1, 2. Luhapu ovadali nounona ohava kala ve liuditile ngahelipi, ndele omafimbo amwe ohava kala ve na oupyakadi ulipi?

OUNONA vahapu vomOilongo ya Hangana ova li va pulwa taku ti: “Natu tye nee ngeno ou shii kutya ovadali voye otava fi mongula, mbela ngeno oshike unene to ka kala wa hala oku va lombwela nena?” Embo ledina For Parents Only, la shangwa kuShaunti Feldhahn naLisa Rice ola ti kutya, ounona ve fike peepersenda 95 ova ti kutya ponhele yokuyandja elitulemo komaupyakadi nokuhaudafana kwavo novadali vavo, ngeno otave va pe ombili noku va lombwela kutya ove va hole neenghono.

² Luhapu ovadali nounona ohava kala ve holafane. Osho osho shi li ngaho naunene tuu momaukwaneumbo opaKriste. Ndele nonande ovadali nounona ohava kala va hala okukala ve na ekwatafano liwa, omafimbo amwe ihashi kala shipu kuvo okukundafana. Ashike nande omafimbo amwe ohava kundafana va manguluka, mbela omolwashike hava henuka okukundafana oinima yonhumba? Oinima imwe ilipi hai va imbi okukundafana nawa? Noshike tava dulu okuninga po opo va xwepopaleke onghedi yavo yokukundafana?

3. (a) Omolwashike hashi kala shidjuu komaukwaneumbo mahapu okukundafana nawa? (b) Omolwashike sha li shipu komaukwaneumbo omuIsrael shonale okukundafana?

³ Omaukwaneumbo mahapu okwa mona kutya oshidjuu okumona efimbo la wana lokuninga eenghundafana tadi ti sha. Ndele onghalo hasho ya li ngaho muIsrael shonale. Moses okwa li a lombwela ovashamane Ovaisrael ta ti: “Ove u noku i findila movana voye noku i tonga fimbo u li omutumba meumbo loye ile fimbo u li mondjila nongenge to ka nangala nongenge to penduka.” (Deut. 6:6, 7) Ounona ova li hava uhala naina meumbo ile naxe mepya ile koilonga. Onghee hano, ovadali nounona ova li hava mono efimbo la wana lokukala pamwe nolokukundafana. Oshidjemo, ovadali  ova li tava dulu okushiiva eemhumbwe, omahalo nosho yo omaukwatya ovana vavo. Sha faafana, ounona navo ova li hava mono efimbo neemhito da wana dokushiiva nawa ovadali vavo.

4. Omolwashike okukundafana haku kala kudjuu momaukwaneumbo mahapu kunena?

⁴ Onghalo kunena oya yooloka ko kwaai yopefimbo lonale. Moilongo imwe, ounona ohava tamekifwa okinda ofimbo vanininini, tashi dulika nokuli fimbo ve na omido mbali. Ovadali vahapu ohava i koilonga. Ngeenge ovadali nounona ova mono okafimbo kokukala pamwe, ihava kundafana molwaashi ohava kala ashike tava tale o-TV, tava longifa eekombiyuta nosho yo oinima ikwao yopaelektronika. Momaukwaneumbo mahapu, ovadali nounona ihava kala lela ve shaafane. Otashi dulika nokuli hava kundafana ashike kanini.

5, 6. Ongahelipi ovadali vamwe hava kongo efimbo la wana lokukala novana vavo?

⁵ Ito dulu mbela okukonga efimbo opo u kale ho kala pamwe noukwaneumbo weni? (Lesha Ovaefeso 5:15, 16.) Omaukwaneumbo amwe okwa udafana a ninipike efimbo olo haa longifa mokutala o-TV nosho yo mokulongifa okombiyuta. Vamwe ohava kendabala okulya pamwe nande lumwe mefiku. Elongelokalunga loukwaneumbo oli li omhito ya denga mbada opo ovadali nounona tava dulu okushiivafana nokukundafana oinima yopamhepo va manguluka. Okulitulila po ovili imwe ile eevili donhumba oshivike keshe dokuninga elongelokalunga loukwaneumbo otashi dulu oku mu kwafela, ashike natango omu na okukonga efimbo lokukundafana mwa mangulula. Onghee hano, omu na okukala hamu kundafana efiku keshe. Ofimbo okaana koye inaka ya kofikola oto dulu oku ka twa omukumo, okukundafana nako omushangwa wefiku ile okwiilikana pamwe nako, naasho otashi ke ka kwafela momukokomoko wefiku olo.

⁶ Ovadali vamwe ova ninga omalunduluko monghedi yavo yokukalamwenyo opo va dule okukala pamwe nounona vavo efimbo la wana. Pashihopaenenwa, Laura * oo e na ounona vashona vavali okwa fiya po oilonga yokulikongela  omboloto oyo a li ha longo efiku alishe omolwetomheno olo. Okwa ti: “Ongula keshe umwe oha kala a endelela, fye otwa yuka koilonga vo ounona okofikola. Eshi handi ka aluka koilonga, ohandi hange ounona va kofa nale nova ka nangekwa kwaau ha longo meumbo. Paife ohatu mono oyuuyemo inini eshi nda efa po oilonga, ashike ondi udite kutya paife ondi shii omadiladilo nomaupyakadi ovana vange. Ohandi pwilikine kwaasho tava popi momailikano avo nohandi dulu oku va wilika, oku va twa omukumo noku va honga.”

7. Ovadali nounona luhapu ohava ngongota shi na sha nashike?

⁷ Konima eshi ovashangi vembo For Parents Only va pulapula ovanyasha vahapu, ova li va mona kutya ope na sha vali osho hashi imbi ovadali nounona va kundafane. Ova ti: “Oshinima osho tashi ngongotwa unene kounona oshosho kutya ovadali vavo ‘ihava pwilikine kuvo.’” Ashike ovadali navo ove udite kutya ounona ihava pwilikine kuvo. Opo oilyo yomaukwaneumbo i kale hai kundafana ya manguluka, keshe umwe oku na okukala ha pwilikine kumukwao. — Lesha Jakob 1:19.

8. Ongahelipi ovadali tava dulu okupwilikina shili kovana vavo?

⁸ Ovadali, ohamu pwilikine ngoo shili kovana veni? Osho otashi dulu okukala shidjuu ngeenge mwa loloka ile mu wete osho okaana ta ka popi sha fa inashi fimana. Ndele oshinima osho mu wete inashi fimana kunye otashi dulika sha fimanenena kokaana keni. Okukala ho “endelele okupwilikina” itashi ti ashike okukala ho yandje elitulemo kwaasho okaana koye taka popi ndele nokonghedi yo omo take shi popi. Omutono wewi nomalinyengo olutu ohaa holola kutya okaana oke udite ngahelipi. Osha fimana yo oku ka pula omapulo. Ombibeli oya ti: “Omadiladilo omunhu okwa fa omeva e li mondungu ile, ndele omunaendunge ota dulu oku a teka mo.” (Omayel. 20:5, Today’s English Version) Owa pumbwa okulongifa eendunge dokuyoolola, naunene tuu ngeenge tamu kundafana kombinga yoshinima osho okaana koye inaka manguluka oku shi popya.

9. Omolwashike ounona ve na okukala hava pwilikine kovadali vavo?

⁹ Ounona, ohamu dulika ngoo kovadali veni? Eendjovo daKalunga oda ti: “Omumwange, pwilikina outekuduliko waxo, ndele ino ekelashi elongo lanyoko.” (Omayel. 1:8) Dimbuluka kutya ovadali voye ove ku hole nove ku halela ouwa, onghee hano, oshi li pandunge okukala ho pwilikine nokudulika kuvo. (Ef. 6:1) Ohashi kala shipu okudulika kovadali voye ngeenge ohamu kundafana nawa navo nongeenge u shii kutya ove ku hole. Kala ho lombwele ovadali voye omaliudo oye. Osho otashi ke va kwafela va kale hava udu ko osho to va lombwele. Ashike naave ou na yo okukala ho udu ko osho tave ku lombwele.

10. Oshike hatu lihongo mehokololo lOmbibeli li na sha naRehabeam?

¹⁰ Owa pumbwa okukala wa lungama ngeenge to pewa omayele kovanyasha vakweni. Otashi dulika ve ku lombwele osho wa hala okuuda, ashike omayele oo otashi dulika itae ku kwafele sha. Omayele avo otashi dulika nokuli e ku twale moshiponga. Molwaashi ovanyasha kave na ounongo nosho yo owino oo u niwe kovakulunhu, ovanyasha vahapu otashi dulika vaha mone kutya eenghatu davo otadi ka etifa oilanduliko ya tya ngahelipi. Dimbuluka oshihopaenenwa shaRehabeam, omonamati wohamba Salomo. Eshi a li a ninga ohamba yaIsrael, okwa li ta dulu okupondola ngeno okwa dulikile komayele mawa ovakulunhu. Ndele ponhele yaasho, okwa li a shikula omayele ehe li pandunge oomakula vaye. Nomolwaasho, ovapangelwa vaye vahapu ova li ve mu tukulila oshibofa. (1 Eeh. 12:1-17) Ponhele yokushikula oshihopaenenwa shii shaRehabeam, kendabala okukala ho kundafana novadali voye wa manguluka. Va lombwela omadiladilo nomaliudo oye. Kala ho tambula ko omayele avo nokulihonga kounongo wavo. — Omayel. 13:20.

11. Oshike tashi dulika shi ka ningwe po ngeenge ovadali ova kala ihava popiwa navo noupu?

 ¹¹ Ovadali, ngeenge inamu hala ounona veni va ka konge omayele koomakula vavo, kaleni hamu popiwa nanye noupu. Omumwameme umwe omunyasha okwa ti: “Shimha ashike nda popi kombinga yomumati, vo ovadali vange ova limbililwa nale. Osho ohashi shi ningifa shidjuu kwaame okutwikila oku va lombwela.” Omumwameme umwe okwa ti: “Ovanyasha vahapu ohava kala va hala okupewa omayele kovadali vavo, ndele ngeenge ovadali itave shi ningi, ovanyasha ovo ohava ka konga omayele kumwe ku lili, tashi dulika kwaava vehe na owino washa nokuli.” Ngeenge owa kala ho pwilikine nonghenda kounona voye mukeshe osho tava popi, otava ka kala hava popi naave va manguluka notava ka tambula ko omayele oye.

12. Ongahelipi onghedi omo ovadali have linyenge tai dulu okwiimba ounona vavo va kundafane navo?

¹² Onghedi omo ovadali have linyenge nayo otai dulu okwiimba ounona va kundafane navo. Ovadali otashi dulika va handukifwe diva kwaasho ounona vavo tave va lombwele. ‘Momafiku aa axuuninwa’ omu na oinima ihapu ya nyika oshiponga, nomolwaasho ovadali Ovakriste ova hala okwaamena ovana vavo. (2 Tim. 3:1-5) Ashike ounona otashi dulika va kale ve udite va ngabekwa unene eshi ovadali tava kendabala oku va amena.

13. Omolwashike ovadali ve na okukala va lungama opo vaha ninge omaetepo avo meendelelo?

¹³ Ovadali ove na okulungama vaha ninge omaetepo avo meendelelo ngeenge tava kundafana nounona vavo. Oshoshili kutya haalushe hashi kala shipu okukala wa mwena ngeenge ounona voye tave ku lombwele oinima oyo tai ku udifa nai. Ndele osha fimana okupwilikina kuvo nelitulemo ofimbo ino popya sha. Ohamba inaendunge Salomo oya ti: “Ou ta nyamukula fimbo ina uda ko, osho oulai waye ndee tashi mu fifa ohoni.” (Omayel. 18:13) Ngeenge owa kala wa ngungumana, okaana koye otaka ka twikila okupopya noto ka uda shihapu. Teelela manga u ude ehokololo alishe fimbo ino kendabala oku ka kwafela. Ngeenge owa ningi ngaho, oshi na oupu u ka ude ko kutya omolwashike okaana koye taka popi ‘eendjovo da puka.’ (Job 6:1-3) Mu li ovadali ovanahole, kaleni hamu pwilikine nokukendabala okuuda ko ounona veni, opo mu dule okupopya oinima oyo tai ke va kwafela shili.

14. Omolwashike ounona ve na okuliteelela mokupopya?

¹⁴ Ounona, nanye omwa pumbwa okukala hamu “liteelele mokupopya.” Dimbulukeni kutya Kalunga okwa pa ovadali veni oshinakuwanifwa shoku mu deula, nomolwaasho inamu kala hamu pataneke meendelelo osho tave mu lombwele. (Omayel. 22:6) Otashi dulika navo va pita meenghalo da faafana naado mwa taalela. Kakele kaasho, ohave lipe oushima omolwomapuko oo va ninga eshi va li ounona nova halelela oku mu kwafela muha ninge omapuko a faafana. Onghee hano, ovadali veni va taleni ko ve li ookaume keni ndele havatondi veni. Ova hala yo oku mu kwafela ndele haku mu yahameka. (Lesha Omayeletumbulo 1:5.) “Fimaneka xo nanyoko,” noku va ulikila kutya ou va hole ngaashi ve ku hole. Osho otashi ke shi ninga shipu kuvo oku ku ‘tekula meduliko nomekumaido lOmwene.’ — Ef. 6:2, 4.

15. Oshike tashi ke tu kwafela tu kale alushe tu na onheni notuha handukile ovo tu hole?

¹⁵ Peemhito dimwe otashi dulika tuha tale onheni ovo tu hole. Omuyapostoli Paulus okwa li a shangela ‘ovamwaxe muKristus, ovayapuki novaitaveli vomuKolossi’ ta ti: “Ovalumenhu nye, holeni ovakainhu veni, nye inamu va ningila onyanya. Ooxe nye, inamu shinda ovana veni, ve he mu livangeke.” (Kol. 1:1, 2; 3:19, 21) Paulus okwa kumaida Ovaefeso ta ti: “Onya keshe, ekeshuko nehandu, efulakato netukano, owii keshe nau kale kokule nanye.” (Ef. 4:31) Natu kulikeni omaukwatya oiimati yomhepo yaKalunga ngaashi  onheni, omwenyo muwa nelipangelo, molwaashi otae ke tu kwafela tu kale twa ngungila nokuli nongeenge tu li meenghalo didjuu. — Gal. 5:22, 23, yelekanifa no-NW.

16. Jesus okwa li a pukulula ngahelipi ovayapostoli vaye, nomolwashike osho shididilikwedi neenghono?

¹⁶ Natu ka taleni koshihopaenenwa shaJesus. Diladila kunghee a li e udite a wililwa po pefimbo louvalelo waxuuninwa oo a lya pamwe novayapostoli vaye. Okwa li e shii kutya oku li poku ka dipawa efyo li udifa omwenyo munyenye noliyahameka. Okwa li yo e shii kutya oku na okukala omudiinini opo a yapulife edina laXe nopo ovanhu va dule oku ka xupifwa. Ndele fimbo tava li ouvalelo oo, mokati kovayapostoli “omwa tukuka eemhata [kutya] olyelye womokati kavo e nokutalwa omunene e dule vakwao.” Jesus ka li e va ngwenyaukila ile e va tangunina. Ndele ponhele yaasho, okwa li e va pukulula pahole. Okwa li e va dimbulukifa kutya ove mu yambidida meenghalo didjuu. Jesus okwa ulika yo elineekelo kutya ovayapostoli vaye otava ka twikila okukala ovadiinini, nonande Satana okwa li te ke va yeleka. Kakele kaasho, okwa li nokuli a ninga ehangano navo. — Luk. 22:24-32.

17. Oshike tashi dulu okukwafela ounona va kale va ngungila?

¹⁷ Ounona navo ova pumbwa okukala va ngungila. Ngeenge ounona ova fiki pomido omulongo nasha, otashi dulika va kale ve udite kutya ovadali vavo inave ve lineekela eshi tave va pe omayele. Ndele dimbuluka kutya ovadali voye ohave lipula shi na sha naave molwaashi ove ku hole. Ngeenge owa pwilikine kuvo wa ngungila nokutambula ko omayele avo, otava ka kala ve ku fimaneka nove ku lineekela. Kungaho, ovadali voye otashi dulika ve ku pe emanguluko la wedwa po moinima yonhumba. Oshi li yo pandunge okukala u na elipangelo. Ombibeli oya ti: “Omushima ta pupula mo onya yaye aishe ndelenee omunaendunge te i lotifa.” — Omayel. 29:11.

18. Ongahelipi ohole hai kwafele omaukwaneumbo a kale haa kundafana nawa?

¹⁸ Ovadali ovaholike nosho yo ounona, inamu sholola ngeenge ihamu kundafana mwa manguluka moukwaneumbo weni ngaashi shi na okukala. Twikileni okuxwepopaleka onghedi yeni yokukundafana nosho yo okweenda moshili. (3 Joh. 4) Eshi tamu ka kala mwa wanenena mounyuni mupe, otamu ka dula okukundafana mu uditafane nawa nopehe na oupyakadi washa. Ndele fimbo twa teelela osho shi ningwe, atusheni otashi dulika tu ninge oinima oyo hatu ke lipa oushima lwanima. Onghee hano, kala ho endelele okuyandja ombili. Kala yo ho dimine po nehalo liwa. Natu kaleni twa “kwatafana mumwe mohole.” (Kol. 2:2) Ohole oi na eenghono. ‘Ohole oi noutalanheni, ohole i nolukeno, ihai kenyanana, ihai dimbulukwa owii ye u ningilwa, ohai tuvike aishe nohai itavele aishe, ohai teelele aishe nohai lididimikile aishe.’ (1 Kor. 13:4-7) Twikileni okukulika ohole, opo nee, otamu ka dula okuxwepopaleka onghedi yeni yokukundafana notamu ka kala mwa hafa moukwaneumbo weni nokutanga Jehova.