Mbela ito dimine kutya Jesus oye Omuhongi munenenene oo a li ko nale? Otashi dulika wa hetekela eenghedi dimwe omo a li ha hongo, ngaashi monghedi omo a li ha longifa omapulo nomafaneko. Ndele mbela owa didilika ngoo kutya luhapu okwa kala ha hongo ta yoolola oinima?

Ovanhu vahapu ohava popi tava yoolola oinima. Naave otashi dulika osho ho ningi, naluhapu oho shi ningi nopehe na oku shi didilika mo. Otashi dulika u tye, “Ova ti kutya oiimati aishe oya pya, ndele ei oikukutu ashike natango.” Ile u tye “Okaana oko oka kala ke na eehoni, ndele paife oka mangulukila ovanhu.”

Peemhito da tya ngaho, tete oho popi onghalo yonhumba ile ediladilo, opo nee to popi eyooloko to longifa omautumbulilo ngaashi, ashike, ndele, ponhele yaasho ile mepingafano naasho. Ile tashi dulika u yoolole oinima mokukoleka osho to popi. Ngeenge to popi monghedi ya tya ngaho, oto popi paushitwe notashi dulu okukwafela vamwe va ude ko osho wa hala okutya.

Nonande momalaka ile momaputuko amwe ovanhu ihava popi tava yoolola oinima, natu didilike kutya osha fimana okuninga ngaho. Omolwashike mbela? Omolwaashi mEendjovo daKalunga da nwefwa mo omwa longifwa lwoikando onghedi oyo yokupopya. Luhapu Jesus okwa li ha hongo ta ulike keyooloko olo li li pokati koinima. Diladila kwaashi: ‘Olamba ihai temwa i tulwe koshi yoshimbale, ndelenee okoshikwatelwalamba.’ ‘Inandi uya okudima po omhango, ndelenee oku i wanifa.’ ‘Onye mwe shi uda sha tiwa: Ino nyona ohombo. Ndelenee Ame ohandi mu lombwele: okeshe tuu ou ta tale omukainhu.’ ‘Onye mwa uda eshi sha tiwa: Eisho omeisho, eyoo omeyoo. Ndelenee Ame ohandi mu lombwele: Inamu anya omunawii; ndele ngenge ku na ou te ku denge kolupanda lokolulyo, mu alulila nalikwao.’ — Mat. 5:15, 17, 27, 28, 38, 39.

Momambo amwe Ombibeli namo omwa longifwa onghedi yokuyoolola oinima. Osho otashi dulu oku tu kwafela tu ude ko oitwa ile kutya oshinima shonhumba osha fimana shi dule osho sha tumbulwa tete. Ngeenge ove omudali, diladila kwaashi: “Nanye ooxe, inamu shinda ovana veni noku va handukifa, [ndele, NW] va tekuleni meduliko nomekumaido lOmwene.” (Ef. 6:4) Ngeno omuyapostoli Paulus okwa shangele ashike kutya ooxe (ile ooina) ove na okutekula ovana vavo meduliko lopakalunga, ngeno oku li mondjila. Ashike ediladilo ola yela mo nawa eshi a popya ta yoolola oinima, a ti kutya ‘inava shinda ovana vavo noku va handukifa, ndele nave va tekule meduliko nomekumaido lOmwene.’

Lwanima metukulwa olo tuu olo Paulus okwa shanga ta ti: ‘Ekondjo letu kali fi okukondjifa ombelela nohonde, ndelenee eemhepo dowii mevalelwa.’ (Ef. 6:12) Eyooloko olo otali ku kwafele u mone kutya oto lu olwoodi la kwata moiti. Ito lwifa ovanhu vakweni, ndele eemhepo dowii mevalelwa.

Paulus okwa popya ta yoolola oinima meevelishe dihapu dembo lOmbibeli lOvaefeso. Okudiladila kwaasho, otaku tu kwafele tu ude ko oitwa yaPaulus nokukala tu shii lela kutya oshike tu na okuninga.

Otashi dulika shi kale shihafifa notashi ti sha okukonakona oshimhungu omo mwa ulikwa eyooloko olo li li pokati koinima imwe oyo i li mOvaefeso etukulwa 4 neti 5. Eshi to lesha kombinga yeyooloko keshe, diladila konghalamwenyo yoye mwene. Lipula kutya: ‘Mbela oikala yange oya tya naanaa ngahelipi? Ohandi linyenge ngahelipi monghalo oyo ile mudikwao da yukila oko? Mbela ngeno vamwe otava ka tya ame omunhu a tya ngahelipi ngeenge tashi uya poinima ei ya yoololwa?’ Ngeenge owa didilike kutya eyooloko pokati koinima yonhumba ola eta poluhaela onghalo yonhumba omo u na okuxwepopala, kendabala u ninge ngaho. Eyoloko olo nali ku kwafele u ninge omalunduluko.

Otamu dulu okukundafana oshimhungu pelongelokalunga loukwaneumbo weni. Tete, oilyo aishe youkwaneumbo weni nai leshe oshimhungu. Opo nee, umwe womunye na leshe etumbulo lotete leyooloko olo li li pokati koinima yonhumba, naasho otashi ka kwafela vakwao va kendabale okudimbuluka oshitwa osho sha divilikwa metumbulo la landula ko. Osho otashi ka twala meenghundafana tadi shambula moukwaneumbo di na sha nanghee tau dulu okutula moilonga etumbulo la landula ko. Onghee hano, okukonakona omayooloko oinima a tya ngaho otaku kwafele ovanyasha novakulunhu va kale ve na elihumbato olo tali wapalele Ovakriste moukwaneumbo nokeshe pamwe.

Ngeenge owa kala u shii kutya okuyoolola oinima okwa fimana shi fike peni, oto ka kala ho dimbulula mo noupu oinima ya tya ngaho mOmbibeli, noto ka mona kutya otashi ku kwafele moukalele wopaKriste. Pashihopaenenwa, oto dulu okulombwela omuneumbo kutya: “Ovanhu vahapu ohava ti kutya omunhu keshe oku na omwenyo ihau fi, ashike tala osho eendjovo daKalunga tadi ti.” Ile oto dulu okupula omukonakonimbibeli to ti: “Ovanhu vahapu vopomudingonoko apa ova itavela kutya Kalunga naJesus ove li omunhu umwe, ndele mbela Ombibeli otai ti shike shi na sha naasho? Ove oto ti ngahelipi?”

Peemhito dihapu, Ombibeli oya popya tai yoolola oinima monghedi tai hongo, naasho otashi tu kwafele tu ende mondjila yaKalunga. Ohatu dulu okukala hatu popi hatu yoolola oinima opo tu kwafele vamwe va shiive oshili yOmbibeli.