Ohamba yOvasiria (Ovaarami) oya li tai kongo omuprofeti waKalunga Elisa i mu kwate po noya li ya uda kutya oku li moshilando shaDotan osho sha li shi na ohotekuma. Opo nee, oya li ya tuma ovakwaita vayo oufiku ve li keenghambe nosho yo momatemba oita va ye koshilando osho. Eshi kwa ka sha, etangakwaita layo ola li la kondeka oshilando osho. — 2 Eeh. 6:13, 14.

Eshi omupiya waElisa a ka penduka ndele ta i pondje, okwa li a mona etangakwaita olo le uya okukwata po omuprofeti oo. Okwa ingida ta ti: “Akutu omwene wange, ohatu ka ninga ngahelipi?” Elisa okwa ti: “Ino tila. Osheshi ava ve li pufye ovahapu, ve dule venya ve li puvo.” Opo nee omuprofeti Elisa okwa ilikana ta ti: “Omwene, pashukifa omesho aye, opo a mone ko.” Ehokololo ola twikila tali ti: “Nomwene okwa pashukifa omesho omupiya waye, ndee ta mono ko, ndele divadiva, omhunda aishe i yadi eenghambe nomatemba omundilo, a dingilila Elisa.” (2 Eeh. 6:15-17) Oshike hatu lihongo moshiningwanima osho nosho yo ikwao imwe oyo ya ningwa mokukalamwenyo kwaElisa?

Elisa okwa li a ngungumana nokuli nonande okwa li a kondekelwa ketangakwaita laSiria molwaashi okwa li e lineekela muJehova nokwa li e wete kutya ote mu amene. Kunena inatu teelela Jehova e tu longele oikumwifilonga, ashike otwe shi didilika mo kutya ota amene oshiwana shaye shi li ongudu. Nafye otwa fa ashike twa dingililwa keenghambe nokomatemba omundilo. Ngeenge otu na eitavelo kutya Jehova ota amene oshiwana shaye nokukala twe mu lineekela alushe, ohatu ka kala twa amenwa note ke tu nangeka noupuna. (Eps. 4:9) Natu ka kundafaneni shi na sha nanghee hatu dulu okumona ouwa moiningwanima ikwao oyo ya ningwa monghalamwenyo yaElisa.

Pomhito imwe, ofimbo Elisa a li ta pulula, omuprofeti Elia okwe uya kuye ndele te mu ekele oshikutu shaye shokombada. Elisa okwa li e shii kutya osho osha hala okutya ngahelipi. Okwa li a ninga oshivilo opo a lekele xe naina ndele ta i a ka ninge omuyakuli waElia. (1 Eeh. 19:16, 19-21) Molwaashi Elisa okwa li a tokola toko okulongela Kalunga ngaashi ta dulu, Jehova okwa kala te mu longifa nolwanima okwa ka ninga omuprofeti ponhele yaElia.

 Elisa okwa kala omuyakuli waElia oule womido 6 lwaapo. Pefimbo opo, Elisa oye a li ha ‘tile omeva komake aElia.’ (2 Eeh. 3:11) Monale, ovanhu kava li hava lifa eefoloko, eembete ile oinima imwe vali, ndele ova li ashike hava li neenyala. Konima yokulya, omupiya okwa li ha tile omwene waye omeva komake opo e likoshe. Onghee hano, oilonga imwe oyo Elisa a li ha longo oya li tai monika ya fa yanafangwa. Ndele nande ongaho, okwa li eshi tala ko shi li oufembanghenda okukala omuyakuli waElia.

Kunena, Ovakriste vahapu navo ohava i moilonga yefimbo li yadi i lili noku lili. Osho ohave shi ningi molwaashi ove na eitavelo nova hala okulongela Jehova ngaashi tava dulu. Oinakuwanifwa imwe ohai va pula va fiye po omaumbo avo va ka longe koBetel, moilonga yokutunga nosho yo imwe vali oyo vamwe tashi dulika ve i tale ko ya fa yanafangwa. Ndele molwaashi Jehova okwa lenga neenghono oilonga ya tya ngaho, kape na Omukriste e na oku i tala ko yanafangwa ile idinifa. — Heb. 6:10.

Ofimbo Kalunga ina ‘kufa po Elia momhepo e mu twale keulu,’ okwa li a tuma omuprofeti oo a ye kuBetel tadi kuGilgal. Elia okwa li a lombwela Elisa a fyaale po, ashike Elisa okwe mu nyamukula ta ti: “Ito fii nge po.” Fimbo ve li mondjila, Elia okwa li vali a ladipika Elisa lwoikando ivali a fyaale po, ndele Elisa okwa li a dika eenyala medu. (2 Eeh. 2:1-6) Elisa okwa li a tokola toko okukala naElia, ngaashi Rut a li ina hala okufiya po Naomi. (Rut 1:8, 16, 17) Omolwashike mbela? Omolwaashi Elisa okwa li a lenga oshinakuwanifwa osho a pewa kuKalunga shokuyakula Elia.

Elisa okwe tu tulila po oshihopaenenwa shiwa. Ngeenge otwa pewa oinakuwanifwa yonhumba mehangano laKalunga, ohatu ka kala twe i lenga neenghono ngeenge otu shii kutya ohatu longele Jehova. Katu na vali apa hatu ka hanga oufembanghenda munene u fike opo. — Eps. 65:5; 84:11.

Ofimbo ve li molweendo, Elia okwa pula Elisa ta ti: “Indile nge ndi ku ningile ouwa washa, fimbo inandi kufwa po puove.” Ngaashi Salomo a li a ninga omido da tetekela, Elisa okwa li a pula a pewe ‘omhepo yomuElia luvali’ opo i mu kwafele a longele Jehova ngaashi ta dulu. (1 Eeh. 3:5, 9; 2 Eeh. 2:9) MuIsrael shonale, okaana kokamati koshiveli okwa li haka pewa oitukulwa ivali yefyuululo. (Deut. 21:15-17) Onghee hano, Elisa okwa li a hala oye a pewe efyuululo lopamhepo laElia. Kakele kaasho, Elisa okwa li a hala okukala e na ouladi ngaashi Elia, oo a li a “kondjela nouladi Omwene.” — 1 Eeh. 19:13, 14.

Elia okwa li e linyenga ngahelipi keindilo lomupiya waye? Okwa ti: “Ope noudjuu okuwanifa eindilo loye. Ndelenee ngenge to mono nhumbi ame handi kufwa po puove, lo otali ka wanifwa. Ndelenee ngenge ito mono nge, lo itali ka wanifwa.” (2 Eeh. 2:10) Enyamukulo laElia oli na omaityo opavali. Lotete, Kalunga oye aeke a li ta dulu okuufa kutya Elisa ota ka pewa osho a indila ile hasho. Oshitivali, opo Elisa a wanifilwe eindilo laye, okwa li e na okukala a tokola toko okukala naElia, kashi na nee mbudi kutya otashi pula shike.

Kalunga okwa li a tala ko ngahelipi eindilo laElisa lokupewa oitukulwa ivali yomhepo yaElia? Ombibeli oya ti: ‘Eshi tava ende tava kundafana, tala, divadiva omatemba omundilo neenghambe domundilo da holoka ndele de va tukaula kumwe. Ndele Elia okwa ya keulu momhepo inene. Elisa okwa li e shi mona.’ * Kungaho, Jehova okwa li a nyamukula eindilo laElisa. Elisa okwa li a mona Elia eshi ta kufwa po puye, a li a pewa oitukulwa ivali yomhepo yaElia nokwa li a ninga omuprofeti ponhele yaElia. — 2 Eeh. 2:11-14.

Elisa okwa li a toola po oshikutu shokombada shaElia osho sha li sha wila pedu ndele te shi djala. Oshikutu osho osha li euliko kutya Elisa okwa ninga omuprofeti waKalunga. Shimwe vali, oshikumwifilonga osho Elisa a ka longa shi na sha nokutukula pokati omeva Omulonga waJordan nasho osha li yo euliko kutya okwa ninga omuprofeti.

Nopehe na omalimbililo, Elisa ka li a dimbwa nandenande osho a li a mona eshi Elia a yelulwa po komhepo. Kakele kaasho, osha li shikumwifi okumona etemba loita lomundilo neenghambe domundilo. Oinima ya tya ngaho oya li euliko kutya Jehova okwa pa Elisa osho a li a indila. Ngeenge Jehova ta nyamukula omailikano etu, ihatu mono emoniko letemba loita la tema omundilo neenghambe domundilo. Ndele ope na oumbangi wa yela oo tau ulike kutya Kalunga ote tu kwafele neenghono daye dinene opo tu dule okulonga ehalo laye. Ngeenge otu wete kutya Jehova ota nangeke noupuna oshitukulwa shehangano laye shokombada yedu,  kungaho otwa fa ashike tu wete etemba linenenene tali ende. — Hes. 10:9-13.

Elisa okwa li e na oimoniwa ihapu oyo ya li ye mu tomha kutya Jehova oku na eenghono dinenenene. Omhepo iyapuki yaKalunga oya li ye mu kwafela a longe oikumwifilonga 16, oyo i dule lwomapa avali oyo ya li ya longwa kuElia. * Oshikando oshitivali osho Elisa a ka mona eenghambe nomatemba oita omundilo osheshi a li a kondekelwa muDotan kovatondi vaye, ngaashi sha hokololwa pehovelo loshitukulwa eshi.

Elisa okwa kala a ngungumana nokuli nonande okwa li a dingililwa kovatondi vaye eshi a li muDotan. Omolwashike mbela? Omolwaashi okwa li e na eitavelo la kola muJehova. Nafye otwa pumbwa eitavelo la tya ngaho. Onghee hano, natu puleni Kalunga e tu pe omhepo iyapuki opo tu kale tu na eitavelo nosho yo omaukwatya makwao oiimati yomhepo. — Luk. 11:13; Gal. 5:22.

Oshiningwanima shopuDotan osha li yo sha pa Elisa etomheno la kola lokukala e lineekela muJehova nomomatangakwaita ovaengeli vaye. Omuprofeti Elisa okwa li a mona kutya Kalunga okwa tuma ovaengeli vaye va kondekele oshilando osho nove mu amene kovatondi vaye. Kalunga okwa li a xupifa Elisa nomupiya waye pashikumwifilonga, eshi a twikifa omesho ovatondi vaye. (2 Eeh. 6:17-23) Ndele pefimbo olo lidjuu, Elisa okwa kala a itavela nokwe lineekela filufilu muJehova, ngaashi e shi ninga nomeenghalo dimwe vali.

Natu kaleni twe lineekela muJehova Kalunga ngaashi Elisa. (Omayel. 3:5, 6) Ngeenge otwa ningi ngaho, ‘Kalunga ote ke tu fila onghenda, note ke tu punika.’ (Eps. 67:2) Oshoshili kutya inatu dingililwa paulelalela komatemba omundilo nokeenghambe. Ashike pefimbo ‘loudjuu munene,’ Jehova ote ke tu amena tu li oumwainafana womounyuni aushe. (Mat. 24:21; Eh. 7:9, 14) Ndele fimbo twa teelela efimbo olo, natu dimbulukeni alushe kutya “Kalunga oye ouhondameno wetu.” — Eps. 62:9.