1. Omolwashike tu na okukala twe lineekela filufilu Eendjovo daKalunga?

OFIMBO omukonakonimbibeli ina hovela okukufa ombinga moukalele, ovakulunhuongalo ove na okushilipaleka tete ngeenge okwa itavela ngoo shili kutya Ombibeli Eendjovo daKalunga. * Ovapiya vaKalunga aveshe ove na okuulika okupitila mwaasho tava ningi nosho yo mwaasho tava popi kutya ove lineekela Ombibeli. Omolwashike mbela? Ngeenge otwe lineekela filufilu Eendjovo daKalunga nokukala tu shii oku di longifa nawa moukalele, ohatu ka dula okukwafela vamwe va shiive Jehova nova ka mone omwenyo waalushe.

2. Omolwashike tu na okudiinina oinima oyo twe lihonga?

² Omuyapostoli Paulus okwa divilika efimano lEendjovo daKalunga eshi a li a shangela Timoteus ta ti: “Kala muei we i longwa ndele u i shii shili.” Oinima oyo Paulus a li ta popi eshi a ti “muei,” oyo oshili yOmbibeli oyo ya li ye linyengifa Timoteus a tambule ko onghundana iwa. Oshili yOmbibeli nafye otai dulu oku tu kwafela tu kale tu na eitavelo la kola noku tu longa ‘eendunge tu xupifwe.’ (2 Tim. 3:14, 15) Luhapu ohatu longifa eendjovo odo Paulus a popya mu 2 Timoteus 3:16 tu ulikile ovanhu kutya Ombibeli oya dja kuKalunga, ndele nafye ohatu dulu okumona mo ouwa pauhandimwe meendjovo odo. (Lesha 2 Timoteus 3:16.) Natu ka kundafaneni ovelishe oyo moule. Okuninga ngaho otashi ke tu kwafela tu kale twe lineekela filufilu kutya omahongo aeshe aJehova okwa “yuka.” — Eps. 119:128.

3-5. (a) Eemhunga dovanhu oda li de linyenga ngahelipi konima yoshipopiwa osho Petrus a yandja pOpentekoste, nomolwashike? (b) Omolwashike Ovatessaloniki vahapu va li va tambula ko oshili? (c) Oshike hashi kumwifa ovanhu kunena shi na sha noukalele wetu?

³ Jesus okwa li a lombwela Ovaisrael ta ti: “Ohandi tumu kunye ovaprofeti novanaendunge novanongo vomishangwa.”  (Mat. 23:34) Jesus okwa li ta popi kombinga yovahongwa vaye, ovo a li a honga nghee ve na okulongifa Omishangwa moukalele. POpentekoste yomo 33 O.P., omuyapostoli Petrus okwa li a yandja oshipopiwa keemhunga dovanhu ovo va li muJerusalem nokwa li a tofa lwoikando mOmishangwa dOshiheberi. Eshi ovanhu va uda Petrus ta yelifa eendjovo odo, vahapu vomuvo “ode va twa komitima,” nova li ve livela ombedi omolwomanyono avo. Ovanhu omayovi atatu lwaapo vomuvo ova li va pula Kalunga e va dimine po nova ninga Ovakriste. — Oil. 2:37-41.

⁴ Ohatu dulu yo okulihonga komuyapostoli Paulus oo a li a udifa onghundana iwa kondje yaJerusalem. Pashihopaenenwa, okwa li a udifila ovo va li hava ongalele moshinagoga moshilando Tessalonika shomuMakedonia. Paulus okwa ‘kundafana navo omishangwa momashabata atatu, nokwe di va fatululila ndee te va ulikile mudo Kristus nhumbi kwa li e nokuhepekwa nokunyumuka koufi.’ Oshidjemo? Ovajuda vamwe ova ninga ovaitaveli nosho yo ongudu inene yOvagreka. — Oil. 17:1-4.

⁵ Kunena ovanhu vahapu ohava kala va kuminwa onghedi omo ovapiya vaKalunga hava longifa Ombibeli. Konima eshi omuneumbo umwe wokoSwitzerland a leshelwa omushangwa wonhumba komumwameme, okwe mu pula ta ti: “Owa dja kongeleka ilipi?” Omumwameme okwa nyamukula ta ti: “Fye namukwetu ou ndi li naye otu li Eendombwedi daJehova.” Omuneumbo okwa ti: “Onda li ndi na okukala ndi shi shii, molwaashi oolyelye vali vokuuya meumbo lange tava lesha Ombibeli vehe fi ashike Eendombwedi daJehova?”

6, 7. (a) Ovo hava yandje oipopiwa meongalo ove na okulongifa ngahelipi Ombibeli? (b) Omolwashike sha fimana okulongifa nawa Omishangwa ngeenge to kwatele komesho ekonakonombibeli?

⁶ Ongahelipi hatu dulu okulongifa nawa Ombibeli ngeenge hatu hongo vamwe? Ngeenge owa pewa oufembanghenda wokuyandja oshipopiwa pokwoongala, longifa omishangwa dokondadalunde. Ponhele yokungonga ashike omishangwa denenediladilo loshipopiwa shoye ile oku di lesha mombapila oyo wa pilinda ile koshinima shopaelekitronika, di konga mOmbibeli yo venevene noku di lesha, nokuladipika ovapwilikini navo va ninge sha faafana. Yelifa yo nefimbo etulomoilonga lomushangwa, to shi ningi monghedi oyo tai kwafele ovapwilikini va ehene popepi elela naJehova. Ino mana po efimbo mokulongifa omafaneko a kitakana nosho yo oimoniwa oyo tai yolifa ashike ovanhu, ndele li longifa mokuyelifa Eendjovo daKalunga.

⁷ Oshike twa pumbwa okukaleka momadiladilo ngeenge hatu kwatele komesho ekonakonombibeli? Eshi hatu longifa oishangomwa yetu yopaKriste, otu na okulungama tuha fiye po omishangwa odo di li mo. Otu na okuladipika omukonakonimbibeli a leshe omishangwa odo da etwa mo ndele inadi tofwa mo noku mu kwafela a ude ko eityo lado. Ngahelipi mbela? Otu na oku mu ladipika a popye omaliudo aye ndele katu na oku mu yelifila oinima ihapu, twa fa hatu mu pe oshipopiwa. Ponhele yokulombwela omukonakoni kutya oshike e na okwiitavela ile nghee e na okukatuka, otu na oku mu pula omapulo a diladilwa nawa oo tae ke mu kwafela a fike pexulifodiladilo li li mondjila. *

8. Paulus okwa li ha kondjo noupyakadi ulipi?

⁸ Luhapu ohatu diladila kutya ovakulunhuongalo Ovakriste ovo ashike ve na oshinakuwanifwa ‘shokukumaida.’ Oshoshili kutya ovapashukili ove na oshinakuwanifwa ‘shokuhanyena ava hava nyono.’ (1 Tim. 5:20; Tit. 1:13) Ndele osha fimana yo okukala hatu lihanyene fye vene. Paulus okwa li ha kala e na eliudo la koshoka noku shii okuhopaenenwa. (2 Tim. 1:3) Ashike nande ongaho, okwa shanga a ti: “Ndele moinhimbu yange ondi wete omhango ikwao tai kondjifa omhango yomadiladilo ange, ndele otai pikile nge momhango youlunde.” Ngeenge otwa konakona  oshikalimo sheendjovo odo, ohatu ka uda ko osho Paulus a li e na okuninga opo a kondjife eamo loulunde. — Lesha Ovaroma 7:21-25.

9, 10. (a) Paulus otashi dulika a li e na ounghundi umwe ulipi? (b) Ongahelipi Paulus a kala nokukondjifa ounghundi oo a li e na?

⁹ Paulus okwa li ha kondjo opo a finde ounghundi ulipi? Nonande ounghundi oo ine u tumbula, okwa li a shangela Timoteus kutya okwa kala ‘omuhepeki.’ (1 Tim. 1:13) Fimbo a li ina ninga Omukriste, Paulus okwa li omuhepeki wOvakriste. Okwa li a popya omaliudo aye e livela ombedi e na sha novashikuli vaKristus a ti: ‘Moupyuhandu wange, onde va hepeka.’ (Oil. 26:11) Paulus okwa li e na okulihonga okupangela ehandu laye, nomafimbo amwe okwa li yo e na okupangela omaliudo aye nosho yo onghedi yaye yokupopya. (Oil. 15:36-39) Oshike sha li she mu kwafela a pondole?

¹⁰ Eshi a li a shangela Ovakriste vokuKorinto, Paulus okwa li a yelifa onghedi oyo a li ha longifa opo e lihanyene. (Lesha 1 Ovakorinto 9:26, 27.) Okwa li ha katuka eenghatu da kwata moiti opo a kondjife ounghundi waye. Nopehe na omalimbililo, okwa li ha kongo omayele mOmishangwa, ha indile Jehova e mu kwafele e a tule moilongo nokulonga noudiinini opo a xwepopale. * Nafye ohatu dulu okumona ouwa moshihopaenenwa shaye molwaashi nafye ohatu kondjifa eamo loulunde.

11. Ongahelipi hatu dulu ‘okuliyeleka’ fye vene tu tale ngeenge ohatu ende mondjila yoshili?

¹¹ Inatu efa nande okukondjifa omaunghundi etu. Ponhele yaasho, otwa pumbwa okukala hatu ‘liyeleke’ fye vene tu shilipaleke kutya ohatu ende ngoo shili mondjila yoshili. (2 Kor. 13:5) Ngeenge hatu lesha omishangwa ngaashi Ovakolossi 3:5-10, ohatu dulu okulipula kutya: ‘Mbela ohandi longo ngoo noudiinini opo ndi dipae eamo lange loulunde ile eenghedi dange otadi ende tadi xutuka? Ngeenge onde lihange konhele oko ku na omauyelele inaa koshoka eshi handi longifa ointaneta, mbela ohandi ka dja ko meendelelo ile ohandi ka kala handi talaatala ko?’ Okukala hatu diladila nghee tu na okutula moilonga omayele Eendjovo daKalunga monghalamwenyo yetu otashi ke tu kwafela tu ‘kale twa pashuka notu li ovalidiliki.’ — 1 Tes. 5:6-8.

12, 13. (a) Okupukulula, ile tu tye, okuyukifa oinima otashi ti shike, nongahelipi hatu dulu okuhopaenena Jesus moshinima osho? (b) Okupopya kulipi tu na okuhenuka ngeenge hatu yukifa oinima naumwe?

¹² Oshitya shOshigreka osho sha tolokwa ‘okupukulula’ otashi ti okuninga osho shiwa ile oku shi yukifa. Omafimbo amwe, otwa pumbwa okuyukifa oinima ngeenge vamwe va uda ko papuko osho twa popya ile osho twa ninga. Pashihopaenenwa, ovawiliki velongelokalunga lOshijuda ova li tava ngongota kutya Jesus oku hole “ovafutifi novalunde.” Jesus okwa tya kuvo: “Ava va pama, ihava pumbwa omuveluli, ndelenee ovanaudu ovo tuu aveke. Ndelenee indeni mu ke lilonge kutya, eshi otashi ti shike: Efilonghenda nda hala, haeyambo.” (Mat. 9:11-13) Okwa li a fatululila aveshe Eendjovo daKalunga pahole nonelidiiniko. Onghee ovalininipiki ova li va shiiva Jehova e li ‘Kalunga omunefilonghenda, omunanghenda, omunanheni nomunene mouwanghenda.’ (Ex. 34:6) Omona waKalunga okwa li a ninga eenghendabala a ‘pukulule’ vamwe, navahapu ova li va tambula ko onghundana iwa.

¹³ Oshihopaenenwa shaJesus otashi tu hongo nghee tu na okukwafela vamwe. Omayele oo e li mu 2 Timoteus 3:16 inaa hala okutya otu na okupopya navamwe nehandu opo tu yukife oinima. Omishangwa inadi tu pa oufemba wokukala hatu popi navamwe nopehe na okuyavelela omaliudo avo. Ngeenge otwa kala hatu kembaula vamwe, eendjovo detu otadi ke va twa ngaashi “eongamukonda.” Osho otashi ke va yahameka noshi na oupu eendjovo detu dihe va kwafele sha nokuli. — Omayel. 12:18.

14-16. (a) Ongahelipi ovakulunhuongalo tava dulu okuyukifa oinima monghedi oyo tai kwafele vamwe va kandule po omaupyakadi avo? (b) Omolwashike okuyukifa oinima hatu longifa Omishangwa sha fimanenena mokutekula ounona?

 ¹⁴ Ongahelipi hatu dulu okuyukifa oinima hatu shi ningi pahole noneyavelelo? Natu tye nee ovalihomboli ova pula omukulunhuongalo e va kwafele vaha kale vali hava tanguna alushe. Mbela omukulunhuongalo oo ota ka ninga po shike? Ota dulu okutomhafana novalihomboli ovo nopehe na olwaamambinga, ta longifa omafinamhango Ombibeli ngaashi oo a kundafanwa metukulwa eti-3 lembo, Osho tashi dulu okukwafela oukwaneumbo u kale wa hafa shili. Eshi tava kundafana omafinamhango oo, ovalihomboli ovo otava ka mona kutya omayele elipi keshe umwe pauhandimwe e na okutula moilonga. Lwanima, omukulunhuongalo ota dulu oku va pula kutya oinima otai ende ngahelipi moukwaneumbo noku va wedela ko omayele vali ngeenge osha pumbiwa.

 ¹⁵ Ongahelipi ovadali tava dulu okuyukifa oinima monghedi oyo tai dulu okupameka ounona vavo pamhepo? Natu tye nee ngeno owa hala okukwafela okamonakadona koye keedula omulongo nasha ka henuke ookaume ovo tava limbilike. Tete, shilipaleka kutya ookaume vako ova tya ngahelipi. Opo nee, ngeenge ou na omalimbililo natango omolwokamonakadona koye, oto dulu okupopya nako to longifa oitwa oyo i li membo Questions Young People Ask — Answers That Work, embo eti-2. Okudja opo, oto dulu okukala ho kala nako efimbo la wedwa po. Kala to tale kutya ota ke lihumbata ngahelipi ngeenge ke li moukalele ile ngeenge oukwaneumbo tau hafele pamwe. Ngeenge owa kala u na onheni nonghenda nokamonakadona koye, ota ke ke shi mona mo kutya ou na ko nasha nako nou ka hole. Otashi ke ke linyengifa ka dulike komayele oye notaka ka henuka okuninga omahoololo a puka monghalamwenyo yako.

¹⁶ Nafye otu na okuninga sha faafana ngeenge hatu ladipike ovo tave lipula shi na sha noukolele wavo, va wililwa po omolwokukanifa oilonga ile vehe udite ko omahongo onhumba Ombibeli. Okuyukifa oinima hatu longifa Eendjovo  daKalunga ohashi etele ovapiya vaJehova omauwa mahapu.

17. Omolwashike tu na okutambula ko outekuduliko nolupandu?

¹⁷ Ombibeli oya ti: “Edengo keshe pefimbo lalo katu li wete olo ehafo, ndelenee olo oluhodi, ndele komesho otali imikile ava va tekulwa kulo oshiimati shombili oshomouyuki.” (Heb. 12:11) Ovakriste ovakulunhu vahapu otava dimine kutya outekuduliko oo va li va pewa kovadali vavo Ovakriste owe va kwafela. Okutambula ko omayele oo hatu pewa kuJehova okupitila movakulunhuongalo Ovakriste ohashi tu kwafele tu kale mondjila oyo tai twala komwenyo. — Omayel. 4:13.

18, 19. (a) Omolwashike omayele oo taa hangwa mOmayeletumbulo 18:13 a fimanenena ‘mokutekula mouyuki’? (b) Ngeenge ovakulunhuongalo ova ungaunga nombili nonohole novanyoni, luhapu ohashi eta oidjemo ilipi?

¹⁸ Ongahelipi ovakulunhuongalo novadali tava dulu okulihonga nghee ve na okuyandja outekuduliko? Jehova okwa lombwela Ovakriste va yandje outekuduliko “mouyuki.” (2 Tim. 3:16) Ndele otu na okulongifa omafinamhango Ombibeli e tu wilike. Limwe lomomafinamhango oo otali hangwa mOmayeletumbulo 18:13, oo ta ti: “Ou ta nyamukula fimbo ina uda ko, osho oulai waye ndee tashi mu fifa ohoni.” Onghee hano, ngeenge ovakulunhuongalo tava ka popya naumwe oo va uda kutya okwa nyona enyono la kwata moiti, ove na okukonakona tete nawanawa oshinima osho opo va mone ouyelele we lixwa po. (Deut. 13:14) Kungaho opo ashike tava ka dula okupukulula omunhu oo “mouyuki.”

¹⁹ Shikwao vali, Eendjovo daKalunga oda lombwela ovakulunhuongalo va kale hava pukulula vamwe “nombili.” (Lesha 2 Timoteus 2:24-26.) Oshoshili kutya omunhu ota dulu okushekifa Jehova nokuyahameka ovo vehe na ondjo. Ndele ngeenge omukulunhuongalo okwa handuka eshi ta pukulula omunhu a tya ngaho, ita ka dula vali oku mu kwafela. Kakele kaasho, ngeenge ovakulunhuongalo ova kala hava hopaenene “ouwa waKalunga” otashi dulika shi kwafele omunyoni e livele ombedi. — Rom. 2:4.

20. Ovadali ove na okutula moilonga omafinamhango elipi ngeenge tava pukulula ovana vavo?

²⁰ Ovadali ove na okukala hava dulika komafinamhango Ombibeli eshi tava tekula ovana vavo “meduliko nomekumaido lOmwene.” (Ef. 6:4) Pashihopaenenwa, omushamane ota ka ninga po shike ngeenge okwa lombwelwa kutya okamonamati oka ninga sha sha puka? Oku na okushilipaleka kutya oku na oushili we lixwa po fimbo ina handukila okamonamati. Moukwaneumbo wopaKriste kamu na okukala mu na elongifo leenghono nehandu. “Omwene Oye omunalukeno nomunamutimanghenda,” onghee hano, ovo ve na oshinakuwanifwa shokupukulula ovanyasha ove na okukendabala va ulike omaukwatya opahole a fa aye. — Jak. 5:11.

21, 22. Outumbulilo ulipi hau holola etaleko loye li na sha nEendjovo daJehova ngeenge to lesha Epsalme 119:97-104?

²¹ Omupiya waKalunga umwe okwa li a ulika nghee a li e hole omhango yaJehova. (Lesha Epsalme 119:97-104.) Eshi a li a konakona Ombibeli, okwa li a mona ounongo, eshiivo neudeko. Okudulika komayele ayo okwe mu kwafela a henuke eendjila da puka odo tadi dulu okweetela vamwe oshiponga. Okukonakona Omishangwa okwa li he ku hafele nokwa li haku mu etele ouwa. Okwa li a tokola toko a kale ha dulika kuKalunga molwaashi omalombwelo aye okwa li e mu etela omauwa mahapu monghalamwenyo yaye.

²² Owa lenga ngoo “Omishangwa adishe”? Omishangwa odo odo tadi ku kwafele u kale wa itavela filufilu kutya Kalunga ota ka wanifa po elalakano laye. Omayele ado a nwefwa mo otae ku amene uha longe oulunde oo tau twala mefyo. Nongeenge to a hepaululile vamwe otae ke va kwafela va mone ondjila yexupifo nova kale mo. Otu na okutwikila okulongifa Ombibeli meenghedi adishe odo eshi hatu longele Jehova Kalunga omunaendunge nomunahole.