pwilikina omailikano etu ngeenge ohatu longo oinima oyo e tonde. Ashike ngeenge otwa kala metwokumwe nomifikamhango daye, ohatu dulu okukala noushili kutya omailikano etu taa di komutima otaa ka kala onga etwimino ledimba liwa kuye. Oshoshili kutya Tate yetu womeulu ota kala a hafa ngeenge otwa kala ovadiinini nohatu dulika kuye. — Omayel. 27:11.

9. Omolwashike kwa li haku yandjwa omapanduloyambo?

⁹ Oshilihongomwa oshitivali: Ohatu longele Jehova molwaashi otwe mu pandula. Ohatu ka mona kutya omolwashike hatu longele Jehova ngeenge otwa konakona nghee sha li sha fimana kOvaisrael okuyandja omapanduloyambo. * Ngeenge Omuisrael ta yandje epanduloyambo ola li la talika ko li li “ehambeleloyambo” ngaashi tashi hangwa membo laLeviticus. (Lev. 7:11-13, 16-18) Okwa li ha yandje omayambo a tya ngaho molwaashi a halelela oku shi ninga, ndele hamolwaashi ashike e na oku shi ninga. Okwa li a halelela okuyandja omayambo a tya  ngaho molwaashi oku hole Kalunga kaye, Jehova. Ngeenge omunhu a yandja eyambo, oukwaneumbo waye nosho yo ovapristeri ova li hava li ombelela yoshinamwenyo osho sha yandjwa eyambo. Ashike nande ongaho, oitukulwa imwe yoshinamwenyo oya li ashike i na okuyandjwa kuJehova. Oitukulwa ilipi oyo?

10. Omapanduloyambo oo taa hangwa muLeviticus 3:6, 12, 14-16 okwa faafana ngahelipi nonghedi yaJesus yokulongela Jehova?

¹⁰ Oshilihongomwa oshititatu: Ohatu pe Jehova osho sha denga mbada hatu linyengifwa kohole. Jehova okwa li a tala ko omakaadi oshinamwenyo e li oshitukulwa sha denga mbada. Okwa li yo a lenga oilyo yomeni, mwa kwatelwa eefiyo. (Lesha Leviticus 3:6, 12, 14-16.) Jehova okwa li ha kala a hafa ngeenge Ovaisrael ove mu pe oitukulwa yomeni yoshinamwenyo nosho yo omakaadi. Ovaisrael ovo va li hava yandje oitukulwa oyo kuJehova, ova li hava ulike kutya ova halelela shili oku mu pa osho sha denga mbada. Sha faafana, Jesus okwa ulika kutya okwa halelela okupa Jehova osho sha denga mbada moku mu longela nomutima aushe te linyengifwa kohole yoku mu hola. (Joh. 14:31) Jesus okwa li e hole okulonga ehalo laKalunga nokwa li a lenga Omhango yaYe. (Eps. 40:8) Jehova ka li tuu ha kala a hafa eshi ta tale Jesus te mu longele nehalo liwa!

11. Okulongela kwetu Jehova okwa faafana ngahelipi nomapanduloyambo, nongahelipi osho tashi tu hekeleke?

¹¹ Onghedi omo hatu longele Jehova oi li onga omapanduloyambo. Ohatu pe Jehova osho sha denga mbada molwaashi otu mu hole tashi di komutima. Jehova iha kala tuu a hafa ngeenge ta tale ovapiya vaye omamiliyona tave mu longele tave linyengifwa kohole yoku mu hola! Otashi hekeleke okushiiva kutya Jehova ina lenga ashike eenghatu detu, ndele okwa lenga yo nomalinyengotomheno etu. Pashihopaenenwa, ngeenge ou li omunamido ndele iho dulu vali okulonga shihapu ngaashi nale, kala u shii kutya Jehova okuudite ko onghalo yoye. Otashi dulika u kale u udite kutya Jehova oho mu pe shinini, ashike oku wete nghee ohole tai ku linyengifa u longe ngaashi to dulu. Okwa hafa okutambula ko keshe osho to mu pe sha denga mbada.

12. Jehova oha kala e uditile ngahelipi omapanduloyambo, nongahelipi osho tashi tu tu omukumo?

¹² Oshike hatu lihongo komapanduloyambo oo a li haa yandjwa? Jehova okwa li ha kala a hafa ngeenge e udite omwifi woitukulwa yoshinamwenyo oyo ya denga mbada. Nafye ohatu dulu okukala noushili kutya Jehova oha kala a hafa ngeenge hatu mu longele nomutima aushe. (Kol. 3:23) Kala u shii kutya okwe ku hokwa. Jehova okwa lenga neenghono eenghendabala doye doku mu longela kashi na nee mbudi kutya odi fike peni, nota kala alushe noku di dimbuluka. — Mat. 6:20; Heb. 6:10.

13. Metwokumwe naLeviticus 9:23, 24, Jehova okwa li a ulika ngahelipi kutya okwa tambula ko ovapristeri ovo va nangekwa po?

¹³ Oshilihongomwa oshitine: Jehova ota nangeke noupuna oshitukulwa shehangano laye shokombada yedu. Diladila kwaasho sha li sha ningwa po mo 1512 K.O.P. eshi etwali la li la dikwa kOmhunda yaSinai. (Ex. 40:17) Moses okwa li a ninga oshivilo omo Aron novanamati vaye va li va nangekwa po ve li ovapristeri. Oshiwana shOvaisrael osha li sha ongala opo shi tale nghee ovapristeri tava yambe omayambo avo otete oinamwenyo. (Lev. 9:1-5) Jehova okwa li a ulika ngahelipi kutya okwa tambula ko ovapristeri ovo va nangekwa po? Konima eshi Aron naMoses va nangeka noupuna ovanhu, Jehova okwa li a tuma omundilo oo wa li wa xwika po omayambo koaltari. — Lesha Leviticus 9:23, 24.

14. Eshi Jehova a nangeka po Aron novanamati vaye ve li ovapristeri otashi tu hongo shike kunena?

 ¹⁴ Oshinima shikumwifi shilipi sha li sha ningwa po eshi omupristeri omukulunhu a nangekwa po? Jehova okwa li a tuma omundilo opo a ulike kutya okwa tambula ko nota yambidida Aron novanamati ovo a hoolola va ninge ovapristeri. Eshi Ovaisrael va mona osho Jehova a ninga po, navo ova li va mona kutya ova pumbwa okuyambidida ovapristeri. Mbela osho otashi ti sha kufye? Heeno! Ovapristeri ovo va li muIsrael ova li omudidimbe wovapristeri va denga mbada. Kristus, Omupristeri Omukulunhu, oku na ovapristeri 144 000 ovo tava ka pangela pamwe naye meulu. — Heb. 4:14; 8:3-5; 10:1.

15-16. Jehova okwa ulika ngahelipi kutya okwa hokwa “omupiya omudiinini nomunaendunge”?

¹⁵ Mo 1919, Jesus okwa li a nangeka po okangudu kanini kovamwatate ovavaekwa ovo ve li “omupiya omudiinini nomunaendunge.” Omupiya oo oha wilike oilonga yokuudifa noha pe ovashikuli vaKristus “oikulya pefimbo.” (Mat. 24:45) Mbela otu wete ngoo oumbangi wa yela kutya Jehova okwa hokwa omupiya oo omudiinini nomunaendunge?

¹⁶ Satana novayambididi vaye ohava kendabala okuya moshipala oshilonga shomupiya omudiinini. Ngeno Jehova ka li ta yambidida omupiya oo, ngeno ita dulu okulonga oshilonga osho. Nonande mounyuni omwa li oita yopavali, omahepeko, ouxupilo tau shongola nosho yo okuhe na ouyuki oko kwa ningilwa oshiwana shaJehova, omupiya omudiinini nomunaendunge ota twikile okuyandja oikulya yopamhepo kovashikuli vaKristus vokombada yedu. Diladila koikulya yopamhepo ya henena oyo i li momalaka e dulife 900 hatu i mono oshali! Oumbangi oo otau ulike kutya Kalunga ota yambidida omupiya. Oilonga yokuudifa  nayo otai ulike kutya Jehova ote i nangeke noupuna. Onghundana iwa otai “udifilwa ounyuni aushe.” (Mat. 24:14) Ohatu dulu okukala noushili kutya Jehova ota nangeke noupuna ehangano laye note li kwafele li pondole.

17. Ongahelipi hatu dulu okuulika kutya ohatu yambidida ehangano olo Jehova ta longifa?

¹⁷ Oshiwa okulipula kutya, ‘Mbela onda pandula ngoo eshi ndi li oshitukulwa shehangano laJehova shokombada yedu?’ Pefimbo laMoses, Jehova okwa li a tuma omundilo okudja meulu opo a ulike kutya okwa hokwa ovo va nangekwa po ve li ovapristeri. Sha faafana, Jehova okwe tu ulikila oumbangi wa kola oo tau ulike kutya ota longifa ehangano laye kunena. Onghee hano, natu pandule Jehova eshi tu li oshitukulwa shehangano laye. (1 Tes. 5:18, 19) Ongahelipi hatu dulu okuulika kutya ohatu yambidida ehangano olo Jehova ta longifa? Omokushikula omayele a kanghamena kOmbiibeli oo hatu pewa okupitila moishangomwa yetu, pokwoongala nosho yo poyoongalele ya kula naai inini. Shikwao vali, ohatu ulike kutya ohatu li yambidida ngeenge hatu kufa ombinga pauyadi moilonga yokuudifa nokuhonga. — 1 Kor. 15:58.

18. Otwa tokola toko okuninga shike?

¹⁸ Natu kale twa tokola toko okutula moilonga oilihongomwa oyo twe lihonga membo laLeviticus. Jehova ota ka tambula ko omayambo etu ngeenge okwe tu hokwa. Ohatu longele Jehova molwaashi otwe mu pandula neenghono. Natu twikile okupa Jehova osho sha denga mbada molwaashi otu mu hole nomutima aushe. Natu yambidide pauyadi ehangano olo Jehova ta longifa kunena. Ngeenge otwa ningi ngaho, ohatu ka ulikila Jehova kutya otwa pandula koufembanghenda woku mu longela tu li Eendombwedi daye.