JESUS okwa li a xunganeka kutya, kape na emanya lotembeli yaJehova tali ka fiwa la londa kulikwao, exunganeko olo la ka wanifwa eshi etangakwaita laRoma olo la li likwetelwe komesho kuTitus la hanauna po Jerusalem mo 70 O.P. (Mat. 24:2) Ndele lwanima Omukesari Julian okwa li a pangela omhangela a tungulule otembeli.

Julian okwa li a shiivika e li omukesari waRoma omupaani waxuuninwa. Okwa li a dalwa kumumwaina waConstantine Munene, nokwa li a hongwa ehongo lOukwakriste. Ndele eshi a ninga omukesari momudo 361 O.P., ka li vali a hala ehongo lOukwakriste olo a li a hongwa. Momambo ondjokonona okwa popiwa mo e li “Omushunimonima,” molwaashi okwa efa po ongeleka.

Julian okwa li e tonde ovo tave liti Ovakriste. Otashi dulika a li e va tonde molwaashi eshi a li e na omido hamano, ovanhu ovo va li tave liti Ovakriste ova li va dipaa xe nosho yo ovapambele vaye vamwe. Ovanandjokonona vongeleka ova ti kutya, Julian okwa li ta ladipike Ovajuda va tungulule otembeli yavo molwaashi okwa li ta diladila kutya osho otashi ka ulika kutya Jesus omuprofeti omunaipupulu. *

Kape na omalimbililo kutya Julian okwa li a hala okutungulula otembeli. Ashike ovanandjokonona ova kala tava tu eemhata ngeenge okwa li ngoo a hovela oilonga yokutungulula, nongeenge osho a ninga, oshike sha shunifa monima oilonga oyo. Kutya nee okwa li a hovela okutunga ile hasho, oushili oyoo kutya okwa ka dipawa meni lomido mbali konima eshi a ninga omukesari, notembeli inai tungululwa vali.