1. Ovanhu vamwe ohava tale ko ngahelipi ovanailongo, nomolwashike sha puka okudiladila ngaho?

NGAASHI sha kundafanwa moshitukulwa sha tetekela, ovanhu kave hole “ovanailongo.” Otashi dulika va kale ve udite ve li xwepo ve va dule nokukala ve va dina. Ndele kashi li pahole okudiladila ngaho. Okambo kedina The Races of Mankind oka ti: “Ovanhu vomihoko da yoolokafana aveshe ovamwainafana ngaashi Ombibeli tai ti.” Nonande otashi dulika va kale va yoolokafana, ove li ashike ovamwainafana.

2, 3. Jehova oha tale ko ngahelipi ovanailongo?

² Pefimbo lOmbibeli, Jehova Kalunga okwa li a ninga ehangano nOvaisrael, oshiwana shaye oshihoololwa. Nonande ova li ve na ekwatafano le likalekelwa naJehova Kalunga, Omhango oya li ya popya kutya ove na okuungaunga nawa nonefimaneko novanailongo. Nafye otu na okuninga sha faafana. Keshe moshilongo omu na ovanailongo, nOvakriste kave na okuungaunga nonhondo novanhu va tya ngaho. Omolwashike mbela? Omuyapostoli Petrus okwa ti: “Paife ondi shi shii shili, Kalunga iha tale omunhu kombada. Ndele moshiwana keshe, keshe ou he mu tila ndee ta diinine ouyuki, ote mu wapalele.” — Oil. 10:34, 35.

³ Ovanailongo ovo va li mokati kOvaisrael vonale ova li hava mono ouwa mokukala pamwe navo. Osho osha li sha ulika kutya Jehova oha tale ko ngahelipi ovanailongo ngaashi omuyapostoli Paulus lwanima a ka pula shi na sha naJehova a ti: “Kalunga okOvajuda aveke mbela? Ke fi kovapaani yo? Heeno, oshili okovapaani yo.” — Rom. 3:29; Joel 2:32.

4. Omolwashike taku dulu okutiwa kutya ‘muIsrael yaKalunga’ kamu na ovanailongo?

⁴ Konima eshi Kalunga a ninga ehangano lipe nOvakriste  ovavaekwa, oshiwana shaIsrael shopambelela kasha li vali shi na ekwatafano le likalekelwa naye. Ndele ponhele yaasho, Ovakriste ovavaekwa ova ninga ‘Israel yaKalunga.’ (Gal. 6:16) Paulus okwa yelifa shi na sha noshiwana osho shipe a ti: ‘Kape na vali Omugreka nOmujuda, epitotanda nokuhapitatanda, [omunailongo, NW] nOmuskiti, omupika nomudalwa, ndelenee aishe nomuaveshe oKristus.’ (Kol. 3:11) Kungaho, kape na oo a li e na okutalwa ko omunailongo meongalo lopaKriste.

5, 6. (a) Epulo lilipi li na sha naJesaja 61:5, 6 tashi dulika li holoke po? (b) Oolyelye ve li “ovapristeri vOmwene” nosho yo “ovanailongo” ovo va popiwa kuJesaja? (c) Omushike omo eengudu odo dopavali hadi longele kumwe?

⁵ Vamwe otashi dulika ve lipule shi na sha nexunganeko laJesaja 61, olo tali wanifwa meongalo lopaKriste. Ovelishe 6 yetukulwa olo otai popi ovo tava ka kala “ovapristeri vOmwene.” Ndele ovelishe 5, oya popya “ovanailongo” ovo tava ka kwafela nokulonga pamwe ‘novapristeri’ ovo. Omolwashike ovelishe oyo ya popya shi na sha ‘novanailongo’?

⁶ ‘Ovapristeri ovo vOmwene’ Ovakriste ovavaekwa ovo tava ‘nyumunwa tete’ notava “ka ninga ovapristeri vaKalunga novaKristus, ndele tava ka pangela pamwe naye ngaashi eehamba omido eyovi limwe.” (Eh. 20:6) Kakele kaasho, ope na yo Ovakriste vahapu ovadiinini ovo ve na eteelelo loku ka kala kombada yedu. Ovakriste ovo ohava longo nove na ekwatafano lopofingo naavo tava i meulu. Ndele molwaashi kave fi oshitukulwa ‘shaIsrael yaKalunga’ ove li ngaashi ovanailongo. Ova hafa eshi tava longo pamwe ‘novapristeri vOmwene’ ve li ‘ovafita voimuna novalongi voikokola yomiviinyu’ moilonga yeteyo notava kwafele ovavaekwa mokufimanekifa Kalunga okupitila mokuudifa nokuhonga vamwe oshili. Ovavaekwa nosho “eedi dimwe” ohava hongo ovanhu oshili noku va kwafela pahole va kale metwokumwe nayo. — Joh. 10:16, NW.

7. Ovakriste kunena ova fa Abraham nosho yo ovadiinini vakwao vonale meityo lilipi?

⁷ Ngaashi twe lihonga moshitukulwa sha tetekela, Ovakriste vashili ove li ngaashi ovanailongo mounyuni waSatana woukolokoshi.  Kungaho, ova fa Abraham nosho yo ovadiinini vakwao ovo vaha li oshitukulwa shounyuni waSatana nova li “ovanailongo novaenda kombada yedu eli.” (Heb. 11:13) Kashi na nee mbudi kutya otu na eteelelo lilipi, ohatu dulu okukala nekwatafano le likalekelwa naJehova ngaashi Abraham a li e li na. Jakob okwa ti kutya “Abraham okwa itavela Kalunga, ndele ye okwe li mu valulila ouyuki, nokwa ifanwa kaume kaKalunga.” — Jak. 2:23.

8. Jehova okwa li a udanekela shike Abraham, na Abraham okwa li e uditile ngahelipi eudaneko olo?

⁸ Kalunga okwa udaneka kutya oiwana aishe yokombada yedu otai ka nangekwa noupuna okupitila muAbraham noludalo laye. (Lesha Genesis 22:15-18.) Abraham okwa kala e na elineekelo kutya eudaneko olo otali ka wanifwa po, nonande ola ka wanifwa po konima eshi a fya nale. Okwa kala nokutembauka noukwaneumbo waye hanga onghalamwenyo yaye aishe, ndele nande ongaho, ina efa po okukala kaume kaJehova.

9, 10. (a) Ongahelipi hatu dulu okuhopaenena Abraham? (b) Ohatu kwafele ovanhu va ninge shike kunena?

⁹ Nonande Abraham ka li e shii kutya Jehova ota ka wanifa po naini eudaneko olo a li e mu udanekela, okwa kala e hole Jehova noku mu longela. Okwa kala e shii kutya ye omunailongo noina kendabala okukala ngaashi omukwashiwana medu lihe fi laye. (Heb. 11:14, 15) Natu hopaeneneni Abraham nokunangwafapaleka onghalamwenyo yetu; inatu kala hatu diladila okuliongelela omaliko, okukala twa tumbala ile tu kale tu na eifano lonhumba. Omolwashike tu na okulalakanena onghedi yokukalamwenyo oyo tai lalakanenwa kuvahapu ngeenge ounyuni ou ou li pokuxula po? Omolwashike tu na okukala tu hole ounyuni oo u li po ashike okafimbo? Otwa teelela ounyuni wa denga mbada u dule ou notwa halelela okulididimika nokuteelela fiyo osheshi omaudaneko aKalunga a wanifwa po. — Lesha Ovaroma 8:25.

¹⁰ Jehova ota shivi natango ovanhu vomoiwana aishe opo va dule okunangekwa noupuna okupitila moludalo laAbraham. “Ovapristeri vOmwene” ovavaekwa nosho yo ovanailongo, ile tu tye, eedi dimwe, otava shivi ovanhu mounyuni aushe momalaka e dule 600.

11. Salomo okwa li a shiva ovanhu vomoiwana va ninge shike?

¹¹ Eshi Salomo a li a yapulila Jehova otembeli mo 1026 K.O.P., okwa li a didilika kutya ovanhu vomoiwana aishe otava ka waimina mokuhambelela Jehova metwokumwe neudaneko olo Jehova a li a udanekela Abraham. Okwa ilikana tashi di komutima a ti: ‘Omunailongo ou ke fi womoshiwana shoye, ngeenge ta di moshilongo shokokule, te uya omolwedina loye, osheshi naakwinya yo edina loye linene neke loye li neenghono nokwooko kwoye kwa yeluka taku ka udika, ye ngeenge te uya ndee ta ilikana mokutaalela ongulu ei. Mu uda hano meulu, monhele yoye, u ninge ashishe osho omunailongo te shi ku indile, opo oiwana aishe yomounyuni i shiive edina loye noku ku tila, ngaashi ovanhu voye Ovaisrael.’ — 1 Eeh. 8:41-43.

12. Omolwashike Eendombwedi daJehova di li ngaashi ovanailongo moilongo omo di li?

¹² Omunailongo omunhu oo ta talele po ile e li moshilongo shihe fi shavo. Eendombwedi daJehova oda fa ovanailongo molwaashi ohandi yambidida ashike Ouhamba waKalunga womeulu oo u li mepangelo laKristus. Onghee hano, ihadi kufa ombinga moinima yopapolotika moilongo omo di li nonande vamwe ove udite kutya odi na okukufa ombinga.

13. (a) Oshike tashi ke tu kwafela tuha tale ko vamwe ve li ovanailongo? (b) Jehova okwa halele ovanhu va kale hava tale ko vakwao ngahelipi?

 ¹³ Luhapu ohashi limonikila noupu kutya ovanhu vonhumba ovanailongo monghedi yavo yokupopya, eenghedindjikilile davo, eholokepo lavo nosho yo onghedi yavo yokudjala. Ndele oinima oyo itai ti sha unene, molwaashi ovanhu ova faafana meembinga dihapu, kashi na nee mbudi kutya ovomoshiwana shilipi. Ngeenge otwe lihongo okuhakala hatu diladila konghedi omo vamwe va yooloka ko kufye, itatu ke va tala ko ve li ovanailongo. Ngeno kombada yedu alishe okwa li ku na ashike epangelo limwe, ile ngeno ounyuni aushe owa li oshilongo shimwe, ngeno kape na omunailongo. Jehova okwa halele ovanhu aveshe va kale oukwaneumbo umwe wa hangana, u li koshi yepangelo laye. Ndele mbela otashi shiiva ngoo kunena ovanhu vomoiwana aishe va efe po okukala va tala ko vakwao ovanailongo?

14, 15. Eendombwedi daJehova di li ongudu oda dula okuninga shike?

¹⁴ Mounyuni ou ovanhu ve lihole nove na omhepo youkwashiwana, otashi mbilipaleke okumona oohandimwe ovo ve hole ovanhu vomoiwana aishe. Ndele nande ongaho, otashi pula eenghendabala opo tuha kale nonhondo. Omutoti woshitaashi yo-TV hai ifanwa CNN wedina Ted Turner, okwa popya shi na sha nokulonga pamwe noohandimwe vomoiwana ya yoolokafana ovo ve na ounghulungu, a ti: “Okushakena novanhu va tya ngaho osha li oshimoniwa shikumwifi. Ovanhu ovo va dja koilongo imwe kanda li nde va tala ko ve li ‘ovanailongo,’ ndele ongaashi ovakwashiwana vakwetu. Outumbulilo ‘ovanailongo’ onde u tala ko u li omutyanai, nonda li nda tula po omhango mo-CNN kutya inau longifwa, kutya nee omombelewa ile omomhepo. Ponhele yaasho, outumbulilo ‘paiwana’ oo wa li u na okulongifwa.”

¹⁵ Eendombwedi daJehova di li ongudu mounyuni aushe, ohadi tale ko ovanhu vomoiwana aishe ngaashi Kalunga he va tale ko. Ode lihonga okukala hadi tale ko oinima ngaashi Jehova he i tale ko, naasho oshe di kwafela di lundulule okudiladila kwado nonghee di uditile vamwe. Kadi tonde ovanhu vokoilongo imwe ile di diladile kutya omunhu molwaashi ashike omunailongo ke shi omulineekelwa nohadi hafele okweendafana novanhu vomaludi e lili noku lili nove na okudula kwa yoolokafana. Mbela owa diladila ngoo nale kunghee Eendombwedi daJehova di li ongudu hadi ningi oinima nokunghee shiwa kufyeni atusheni okulundulula etaleko letu li na sha navamwe?

16, 17. Onghalamwenyo otai ka kala ya tya ngahelipi ngeenge Ehololo 16:16; naDaniel 2:44 okwa wanifwa po?

¹⁶ Mafiku oiwana aishe otai ka lwifa epangelo laKalunga poita yaHarmagedon. (Eh. 16:14, 16; 19:11-16) Omido di dule po 2 500 da pita, omuprofeti Daniel okwa li a xunganeka kombinga yaasho tashi ka ningilwa omapangelo aeshe opanhu, a ti: “Pomafiku eehamba dinya Kalunga ou komeulu ota ka dika ouhamba itau ka teka po fiyo alushe, nepangelo lawo itali ka yandjwa koshiwana shimwe. Ndele owo otau ka nyanyaula notau ka teyaula omauhamba aeshe noku a xulifa po, ndelenee owo vene tau ka kala fiyo alushe.” — Dan. 2:44.

¹⁷ Diladila kutya ewanifo lexunganeko olo otali ka tya shike kwoove pauhandimwe. Kunena, keshe umwe ota dulu okutalwa ko omunailongo, molwaashi ounyuni owa tukulwa moilongo i lili noku lili. Ndele konima yaHarmagedon, itapa ka kala vali eengaba. Nonande ovanhu natango otava ka kala va yoolokafana, osho otashi ka ulika ashike kutya Kalunga okwa shita oinima iwa ya yoolokafana. Molwaashi otwa teelela onakwiiwa ihafifa ya tya ngaho, natu twikileni okuninga ngaashi hatu dulu tu tange nokufimanekifa Omushiti wetu.

18. Oihopaenenwa ilipi tai ulike kutya Eendombwedi daJehova inadi tala ko vamwe ve li ovanailongo?

¹⁸ Mbela otashi shiiva ngoo ovanhu aveshe mounyuni vaha kale va tala ko vakwao ve li ovanailongo? Heeno, otu na elineekelo kutya otashi shiiva. Nokuli nopaife, Eendombwedi daJehova ihadi tale ko vamwe ve li ovanailongo. Pashihopaenenwa, oitaimbelewa imwe inini oya hengumukila mumwe naikwao yokoilongo imwe. Osho osha ningwa opo ku shilipalekwe kutya oilonga yokuudifa otai longwa monghedi i li paunafangwa notai pondola. (Mat. 24:14) Etokolo olo inali ningwa she likolelela keengaba doilongo, okuninga shi li oshiteelelwa shopaveta. Osho otashi ulike kutya Jesus Kristus, Ohamba yOuhamba waKalunga, ota ende ta xulifa po eengaba odo da tukaula ovanhu nota ka ‘findana’ mafiku. — Eh. 6:2.

19. Elaka la koshoka loshili ola ningifa shike tashi shiiva?

¹⁹ Nonande Eendombwedi daJehova oda dja moiwana ihapu nohadi popi omalaka mahapu e lili noku lili, ohadi kendabala okupopya elaka la koshoka loshili, onghee hano, odi na oukumwe wa kola. (Lesha Sefanja 3:9.) Odi li oukwaneumbo womounyuni aushe oo uhe fi oshitukulwa shounyuni ou woukolokoshi. Oushili oo kutya oda hangana paife di li oukwaneumbo otau yandje oumbangi kutya mounyuni mupe itamu ka kala omunailongo. Ovanhu aveshe otava ka dimina nehafo oushili wetofwemo lokambo The Races of Mankind, olo tali ti: “Ovanhu vomihoko da yoolokafana aveshe ovamwainafana ngaashi Ombibeli tai ti.”