MOMUDO 49 O.P., Petrus, Jakob naJohannes ovo va li ‘va talwa ko eengudi,’ ova li va pa omuyapostoli Paulus naBarnabas oshilonga. Ndele ova li ve na okukaleka momadiladilo Ovakriste ovo va hepa eshi tava udifile oiwana. (Gal. 2:9, 10) Osho osha li sha wanifwa po ngahelipi?

Onhumwafo oyo Paulus a li a shanga otai ulike kutya okwa li a yandja elitulemo koshinima osho. Pashihopaenenwa, eshi a li a shangela Ovakriste vomuKorinto, okwa ti: “Mokupopya ongalo hai shivilwa ovayapuki, nanye yo ningeni ngaashi nda lombwelele omaongalo omuGalatia. Mefiku lotete loshivike keshe, keshe tuu womunye na tuvikile sha mombulavo palikolo laye, mu ha hangike eshi nde uya tamu i shivi. Ndelenee ngenge nde uya ko, opo nee handi ka tuma ovanhu ovo mwe va tala va wana va twale eeshalihole deni neenhumwafo kuJerusalem.” — 1 Kor. 16:1-3.

Paulus okwa li a tumbula vali elalakano lokuyandja omayambidido monhumwafo ya nwefwa mo onhivali oyo a li a shangela Ovakorinto. Okwa ti: ‘Napa kale efaafano, oupuna weni u kwafe paife oluhepo lavo.’ — 2 Kor. 8:12-15.

Pefimbo opo Paulus a li a shangela Ovakriste muRoma mo 56 O.P. lwaapo, omayambidido okwa li hanga a wana. Okwa shanga a ti: “Paife ohandi ka enda kuJerusalem omolweyakulo lovayapuki. Osheshi Makedonia naAkaia ova tala sha wapala okwoongela oikwafa yeehepele dovayapuki vomuJerusalem.” (Rom. 15:25, 26) Paulus okwa li a wanifa po oshinakuwanifwa shaye diva eshi a shuna kuJerusalem, naashi a li a kwatwa po okwa li a lombwela ngoloneya waRoma Feliks a ti: “Onde uya ndi etele oshiwana shetu oikwafa nondi yambe omayambo.” — Oil. 24:17.

Okutala kwaasho Paulus a li a lombwela Ovamakedonia, osha yela kutya Ovakriste vopefimbo laye ova li va ulika omhepo yokuyandja. Okwa ti: “Nokwiindila kuhapu ove tu indila neenghono va pewe okukala pamwe nafye meyakulo lovayapuki.” Okwa li yo a ladipika Ovakorinto va landule oshihopaenenwa osho, a ti: “Keshe tuu na yandje ngaashi omutima waye tau mu lombwele, hanomunyengutima ile kefininiko, osheshi Kalunga e hole ou ta yandje nehafo.” Mbela oshike sha li she linyengifa eongalo li yandje nehalo liwa? Kava li ashike va hala ‘okukufa po oluhepo lovayapuki, ndelenee okuhapupalifa oiimati omolwomapandulo mahapu okupandula Kalunga.’ (2 Kor. 8:4; 9:7, 12) Nafye ohatu dulu okuyandja monghedi ya faafana. Nopehe na omalimbililo, Jehova Kalunga ota ka nangeka noupuna oikala ya tya ngaho yokuheliholamwene, nenangeko noupuna laye olo tali likolifa. — Omayel. 10:22.

Ngaashi sha li pefimbo laPaulus, vahapu kunena ohava “tuvikile sha” ile ve litulile po omuvalu wonhumba woimaliwa oyo va tokola okukala tava tula mokakefa ‘kOmayambidido Oilonga yomOunyuni Aushe.’ (1 Kor. 16:2) Omwedi keshe, omaongalo ohaa tumu omayambidido oo keembelewa dEendombwedi daJehova domoilongo yao. Oto dulu yo okutuma omayambidido odikilila kehangano lopaveta olo hali longifwa kEendombwedi daJehova moshilongo sheni. Opo u shiive edina lehangano lopaveta olo hali longifwa kEendombwedi daJehova moshilongo sheni, kwatafana noshitaimbelewa osho hashi yakula oshilongo sheni. Ondjukifi yoshitaimbelewa otai hangwa ko-www.pr418.com. Ohatu dulu okuyandja omayambidido meenghedi tadi landula:

OMAYAMBIDIDO OO HATU DULU OKUTUMA ODIKILILA

• Omayambidido opashimaliwa, oulyenge ile oinima ikwao yondilo.
• Ou na yo okutuma onhumwafo i li pauxupi omo wa popya kutya oimaliwa noinima ikwao oi li omayambidido.

OINIMA OYO WA DILADILA OKUYANDJA MONAKWIIWA

Kakele kokuyandja omayambidido opashimaliwa nosho yo oinima ikwao yondilo, ope na vali eenghedi dimwe omo tamu dulu okuyambidida oilonga yOuhamba yomounyuni aushe. Eenghedi odo oda tumbulwa pedu. Kutya nee owa hala okuyandja monghedi ilipi, alikana tete ninga ekwatafano noshitaimbelewa opo u ude kutya omukalo ulipi tau longo moshilongo sheni. Molwaashi oiteelelwa yopaveta nosho yo eemhango di na sha noifendela oda yoolokafana, osha fimana okuninga ekwatafano novashiivi nawa moinima oyo ofimbo ino hoolola onghedi omo wa hala okuyandja.

Omakwashilipaleko: Oto dulu okushangifa ehangano lopaveta olo hali longifwa kEendombwedi daJehova li kale omufyuululi woimaliwa yoye yokomahangano omakwashilipaleki ile yopendjela.

Omatuvikilo okombaanga: Oto dulu okupula ombaanga opo oimaliwa oyo i li koakounta yoye, opendjela yoye ile oyo wa tuvikilifa oule wefimbo lonhumba i fyuululwe po kehangano lopaveta olo hali longifwa kEendombwedi daJehova, to shi ningi metwokumwe noiteelelwa yeembanga domoshilongo sheni.

Oipambuliko nomikuli odo wa ehelwa komahangano onhumba ile kepangelo (Stocks and Bonds): Oto dulu okushanga sha yela nawa kutya oinima oyo nai pewe po ehangano lopaveta olo hali longifwa kEendombwedi daJehova ile kutya nai ninge po yalo ngeenge owa fi.

Oiniwe ngaashi etungo ile edu: Oto dulu okuyandja omayambidido oinima ya tya ngaho kehangano ile ngeenge omo ho kala natango monhele oyo, oto dulu okushanga kutya ngeenge owa fi nai pewe ehangano.

Omatestamenti nomikanda dikwao dopaveta di na sha netukulo loikwamaliko (Wills and Trusts): Oto dulu okushanga etestamenti kutya ngeenge owa fi oikwamaliko yoye nai pewe ehangano lopaveta olo hali longifwa kEendombwedi daJehova ile oku li kwatela momikanda dikwao di na sha netukulo loikwamaliko yoye. Ngeenge owa shangifa ehangano lopalongelokalunga momikanda da tya ngaho, otashi dulika uha ka fute oifendela ihapu.

Opo u mone ouyelele muhapu, dengela ile u shangele ko-Accounting Office (ombelewa yomavalulo) kondjukifi oyo ya ulikwa pedu ile u kwatafane noshitaimbelewa shomoshilongo sheni.