“ONDJOVO yaKalunga oi nomwenyo neenghono.” (Heb. 4:12) Omuyapostoli Paulus okwa li a popya eendjovo odo ta divilike oushili oo kutya eendjovo daKalunga odi na eenghono dokuhanga omutima nokulundulula onghalamwenyo yomunhu.

Ndele ovanhu ova ka kala va lyalyakana shi na sha neenghono detumwalaka lOmbibeli eshi oushunimonima oo wa li wa xunganekwa wa hapupala konima yefyo lovayapostoli. (2 Pet. 2:1-3) Lwanima, ovafita veengeleka ova li va hovela okulongifa Eendjovo daKalunga di li onga oshiketi. Omuhongwanhu wedina Harry Y. Gamble okwa li a shanga shi na sha “nokulongifa omishangwa dopaKriste paumhulile.” Okwa ti: Mefelemudo etitatu (paife pa pita eedula 1 800 lwaapo), omufita umwe wongeleka wedina Origen okwa ti kutya “eendjovo diyapuki odi na ouwa. Ngeenge eendjovo doumhulile woshipaani odi na eenghono, ongahelipi shi na sha nomishangwa odo da nwefwa mo kuKalunga?” John Chrysostom oo a li ko mefelemudo etine (paife pa pita eedula 1 700 lwaapo), okwa li a shanga a ti: “Ondiaboli itai ka dula okuya meumbo omo mu na Evangeli.” Okwa ti yo kutya ovanhu ohava djala omashangelo onhumba mofingo a dja mOmavangeli e li oshiketi shi na eenghono. Gamble okwa weda ko yo kutya Omuteologi waKatolika Augustine “okwa li e wete shi li nawa okutula omishangwa dEvangeli laJohannes koshi yoshiwilo ngeenge omunhu ota vele omutwe.” Osho otashi ulike kutya ovanhu ova li hava longifa Omishangwa moinima youmhulile. Mbela oho tale ko Ombibeli ngaashi oshiketi, tai kupe elao notai ku amene kowii?

Onghedi imwe omo Ombibeli hai longifwa nai apeshe, omo ku i longifa onga oshiketi. Osho osha hala okutya ngahelipi? Ovanhu vamwe ohava pandje Ombibeli keshe opo va pandje, vo tava lesha ovelishe oyo tava fikile puyo tava diladila kutya otai ke va pa ewiliko olo va pumbwa. Pashihopaenenwa, Gamble okwa ti kutya eshi Augustine a li a uda ewi lokaana poushiinda taka ti: “Kufa u leshe, kufa u leshe,” okwa li e shi tala ko shi li elombwelo la dja kuKalunga a pandje Ombibeli nokuleshe ovelishe oyo ta fikile muyo.

Mbela ou shii ngoo kutya ope na ovanhu vamwe ovo ngeenge va taalela oupyakadi hava ilikana kuKalunga, tava pandje Ombibeli keshe opo va pandje va itavela kutya ovelishe oyo tava fikile muyo otai ke va kwafela va ungaunge noupyakadi wavo? Nonande otashi dulika tave shi ningi nomalinyengotomheno mawa, Ovakriste kave na okukonga ewiliko mOmishangwa monghedi ya tya ngaho.

Jesus okwa li a shilipaleka ovashikuli vaye kutya ote ke va tumina ‘omupopili, omhepo iyapuki oyo tai va longo ashishe ndee tai va dimbulukifa ashishe e shi va lombwela.’ (Joh. 14:26) Mepingafano naasho, ovo hava kendabala okumona ewiliko mokupandja ashike Ombibeli keshe apa va pandje ihashi pula va kale ve na eshiivo lOmishangwa.

Ovanhu apeshe ohava longifa Ombibeli meenghedi doumhulile di lili noku lili. Ndele nande ongaho, Eendjovo daKalunga oda tokola oumhulile. (Lev. 19:26; Deut. 18:9-12; Oil. 19:19) “Ondjovo yaKalunga oi nomwenyo neenghono,” ndele otu na okukala tu na owino woku i longifa. Eshiivo lashili lOmbibeli olo hali xwepopaleke onghalamwenyo yovanhu ponhele yoku i longifa ya fa oshiketi. Okumona eshiivo la tya ngaho okwa kwafela ovanhu vahapu va kale ve na eenghedi, va efe po onghedi yokukalamwenyo oyo ya nyika oshiponga, va pameke omaukwaneumbo avo nova kulike ekwatafano lavo nOmushangi wOmbibeli.