1, 2. Eendombwedi daJehova odi na oufembanghenda we likalekelwa ulipi, nou uditile ngahelipi oufembanghenda oo?

OVANHU vahapu ohava kala ve udite etumba ngeenge va pewa ondjabi molwoshilonga shididilikwedi osho va longa. Pashihopaenenwa, vamwe ova li va pewa epapa lokomudo molwaashi va longa nouladi opo va hanganife ovanhu ovo ve tondafane. Ndele kashi fi tuu oufembanghenda munenenene okukala u li omukalelipo waKalunga, oo a tumwa a ka kwafele ovanhu va pange vali ombili nOmushiti wavo!

² Tu li Eendombwedi daJehova, otu na oufembanghenda wa tya ngaho we likalekelwa. Ohatu ladipike ovanhu va ‘hangane naKalunga,’ hatu shi ningi koshi yewiliko laye nolaKristus. (2 Kor. 5:20) Jehova okwa kala te tu longifa opo tu ehenife ovanhu popepi naye. Kungaho, ovanhu omamiliyona moilongo i dulife 235 ova kwafelwa va kale ve na ekwatafano liwa naKalunga nosho yo eteelelo loku ka mona omwenyo waalushe. (Tit. 2:11) Ohatu shivi nomutima aushe keshe oo ‘a hala, a tambule omeva omwenyo oshali.’ (Eh. 22:17) Molwaashi otwa lenga oshilonga osho sha fimana nohatu shi wanifa po noudiinini, otaku dulu okutiwa kutya otu li oshiwana “osho hashi diinine shili oilonga iwa.” (Tit. 2:14) Paife natu ka kundafaneni nghee ouladi wetu wokulonga oilonga iwa hau tu kwafele tu ehenife ovanhu popepi naJehova. Oilonga yetu yokuudifa oi li onghedi imwe omo hatu nanene ovanhu kuJehova.

3. “Ouladi waKalunga” otau ulike shike?

³ Jesaja 9:6 okwa popya shi na sha naasho epangelo lOmona waKalunga tali ka pondola eshi a ti: “Ouladi waKalunga, Omwene womatanga ovakwaita otau ke shi ninga.” Eendjovo odo otadi ulike kutya Tate yetu womeulu okwa halelela shili ovanhu va ka xupifwe. Oshihopaenenwa shaJehova shouladi otashi yandje oumbangi kutya oshilonga osho e tu pa tu li ovaudifi vOuhamba otwa pumbwa oku shi longa nomutima aushe, nexwamo nonouladi. Okukala kwetu twa halelela okukwafela  ovanhu va shiive Kalunga otaku ulike kutya Jehova omuladi. Ndele tu li ovalongi pamwe naKalunga, mbela otwa tokola ngoo toko okukufa ombinga pauyadi moilonga yokuudifa onghundana iwa she likolelela keenghalo detu? — 1 Kor. 3:9.

4. Ongahelipi Jesus a tula po oshihopaenenwa shokutwikila okulonga nouladi moukalele?

⁴ Diladila yo shi na sha nouladi waJesus. Jesus okwa tula po oshihopaenenwa sha wanenena shi na sha nokutwikila nouladi moukalele. Nonande okwa li ha patanekwa nonyanya, okwa kala ta twikile nouladi moilonga yokuudifa fiyo okefyo laye li udifa omwenyo munyenye. (Joh. 18:36, 37) Eshi eufwafimbo lokufya kwaJesus efyo lopayambo la li la fika, ouladi waye wokukwafela ovanhu va shiive Jehova owa li wa xwama.

5. Ongahelipi Jesus a li a katuka metwokumwe nefaneko lomukwiyu?

⁵ Lwopexulilo 32 O.P, Jesus okwa li a popya efaneko li na sha nomulumenhu oo a li e na omukwiyu u li mepya laye lomiviinyu oo inau ima oiimati oule womido adishe nhatu. Eshi omulongi wepya lomiviinyu a lombwelwa e u ke po, okwa li a pula a pewe efimbo la wedwa po e u tutile oushosho. (Lesha Lukas 13:6-9.) Movanhu ovo Jesus a li a udifila okwa li ashike a likola mo ovahongwa vanini. Ndele ngaashi sha ulikwa mefaneko lomulongi wepya lomiviinyu, Jesus okwa li a longifa efimbo lixupi olo la li la xupa ko, eemwedi hamano lwaapo, opo a udife nexwamo muJudea nomuPerea. Omafiku manini fimbo Jesus ina fya, okwa li a lila omolwovanhu vomoshilongo shavo ovo va li va ‘fitika omatwi avo.’ — Mat. 13:15; Luk. 19:41.

6. Omolwashike tu na okukala hatu udifa nexwamo?

⁶ Osha fimanenena okukala hatu udifa nexwamo, naunene tuu eshi tu li komuxundalili womafiku axuuninwa. (Lesha Daniel 2:41-45.) Kau fi tuu oufembanghenda munene okukala tu li Eendombwedi daJehova! Ofye ashike kombada yedu alishe hatu kwafele ovanhu va kale ve na eteelelo lashili lekandulepo lomaupyakadi. Omafimbo opo a di ko, omushangi umwe woshifokundaneki okwa ti kutya kape na enyamukulo kepulo olo kutya, “Omolwashike ovanhu vawa hava ningilwa oinima ii?” Oshi li oshinakuwanifwa shopaKriste nosho yo oufembanghenda okukwafela ovanhu ovo va hala okupwilikina va shiive omanyamukulo Ombibeli komapulo a tya ngaho. Otu na omatomheno mahapu okukala ‘twa xwama momhepo’ eshi hatu wanifa po oshilonga osho twa pewa kuKalunga. (Rom. 12:11) Jehova ohe tu nangeke noupuna eshi hatu udifa nouladi opo tu kwafele ovanhu ve mu shiive nova kale ve mu hole.

7, 8. Ongahelipi omhepo yeliyambo hai fimanekifa Jehova?

⁷ Ngaashi sha ulikwa moimoniwa yomuyapostoli Paulus, oukalele wetu otashi dulika u tu ningife tu kale “oupafi” oufiku, ile tu tye, tu londokwe keemhofi, ‘nokulidilika oikulya.’ (2 Kor. 6:5) Omautumbulilo oo taa ulike kutya otwa pumbwa okuninga omaliyambo notae tu dimbulukifa ovakokolindjila ovo va pitifa komesho oukalele wavo nopefimbo opo tuu opo otave liyambidida kuvo vene painiwe. Diladila yo shi na sha novatumwa ovadiinini ovo have ‘litileshi ngaashi eyambo’ opo va ka kwafele ovanhu koilongo imwe. (Fil. 2:17) Ongahelipi shi na sha novakulunhuongalo ovadiinini ovo omafimbo amwe ihava mono efimbo lokulya ile lokukofa molwaashi tava file oshisho eedi daJehova? Otu na yo ovanamido nosho yo ovo vehe na oukolele ovo hava ningi eenghendabala va kale pokwoongala kwopaKriste nokukufa ombinga moukalele. Omitima detu ohandi kala di yadi olupandu ngeenge hatu diladila kovapiya vaKalunga aveshe ovo ve na omhepo yeliyambo. Eenghendabala da tya ngaho ohadi kumu etaleko lavamwe li na sha noukalele wetu.

⁸ Omulumenhu wonhumba oo ehe fi Ondombwedi okwa popya monhumwafo imwe oyo a li a shangela koLincolnshire Boston Target, shomuUnited Kingdom a ti: “Ovanhu kave na vali eitavelo momalongelokalunga . . . Hano ovawiliki veengeleka ohava uhala tava ningi shike? Osha yela kutya ihava i va ka udifile ovanhu ngaashi Kristus a li ha ningi . . . Elongelokalunga olo li na ko nasha novanhu shili Eendombwedi daJehova  ashike, odo hadi i kovanhu di ke va udifile oshili.” Molwaashi otu li mounyuni omu mu na ovanhu ve na oikala yokuliholamwene, omhepo yetu yeliyambo ohai fimanekifa Jehova Kalunga. — Rom. 12:1.

9. Oshike tashi dulu oku tu linyengifa tu twikile nouladi okulonga oilonga iwa moukalele?

⁹ Ndele mbela oshike tu na okuninga po ngeenge otwa fa hatu kanifa ouladi wetu wokuudifa? Otashi ka kala shiwa okudilonga kwaasho Jehova ta wanifa po okupitila moilonga yokuudifa. (Lesha Ovaroma 10:13-15.) Ovo tava ifana edina laJehova ve na eitavelo ovo ashike tava ka xupifwa, ashike ovanhu itava dulu oku li ifana ngeenge ihatu va udifile. Oushili oo ou na oku tu linyengifa tu twikile nouladi okulonga oilonga iwa nokuudifa noudiinini onghundana iwa yOuhamba.

10. Omolwashike taku dulu okutiwa kutya elihumbato letu liwa ohali nanene ovanhu kuJehova?

¹⁰ Nonande osha fimana okukala ovaladi moukalele, itatu ka dula okukwafela ovanhu va ehene popepi naKalunga ngeenge ouladi oo ashike tu na. Oshinima shimwe vali osho tashi ka nanena ovanhu kuKalunga osho elihumbato liwa lopaKriste. Paulus okwa divilika efimano lelihumbato letu eshi a ti: “Fye itatu pe omunhu omhito okudina moshinima nande shimwe, oshilongayakulo shetu shi ha shekwe.” (2 Kor. 6:3) Okupopya kuwa nosho yo elihumbato liwa lOvakriste ohai tumbalekifa omahongo aKalunga nokunanena vamwe koshili. (Tit. 2:10) Luhapu ohatu udu ovanamitimadiwa tava popile mouwa oshiwana shaKalunga omolwelihumbato lasho liwa lopaKriste.

11. Omolwashike tu na okukala hatu konakona pamwe neilikano shi na sha nelihumbato letu?

¹¹ Nonande otwa mona kutya eenghatu detu otadi dulu okukuma vamwe monghedi iwa, otadi dulu yo oku va kuma monghedi ii. Onghee hano, nonande otu li koilonga, meumbo ile kofikola, inatu ninga nande oinima oyo tai ka shekifa oukalele nosho yo elihumbato letu. Ngeenge otwa  kala hatu nyonene owina, ohatu ka mona oilanduliko inyikifa oluhodi. (Heb. 10:26, 27) Ediladilo olo oli na oku tu linyengifa tu konakone pamwe neilikano osho hatu ningi nosho yo kutya onghedi yetu yokukalamwenyo otai yandje efano lilipi. Eshi omifikamhango dopaenghedi dounyuni tadi ende tadi xutuka, ovanamitimadiwa otava ka mona ‘etongoko pokati kaau ha longele Kalunga naau ihe mu longele.’ (Mal. 3:18) Onghee hano, elihumbato letu liwa lopaKriste otali dana onghandangala ya fimana mokuhanganifa ovanhu naKalunga.

12-14. Onghedi omo hatu lididimikile omayeleko eitavelo ohai kumu ngahelipi etaleko lavamwe li na sha noukalele wetu? Yandja oshihopaenenwa.

¹² Eshi Paulus a li a shangela Ovakorinto, okwa popya kutya okwa shakeneka omahepeko, omafininiko, omadengo nokwa li a idililwa modolongo. (Lesha 2 Ovakorinto 6:4, 5.) Ngeenge otwa shakeneke omayeleko eitavelo, oku e lididimikila otaku dulu okulinyengifa vamwe va tambule ko oshili. Pashihopaenenwa, omido donhumba da pita, opa li pa ningwa eenghendabala dokuxulifa po Eendombwedi daJehova moAngola. Eendombwedi mbali da ninginifwa nosho yo ovanhu 30 ve na ohokwe ovo va li hava kala pokwoongala ova li va kwatwa po. Opo nee, ovanhu vomoshitukulwa ova li va ongalekwa va ka tale eshi ovapataneki tava denge ovanhu ovo vehe na ondjo fiyo otava di ohonde. Ovakainhu nounona navo ova li va hepekwa nonyanya. Osho osha li sha ningwa nelalakano lokutilifa ovanhu opo vaha pwilikine kEendombwedi daJehova. Ndele konima yedengo la tya ngaho, ovanhu vahapu vomoshitukulwa ova li va ya kEendombwedi daJehova noku di pula di konakone navo Ombibeli. Okudja opo, oilonga yokuudifa Ouhamba oya xuma komesho, naasho osha etifa ekulo linene nomanangeko noupuna mahapu.

¹³ Oshihopaenenwa osho otashi ulike kutya okukala twa diinini omafinamhango Ombibeli okwa fimana shi fike peni. Oudiinini waPetrus novayapostoli vakwao otashi dulika wa li wa hanganifa ovanhu naKalunga. (Oil. 5:17-29) Ovanafikola vakwetu, ovanailonga pamwe nafye ile oilyo youkwaneumbo wetu oshi na oupu i tambule ko oshili ngeenge oya mono kutya otwa tokola toko okulonga osho sha yuka.

¹⁴ Ashike ovamwatate vamwe otava hepekwa fiyo okunena. Pashihopaenenwa, muArmenia, ovamwatate 40 lwaapo ove li modolongo omolwokuhenombinga kwavo, noshi na oupu vakwao vamwe navo va ka tulwe mo meemwedi tadi ya. MuEritrea, ovapiya vaJehova 55 ova idililwa modolongo, navamwe vomuvo ove na omido di dulife po 60. MoSouth Korea, Eendombwedi 700 lwaapo oda idililwa modolongo omolweitavelo lado. Onghalo ya tya ngaho oya kala tai twikile oule womido 60 moshilongo osho. Otwe lineekela kutya oudiinini wovamwatate ovo tava hepekwa moilongo i lili noku lili otau ka tumbalekifa Kalunga notau ka kwafela ovo ve hole ouyuki ve uye melongelokalunga lashili. — Eps. 76:9-11.

15. Yandja oshihopaenenwa osho tashi ulike kutya okukala ovanashili otaku dulu okunanena vamwe koshili.

¹⁵ Okukala ovanashili nako otaku dulu okunanena ovanhu koshili. (Lesha 2 Ovakorinto 6: 4, 7.) Pashihopaenenwa, diladila koshimoniwa eshi: Eshi omumwameme wonhumba a li ta tula oimaliwa meshina loutekete lomobesa yonhumba, omushiivikile umwe okwa li e mu lombwela kutya ina pumbwa okufutila okatekete kaye molwaashi oshinano oshixupi. Omumwameme okwe mu yelifila kutya osha yuka okufuta okatekete nokuli nonande oshinano kashile. Konima yaasho, kaume kaye oo okwa yeluka mo mobesa. Opo nee, omushingi wobesa okwa tala komumwameme ndele te mu pula ta ti: “Ove Ondombwedi yaJehova?” Omumwameme okwa nyamukula ta ti: “Heeno! Omolwashike to pulile ngaho?” Okwa ti: “Onde mu uda eshi mwa li ta mu popi shi na sha nokatekete kobesa, nondi shi shii kutya Eendombwedi daJehova odo unene hadi futu outekete vado nodi li ovanashili moinima aishe.” Konima yeemwedi dinini, pokwoongala kumwe omulumenhu umwe okwa li a ya pomumwameme oo ndele ta ti, “Ou  shii nge? Aame omushingi wobesa oo a popile naave shi na sha nokufuta outekete. Eshi nda mona elihumbato loye liwa, onda tokola okuhovela okukonakona Ombibeli nEendombwedi daJehova.” Okukala ovanashili ohaku tu didilikifa mo kutya otu li ovakalele ve shii okulineekelwa.

16. Omolwashike omaukwatya ngaashi onheni, ohole nolukeno haa kumu omitima dovanhu? Yandja oshihopaenenwa.

¹⁶ Okuulika omaukwatya ngaashi onheni, ohole nosho yo olukeno nako haku linyengifa ovanhu va ehene popepi naJehova. Vamwe ovo tave tu konenene otashi dulika va kale va hala okulihonga kombinga yaJehova, omalalakano aye nosho yo oshiwana shaye. Oikala nelihumbato lOvakriste vashili oya yooloka ko filufilu kwaayo yaavo have liningifa va fa ve na etilokalunga ndele paulelalela ovanaihelele. Ovawiliki vomalongelokalunga vamwe ova likola oupuna mokukunguda oilyo yeengeleka davo, noimaliwa ihapu oyo hava pewa ohave i longifa mokulilandela omaumbo neehauto dondilo, nopomhito imwe, umwe okwa li nokuli a tungifa okanduda kombwa yaye mu na omupepo. Osha yela kutya vahapu ovo have liti kutya ovashikuli vaKristus ihava yandje “oshali.” (Mat. 10:8) Ndele ponhele yaasho, ohava “longele ofuto” ngaashi ovapristeri ovatangalali vomuIsrael shonale, naluhapu ohava hongo oinima ihe li pamishangwa. (Mika 3:11) Elihumbato la tya ngaho itali hanganifa nandenande ovanhu naKalunga.

17, 18. (a) Ongahelipi okuulika omaukwatya a fa aJehova haku mu fimanekifa? (b) Oshike hashi ku linyengifa u twikile okulonga oilonga iwa?

¹⁷ Mepingafano naasho sha popiwa mokatendo ka tetekela, omahongo Ovakriste vashili noilonga iwa oyo hava longele ovanhu vakwao ohai kumu omitima dovanhu vahapu. Pashihopaenenwa, pomhito imwe fimbo omukokolindjila umwe a li ta udifa eumbo neumbo, okwa li a shunifwa ko komufiyekadi umwe omunamido. Omufiyekadi oo okwa ti kutya eshi omukokolindjila oo a denga okangedjo, okwa hangwa a londa komhani ta tula mo okabiena komokombifa. Omumwatate oo okwa ti: “Osha nyika oshiponga okuninga ngaho u li oove auke.” Opo nee, okwa tulila mo omunamido oo okabiena kaye ndele ta i. Eshi omonamati womukainhu oo a hokololelwa osho sha ningwa po, okwa li a kumwa neenghono nokwa kendabala oku ka konga omumwatate oo opo e mu pandule. Mokweendela ko kwefimbo, omumati oo okwa ka tambula ko ekonakonombibeli.

¹⁸ Omolwashike wa tokola toko okutwikila okulonga oilonga iwa? Otashi dulika omolwaashi u shii kutya ngeenge otwa kala tu li ovaladi moukalele nokulonga ehalo laJehova, kungaho ohatu mu fimanekifa nohatu kwafele vamwe va ka xupifwe. (Lesha 1 Ovakorinto 10:31-33.) Ohole yetu yokuhola Jehova nosho yo ovanhu vakwetu oyo hai tu linyengifa tu kale ovaladi moilonga iwa mokukala hatu udifa onghundana iwa nokulihumbata monghedi yopaKriste. (Mat. 22:37-39) Ngeenge otu li ovaladi moilonga iwa, otashi ke tu etela ehafo linene nohatu ka kala twa wanenwa. Kakele kaasho, otwa teelela nodjuulufi efimbo opo ovanhu aveshe tava ka fimanekifa Omushiti, Jehova, mokuulika ouladi welongelokalunga lashili.